ᠨᠠ᠊ · ᠳᠤᠯᠭᠠᠷ | | ᠪᠠᠶᠠᠨ ᠪᠠᠷᠭᠤ | | ᠠᠷᠢᠭᠤᠨ ᠲᠩᠷᠢ ᠶᠢᠨ ᠮᠠᠨᠳᠠᠯ ᠤᠨ ᠬᠤᠨ ᠰᠢᠪᠠᠭᠤᠨ ᠠᠴᠠ ᠢᠷᠡᠯᠲᠠᠢ | ᠠᠪᠤᠷᠭᠤ ᠳᠡᠯᠡᠬᠡᠢ ᠶᠢᠨ ᠬᠠᠭᠤᠳᠠᠰᠤᠨ ᠳᠤ ᠴᠢᠩᠭᠢᠰ ᠤᠨ ᠠᠯᠳᠠᠨ ᠤᠷᠤᠭ ᠲᠠᠢ | ᠠᠭᠤᠤ ᠶᠤᠰᠤᠨ ᠤ ᠲᠥᠯᠥᠭᠡ ᠵᠤᠭᠰᠤᠭᠠ ᠪᠠᠷ ᠢᠶᠠᠨ ᠨᠥᠭᠴᠢᠳᠡᠭ | ᠠᠽᠢᠶᠠ ᠶᠢᠨ ᠠᠭᠤᠳᠠᠮ ᠴᠡᠭᠡᠵᠢᠨ ᠳᠤ ᠬᠠᠭᠠᠨ ᠰᠠᠭᠤᠳᠠᠯ ᠲᠠᠢ | ᠪᠠᠶᠠᠨ ᠪᠠᠷᠭᠤ | ᠳᠤᠮᠳᠠᠳᠤ᠂ ᠣᠷᠣᠰ᠂ ᠮᠤᠩᠭᠤᠯ ᠳᠤ ᠠᠰᠬᠭᠰᠠᠨ ᠱᠠᠭᠠᠢ ᠰᠢᠭ᠋ ᠲᠠᠷᠬᠠᠵᠤ | ᠪᠠᠶᠢᠭᠠᠯ ᠳᠠᠯᠠᠢ᠂ ᠪᠤᠶᠢᠷ ᠨᠠᠭᠤᠷ ᠢ ᠵᠡᠭᠦᠥ ᠶᠢᠨ ᠰᠥᠪᠡᠭᠴᠢ ᠰᠢᠭ ᠬᠤᠯᠪᠤᠵᠤ | ᠨᠡᠭᠦᠳᠡᠯ ᠤᠨ ᠤᠷᠳᠤ ᠠᠶᠠᠨ ᠤᠶᠠᠩᠭᠠᠷᠠᠨ ᠤᠶᠠᠩᠭᠠᠷᠠᠵᠤ ᠬᠤᠯᠠᠳᠠᠬᠤ ᠳᠤ | ᠤᠶᠢᠯᠤᠨ ᠪᠤᠰᠤᠭᠰᠠᠨ ᠳᠠᠪᠠᠯᠭᠠᠨ ᠰᠢᠭ᠋ ᠲᠥᠷᠢᠨ ᠲᠥᠷᠢᠭᠰᠡᠨ ᠠᠶᠠᠯᠭᠤ | ᠨᠡᠭᠦᠳᠡᠯᠴᠢᠨ ᠪᠠᠷᠭᠤ | ᠳᠠᠯᠠ᠂ ᠬᠠᠩᠭᠠᠢ᠂ ᠭᠤᠪᠢ ᠶᠢ ᠠᠯᠠᠭᠠᠨ ᠤ ᠵᠢᠷᠤᠭᠠᠰᠤ ᠰᠢᠭ᠋ ᠤᠶᠢᠯᠠᠭᠠᠵᠤ | ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠢᠶᠠᠨ ᠲᠤᠭᠤᠷᠠᠢ ᠶᠢᠨ ᠬᠢᠨᠢ ᠬᠡ ᠪᠠᠷ ᠲᠠᠨᠢᠳᠠᠭ | ᠤᠷᠴᠢᠯᠠᠩ ᠴᠢᠮᠡᠭᠰᠡᠨ ᠤᠷᠭᠤᠮᠠᠯ ᠤᠨ ᠨᠡᠷᠡ ᠶᠢ ᠨᠢ ᠬᠡᠯᠡᠭᠡᠳ ᠭᠠᠷᠭᠠᠴᠢᠬᠠᠳᠠᠭ | ᠤᠩᠭᠤᠨ ᠨᠤᠲᠤᠭ ᠤᠨ ᠪᠤᠭᠤᠷᠤᠯ ᠡᠵᠡᠳ — ᠪᠠᠷᠭᠤ | ᠭᠠᠷᠬᠤ ᠵᠢᠯ ᠤᠨ ᠰᠢᠨᠡ ᠶᠢᠨ ᠨᠢᠭᠡᠨ ᠳᠤ ᠴᠠᠰᠤᠨ ᠰᠥᠯᠳᠡ ᠪᠤᠰᠬᠠᠵᠤ | ᠭᠠᠩ ᠢ ᠬᠤᠷᠠ ᠪᠠᠷ ᠲᠠᠶᠢᠯᠬᠤ ᠪᠠᠷ ᠬᠤᠷᠸᠠ ᠶᠢ ᠵᠥᠭᠡᠯᠡᠯᠡᠵᠤ ᠠᠷᠭᠠᠳᠠᠭᠰᠠᠨ | ᠭᠠᠳᠠᠨᠠ ᠠᠴᠠ ᠤᠷᠤᠭᠰᠠᠨ ᠬᠥᠮᠥᠨ ᠳᠤ ᠬᠠᠳᠠᠭ ᠲᠠᠢ ᠠᠶᠢᠷᠠᠭ ᠪᠠᠷᠢᠵᠤ | ᠭᠠᠷ ᠬᠤᠭᠤᠰᠤᠨ ᠭᠠᠷᠭᠠᠬᠤ ᠶᠢ ᠨᠢᠭᠦᠯ ᠭᠡᠵᠤ ᠪᠤᠳᠤᠳᠠᠭ — ᠪᠠᠷᠭᠤ | ᠪᠠᠶᠢᠷᠢ ᠪᠠᠨ ᠠᠯᠳᠠᠳᠠᠭ ᠥᠭᠡᠢ ᠬᠠᠨᠠᠳᠤ ᠭᠡᠷ ᠨᠢ ᠮᠥᠭᠦᠨ ᠰᠠᠷᠠᠨ ᠰᠢᠭ᠋ ᠲᠡᠷᠭᠡᠯᠰᠢᠵᠤ | ᠪᠠᠷᠢᠴᠠ ᠪᠠᠨ ᠠᠯᠳᠠᠳᠠᠭ ᠥᠭᠡᠢ ᠬᠤᠳᠡ ᠬᠤᠷᠤᠭᠠ ᠨᠢ ᠲᠣᠷᠭᠠᠨ ᠣᠲᠠᠰᠣ ᠰᠢᠭ᠋ ᠵᠢᠭᠳᠡᠷᠡᠵᠤ | ᠲᠡᠷᠭᠡᠳᠡ ᠪᠠᠨ ᠭᠥᠨᠵᠢᠭᠰᠡᠨ ᠲᠡᠷᠭᠡ ᠤᠳ ᠨᠢ ᠭᠠᠨᠵᠤᠭᠠᠨ ᠤ ᠰᠤᠷ ᠰᠢᠭ᠋ ᠡᠪᠯᠡᠷᠡᠵᠤ | ᠲᠡᠷᠲᠡᠭᠡ ᠰᠡᠬᠦᠶᠢᠬᠦ ᠮᠠᠨᠤᠭᠤᠯᠬᠠᠢ ᠠᠴᠠ ᠨᠢ ᠡᠵᠡᠨ ᠤ ᠬᠢᠨᠢ ᠥᠨᠥᠷ ᠰᠡᠩᠭᠢᠨᠡᠬᠦ | ᠴᠢᠨ᠋ᠸᠠ ᠰᠥᠷᠳᠡᠳᠡᠭ ᠪᠠᠷᠭᠤ | ᠲᠡᠯᠮᠡᠭᠦᠨ ᠬᠠᠲᠠᠷᠢᠶᠠ ᠲᠠᠢ ᠬᠥᠯᠥᠭ ᠪᠠᠷ ᠢᠶᠠᠨ ᠶᠢᠷᠲᠢᠨᠴᠤ ᠶᠢᠨ ᠵᠤ ᠶᠢ ᠡᠪᠬᠡᠵᠤ | ᠲᠤᠵᠢᠷᠬᠠᠨ ᠠᠯᠬᠤᠭᠠ ᠲᠠᠢ ᠬᠤᠨᠢᠳ ᠢᠶᠠᠷ ᠢᠶᠠᠨ ᠭᠠᠵᠠᠷ ᠤᠨ ᠰᠤᠳᠠᠰᠤ ᠶᠢ ᠡᠮᠬᠢᠷᠳᠡᠵᠤ | ᠥᠯᠴᠢᠷᠬᠡᠨ ᠵᠠᠩ ᠲᠠᠢ ᠲᠡᠮᠡᠭᠡᠳ ᠤᠨ ᠢᠶᠠᠨ ᠤᠶᠠᠬᠠᠨ ᠪᠤᠶᠢᠯᠠᠭᠠᠨ ᠳᠤ ᠬᠠᠶᠢᠯᠵᠤ | ᠥᠯᠵᠡᠢ ᠵᠠᠩᠭᠢᠶᠠ ᠲᠠᠢ ᠥᠬᠡᠷ ᠤᠨ ᠢᠶᠠᠨ ᠰᠡᠪ ᠥᠭᠡᠢ ᠥᠨᠡᠨᠴᠢ ᠶᠢ ᠥᠪᠴᠢᠭᠰᠡᠨ | ᠲᠩᠷᠢ ᠥᠷᠡᠰ ᠪᠠᠷᠭᠤ | ᠠᠭᠤᠯᠠᠨ ᠳᠤ ᠪᠠᠨ ᠴᠢᠯᠠᠭᠤ ᠨᠡᠮᠡᠬᠦ ᠪᠥᠷᠢ ᠥᠷᠡ ᠳᠡᠭᠡᠨ ᠤᠬᠠᠭᠠᠨ ᠬᠠᠶᠢᠷᠠᠯᠠᠭᠰᠠᠨ | ᠤᠰᠤᠨ ᠳᠤ ᠨᠢ ᠵᠢᠭᠠᠰᠤ ᠴᠤᠯᠭᠢᠬᠤ ᠪᠥᠷᠢ ᠪᠠᠶᠢᠭᠠᠯᠢ ᠶᠤᠰᠤᠨ ᠢ ᠮᠡᠳᠡᠷᠡᠭᠰᠡᠨ | ᠠᠷᠭᠠᠮᠵᠢᠶᠠᠨ ᠤ ᠭᠠᠳᠠᠰᠤ ᠪᠠᠨ ᠰᠤᠭᠤᠯᠬᠤ ᠪᠥᠷᠢ ᠵᠢᠷᠤᠬᠡ ᠪᠠᠨ ᠵᠥᠭᠡᠯᠡᠯᠡᠵᠤ ᠳᠡᠪᠢᠰᠥᠭᠰᠡᠨ | ᠠᠮᠢᠲᠠᠨ ᠠᠷᠢᠶᠠᠲᠠᠨ ᠰᠤᠴᠢᠬᠤ ᠠᠴᠠ ᠠᠷᠭᠠ ᠥᠭᠡᠢ ᠥᠨᠡᠨ ᠬᠢᠴᠢᠶᠡᠭᠰᠡᠨ | ᠪᠠᠶᠢᠭᠠᠯᠢ ᠠᠮᠢ ᠪᠠᠷᠭᠤ | ᠮᠥᠩᠭᠦᠨ ᠠᠶᠠᠭᠠ ᠲᠠᠢ ᠢᠳᠡᠭᠡ ᠨᠢ ᠬᠤᠶᠢᠮᠤᠷ ᠭᠤᠤᠯᠯᠠᠨ ᠰᠠᠭᠠᠲᠠᠳᠠᠭ | ᠮᠥᠩᠭᠦᠨ ᠬᠤᠢ ᠲᠠᠢ ᠬᠢᠲᠤᠭᠠ ᠨᠢ ᠡᠷᠡ ᠶᠢᠨ ᠰᠥᠯᠳᠡ ᠪᠠᠷ ᠭᠢᠯᠠᠯᠵᠠᠳᠠᠭ | ᠮᠥᠩᠭᠦᠨ ᠬᠠᠵᠠᠭᠠᠷ ᠤᠨ ᠠᠮᠠᠭᠠᠢ ᠨᠢ ᠡᠵᠡᠨ ᠢᠶᠠᠨ ᠳᠠᠭᠤᠷᠢᠶᠠᠵᠤ ᠱᠠᠷᠭᠢᠳᠠᠭ | ᠮᠥᠩᠭᠦᠨ ᠡᠮᠡᠭᠡᠯ ᠤᠨ ᠪᠥᠭᠦᠷᠭᠡ ᠨᠢ ᠰᠠᠭᠤᠳᠠᠯ ᠡᠵᠡᠯᠡᠨ ᠬᠠᠩᠬᠠᠶᠢᠳᠠᠭ | ᠴᠤᠯᠤ ᠮᠥᠩᠭᠦᠨ ᠪᠠᠷᠭᠤ | ᠠᠷᠤᠭ ᠰᠠᠪᠠᠷ ᠬᠤᠶᠠᠷ ᠢᠶᠠᠷ ᠢᠶᠠᠨ ᠠᠮᠢᠳᠤᠷᠠᠯ ᠵᠠᠩᠭᠢᠳᠤᠭᠰᠠᠨ ᠥᠬᠢᠨ ᠵᠠᠶᠠᠭᠠ | ᠠᠯᠲᠠ ᠮᠥᠩᠭᠦᠨ ᠵᠠᠰᠠᠯ ᠢᠶᠠᠷ ᠢᠶᠠᠨ ᠭᠤᠶᠤᠵᠤ ᠭᠤᠤᠳᠠᠭᠰᠠᠨ ᠬᠠᠳᠤᠨ ᠲᠩᠷᠢ | ᠲᠤᠭᠤᠢ ᠬᠡ ᠲᠠᠢ ᠲᠤᠷᠭᠠᠨ ᠳᠡᠭᠡᠷᠠ ᠲᠤᠭᠯᠠᠵᠤ ᠥᠰᠥᠭᠰᠡᠨ ᠭᠤᠸᠠ ᠥᠵᠡᠰᠭᠦᠯᠡᠩ | ᠲᠠᠯᠠ ᠠᠭᠤᠵᠢᠠᠭᠤ ᠬᠠᠷᠠᠴᠠ ᠨᠢ ᠴᠡᠴᠡᠭᠡᠰ ᠠᠲᠠᠭᠠᠷᠬᠠᠮᠠ ᠡᠷᠬᠢᠮᠰᠥᠭ ᠪᠠᠷᠭᠤ | ᠡᠷᠳᠡᠨᠢ ᠠᠭᠤᠯᠠ ᠶᠢᠨ ᠪᠠᠷᠠ ᠶᠢ ᠡᠭᠡᠰᠢᠭᠯᠡᠨ ᠳᠠᠭᠤᠯᠠᠬᠤ ᠳᠤ ᠪᠤᠳᠤᠯ ᠠᠯᠳᠠᠷᠠᠭᠤᠯᠳᠠᠭ | ᠡᠷᠡᠮᠡᠭ ᠬᠥᠯᠥᠭ ᠤᠨ ᠳᠠᠪᠬᠢᠶᠠ ᠨᠢ ᠬᠠᠷᠠᠭᠠᠨ ᠤ ᠥᠵᠥᠭᠦᠷ ᠲᠤᠷᠤᠯᠵᠠᠬᠤ ᠳᠤ ᠨᠢᠯᠪᠤᠰᠣ ᠠᠰᠬᠠᠷᠠᠭᠤᠯᠳᠠᠭ | ᠡᠷᠡᠬᠡᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠨᠢ ᠰᠠᠯᠬᠢ ᠰᠥᠯᠵᠢᠨ ᠤᠷᠠᠯᠠᠬᠤ ᠳᠤ ᠳᠡᠯᠡᠬᠡᠢ ᠠᠯᠳᠠᠷᠠᠭᠤᠯᠳᠠᠭ | ᠡᠷᠡ ᠵᠤᠷᠢᠭᠳᠤ ᠪᠥᠬᠡᠴᠢᠳ ᠨᠢ ᠭᠠᠵᠠᠷ ᠬᠤᠳᠤᠯᠵᠠᠲᠠᠯᠠ ᠳᠡᠪᠢᠬᠦ ᠳᠤ ᠬᠤᠷᠸᠠ ᠠᠯᠳᠠᠷᠠᠭᠤᠯᠳᠠᠭ ᠪᠠᠷᠭᠤ | ᠭᠠᠵᠠᠷ ᠳᠡᠯᠡᠬᠡᠢ ᠶᠢᠨ ᠥᠷᠥᠴᠡᠨ ᠳᠤ ᠨᠢ ᠡᠷᠳᠡᠨᠢ ᠪᠤᠯᠠᠭᠳᠠᠴᠠ ᠪᠠᠷ ᠡᠯᠪᠡᠭ ᠪᠤᠯᠬᠤᠷ | ᠭᠠᠯ ᠨᠢ ᠥᠭᠡᠳᠡ ᠪᠠᠨ ᠨᠤᠳᠤᠭ ᠲᠤ ᠪᠠᠨ ᠮᠠᠯ ᠰᠥᠷᠥᠭ ᠢᠶᠠᠷ ᠥᠨᠢᠷ ᠪᠤᠯᠬᠤᠷ | ᠰᠥ ᠪᠠᠷ ᠳᠣᠮᠨᠠᠳᠠᠭ ᠠᠷᠠᠨᠰᠢᠨ ᠲᠠᠢ ᠳᠠᠭᠠᠨ ᠪᠤᠶᠠᠨ ᠵᠠᠶᠠᠭᠠ ᠨᠢ ᠵᠤᠵᠠᠭᠠᠨ ᠪᠤᠯᠬᠤᠷ | ᠰᠥᠯᠳᠡ ᠲᠠᠢ ᠮᠤᠩᠭᠤᠯ ᠤᠨ ᠲᠡᠤᠬᠡᠨ ᠳᠤ ᠤᠬᠠᠭᠠᠨ ᠰᠠᠨᠠᠭᠠ ᠪᠠᠷ ᠪᠠᠶᠠᠨ ᠪᠤᠯᠬᠤᠷ | ᠥᠭᠡᠶᠢᠷᠡᠰᠢ ᠥᠭᠡᠢ ᠪᠠᠶᠠᠨ ᠭᠡᠳᠡᠭ ᠶᠤᠮ | ᠥᠨᠥᠴᠢᠷᠡᠰᠢ ᠥᠭᠡᠢ ᠥᠨᠢᠷ ᠭᠡᠳᠡᠭ ᠶᠤᠮ | ᠪᠠᠷᠭᠤᠳᠠᠢ ᠪᠠᠭᠠᠳᠣᠷ ᠤᠨ ᠬᠤᠶᠢᠴᠢᠰ ᠭᠡᠳᠡᠭ ᠶᠤᠮ | ᠪᠠᠶᠠᠨ ᠪᠠᠷᠭᠤ ᠭᠡᠳᠡᠭ ᠶᠤᠮ ᠡ | |