ᠠᠨᠤ ᠬᠠᠲᠤᠨ ᠬᠢᠬᠡᠳ ᠵᠠᠭᠤᠨ ᠮᠤᠳᠤ ᠶᠢᠨ ᠲᠠᠶᠢᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/7/12
      ᠠᠨᠤ ᠪᠤᠯ ᠰᠡᠩᠭᠡ ᠬᠤᠩ ᠲᠠᠶᠢᠵᠢ ᠶᠢᠨ ᠬᠠᠳᠤᠨ᠃ ᠠᠨᠤ ︵ᠪᠠᠰᠠ ᠠᠨᠤ ᠳ᠋ᠠᠷ᠎ᠠ ᠭᠡᠳᠡᠭ︶ ᠪᠠ ᠰᠠᠩᠭᠡ ᠬᠤᠩ ᠲᠠᠶᠢᠵᠢ ᠠᠴᠠ ᠴᠠᠸᠠᠩᠷᠠᠪᠳᠠᠨ᠂ ᠰᠤᠨᠠᠮᠷᠠᠪᠳᠠᠨ᠂ ᠲᠠᠨᠵᠢᠨ ᠭᠡᠭᠦ ᠭᠤᠷᠪᠠᠨ ᠬᠦᠪᠡᠭᠦᠨ ᠲᠠᠢ ᠪᠠᠶᠢᠵᠠᠢ᠃ ᠰᠡᠩᠬᠡ ᠬᠤᠩ ᠲᠠᠶᠢᠵᠢ ᠬᠤᠤᠷᠯᠠᠭᠳᠠᠭᠰᠠᠨ ᠤ ᠬᠤᠶᠢᠨ᠎ᠠ᠂ ᠡᠭᠡ ᠶᠤᠮ ︵ᠶᠦᠮᠦ︶ ᠠᠭᠠᠰ ᠬᠠᠳᠤᠨ ᠤ ᠰᠠᠨᠠᠭᠤᠯᠭ᠎ᠠ ᠪᠠᠷ ᠯᠠᠮᠠ ᠪᠠᠶᠢᠭᠰᠠᠨ ᠭᠠᠯᠳᠠᠨ ᠬᠠᠷ᠎ᠠ ᠪᠤᠯᠵᠤ ᠲᠦᠪᠡᠳ ᠤᠷᠤᠨ ᠠᠴᠠ ᠵᠡᠬᠦᠨᠭᠠᠷ ᠲᠠᠭᠠᠨ ᠬᠠᠷᠢᠵᠦ ᠢᠷᠡᠭᠡᠳ᠂ ᠠᠬ᠎ᠠ ᠰᠡᠩᠬᠡ ᠶᠢᠨ ᠴᠤᠯᠠ ᠭᠡᠷᠭᠡᠮ ᠢ ᠵᠠᠯᠭᠠᠮᠵᠢᠯᠠᠵᠤ᠂ ᠴᠤᠷᠤᠰ ᠠᠶᠢᠮᠠᠭ ᠤᠨ ᠬᠤᠩ ᠲᠠᠶᠢᠵᠢ ᠪᠤᠯᠵᠠᠢ᠃ ᠮᠦᠨ ᠡᠭᠡ ᠶᠢᠨ ᠢᠶᠠᠨ ᠰᠠᠨᠠᠯ ᠢᠶᠠᠷ ᠠᠬ᠎ᠠ ᠰᠡᠩᠬᠡ ᠶᠢᠨ ᠭᠡᠷᠭᠡᠢ ᠠᠨᠤ ᠶᠢ ᠬᠠᠳᠤᠨ ᠢᠶᠠᠨ ᠪᠤᠯᠭᠠᠵᠤ ᠠᠪᠴᠠᠢ᠃ ᠠᠨᠤ ᠬᠠᠳᠤᠨ ᠭᠠᠯᠳᠠᠨ ᠲᠠᠢ ᠵᠠᠯᠭᠠᠨ ᠰᠠᠭᠤᠭᠠᠳ ᠰᠧᠪᠳᠡᠨᠪᠠᠯᠵᠦᠦᠷ ᠭᠡᠳᠡᠭ ᠨᠢᠭᠡ ᠬᠦᠦ᠂ ᠵᠦᠩᠴᠢᠬᠠᠢ ︵ᠵᠤᠨᠴᠢᠬᠠᠢ︶ ᠭᠡᠳᠡᠭ ᠨᠢᠭᠡ ᠦᠬᠢᠨ ᠲᠠᠢ ᠪᠤᠯᠵᠠᠢ᠃ ᠭᠠᠯᠳᠠᠨ ᠤᠷᠤᠭ ᠭᠡᠷ ᠪᠦᠯᠢ ᠶᠢᠨ ᠬᠠᠷᠢᠴᠠᠭ᠎ᠠ ᠪᠠᠨ ᠰᠠᠶᠢᠨ ᠰᠠᠶᠢᠬᠠᠨ ᠢᠶᠠᠷ ᠰᠢᠢᠳᠪᠤᠷᠢᠯᠡᠬᠦ ᠪᠠᠷ ᠴᠢᠷᠮᠠᠶᠢᠵᠦ᠂ ᠠᠬ᠎ᠠ ᠰᠡᠩᠭᠡ ᠶᠢᠨ ᠭᠤᠷᠪᠠᠨ ᠬᠦᠪᠡᠬᠦᠨ ᠢ ᠲᠡᠷᠭᠡᠳᠡ ᠪᠠᠨ ᠲᠡᠵᠢᠭᠡᠨ ᠬᠦᠮᠦᠵᠢᠬᠦᠯᠦᠭᠰᠡᠨ ᠳᠤ ᠰᠡᠩᠭᠡ ᠶᠢᠨ ᠬᠠᠭᠤᠴᠢᠨ ᠲᠦᠰᠢᠮᠡᠯ ᠵᠢᠴᠢ ᠬᠠᠷᠢᠶᠠᠳᠤ ᠨᠠᠷ ᠤᠨ ᠬᠦᠷᠢᠶᠡᠯᠡᠯ ᠪᠠ ᠲᠡᠮᠵᠢᠯᠭᠡ ᠶᠢ ᠶᠡᠭᠡᠪᠡᠷ ᠤᠯᠵᠠᠢ᠃ ᠭᠠᠯᠳᠠᠨ ᠰᠢᠷ᠎ᠠ ᠪᠠᠨ ᠰᠢᠪᠳᠤᠯᠵᠤ ᠬᠠᠷ᠎ᠠ ᠪᠤᠯᠬᠤ ᠦᠶ᠎ᠡ ᠳᠤ ᠲᠠᠪᠤᠳᠤᠭᠠᠷ ᠲᠠᠯᠠᠢ ᠯᠠᠮᠠ ᠠᠴᠠ ᠭᠠᠯᠳᠠᠨ ᠤ ᠨᠡᠷ᠎ᠡ ᠬᠦᠨᠳᠦ ᠪᠡ ᠪᠠᠶᠢᠷᠢ ᠰᠠᠭᠤᠷᠢ ᠶᠢ ᠬᠠᠷᠠᠭᠠᠯᠵᠠᠨ ︽ ᠪᠤᠱᠤᠭᠳᠤ︾ ᠴᠤᠯᠠ ᠰᠤᠶᠤᠷᠬᠠᠪᠠ᠃ ᠵᠡᠬᠦᠨᠭᠠᠷ ᠦᠢᠷᠡᠳ ᠤᠨ ᠬᠢᠨ ᠲᠡᠭᠦᠨ ᠢ ᠲᠠᠯᠠᠢ ᠯᠠᠮᠠ᠂ ᠪᠠᠨᠴᠢᠨ ᠡᠷᠳᠡᠨᠢ ᠶᠢᠨ ᠲᠤᠰᠬᠠᠢ ᠱᠠᠪᠢ ᠪᠠᠷ ᠦᠵᠡᠵᠦ ᠪᠢᠰᠢᠷᠠᠨ ᠬᠦᠨᠳᠦᠳᠭᠡᠳᠡᠭ ᠢᠶᠠᠷ ᠦᠯᠦ ᠪᠠᠷᠠᠨ ᠭᠠᠯᠳᠠᠨ ᠤ ᠦᠭᠡ ᠦᠢᠯᠡ ᠨᠢ ᠲᠠᠯᠠᠢ ᠯᠠᠮᠠ ᠶᠢᠨ ᠵᠢᠭᠠᠪᠤᠷᠢ ᠶᠢ ᠲᠦᠯᠦᠭᠡᠯᠡᠵᠦ ᠪᠠᠶᠢᠬᠤ ᠪᠠᠷ ᠢᠳᠡᠭᠡᠳᠡᠭ ᠪᠠᠶᠢᠭᠰᠠᠨ ᠠᠴᠠ ᠪᠤᠰᠤᠳ ᠠᠶᠢᠮᠠᠭ ᠤᠨ ᠤᠯᠠᠨ ᠲᠠᠶᠢᠵᠢ ᠨᠠᠷ ᠴᠣ᠋ ᠬᠦᠷᠢᠶᠡᠯᠡᠨ ᠢᠷᠡᠵᠢᠭᠡᠨ  ᠲᠠᠭᠠᠨ ᠲᠦᠰᠢᠯᠴᠡᠵᠡᠢ᠃ ᠲᠡᠶᠢᠮᠦ ᠠᠴᠠ ᠭᠠᠯᠳᠠᠨ ᠪᠤᠱᠤᠭᠳᠤ ᠤᠨᠴᠠᠭᠠᠢ ᠪᠠᠶᠢᠷᠢ ᠰᠠᠭᠤᠷᠢ᠂ ᠨᠡᠷ᠎ᠡ ᠨᠦᠯᠦᠬᠡ ᠪᠠᠨ ᠠᠰᠢᠭᠯᠠᠨ ᠬᠦᠴᠦᠨ ᠢᠶᠠᠨ ᠦᠷᠭᠡᠳᠭᠡᠨ᠂ ᠤᠯᠤᠰ ᠲᠦᠷᠦ ᠶᠢᠨ ᠲᠠᠯ᠎ᠠ ᠪᠠᠷ ᠴᠣ᠋ ᠮᠠᠰᠢ ᠦᠭᠡᠳᠡ ᠲᠠᠢ ᠪᠤᠯᠵᠤ ᠪᠤᠵᠠᠭᠠᠶᠢᠷᠠᠵᠠᠢ᠃ ᠢᠯᠠᠩᠭᠤᠶ᠎ᠠ ᠠᠨᠤ ᠬᠠᠳᠤᠨ ᠪᠤᠯ ᠴᠢᠭᠤᠯᠭᠠᠨ ᠬᠠᠨ ᠸᠴᠢᠷ ᠴᠡᠴᠡᠨ ᠤ ᠤᠮᠪᠤᠯᠤ ᠬᠡᠤᠬᠡᠨ ᠲᠤᠯᠠ ᠬᠤᠱᠤᠳ ᠠᠶᠢᠮᠠᠭ ᠲᠠᠢ ᠨᠦᠭᠦᠷᠰᠡᠭ ᠬᠠᠷᠢᠴᠠᠭ᠎ᠠ ᠶᠢ ᠪᠠᠳᠤᠯᠠᠵᠤ ᠴᠢᠳᠠᠭᠰᠠᠨ ᠪᠠᠶᠢᠯ᠎ᠠ᠃      ᠡᠷᠳᠡᠨ ᠤ ᠤᠪᠤᠭ ᠠᠶᠢᠮᠠᠭ ᠤᠨ ᠤᠷᠤᠭ ᠬᠤᠯᠪᠤᠭᠠᠨ ᠪᠤᠯ ᠬᠠᠷᠢᠯᠴᠠᠨ ᠲᠦᠰᠢᠯᠴᠡᠬᠦ ᠬᠦᠴᠦᠨ ᠤ ᠡᠬᠢ ᠰᠤᠷᠪᠤᠯᠵᠢ ᠪᠠᠶᠢᠵᠠᠢ᠃ ᠤᠪᠤᠭ ᠤᠨ ᠭᠠᠳᠠᠨ᠎ᠠ ᠤᠷᠤᠭᠯᠠᠬᠤ ᠨᠢ ᠴᠢᠰᠤᠨ ᠲᠦᠷᠦᠯ ᠤᠨ ᠬᠤᠭᠤᠷᠤᠨᠳᠤᠬᠢ ᠤᠷᠤᠭ ᠤᠨ ᠬᠠᠷᠢᠴᠠᠭ᠎ᠠ ᠶᠢ ᠴᠠᠭᠠᠵᠠᠯᠠᠬᠤ ᠮᠦᠷᠳᠡᠭᠡᠨ ᠪᠤᠰᠤᠳ ᠠᠶᠢᠮᠠᠭ ᠡᠰᠡᠭᠦᠯ᠎ᠡ ᠲᠠᠶᠢᠰᠤᠩᠨᠠᠭᠴᠢ ᠡᠳᠡᠭᠡᠳ ᠲᠠᠢ ᠪᠠᠨ ᠡᠶᠡᠯᠳᠦᠨ ᠤᠷᠤᠭ ᠬᠤᠯᠪᠤᠬᠤ ᠨᠢ ᠤᠪᠤᠭ ᠤᠨ ᠵᠤᠬᠢᠶᠠᠨ ᠪᠠᠶᠢᠭᠤᠯᠬᠤ ᠬᠦᠴᠦᠨ ᠤ ᠪᠦᠷᠢᠯᠳᠤᠯ᠂ ᠵᠢᠴᠢ ᠬᠦᠴᠦᠷᠭᠡᠭ ᠠᠶᠢᠮᠠᠭ ᠲᠠᠢ ᠤᠷᠤᠭ ᠬᠤᠯᠪᠤᠭᠠᠯᠠᠬᠤ ᠪᠠᠷ ᠲᠠᠮᠵᠢᠨ ᠬᠦᠴᠦᠨ ᠢᠶᠠᠨ ᠦᠷᠭᠡᠳᠭᠡᠨ᠂ ᠲᠤᠰ ᠲᠤᠰ ᠤᠨ ᠠᠰᠢᠭ ᠲᠤᠰᠠ ᠪᠠᠨ ᠤᠷᠭᠠᠨᠢᠭ ᠤᠶᠠᠯᠳᠤᠭᠤᠯᠤᠨ ᠨᠡᠩ ᠰᠠᠶᠢᠨ ᠬᠠᠮᠠᠭᠠᠯᠠᠵᠤ ᠴᠢᠳᠠᠬᠤ ᠪᠣᠯᠣᠨ᠎ᠠ᠃ ᠭᠡᠬᠦ ᠳᠡᠭᠡᠨ ᠡᠨᠡᠬᠦ ᠠᠷᠭ᠎ᠠ ᠬᠡᠯᠪᠡᠷᠢ ᠨᠢ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ ᠲᠤᠬᠠᠢ ᠶᠢᠨ ᠨᠠᠶᠢᠭᠡᠮ  ᠠᠬᠤᠢ ᠶᠢᠨ ᠪᠦᠳᠦᠭᠡᠭᠳᠡᠭᠦᠨ ᠪᠠᠶᠢᠭᠰᠠᠨ ᠪᠢᠯᠠ᠃      ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠳᠠᠭᠤᠵᠢᠯᠳᠠᠢ ᠴᠢᠷᠮᠠᠶᠢᠯᠭ᠎ᠠ ᠪᠠᠷ 1678 ᠤᠨ ᠳᠤ ᠵᠡᠬᠦᠨᠭᠠᠷ ᠬᠠᠭᠠᠨᠳᠤ ᠤᠯᠤᠰ ᠢ ᠪᠠᠶᠢᠭᠤᠯᠤᠭᠰᠠᠨ ᠶᠤᠮ᠃ ᠨᠤᠳᠤᠭ ᠲᠡᠪᠢᠰᠭᠡᠷ ᠢᠶᠠᠨ ᠦᠷᠭᠡᠳᠭᠡᠬᠦ ᠪᠠᠷ ᠲᠡᠳᠡ ᠬᠠᠯᠬ᠎ᠠ ᠪᠠ ᠴᠢᠩ ᠤᠯᠤᠰ ᠲᠠᠢ ᠲᠠᠶᠢᠨ ᠵᠠᠷᠯᠠᠵᠠᠢ᠃ ᠵᠢᠯ ᠲᠠᠷᠠᠭᠠᠯᠠᠨ ᠪᠠᠶᠢᠯᠳᠤᠭᠠᠨ ᠦᠷᠭᠦᠯᠵᠢᠯᠡᠬᠦ ᠳᠤ ᠠᠨᠤ ᠬᠠᠳᠤᠨ ᠦᠷᠭᠦᠯᠵᠢ ᠬᠤᠶᠠᠭ ᠲᠤᠭᠤᠯᠭ᠎ᠠ ᠬᠡᠲᠡᠷᠴᠦ ᠂ ᠬᠤᠷᠤᠮᠰᠠᠭ᠎ᠠ ᠰᠠᠭᠠᠳᠠᠭ ᠠᠭᠰᠠᠭᠠᠨ᠂ ᠬᠤᠷᠳᠤᠨ ᠬᠦᠯᠦᠭ ᠲᠤ ᠮᠤᠷᠳᠠᠨ᠂ ᠲᠠᠶᠢᠨ ᠪᠠᠶᠢᠯᠳᠤᠭᠠᠨ ᠳᠤ ᠭᠠᠪᠰᠢᠭᠠᠶᠢᠯᠠᠨ ᠤᠷᠤᠯᠴᠠᠬᠤ ᠪᠤᠶᠤ ᠠᠷᠤ ᠬᠦᠷᠢᠶ᠎ᠡ ᠰᠠᠭᠤᠷᠢ ᠪᠠᠬᠢᠯᠡᠯᠳᠡ ᠶᠢ ᠰᠠᠬᠢᠨ ᠬᠠᠮᠠᠭᠠᠯᠠᠬᠤ ᠬᠦᠨᠳᠦ ᠡᠭᠦᠷᠭᠡ ᠶᠢ ᠬᠦᠢᠴᠡᠳᠭᠡᠵᠦ ᠶᠠᠪᠤᠵᠠᠢ᠃ ᠲᠡᠷᠡᠬᠦ ᠴᠠᠭ ᠦᠶ᠎ᠡ ᠤᠷᠴᠢᠨ ᠠᠬᠤᠢ ᠨᠢ ᠠᠨᠤ ᠬᠠᠳᠤᠨ ᠢ ᠢᠷᠯᠡᠨ ᠱᠤᠭᠤᠵᠤ᠂ ᠬᠡᠳᠦᠨ ᠠᠷᠪᠠᠨ ᠵᠢᠯ ᠤᠨ ᠲᠠᠶᠢᠨ ᠪᠠᠶᠢᠯᠳᠤᠭᠠᠨ ᠢᠶᠠᠷ ᠲᠠᠪᠳᠠᠭᠰᠠᠭᠠᠷ ᠪᠠᠶᠢᠵᠦ ᠨᠢᠭᠡᠨ ᠨᠤᠭᠤᠷᠠᠰᠢ ᠦᠭᠡᠢ ᠬᠠᠳᠠᠨ ᠲᠠᠰᠪᠤᠷᠢᠳᠠᠢ ᠡᠮᠡᠭᠳᠡᠢ ᠪᠠᠭᠠᠳᠤᠷ ᠪᠤᠯᠭᠠᠨ ᠰᠢᠯᠭᠠᠷᠠᠭᠤᠯᠵᠠᠢ᠃ ᠵᠡᠬᠦᠨᠭᠠᠷ ᠬᠠᠭᠠᠨᠳᠤ ᠤᠯᠤᠰ ᠢ ᠴᠤᠭᠴᠠᠯᠠᠨ ᠪᠠᠶᠢᠭᠤᠯᠬᠤ ᠪᠠ ᠨᠤᠳᠤᠭ ᠲᠡᠪᠢᠰᠭᠡᠷ ᠤᠨ ᠦᠷᠭᠡᠳᠭᠡᠬᠦ ᠲᠠᠶᠢᠨ ᠳᠤ ᠤᠶᠤᠨ ᠤᠬᠠᠭᠠᠨ᠂ ᠬᠦᠴᠦ ᠴᠢᠳᠠᠯ᠂ ᠠᠮᠢ ᠨᠠᠰᠤ ᠠᠯᠢᠪᠠ  ᠪᠠᠨ ᠬᠠᠷᠠᠮ ᠦᠭᠡᠢ ᠡᠷᠭᠦᠭᠰᠡᠨ ᠠᠨᠤ ᠬᠠᠳᠤᠨ᠂ ᠵᠡᠬᠦᠨᠭᠠᠷ ᠬᠠᠭᠠᠨᠳᠤ ᠤᠯᠤᠰ ᠲᠠᠭᠠᠨ ᠲᠦᠢᠯ ᠤᠨ ᠶᠡᠭᠡ ᠢᠳᠡᠭᠡᠯ ᠬᠦᠨᠳᠦ ᠲᠠᠢ ᠶᠤᠮᠰᠠᠨ᠃ ᠬᠠᠮᠤᠭ ᠮᠤᠩᠭᠤᠯ ᠤᠨ ᠲᠡᠤᠬᠡᠨ ᠳᠤ ᠴᠤ ᠮᠠᠰᠢ ᠨᠦᠯᠦᠭᠡ ᠶᠡᠭᠡᠳᠡᠢ ᠪᠠᠭᠠᠳᠤᠷ ᠪᠦᠰᠡᠭᠦᠢ ᠶᠤᠮᠰᠠᠨ᠃      ᠠᠨᠤ ᠪᠤᠯ ᠬᠤᠱᠤᠳ ᠠᠶᠢᠮᠠᠭ ᠤᠨ ᠸᠴᠢᠷᠳᠤ ᠴᠡᠴᠡᠨ ᠬᠠᠨ ᠤ ᠬᠦᠪᠡᠬᠦᠨ ᠭᠠᠯᠳᠠᠮ᠎ᠠ ︵ᠭᠠᠯᠳᠠᠮᠪᠠ︶ ᠶᠢᠨ ᠶᠡᠭᠡ ᠦᠬᠢᠨ᠃ ᠰᠡᠴᠡᠨ ᠰᠡᠷᠭᠦᠯᠡᠩ ᠠᠨᠤ ᠬᠠᠷᠬᠠᠨ ᠪᠠᠭ᠎ᠠ ᠠᠴᠠ ᠪᠠᠨ ᠬᠠᠷᠪᠤᠬᠤ ᠨᠠᠮᠨᠠᠬᠤ ᠶᠢ ᠰᠤᠷᠴᠣ᠂ ᠵᠠᠷ ᠵᠠᠪᠰᠡᠭ ᠤᠨ ᠡᠷᠳᠡᠮ ᠢ ᠴᠢᠳᠠᠮᠠᠭᠠᠢ ᠡᠵᠡᠮᠰᠢᠵᠡᠢ᠃ ᠭᠠᠯᠳᠠᠮ᠎ᠠ ᠳᠤ ᠪᠠᠰᠠ ᠨᠢᠭᠡᠨ ᠪᠠᠭ᠎ᠠ ᠦᠬᠢᠨ ᠪᠤᠢ᠃ ᠨᠠᠷ᠎ᠠ ᠨᠢ ᠠᠬᠠᠢ ᠭᠡᠳᠡᠭ᠃ ᠬᠤᠱᠤᠳ ᠠᠶᠢᠮᠠᠭ ᠪᠤᠯᠤᠨ ᠴᠤᠷᠤᠰ ᠠᠶᠢᠮᠠᠭ ᠡᠷᠳᠡᠨ ᠠᠴᠠ ᠤᠷᠤᠭ ᠤᠨ ᠬᠠᠷᠢᠴᠠᠭ᠎ᠠ ᠲᠠᠢ ᠪᠠᠶᠢᠭᠰᠠᠨ ᠶᠤᠮ᠃ ᠭᠠᠯᠳᠠᠮ᠎ᠠ ᠠᠮᠢᠳᠤ ᠰᠠᠷᠠᠭᠦᠨ ᠪᠠᠶᠢᠬᠤ ᠳᠤ ᠶᠡᠭᠡ ᠦᠬᠢᠨ ᠠᠨᠤ ᠳ᠋ᠠᠷ᠎ᠠ ᠶᠢ ᠰᠡᠩᠬᠡ ᠬᠤᠩ ᠲᠠᠶᠢᠵᠢ ᠳᠤ ᠤᠷᠤᠭᠯᠠᠭᠤᠯᠤᠭᠠᠳ᠂ ᠬᠤᠶᠠᠳᠤᠭᠠᠷ ᠦᠬᠢᠨ ᠠᠬᠠᠢ ᠶᠢ ᠬᠤᠵᠢᠮ ᠤᠨ ᠡᠳᠦᠷ ᠴᠡᠸᠠᠩᠷᠡᠪᠳᠡᠨ ᠳᠤ ᠬᠤᠯᠪᠤᠶ᠎ᠠ ᠭᠡᠵᠦ ᠬᠡᠯᠡᠯᠴᠡᠵᠦ ᠲᠤᠭᠳᠠᠵᠠᠢ᠃      1679 ᠤᠨ ᠳᠤ ᠬᠤᠱᠤᠳ ᠠᠶᠢᠮᠠᠭ ᠤᠨ ᠬᠢᠨ ᠤᠤᠯ ᠤᠨ ᠬᠡᠯᠡᠯᠴᠡᠭᠰᠡᠨ ᠢᠶᠠᠨ ᠵᠢᠷᠤᠮᠯᠠᠵᠤ᠂ ᠠᠬᠠᠢ ᠬᠡᠤᠬᠡᠨ ᠢ ᠴᠡᠸᠠᠩᠷᠡᠪᠳᠡᠨ ᠳᠤ ᠬᠦᠷᠭᠡᠵᠦ ᠤᠴᠢᠬᠤ ᠪᠠᠷ ᠪᠤᠯᠵᠠᠢ᠃ ᠭᠡᠳᠡᠯ᠎ᠡ ᠪᠤᠱᠤᠭᠳᠤ ᠬᠠᠭᠠᠨ ᠨᠢ ᠠᠬᠠᠢ ᠬᠡᠤᠬᠡᠨ ᠢ ᠴᠡᠸᠠᠩᠷᠡᠪᠳᠡᠨ ᠲᠠᠢ ᠤᠷᠤᠭᠯᠠᠭᠤᠯᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠦᠪᠡᠷ ᠢᠶᠠᠨ ᠬᠠᠳᠤᠨ ᠪᠤᠯᠭᠠᠵᠤ ᠠᠪᠴᠠᠢ᠃ ᠡᠨᠡ ᠶᠠᠪᠤᠳᠠᠯ ᠨᠢ ᠴᠡᠸᠠᠩᠷᠡᠪᠳᠡᠨ ᠪᠡ ᠲᠡᠭᠦᠨ ᠤ ᠲᠡᠭᠦᠦ ᠰᠤᠨᠠᠮᠷᠠᠪᠳᠠᠨ ᠨᠡᠷ ᠤᠨ ᠲᠤᠷ᠎ᠠ ᠦᠭᠡᠶᠢᠴᠡᠯ ᠢ ᠬᠦᠷᠭᠡᠪᠡ᠃ ᠢᠯᠠᠩᠭᠤᠶ᠎ᠠ ᠰᠤᠨᠠᠮᠷᠠᠪᠳᠠᠨ ᠲᠤᠰᠭᠠᠷᠯᠠᠨ ᠭᠠᠷᠴᠣ ᠡᠴᠢᠭᠡ ᠶᠢᠨ ᠢᠶᠠᠨ ᠰᠠᠭᠤᠷᠢᠨ ᠢ ᠰᠡᠷᠭᠦᠭᠡᠬᠦ ᠭᠡᠵᠦ ᠬᠢᠯᠢᠩᠨᠡᠨ ᠪᠠᠶᠢᠵᠠᠢ᠃ ᠠᠪᠠᠭ᠎ᠠ ᠬᠢᠬᠡᠳ ᠠᠴᠢ ᠬᠦᠪᠡᠬᠦᠳ ᠤᠨ ᠬᠤᠭᠤᠷᠤᠨᠳᠤ ᠵᠦᠷᠢᠴᠡᠯ ᠡᠭᠦᠰᠬᠦ ᠠᠴᠠ ᠪᠤᠯᠭᠤᠮᠵᠢᠯᠠᠵᠤ᠂ ᠴᠡᠴᠡᠨ ᠮᠡᠷᠭᠡᠨ ᠠᠨᠤ ᠬᠠᠳᠤᠨ ᠲᠠᠷᠤᠢ  ᠳᠤᠨᠢ ᠬᠦᠳᠡᠯᠦᠨ᠂ ᠦᠭᠡᠷ᠎ᠡ ᠨᠢᠭᠡᠨ ᠲᠠᠶᠢᠵᠢ ᠶᠢᠨ ᠬᠡᠤᠬᠡᠨ ᠢ ᠴᠡᠸᠠᠩᠷᠡᠪᠳᠡᠨ ᠳᠤ ᠬᠡᠯᠡᠯᠴᠡᠨ ᠦᠭᠴᠦ᠂ ᠤᠷᠤᠭ ᠤᠨ ᠶᠠᠪᠤᠳᠠᠯ ᠢ ᠨᠢ ᠪᠦᠳᠦᠭᠡᠬᠦ ᠪᠠᠷ ᠲᠦᠪᠡᠳ ᠤᠨ ᠯᠾᠠᠰᠠ ᠳᠤ ᠨᠢᠭᠡᠨ ᠴᠢᠳᠠᠪᠤᠷᠢ ᠲᠠᠢ ᠡᠯᠴᠢ ᠶᠢ ᠢᠯᠡᠭᠡᠨ ᠬᠦᠨᠳᠦ ᠪᠡᠯᠡᠭ ᠰᠠᠯᠳᠠ ᠬᠦᠷᠭᠡᠪᠡ᠃ ᠲᠡᠭᠡᠭᠡᠳ ᠫᠤᠩᠰᠤᠭ ᠲᠠᠯᠠᠢ ᠬᠠᠨ ᠤ ᠦᠬᠢᠨ ᠢ ᠴᠡᠸᠠᠩᠷᠡᠪᠳᠡᠨ ᠳᠤ ᠬᠡᠯᠡᠯᠴᠡᠵᠦ ᠲᠤᠬᠢᠷᠠᠭᠠᠳ᠂ ᠭᠡᠷᠡᠭ ᠶᠠᠪᠤᠳᠠᠯ ᠢ ᠨᠠᠮᠳᠠᠭᠠᠨ ᠡᠶ᠎ᠡ ᠡᠪ ᠢ ᠵᠤᠬᠢᠴᠡᠭᠤᠯᠪᠠ᠃ 1686 ᠤᠨ ᠤ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ 9 ᠰᠠᠷ᠎ᠠ ᠳᠤ ᠠᠨᠤ ᠬᠠᠳᠤᠨ ᠦᠪᠡᠷ ᠤᠨ ᠪᠠᠶ᠎ᠠ ᠪᠠᠷ ᠮᠢᠩᠭ᠎ᠠ ᠭᠠᠷᠤᠢ ᠴᠡᠷᠢᠭ ᠲᠠᠭᠠᠭᠠᠤᠯᠤᠨ ᠪᠤᠯᠠᠩᠬᠢᠷ ᠤᠨ ᠭᠤᠤᠯ ᠢᠶᠠᠷ ᠲᠠᠭᠠᠷᠢᠵᠦ ᠬᠦᠬᠡᠨᠠᠭᠤᠷ ᠲᠦᠪᠡᠳ ᠠᠴᠠ ᠫᠤᠩᠰᠤᠭ ᠲᠠᠯᠠᠢ ᠬᠠᠨ ᠤ ᠦᠬᠢᠨ ᠢ ᠪᠠᠭᠤᠯᠭᠠᠨ ᠠᠪᠴᠢᠷᠠᠵᠤ᠂ ᠴᠡᠸᠠᠩᠷᠡᠪᠳᠡᠨ ᠤ ᠤᠷᠤᠭ ᠤᠨ ᠶᠠᠪᠤᠳᠠᠯ ᠢ ᠠᠮᠵᠢᠯᠳᠠ ᠲᠠᠢ ᠪᠦᠳᠦᠭᠡᠭᠰᠡᠨ ᠶᠤᠮ᠃      ᠡᠮᠡᠭᠳᠡᠢ ᠬᠦᠮᠦᠨ ᠤ ᠰᠤᠷᠭᠤᠭ ᠮᠡᠳᠡᠷᠡᠮᠵᠢ ᠪᠠᠷ ᠡᠯ᠎ᠡ ᠲᠠᠯ᠎ᠠ ᠶᠢ ᠬᠠᠷᠠᠭᠠᠯᠵᠠᠵᠤ ᠴᠢᠳᠠᠭᠠᠳ᠂ ᠡᠭᠡ ᠬᠦᠮᠦᠨ ᠤ ᠬᠠᠶᠢᠷ᠎ᠠ ᠬᠠᠯᠠᠮᠵᠢᠯᠠᠯ ᠢᠶᠠᠷ ᠴᠡᠸᠠᠩᠷᠡᠪᠳᠡᠨ ᠤ ᠤᠷᠤᠭ ᠤᠨ ᠶᠠᠪᠤᠳᠠᠯ ᠢ ᠠᠮᠵᠢᠯᠳᠠ ᠲᠠᠢ ᠪᠠᠷ ᠪᠦᠳᠦᠭᠡᠭᠰᠡᠨ ᠠᠨᠤ ᠬᠠᠳᠤᠨ ᠤ ᠰᠠᠶᠢᠬᠠᠨ ᠰᠡᠳᠭᠢᠯ ᠴᠠᠶᠢᠯᠭᠠᠨ ᠵᠡᠩ ᠨᠠᠷᠠᠨ ᠰᠠᠷᠠ ᠲᠠᠢ ᠵᠡᠷᠭᠡᠴᠡᠨ᠂ ᠰᠢᠯᠤᠭᠤᠨ ᠬᠢᠳᠡᠯ ᠰᠢᠭᠤᠷᠬᠠᠢ ᠦᠢᠯᠡ ᠨᠢ ᠤᠳᠤᠨ ᠮᠡᠴᠢᠳ ᠲᠠᠢ ᠮᠦᠴᠡᠷᠭᠡᠨ᠂ ᠪᠦᠰᠡᠭᠦᠢ ᠬᠠᠶᠢᠷ᠎ᠠ ᠤᠶᠠᠩᠭᠠᠳᠤ ᠲᠤᠤᠯᠢ ᠬᠠᠶᠢᠯᠠᠨ ᠴᠠᠶᠢᠯᠠᠨ ᠴᠤᠤᠷᠢᠶᠠᠯᠠᠨ᠎ᠠ᠃ ᠬᠠᠶᠢᠷᠠᠯᠠᠯᠳᠠᠢ ᠠᠨᠤ ᠬᠠᠳᠤᠨ ᠴᠡᠷᠢᠭ ᠲᠠᠶᠢᠨ ᠤ ᠡᠷᠳᠡᠮ ᠴᠢᠳᠠᠯ ᠢᠶᠠᠷ ᠴᠠᠭᠠᠷᠠᠭᠰᠠᠨ ᠪᠠᠭᠠᠳᠤᠷ ᠪᠦᠰᠡᠭᠦᠢ︕ ᠤᠶᠠᠬᠠᠨ ᠨᠠᠶᠢᠷᠠᠮᠳᠠᠭᠤ ᠠᠷᠭ᠎ᠠ ᠪᠤᠳᠤᠯᠭᠠᠳᠤ ᠲᠡᠭᠦᠰ ᠦᠵᠡᠰᠬᠦᠯᠡᠩᠳᠤ ᠰᠠᠶᠢᠳ ᠡᠭᠡᠨᠡᠷ︕ ᠤᠷᠤᠭ ᠭᠡᠷ ᠪᠦᠯᠢ ᠶᠢᠨ ᠡᠶ᠎ᠡ ᠵᠤᠬᠢᠴᠡᠯ ᠢ ᠤᠶᠤᠨ ᠤᠬᠠᠭᠠᠨ ᠢᠶᠠᠷ ᠢᠶᠠᠨ ᠤᠶᠠᠰᠬᠠᠨ ᠡᠪᠯᠡᠭᠦᠯᠵᠦ ᠴᠢᠳᠠᠬᠤᠶᠢᠴᠢ ᠰᠤᠳᠤᠨ ᠡᠭᠡ︕ ᠮᠤᠩᠭᠤᠯ ᠤᠨ ᠮᠢᠨᠢ ᠮᠤᠯᠤᠷ ᠡᠷᠳᠡᠨᠢ ᠮᠤᠩᠭᠤᠯᠵᠢᠨ ᠭᠤᠸ᠎ᠠ ᠰᠤᠤᠳᠤ ᠬᠠᠳᠤᠨ︕       1688 ᠤᠨ ᠳᠤ ᠲᠡᠭᠷᠢ ᠠᠭᠤᠯᠠ ᠶᠢᠨ ᠡᠮᠤᠨ᠎ᠡ ᠠᠴᠠ ᠢᠯᠢ ᠳᠤ ᠨᠡᠭᠦᠯᠭᠡᠨ ᠰᠠᠭᠤᠯᠭᠠᠭᠰᠠᠨ ᠬᠤᠶᠠᠷ ᠰᠦᠯᠳᠡ ᠤᠷᠪᠠᠯᠭᠠᠨ ᠭᠠᠷᠭᠠᠬᠤ ᠳᠤ᠂ ᠴᠡᠸᠠᠩᠷᠡᠪᠳᠡᠨ ᠨᠢᠭᠡᠨ ᠰᠠᠯᠠᠭ᠎ᠠ ᠴᠡᠷᠢᠭ ᠲᠠᠶᠢᠴᠢᠯᠠᠨ ᠭᠠᠯᠳᠠᠨ ᠪᠤᠱᠤᠭᠳᠤ ᠶᠢ ᠬᠠᠪᠰᠤᠷᠤᠨ᠂ ᠤᠷᠪᠠᠯᠭᠠᠨ ᠢ ᠬᠦᠴᠦᠳᠡᠢ ᠴᠤᠬᠢᠨ ᠲᠠᠷᠤᠩᠭᠤᠶᠢᠯᠠᠭᠰᠠᠨ ᠳᠤ ᠪᠤᠱᠤᠭᠳᠤ ᠬᠠᠭᠠᠨ ᠪᠠᠶᠠᠷᠯᠠᠨ ᠰᠠᠶᠢᠰᠢᠶᠠᠪᠠ᠃ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠤᠷᠪᠠᠯᠭᠠᠨ ᠤ ᠲᠠᠷᠠᠭ᠎ᠠ ᠪᠦᠬᠦ᠋ᠢᠯᠠ ᠵᠡᠬᠦᠨᠭᠠᠷ ᠤᠷᠤᠨ ᠳᠤ ᠲᠠᠷᠤᠩᠭᠤᠶᠢᠯᠠᠬᠤ ᠴᠡᠷᠢᠭ ᠰᠠᠭᠤᠯᠭᠠᠭᠰᠠᠨ ᠦᠭᠡᠢ ᠬᠦᠩᠭᠡᠪᠴᠢᠯᠡᠪᠡ᠃ ᠡᠨᠡᠬᠦ ᠵᠠᠪᠰᠢᠶᠠᠨ ᠢ ᠲᠠᠯᠢᠮᠳᠠᠭᠤᠯᠤᠨ ᠴᠡᠸᠠᠩᠷᠡᠪᠳᠡᠨ ᠤᠷᠪᠠᠵᠤ ᠭᠠᠷᠬᠤ ᠪᠠᠷ 1689 ᠤᠨ ᠤ ᠬᠠᠪᠤᠷ ᠡᠴᠢᠭᠡ ᠶᠢᠨ ᠬᠠᠭᠤᠴᠢᠨ ᠲᠦᠰᠢᠮᠡᠯ ᠲᠤᠯᠤᠭᠠᠨ ᠬᠦᠮᠦᠨ ᠵᠢᠴᠢ ᠲᠡᠭᠦᠦ ᠰᠤᠨᠠᠮᠷᠠᠪᠳᠠᠨ ᠲᠠᠢ ᠲᠠᠯᠳᠠᠭᠤᠷ ᠵᠦᠪᠯᠠᠪᠠ᠃ ᠵᠦᠪᠯᠡᠯᠭᠡ ᠶᠢ ᠲᠠᠨᠵᠢᠨ ᠤᠮᠪᠤ ︵ ᠴᠡᠸᠠᠩᠷᠡᠪᠳᠡᠨ ᠤ ᠬᠤᠶᠠᠳᠤᠭᠠᠷ ᠲᠡᠭᠦᠦ ︶ ᠪᠤᠱᠤᠭᠳᠤ ᠬᠠᠭᠠᠨ ᠳᠤ ᠵᠠᠭᠠᠯᠳᠤᠵᠠᠢ᠃ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠶᠠᠭᠤᠨ ᠤ ᠤᠷᠢᠳ ᠰᠤᠨᠠᠮᠷᠠᠪᠳᠠᠨ ᠢ ᠲᠠᠭᠤᠳᠠᠨ ᠰᠢᠬᠦᠵᠦ ᠰᠢᠳᠭᠡᠨ ᠠᠯᠠᠵᠠᠢ᠃ ᠴᠡᠸᠠᠩᠷᠡᠪᠳᠡᠨ ᠬᠠᠭᠤᠴᠢᠨ ᠲᠦᠰᠢᠮᠡᠯ ᠨᠡᠷ ᠤᠨ  ᠬᠠᠪᠰᠤᠷᠤᠯᠭ᠎ᠠ ᠲᠤᠤᠷ᠎ᠠ ᠬᠠᠷᠢᠶᠠᠳᠤ ᠲᠡᠪᠤᠨ ᠮᠢᠩᠭᠠᠨ ᠬᠦᠮᠦᠨ ᠢ ᠴᠤᠭᠯᠠᠭᠤᠯᠤᠨ ᠲᠤᠳᠠᠭᠠᠨ ᠭᠠᠷᠴᠤ ᠪᠤᠷᠤ ᠲᠠᠯ᠎ᠠ ᠳᠤ ᠤᠴᠢᠵᠦ ᠰᠠᠭᠤᠵᠠᠢ᠃ ᠲᠤᠰ ᠵᠢᠯ ᠤᠨ ᠨᠠᠮᠤᠷ ᠨᠢ ᠪᠤᠱᠤᠭᠳᠤ ᠬᠠᠭᠠᠨ ᠰᠡᠯᠡᠩᠭᠡ ᠵᠦᠭ ᠢᠷᠡᠭᠰᠡᠨ ᠢ ᠴᠡᠸᠠᠩᠷᠡᠪᠳᠡᠨ ᠲᠤᠷᠰᠢᠨ ᠮᠡᠳᠡᠭᠡᠳ᠂ ᠬᠠᠷ᠎ᠠ ᠡᠷᠴᠢᠰ ᠢᠶᠠᠨ ᠠᠯᠳᠠᠢ ᠶᠢ ᠲᠠᠪᠠᠭᠠᠳ ᠬᠤᠪᠳᠤ ᠵᠦᠭ ᠴᠦᠮᠦᠷᠦᠨ ᠤᠷᠤᠵᠤ᠂ ᠬᠤᠪᠳᠤ ᠶᠢᠨ ᠰᠠᠭᠤᠷᠢᠨ ᠭᠠᠵᠠᠷ ᠢ ᠰᠡᠬᠢᠵᠦ ᠦᠯᠡᠳᠡᠭᠰᠡᠨ ᠠᠨᠤ ᠬᠠᠳᠤᠨ ᠪᠤᠯᠤᠨ ᠲᠠᠨᠵᠢᠨ ᠤᠮᠪᠤ ᠵᠢᠴᠢ ᠴᠡᠷᠢᠭ ᠠᠷᠠᠳ ᠤᠨ ᠡᠳ᠋ ᠬᠦᠷᠦᠩᠭᠡ ᠪᠦᠬᠦᠨ ᠢ ᠤᠯᠵᠠᠯᠠᠭᠠᠳ᠂ ᠠᠯᠳᠠᠢ ᠶᠢ ᠲᠠᠪᠠᠵᠤ ᠪᠠᠷᠠᠭᠤᠨᠰᠢ ᠶᠠᠪᠤᠵᠠᠢ᠃      ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠬᠤᠪᠳᠤ ᠳᠤ ᠪᠤᠴᠠᠬᠤ ᠳᠤ᠂ ᠬᠤᠪᠳᠤ ᠨᠢᠭᠡᠨᠳᠡ ᠶᠠᠭᠤ ᠴᠣ᠋ ᠦᠭᠡᠢ ᠬᠤᠭᠤᠰᠤᠷᠪᠠ ᠃ ᠲᠦᠪᠡᠳ ᠬᠦᠬᠡᠨᠠᠭᠤᠷ ᠪᠡ ᠠᠯᠠᠱᠠ ᠶᠢᠨ ᠲᠠᠰᠤᠷᠠᠯ ᠦᠭᠡᠢ ᠲᠡᠮᠵᠢᠯᠭᠡ ᠪᠠᠷ ᠬᠤᠪᠳᠤ ᠤᠷᠤᠨ ᠤ ᠴᠡᠷᠢᠭ ᠠᠷᠠᠳ ᠤᠨ ᠠᠮᠢᠳᠤᠷᠠᠯ ᠮᠠᠰᠢ ᠲᠦᠷᠭᠡᠨ ᠲᠡᠭᠡᠭᠰᠢᠯᠡᠭᠰᠡᠨ ᠢᠶᠠᠷ ᠦᠯᠦ ᠪᠠᠷᠠᠨ᠂ ᠡᠨᠡᠬᠦ ᠬᠤᠭᠤᠷᠤᠨᠳᠤ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠤ ᠨᠤᠮ ᠤᠨ ᠨᠦᠬᠦᠷ ᠳ᠋ᠢᠪᠠ ᠰᠠᠩᠵᠠᠢ ︽ᠲᠠᠯᠠᠢ ᠯᠠᠮᠠ︾ ᠶᠢᠨ ᠨᠠᠷ᠎ᠠ ᠪᠠᠷ ᠴᠡᠸᠠᠩᠷᠡᠪᠳᠡᠨ ᠳᠤ ᠤᠯᠠᠨᠳᠠ ᠡᠯᠴᠢ ᠶᠠᠪᠤᠭᠤᠯᠤᠨ ᠠᠪᠠᠭ᠎ᠠ ᠬᠦᠪᠠᠬᠦᠨ ᠬᠤᠶᠠᠭᠤᠯᠠ ᠶᠢ ᠡᠶᠡᠳᠡᠬᠦᠯᠬᠦ ᠠᠵᠢᠯ ᠬᠢᠵᠡᠢ᠃ ᠡᠶᠢᠨᠬᠦ ᠪᠠᠶᠢᠳᠠᠯ ᠲᠤᠤᠷ᠎ᠠ ᠪᠤᠱᠤᠭᠳᠤ ᠬᠠᠭᠠᠨ ᠪᠤᠷᠤ ᠲᠠᠯ᠎ᠠ ᠵᠦᠭ ᠬᠦᠮᠦᠨ ᠢᠯᠡᠭᠡᠵᠦ᠂ ᠠᠨᠤ ᠬᠠᠳᠤᠨ ᠪᠤᠯᠤᠨ ᠲᠠᠨᠵᠢᠨ ᠤᠮᠪᠤ ᠲᠠᠢ ᠲᠠᠯᠳᠠᠭᠤᠷ ᠵᠦᠪᠯᠠᠵᠦ᠂ ᠲᠠᠳᠠᠨ ᠢ ᠤᠭᠳᠤᠨ ᠲᠤᠰᠬᠤ ᠴᠠᠭ ᠪᠠ ᠭᠠᠵᠠᠷ ᠢᠶᠠᠨ ᠬᠡᠯᠡᠯᠡᠴᠡᠨ ᠲᠤᠭᠳᠠᠵᠤ᠂ ᠲᠠᠶᠢᠵᠢ ᠦᠷᠵᠢᠵᠠᠪ ᠢ ᠢᠯᠡᠭᠡᠵᠦ᠂ ᠠᠨᠤ ᠬᠠᠳᠤᠨ ᠪᠤᠯᠤᠨ ᠲᠠᠨᠵᠢᠨ ᠤᠮᠪᠤ ᠶᠢ ᠲᠤᠰᠴᠤ ᠠᠪᠴᠢᠷᠠᠵᠠᠢ᠃       ᠠᠷᠭᠠᠴᠠᠬᠤ ᠡᠶᠡᠳᠡᠯ ᠢᠶᠠᠷ ᠲᠠᠮᠵᠢᠨ ᠠᠶᠢᠮᠠᠭ ᠤᠭᠰᠠᠭᠠᠨ ᠤ ᠲᠤᠮᠳᠠ ᠠᠯᠠᠯᠳᠤᠭᠠᠨ ᠭᠠᠷᠴᠣ ᠴᠢᠰᠤ ᠤᠷᠤᠰᠤᠭᠰᠠᠨ ᠦᠭᠡᠢ᠂ ᠠᠮᠤᠷ ᠲᠦᠪᠰᠢᠨ ᠢᠶᠠᠷ ᠠᠨᠤ ᠬᠠᠳᠤᠨ ᠪᠠ ᠲᠠᠨᠵᠢᠨ ᠤᠮᠪᠤ ᠨᠡᠷ ᠴᠡᠸᠠᠩᠷᠡᠪᠳᠡᠨ ᠠᠴᠠ ᠰᠠᠯᠵᠤ ᠴᠢᠳᠠᠵᠠᠢ᠃      1695 ᠤᠨ ᠤ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠬᠤᠶᠠᠷ ᠰᠠᠷ᠎ᠠ ᠳᠤ ᠲᠦᠪᠡᠳ ᠠᠴᠠ ᠲᠠᠷᠬᠠᠨ ᠤᠮᠪᠤ ᠭᠡᠭᠴᠢ ᠯᠠᠮᠠ ᠢᠷᠡᠭᠡᠳ ︽ᠲᠠᠯᠠᠢ ᠯᠠᠮᠠ︾ ᠶᠢᠨ ᠴᠢᠬᠤᠯᠠ ᠵᠢᠭᠠᠪᠤᠷᠢ ᠶᠢ ᠤᠯᠠᠮᠵᠢᠯᠠᠵᠠᠢ᠃ ᠲᠡᠷᠡ ᠵᠢᠭᠠᠪᠤᠷᠢ ᠳᠤ ᠲᠦᠰᠢᠶᠠᠳᠤ ᠬᠠᠨ ᠪᠠ ᠵᠢᠪᠽᠳᠳᠠᠮᠪᠠ ᠬᠤᠳᠤᠭᠳᠤ ᠶᠢ ᠮᠠᠨᠵᠤ ᠠᠴᠠ ᠪᠤᠴᠠᠭᠠᠨ ᠠᠪᠬᠤ ᠶᠠᠪᠤᠳᠠᠯ ᠢ ᠴᠢᠩᠭᠠᠯᠠᠵᠤ ︽ᠡᠮᠤᠨᠡᠰᠢ ᠲᠡᠶᠢᠯᠡᠪᠡᠰᠤ ᠢᠷᠸ᠎ᠠ ᠪᠡᠯᠭᠡ ᠰᠠᠶᠢᠨ ᠪᠤᠯᠠᠢ︾ ᠭᠡᠪᠡ᠃ ᠡᠨᠡᠬᠦ ᠵᠢᠭᠠᠪᠤᠷᠢ ᠨᠢ ᠲᠤᠭᠳᠠᠭᠤᠨ ᠪᠠᠶᠢᠭᠰᠠᠨ ᠲᠤᠭᠤᠷᠢᠮ ᠤᠨ ᠤᠰᠤᠨ ᠳᠤ ᠴᠢᠯᠠᠭᠤ ᠬᠠᠶᠠᠭᠰᠠᠨ ᠠᠳᠠᠯᠢ ᠲᠦᠰᠢᠮᠡᠯ ᠵᠠᠶᠢᠰᠠᠩ ᠵᠢᠴᠢ ᠠᠷᠠᠳ ᠢᠷᠡᠭᠡᠳ ᠤᠨ ᠲᠤᠮᠳᠠ ᠨᠢᠭᠡᠨ ᠵᠡᠷᠭᠡ ᠶᠠᠷᠢᠶ᠎ᠠ ᠭᠡᠯᠡᠯᠴᠡᠭᠡ ᠪᠣᠯᠪᠠ᠃ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠴᠤ ︽ᠡᠮᠤᠨᠡᠰᠢ ᠲᠡᠶᠢᠯᠠᠬᠤ︾ ᠲᠤᠷ᠎ᠠ ᠦᠭᠡᠢ ᠪᠠᠶᠢᠭᠰᠠᠨ ᠶᠤᠮ᠃ ᠭᠡᠳᠡᠯ᠎ᠡ ᠪᠤᠭᠳᠠ ᠶᠢᠨ ᠵᠢᠭᠠᠪᠤᠷᠢ ᠠᠴᠠ ᠵᠦᠷᠢᠴᠡᠪᠡᠯ ᠶᠠᠮᠠᠷ ᠮᠠᠭᠤ ᠢᠷᠸ᠎ᠠ ᠲᠤᠯᠭᠠᠷᠠᠵᠤ ᠮᠡᠳᠡᠬᠦ ᠠᠴᠠ ᠠᠶᠤᠬᠤ ᠲᠤᠯᠠ ᠡᠴᠤᠰ ᠲᠡᠭᠡᠨ ᠠᠷᠭ᠎ᠠ ᠪᠤᠰᠤ ᠵᠢᠭᠠᠪᠤᠷᠢ ᠶᠢ ᠵᠢᠷᠤᠮᠯᠠᠨ ᠴᠡᠷᠢᠭ ᠮᠤᠷᠳᠠᠬᠤ ᠪᠠᠷ ᠪᠡᠯᠡᠳᠭᠡᠪᠡ᠃ ᠭᠠᠯᠳᠠᠨ ᠪᠤᠯ ᠪᠤᠱᠤᠭᠳᠤ ᠬᠠᠭᠠᠨ᠂ ᠲᠡᠶᠢᠮᠦ ᠠᠴᠠ ᠱᠠᠰᠢᠨ ᠤ ᠬᠢ ᠶᠢ ᠰᠤᠨᠤᠰᠬᠤ ᠲᠤᠷᠠᠳᠠᠢ ᠮᠦᠷᠳᠡᠭᠡᠨ ᠰᠤᠨᠤᠰᠬᠤ ᠶᠤᠰᠤᠳᠠᠢ ᠪᠠᠶᠢᠭᠰᠠᠨ᠃ ︽ᠢᠩᠬᠢᠵᠦ ᠬᠠᠰᠢ ᠶᠠᠰᠢ ᠪᠠᠷ ᠴᠡᠷᠢᠭ ᠮᠤᠷᠳᠠᠬᠤ ᠨᠢ ᠮᠢᠨᠦ ᠰᠠᠨᠠᠭ᠎ᠠ ᠪᠢᠰᠢ︾ ᠭᠡᠵᠦ ᠪᠤᠱᠤᠭᠳᠤ ᠬᠠᠨ ᠰᠡᠭᠦᠷᠡᠰᠦ ᠠᠯᠳᠠᠨ ᠦᠬᠦᠯᠡᠵᠦ ᠪᠠᠶᠢᠭᠰᠠᠨ ᠰᠠᠨ᠃      ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠤ ᠬᠦᠴᠦᠨ ᠶᠠᠪᠤᠬᠤ ᠲᠤᠳᠤᠮ ᠪᠤᠵᠠᠭᠠᠶᠢᠷᠠᠬᠤ ᠳᠤ ᠰᠠᠨᠠᠭ᠎ᠠ ᠪᠤᠯᠵᠤ ᠪᠠᠶᠢᠭᠰᠠᠨ ᠮᠠᠨᠵᠤ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠲᠠᠷᠤᠢ ᠲᠦᠷᠭᠡᠨ ᠰᠦᠨᠦᠬᠡᠭᠦ ᠪᠠᠷ ᠶᠠᠭᠠᠷᠠᠵᠤ ᠪᠠᠶᠢᠵᠠᠢ᠃ ᠡᠩᠭᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠪᠡᠭᠡᠵᠢᠩ ᠠᠴᠠ ᠶᠡᠭᠡ ᠴᠡᠷᠢᠭ ᠢᠶᠠᠨ ᠬᠡᠳᠦ᠋ᠢᠨ ᠤ ᠬᠦᠳᠡᠯᠭᠡᠬᠦ ᠶᠢᠨ ᠲᠠᠭᠠᠤ ᠭ᠋ᠤᠭᠤᠴᠠᠬ ᠬᠤᠵᠢᠬᠤ᠂ ᠭ᠋ᠠᠭᠤᠷᠡᠨ ᠮᠠᠭᠡᠯᠠᠬᠦ ᠵᠣᠷᠢᠯᠬ ᠪᠠᠷ 1696 ᠤᠨ ᠤ 5 ᠰᠠᠷ᠎ᠠ ᠶᠢᠨ ᠡᠬᠢᠨ ᠢᠶᠠᠷ ᠪᠤᠱᠤᠭᠳᠤ ᠬᠠᠭᠠᠨ ᠭᠠᠯᠳᠠᠨ ᠳᠤ 200 ᠯᠠᠩ ᠮᠥᠩᠭᠦ᠂ ᠬᠡᠯᠬᠢᠶ᠎ᠠ ᠲᠠᠢ ᠵᠣᠭᠤᠰ᠂ ᠠᠯᠳᠡᠨ ᠬᠤᠶᠠᠭ᠂ ᠮᠠᠩᠨᠤᠭ ᠳᠠᠪᠠᠯ᠂ ᠪᠤᠯᠡᠭᠠᠨ ᠮᠡᠯᠡᠭᠠᠢ ᠵᠠᠷᠭᠡ ᠭ᠋ᠤᠪᠤᠷ ᠨᠡᠨᠳᠢᠨ ᠪᠠᠯᠡᠭ ᠬᠦᠷᠭᠡᠬᠦᠯᠦᠭᠰᠠᠨ ᠮᠦᠷᠳᠡᠭᠡᠨ ᠬᠤᠳᠠ ᠣᠷᠤᠬ ᠤᠨ ᠪᠠᠷᠢᠯᠳᠤᠯᠭ᠎ᠠ ᠲᠣᠬᠲᠡᠭᠠᠬᠤ᠂ ︽ᠦᠩᠭᠡᠨ ᠳᠤ ᠤᠨᠠᠭᠠᠬᠤ︾ ᠠᠷᠭ᠎ᠠ ᠪᠠᠷ ᠴᠢᠩ ᠤᠨ ᠭ᠋ᠠᠭᠠᠨ ᠤ ᠬᠦᠩᠵᠤ ᠳ᠋ᠦᠸᠧ ᠴᠡᠨ ᠢ ᠬᠦᠷᠭᠡᠵᠡᠢ᠃ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠵᠡᠬᠢᠲᠡᠯ᠂ ᠪᠠᠯᠡᠭ ᠰᠠᠯᠳᠠ᠂ ᠭ᠋ᠠᠭᠠᠨ ᠤ ᠭᠦᠡᠭᠵᠤ ᠶᠢ ᠲᠤᠰᠴᠤ ᠠᠪᠤᠭᠠᠳ ᠡᠯᠴᠢ ᠲᠦᠯᠦᠬᠡᠯᠡᠭᠴᠢ ᠶᠢ ᠨᠢ ᠪᠤᠴᠠᠭᠠᠵᠡᠢ᠃ ᠡᠳᠡᠭᠡᠷ ᠦᠢᠯᠡ ᠶᠠᠪᠤᠳᠠᠯ ᠪᠤᠯ ︽ᠬᠦᠯ ᠲᠤᠱᠠᠬᠤ ᠠᠷᠭ᠎ᠠ︾ ᠭᠡᠷᠡᠭᠯᠡᠵᠦ ᠪᠤᠢ ᠭᠡᠵᠦ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠰᠠᠶᠢᠨ ᠮᠡᠳᠡᠵᠦ ᠪᠠᠶᠢᠭᠰᠠᠨ ᠪᠤᠯᠬᠤᠷ ᠭᠡᠷᠦᠯᠦᠨ ᠢ ᠦᠭᠰᠦᠵᠦ᠂ ᠭᠡᠷᠢᠶ᠎ᠡ ᠬᠤᠰᠢᠭᠤ ᠵᠦᠭ ᠲᠦᠷᠭᠡᠯᠡᠨ ᠵᠠᠶᠢᠯᠠᠵᠠᠢ᠃      ᠦᠨᠡᠬᠡᠷ ᠭᠠᠯᠳᠠᠨ ᠤ ᠰᠠᠨᠠᠭ᠎ᠠ ᠪᠢᠰᠢ᠂ ᠭᠠᠳᠠᠭᠠᠳᠤ ᠲᠤᠳᠤᠭᠠᠳᠤ ᠶᠢᠨ ᠲᠠᠷᠤᠯᠳᠠ ᠬᠠᠪᠴᠢᠯᠳᠠ ᠲᠤᠤᠷ᠎ᠠ ᠵᠠᠭᠤᠨ ᠮᠣᠳᠣ ᠶᠢᠨ ᠲᠤᠯᠤᠯᠳᠤᠭᠠᠨ ᠵᠠᠶᠢᠯᠠᠰᠢ ᠦᠭᠡᠢ ᠡᠭᠦᠰᠦᠭᠰᠡᠨ ᠪᠢᠯᠠ᠃ ᠵᠠᠭᠤᠨ ᠮᠣᠳᠣ ᠶᠢᠨ ᠲᠠᠶᠢᠨ ᠪᠤᠯ ᠲᠡᠤᠭᠡᠨ ᠴᠠᠭ ᠦᠶ᠎ᠡ ᠳᠠᠬᠢ ᠡᠷᠬᠢᠯᠳᠡ ᠶᠢᠨ ᠴᠢᠨᠡᠷ ᠲᠠᠢ ᠲᠠᠶᠢᠨ ᠶᠤᠮ᠃       ᠴᠢᠩ ᠤᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠡᠨᠡ ᠤᠳᠠᠭᠠᠨ ᠤ ᠲᠠᠶᠢᠨ ᠳᠤ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠷ ᠴᠡᠷᠢᠭ ᠰᠢᠯᠭᠠᠨ ᠲᠠᠶᠢᠴᠢᠯᠠᠵᠤ᠂ ᠨᠡᠷᠢᠨ ᠲᠡᠭᠦᠰ ᠪᠡᠯᠡᠳᠭᠡᠯ ᠬᠢᠭᠰᠡᠨ ᠶᠤᠮ᠃ ᠭᠠᠯᠳᠤ ᠵᠡᠪᠰᠡᠭ ᠶᠢ ᠮᠠᠰᠢ ᠴᠢᠬᠤᠯᠠᠴᠢᠯᠠᠨ᠂ ᠠᠪᠴᠣ ᠶᠠᠪᠤᠬᠤ ᠳᠤ ᠬᠢᠯᠪᠡᠷ᠂ ᠬᠦᠩᠬᠡᠨ ᠮᠠᠶ᠋ᠢᠭ ᠤᠨ ᠦᠭᠡᠷ ᠫᠤᠤ ᠶᠢ ᠰᠢᠨ᠎ᠡ ᠴᠢᠳᠬᠤᠭᠤᠯᠤᠭᠰᠠᠨ ᠮᠦᠷᠳᠡᠭᠡᠨ ᠴᠡᠷᠢᠭ ᠤᠳ ᠲᠤ ᠰᠤᠮᠤ ᠨᠡᠪᠳᠡᠷᠡᠬᠦ ᠦᠭᠡᠢ ᠮᠢᠨᠳᠠᠰᠤ ᠲᠠᠯᠪᠢᠭᠰᠠᠨ ᠬᠤᠶᠠᠭ ᠡᠮᠤᠰᠭᠡᠵᠦ᠂ ᠬᠢᠳᠡᠳ᠂ ᠮᠠᠨᠵᠦ᠂ ᠦᠪᠦᠷᠯᠡᠭᠴᠢ᠂ ᠬᠠᠯᠬ᠎ᠠ ᠵᠡᠷᠭᠡ ᠴᠡᠷᠢᠭ ᠢᠶᠠᠷ ᠪᠦᠷᠢᠯᠳᠦᠭᠰᠡᠨ ᠲᠦᠴᠢᠨ ᠲᠦᠮᠡᠨ ᠴᠡᠷᠢᠭ ᠲᠠᠢ ᠭᠡᠵᠦ ᠠᠯᠳᠠᠷᠰᠢᠭᠤᠯᠤᠨ ᠬᠦᠳᠡᠯᠵᠠᠢ᠃       ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠦᠪᠡᠷ ᠤᠨ ᠴᠡᠷᠢᠭ ᠢ ᠠᠷᠪᠠᠨ ᠲᠦᠮᠡᠨ᠂ ᠬᠤᠳᠤᠩ ᠴᠡᠷᠢᠭ ᠠᠷᠪᠠᠨ ᠲᠦᠮᠡ ᠶᠢ ᠤᠷᠤᠰ ᠤᠨ ᠲᠤᠰᠠᠯᠠᠬᠤ ᠴᠡᠷᠢᠭ ᠭᠡᠵᠦ ᠠᠯᠳᠠᠷᠰᠢᠭᠤᠯᠤᠨ᠂ ᠴᠡᠷᠢᠭ ᠤᠳ ᠨᠢ ᠮᠢᠨᠳᠠᠰᠤᠨ ᠲᠡᠪᠡᠯ ᠤᠨ ᠭᠠᠳᠠᠭᠤᠷ ᠨᠢᠮᠭᠡᠨ ᠲᠡᠮᠦᠷ ᠴᠠᠭᠠᠷᠢᠭ ᠭᠡᠯᠬᠢᠵᠦ ᠬᠠᠳᠠᠭᠰᠠᠨ ᠬᠤᠶᠠᠭ ᠡᠮᠤᠰᠴᠤ᠂ ᠵᠠᠷᠢᠮ ᠨᠢ ᠬᠤᠶᠠᠭ ᠤᠨ ᠢᠶᠠᠨ ᠭᠠᠳᠠᠭᠤᠷ ᠬᠢᠨᠵᠢᠨ ᠬᠦᠷᠮ᠎ᠡ ᠲᠡᠪᠬᠤᠷᠯᠠᠨ ᠡᠮᠤᠰᠤᠭᠰᠠᠨ ᠪᠠᠶᠢᠯ᠎ᠠ᠃ ᠬᠤᠷᠴᠠ ᠢᠷ ᠲᠠᠢ ᠰᠠᠷᠠᠨ ᠵᠠᠪᠠ᠂ ᠬᠢᠳᠤᠭᠠᠨ ᠵᠡᠪᠡ᠂ ᠰᠢᠪᠤᠭᠡᠨ ᠵᠡᠪᠡ ᠪᠦᠬᠦᠢ ᠨᠤᠮᠤ ᠰᠤᠮᠤ ᠲᠠᠢ ᠪᠦᠭᠡᠳ ᠪᠠᠰᠠ ᠭᠠᠯᠳᠤ ᠫᠤᠤ ᠲᠠᠢ ᠪᠠᠶᠢᠵᠠᠢ᠃ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠪᠦᠭᠦ ᠴᠡᠷᠢᠭ ᠢᠶᠠᠨ ᠭᠡᠳᠦᠨ ᠠᠩᠬᠢ ᠬᠤᠪᠢᠶᠠᠵᠤ᠂ ᠠᠴᠢᠶ᠎ᠡ ᠬᠦᠰᠭᠡ᠂ ᠬᠡᠤᠬᠡᠳ ᠪᠦᠰᠡᠭᠦ᠋ᠢᠴᠣᠳ᠂ ᠮᠠᠯ ᠤᠨᠤᠭ᠎ᠠ ᠪᠠᠨ ᠠᠷᠤ ᠲᠠᠯ᠎ᠠ ᠳᠠᠭᠠᠨ ᠲᠤᠬᠢᠷᠠᠭᠤᠯᠵᠠᠢ᠃ ᠦᠨᠡᠨ ᠳᠡᠭᠡᠨ ᠪᠤᠱᠤᠭᠳᠤ ᠬᠠᠭᠠᠨ ᠭᠡᠷᠦᠯᠦᠨ ᠠᠴᠠ ᠲᠤᠤᠯᠠ ᠭᠤᠤᠯ ᠵᠦᠭ ᠢᠷᠡᠬᠦ ᠵᠠᠮ ᠳᠤ ᠴᠡᠷᠢᠭ ᠤᠨ ᠲᠤᠳᠤᠷ᠎ᠠ ᠡᠪᠡᠳᠴᠢᠨ ᠲᠠᠬᠤᠯ ᠲᠡᠯᠭᠡᠷᠡᠭᠰᠡᠨ ᠠᠴᠠ ᠦᠯᠡᠳᠡᠵᠦ ᠬᠤᠴᠤᠷᠠᠭᠰᠠᠨ ᠪᠠ ᠤᠷᠭᠤᠵᠤ ᠪᠤᠰᠠᠨᠢᠭᠰᠠᠨ ᠬᠦᠮᠦᠰ ᠨᠡᠯᠢᠶᠡᠳ ᠭᠠᠷᠴᠠᠢ᠂ ᠡᠶᠢᠮᠦ ᠠᠴᠠ ᠲᠠᠶᠢᠨ ᠳᠤ ᠤᠷᠤᠯᠴᠠᠵᠤ ᠴᠢᠳᠠᠬᠤ ᠬᠦᠮᠦᠨ ᠲᠦᠮᠡ ᠬᠦᠷᠬᠦ ᠦᠭᠡᠢ ᠪᠠᠶᠢᠵᠠᠢ᠃ ᠬᠡᠳᠦᠶᠢᠪᠡᠷ ᠵᠡᠬᠦᠨᠭᠠᠷ ᠤᠨ ᠦᠢᠷᠡᠳ ᠴᠡᠷᠢᠭ ᠪᠤᠯ ᠤᠤᠯ ᠠᠴᠠ ᠪᠠᠨ ᠪᠤᠯᠪᠠᠰᠤᠷᠠᠯ ᠰᠠᠶᠢᠳᠠᠢ᠂ ᠲᠠᠶᠢᠨ ᠤ ᠲᠤᠷᠰᠢᠯᠭ᠎ᠠ ᠲᠠᠢ᠂ ᠪᠠᠭᠠᠳᠤᠷᠯᠢᠭ ᠵᠤᠷᠢᠭ ᠰᠦᠰᠦ ᠲᠠᠢ ᠰᠢᠨᠳᠠᠰᠤᠯᠢᠭ ᠢᠶᠠᠷ ᠠᠯᠳᠠᠷ ᠲᠠᠢ  ᠪᠣᠯᠪᠠᠴᠤ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠬᠦᠮᠦᠨ ᠤ ᠲᠤᠭ᠎ᠠ ᠪᠠ ᠬᠦᠴᠦᠨ ᠤ ᠬᠠᠷᠢᠴᠡᠯ ᠢᠶᠠᠷ ᠮᠠᠨᠵᠦ ᠴᠡᠷᠢᠭ ᠲᠠᠢ ᠠᠳᠠᠯᠢᠳᠬᠠᠬᠤ ᠠᠷᠭ᠎ᠠ ᠦᠭᠡᠢ ᠪᠠᠶᠢᠯ᠎ᠠ᠃      ᠵᠠᠭᠤᠨ ᠮᠤᠳᠤ ᠪᠤᠯ ᠦᠨᠦ ᠶᠢᠨ ᠤᠯᠠᠭᠠᠨᠪᠠᠭᠠᠳᠤᠷ ᠬᠤᠳᠠ ᠶᠢᠨ ᠵᠡᠬᠦᠨ ᠡᠮᠤᠨ᠎ᠡ ᠪᠠᠶᠢᠳᠠᠭ᠃ ᠮᠢᠩ ᠤᠯᠤᠰ ᠤᠨ ᠴᠧᠩ ᠵᠤ᠋ ᠬᠠᠭᠠᠨ ᠮᠤᠩᠭᠤᠯ ᠤᠨ ᠠᠷᠤᠭᠰᠢ ᠲᠠᠶᠢᠱᠢ ᠲᠠᠢ ᠪᠠᠶᠢᠯᠳᠤᠵᠤ ᠦᠩᠭᠡᠷᠡᠭᠰᠡᠨ ᠡᠷᠳ᠋ᠨ ᠠᠴᠠ ᠲᠠᠶᠢᠨ ᠤ ᠲᠠᠯᠠᠪᠤᠷ ᠪᠠᠶᠢᠭᠰᠠᠨ ᠶᠤᠮ᠃ ᠵᠠᠭᠤᠨ ᠮᠤᠳᠤ ᠨᠢ ᠲᠤᠤᠯᠠ ᠭᠤᠤᠯ ᠤᠨ ᠠᠷᠤ ᠳᠤ ᠤᠷᠤᠰᠢᠵᠦ᠂ ᠪᠠᠷᠠᠭᠤᠨ ᠲᠠᠯ᠎ᠠ ᠳᠠᠭᠠᠨ ᠬᠠᠨ ᠠᠭᠤᠯᠠ᠂ ᠠᠷᠤ ᠲᠠᠯ᠎ᠠ ᠳᠠᠭᠠᠨ ᠬᠡᠨᠳᠡᠢ ᠠᠭᠤᠯᠠ ᠨᠢᠷᠤᠭᠤ ᠶᠢ ᠲᠦᠰᠢᠵᠦ᠂ ᠲᠠᠯ᠎ᠠ ᠶᠢᠨ ᠡᠮᠤᠨ᠎ᠡ᠂ ᠲᠠᠷᠤᠢ ᠲᠤᠤᠯᠠ ᠭᠤᠤᠯ ᠤᠨ ᠠᠷᠤ ᠳᠤ ᠨᠢᠭᠡᠨ ᠡᠮᠡᠭᠡᠯ ᠤᠨ ᠭᠡᠯᠪᠡᠷᠢ ᠲᠠᠢ ᠪᠤᠭᠤᠨᠢ ᠠᠭᠤᠯᠠ ᠪᠠᠶᠢᠳᠠᠭ᠃      ᠮᠡᠨᠵᠦ ᠶᠢᠨ ᠵᠠᠩᠵᠤᠨ ᠫᠢᠶᠠᠩᠭᠤ ᠵᠠᠭᠤᠨ ᠮᠤᠳᠤ ᠶᠢᠨ ᠤᠶᠢᠷᠠᠯᠴᠠᠭ᠎ᠠ ᠬᠦᠷᠢᠶ᠎ᠡ ᠪᠠᠭᠤᠮᠠᠭᠴᠠ᠂ ᠴᠡᠷᠢᠭ ᠢᠶᠠᠨ ᠭᠤᠷᠪᠠᠨ ᠠᠩᠬᠢ ᠬᠤᠪᠢᠶᠠᠨ᠂ ᠡᠮᠡᠬᠡᠯ ᠠᠭᠤᠯᠠᠨ ᠤ ᠵᠡᠬᠦᠨ ᠲᠠᠯ᠎ᠠ᠂ ᠡᠮᠤᠨ᠎ᠡ ᠲᠠᠯ᠎ᠠ ᠪᠠᠷ ᠲᠤᠰ ᠲᠤᠰ ᠵᠢᠭᠰᠠᠭᠠᠯ ᠵᠠᠰᠠᠭᠠᠳ ᠵᠢᠴᠢ ᠠᠭᠤᠯᠠ ᠶᠢᠨ ᠤᠷᠤᠢ ᠳᠤ ᠵᠠᠩᠵᠤᠨ ᠰᠦᠨ ᠰᠧ ᠺᠧ ᠶᠢᠨ ᠨᠤᠭᠤᠭᠠᠨ ᠲᠤᠭᠳᠤ ᠴᠡᠷᠢᠭ ᠢ ᠵᠢᠭᠰᠠᠭᠠᠪᠠ ᠃ ᠭᠠᠪᠰᠢᠭᠠᠢ ᠴᠡᠷᠢᠭ ᠤᠨ ᠪᠦᠬᠦᠳᠡ ᠶᠢᠨ ᠲᠠᠷᠤᠭ᠎ᠠ ᠰᠤᠳᠠᠢ ᠪᠤᠯᠤᠨ ᠮᠠᠶᠢᠷᠠᠨ ᠵᠠᠩᠬᠢ ᠠᠨᠠᠨᠳᠠ ᠳᠤ ᠲᠦᠷᠪᠠᠨ ᠵᠠᠭᠤᠨ ᠴᠡᠷᠢᠭ ᠦᠭᠴᠤ᠂ ᠵᠡᠬᠦᠨᠭᠠᠷ ᠤᠨ ᠴᠡᠷᠢᠭ ᠢ ᠦᠳᠦᠭᠡᠨ ᠠᠪᠴᠢᠷᠠᠬᠤ ᠪᠠᠷ ᠢᠯᠡᠭᠡᠪᠡ᠃      1696 ᠤᠨ ᠤ 5 ᠰᠠᠷ᠎ᠠ ᠶᠢᠨ 13 ᠳᠤ ᠪᠤᠯᠤᠭᠰᠠᠨ ᠵᠠᠭᠤᠨ ᠮᠤᠳᠤ ᠶᠢᠨ ᠲᠤᠯᠤᠯᠳᠤᠭᠠᠨ ᠨᠢ ᠬᠤᠨᠢᠨ ᠴᠠᠭ ᠠᠴᠠ ᠡᠭᠢᠯᠡᠨ ᠪᠠᠶᠢᠯᠳᠤᠪᠠ᠃ ᠪᠤᠱᠤᠭᠳᠤ ᠬᠠᠭᠠᠨ ᠤ ᠲᠡᠷᠢᠬᠦᠨ ᠠᠩᠬᠢ ᠴᠡᠷᠢᠭ ᠲᠦᠷᠪᠡᠯᠵᠢᠨ ᠵᠢᠭᠰᠠᠭᠠᠯ ᠤᠨ ᠭᠡᠯᠪᠡᠷᠢ ᠪᠠᠷ ᠤᠷᠤᠭᠰᠢ ᠲᠦᠯᠬᠢᠯᠡᠨ ᠲᠠᠭᠠᠷᠢᠭᠰᠠᠨ ᠳᠤ ᠴᠢᠩ ᠤᠨ ᠵᠡᠬᠦᠨ ᠲᠠᠯ᠎ᠠ ᠶᠢᠨ ᠴᠡᠷᠢᠭ ᠨᠢᠭᠡ ᠭᠠᠷ ᠲᠠᠭᠠᠨ ᠬᠤᠯᠤᠰᠤᠨ ᠬᠠᠯᠬᠠᠪᠴᠢ ᠪᠠᠷᠢᠵᠦ᠂ ᠨᠦᠬᠦᠭᠡ ᠭᠠᠷ ᠲᠠᠭᠠᠨ ᠵᠢᠳᠡ ᠰᠠᠯᠠᠮ᠎ᠠ ᠠᠳᠬᠤᠨ ᠵᠢᠳᠠᠯᠠᠵᠤ ᠶᠠᠪᠠᠭᠠᠨ ᠢᠶᠠᠷ ᠵᠢᠭᠤᠷᠠᠯᠳᠤᠨ ᠪᠠᠶᠢᠯᠳᠤᠪᠠ᠃ ᠭᠠᠪᠰᠢᠭᠠᠢ ᠪᠠᠶᠢᠯᠳᠤᠭᠠᠨ ᠢᠶᠠᠷ ᠦᠢᠷᠡᠳ ᠤᠨ ᠴᠡᠷᠢᠭ ᠵᠡᠭᠦᠨ ᠲᠠᠯ᠎ᠠ ᠶᠢᠨ ᠵᠢᠭᠰᠠᠭᠠᠯ ᠢ ᠡᠪᠳᠡᠯᠡᠨ᠂ ᠤᠷᠤᠭᠰᠢ ᠲᠦᠷᠢᠵᠦ ᠡᠮᠡᠭᠡᠯ ᠠᠭᠤᠯᠠ ᠶᠢ ᠡᠵᠡᠯᠡᠬᠦ ᠪᠠᠷ ᠴᠢᠷᠮᠠᠶᠢᠪᠠ᠃      ᠡᠮᠡᠭᠡᠯ ᠭᠡᠯᠪᠡᠷᠢ ᠲᠠᠢ ᠠᠭᠤᠯᠠᠨ ᠳᠤ ᠵᠢᠭᠰᠠᠭᠠᠵᠤ ᠪᠠᠶᠢᠭ᠎ᠠ ᠨᠤᠭᠤᠭᠠᠨ ᠲᠤᠭᠳᠤ ᠴᠡᠷᠢᠭ ᠨᠢ ᠭᠠᠯᠳᠤ ᠫᠤᠤ᠂ ᠨᠤᠮᠤ ᠰᠤᠮᠤ ᠪᠠᠷ ᠲᠤᠷᠤᠭᠰᠢ ᠭᠠᠯᠯᠠᠨ ᠬᠠᠷᠪᠤᠬᠤ ᠳᠤ ᠵᠡᠬᠦᠨᠭᠠᠷ ᠴᠡᠷᠢᠭ ᠪᠠᠰᠠ ᠭᠠᠯᠳᠤ ᠫᠤᠤ᠂ ᠨᠤᠮᠤ ᠰᠤᠮᠤ ᠪᠠᠷ ᠲᠡᠭᠡᠭᠰᠢ ᠬᠠᠷᠪᠤᠬᠤ ᠶᠢᠨ ᠲᠠᠭᠠᠤ ᠮᠠᠴᠤᠪᠠ᠃ ᠲᠤᠯᠤᠯᠳᠤᠭᠠᠨ ᠮᠠᠰᠢ ᠰᠢᠷᠦᠭᠦᠨ ᠶᠠᠪᠤᠭᠳᠠᠵᠤ᠂ ᠪᠤᠱᠤᠭᠳᠤ ᠬᠠᠭᠠᠨ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠷ ᠲᠡᠷᠢᠭᠦᠯᠡᠨ ᠮᠤᠷᠢᠨ ᠠᠴᠠ ᠪᠠᠨ ᠪᠠᠭᠤᠵᠤ ᠶᠠᠪᠠᠭᠠᠨ ᠢᠶᠠᠷ ᠪᠠᠶᠢᠯᠳᠤᠵᠤ᠂ ᠲᠤᠭᠠᠷ ᠠᠷᠠᠪᠳᠠᠨ ᠤ ᠪᠠᠶ᠎ᠠ ᠭᠡᠳᠦᠨ ᠭᠠᠵᠠᠷ ᠰᠢᠷᠬ᠎ᠠ ᠤᠯᠤᠭᠰᠠᠨ ᠴᠤ ᠲᠡᠭᠡᠭᠰᠢ ᠪᠠᠨ ᠮᠠᠴᠤᠨ ᠪᠠᠭᠠᠳᠤᠷᠯᠠᠨ ᠪᠠᠶᠢᠯᠳᠤᠭᠰᠠᠭᠠᠷ ᠠᠭᠤᠯᠠᠨ ᠤ ᠬᠠᠭᠠᠰ ᠢ ᠡᠵᠡᠯᠡᠨ ᠠᠪᠴᠠᠢ᠃ ᠬᠤᠶᠠᠷ ᠡᠳᠡᠭᠡᠳ ᠠᠭᠤᠯᠠᠨ ᠲᠡᠭᠡᠷ᠎ᠡ ᠬᠠᠷᠢᠯᠴᠠᠨ ᠬᠠᠷᠪᠤᠯᠴᠠᠵᠤ᠂ ᠠᠭᠤᠯᠠᠨ ᠤ ᠲᠤᠤᠷ᠎ᠠ ᠵᠢᠭᠤᠷᠠᠯᠳᠤᠨ ᠪᠠᠶᠢᠯᠳᠤᠵᠤ᠂ ᠬᠡᠨ ᠠᠯᠢᠨ ᠳᠠᠭᠠᠨ ᠬᠦᠴᠦᠨ ᠲᠠᠷᠤᠭᠳᠠᠬᠤ ᠦᠭᠡᠢ᠂ ᠠᠯᠠᠭᠳᠠᠨ ᠰᠢᠷᠠᠭᠳᠤᠭᠰᠠᠨ ᠬᠦᠮᠦᠨ ᠤ ᠲᠤᠭ᠎ᠠ ᠲᠡᠩᠴᠠᠭᠦᠦ ᠪᠠᠶᠢᠭᠰᠠᠨ ᠶᠤᠮ᠃ ᠡᠨᠡ ᠮᠠᠳᠤ ᠬᠤᠨᠢᠨ ᠴᠠᠭ ᠠᠴᠠ ᠨᠠᠷᠠ ᠰᠢᠩᠬᠡᠬᠦ ᠪᠤᠯᠳᠠᠯ᠎ᠠ ᠪᠠᠶᠢᠯᠳᠤᠬᠤ ᠳᠤ ᠵᠡᠬᠦᠨᠭᠠᠷ ᠦᠢᠷᠡᠳ ᠴᠡᠷᠢᠭ ᠤᠨ ᠤᠳᠠᠭᠠᠨ ᠲᠡᠰᠪᠤᠷᠢᠳᠡᠢ᠂ ᠵᠤᠷᠢᠭ ᠰᠦᠰᠦ ᠲᠠᠢ ᠡᠷᠡᠯᠭᠡᠭᠯᠡᠨ ᠲᠡᠮᠡᠴᠡᠬᠦ ᠨᠢ ᠴᠢᠩ ᠤᠨ ᠵᠠᠩᠵᠤᠨ ᠫᠢᠶᠠᠩᠭᠤ ᠶᠢ ᠲᠦᠢᠯ ᠢᠶᠠᠷ ᠪᠠᠴᠢᠮᠳᠠᠭᠤᠯᠵᠤ᠄ ︽ᠡᠨᠡ ᠨᠠᠰᠤᠨ ᠳᠠᠭᠠᠨ ᠡᠶᠢᠮᠦᠷᠬᠦ ᠠᠶᠢᠬᠤᠪᠳᠤᠷ ᠭᠡᠴᠡᠭᠦᠦ ᠲᠠᠶᠢᠰᠤᠨ  ᠲᠠᠢ ᠠᠩᠬ᠎ᠠ ᠤᠳᠠᠭ᠎ᠠ ᠲᠤᠯᠭᠠᠷᠠᠭᠰᠠᠨ︾ ᠭᠡᠵᠦ ᠵᠢᠷᠦᠭᠡ ᠭᠤᠤᠯ ᠨᠢ ᠲᠤᠯᠬᠢᠰᠴᠣ ᠠᠷᠭ᠎ᠠ ᠪᠠᠷᠠᠵᠤ ᠪᠠᠶᠢᠵᠠᠢ᠃ ᠡᠨᠡ ᠦᠶ᠎ᠡ ᠳᠤ ᠬᠢᠳᠡᠳ ᠴᠡᠷᠢᠭ ᠤᠨ ᠲᠠᠷᠤᠭ᠎ᠠ ᠶᠢᠨ ᠬᠤᠸᠠ ᠴᠧᠩ ︵ ᠶᠢᠨ ᠬᠤᠸᠠ ᠰᠢᠩ ᠭᠡᠵᠦ ᠪᠠᠰᠠ ᠪᠢᠴᠢᠵᠦ ᠪᠤᠢ︶ ᠠᠴᠠ ᠨᠢᠭᠡᠨ ᠠᠷᠭ᠎ᠠ ᠡᠷᠭᠦᠵᠦ᠂ ᠨᠢᠭᠡᠨ ᠰᠠᠯᠠᠭ᠎ᠠ ᠴᠦᠬᠡᠨ ᠴᠡᠷᠢᠭ ᠢ ᠢᠯᠡᠭᠡᠵᠦ᠂ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠤ ᠠᠷᠤ ᠲᠠᠯ᠎ᠠ ᠶᠢᠨ ᠠᠴᠢᠶ᠎ᠠ ᠬᠦᠰᠭᠡ᠂ ᠬᠡᠤᠬᠡᠳ ᠪᠦᠰᠡᠭᠦ᠋ᠢᠴᠤᠳ ᠢ ᠲᠠᠭᠠᠷᠢᠭᠤᠯᠵᠠᠢ᠃ ᠠᠷᠤ ᠲᠠᠯ᠎ᠠ ᠶᠢᠨ ᠦᠢᠮᠡᠭᠡᠨ ᠲᠡᠪᠵᠢᠶᠡᠨ᠂ ᠬᠡᠤᠬᠡᠳ ᠪᠦᠰᠡᠬᠦ᠋ᠢᠴᠤᠳ ᠪᠠᠷᠬᠢᠷᠠᠨ ᠤᠬᠢᠯᠠᠯᠳᠤᠬᠤ ᠳᠤ ᠵᠡᠬᠦᠨᠭᠠᠷ ᠴᠡᠷᠢᠭ ᠤᠨ ᠰᠡᠳᠭᠢᠯ ᠬᠤᠪᠢᠶᠠᠭᠳᠠᠵᠤ ᠵᠢᠭᠰᠠᠭᠠᠯ ᠤᠨ ᠬᠦᠯ ᠢᠶᠠᠨ ᠠᠯᠳᠠᠪᠠ᠃ ᠲᠡᠷᠡ ᠬᠢᠷᠢ ᠳᠤ ᠠᠭᠤᠯᠠᠨ ᠲᠡᠭᠡᠷ᠎ᠡ ᠪᠤᠭᠤ ᠶᠢᠨ ᠡᠪᠡᠷ ᠬᠠᠩᠬᠢᠨᠠᠵᠤ᠂ ᠨᠤᠭᠤᠭᠠᠨ ᠲᠤᠭᠳᠤ ᠴᠡᠷᠢᠭ ᠤᠳ ᠲᠤᠷᠤᠭᠰᠢ ᠲᠠᠭᠠᠷᠢᠬᠤ ᠳᠤ ᠵᠡᠬᠦᠨᠭᠠᠷ ᠴᠡᠷᠢᠭ  ᠤᠳ ᠪᠦᠯᠦᠭ ᠪᠦᠯᠦᠭ ᠢᠶᠠᠷ ᠬᠤᠶᠢᠰᠢ ᠤᠬᠤᠷᠢᠵᠠᠭᠠᠪᠠ᠃      ᠬᠦᠮᠦᠨ ᠤᠷᠢᠯᠠᠯᠳᠤᠨ᠂ ᠮᠤᠷᠢᠳ ᠢᠨᠴᠠᠭᠠᠨ᠂ ᠫᠤᠤ ᠲᠦᠵᠢᠭᠡᠨᠡᠵᠦ᠂ ᠬᠠᠷᠪᠤᠭᠰᠠᠨ ᠰᠤᠮᠤ ᠢᠰᠬᠢᠷᠤᠯᠳᠤᠨ᠂ ᠴᠢᠬᠢ ᠲᠦᠯᠡᠶᠢᠷᠠᠬᠦᠯᠤᠮ᠎ᠠ ᠲᠠᠭᠤᠨ ᠱᠤᠤᠬᠢᠶᠠᠨ ᠂ ᠬᠦᠮᠦᠨ ᠤ ᠦᠬᠦᠳᠡᠯ ᠬᠦᠨᠳᠡᠯᠡᠨ ᠭᠤᠤᠯᠳᠤ᠂ ᠬᠦᠮᠦᠨ ᠤ ᠴᠢᠰᠤ ᠭᠤᠤᠯ ᠭᠤᠷᠤᠬ᠎ᠠ ᠪᠤᠯᠵᠤ ᠤᠷᠤᠰᠤᠭᠠᠳ᠂ ᠨᠢᠳᠤ ᠬᠠᠯᠳᠠᠷᠠᠮ᠎ᠠ ᠲᠠᠶᠢᠨ ᠤ ᠲᠠᠯᠠᠪᠤᠷ ᠲᠤ ᠠᠮᠢᠰᠬᠤᠭ᠎ᠠ ᠪᠦᠭᠰᠢᠬᠦ ᠬᠠᠷ᠎ᠠ ᠤᠳᠤᠭ᠎ᠠ ᠮᠠᠨᠠᠷᠠᠨ᠎ᠠ ᠁ ᠡᠶᠢᠮᠦᠷᠬᠦ ᠪᠠᠴᠢᠮ ᠲᠤᠯᠭᠠᠮ᠎ᠠ ᠪᠠᠶᠢᠳᠠᠯ ᠳᠤ ᠡᠷᠡᠯᠭᠡᠭ ᠪᠠᠭᠠᠳᠤᠷ ᠠᠨᠤ ᠬᠠᠳᠤᠨ ᠤᠷᠳᠤ ᠵᠢᠳᠠ ᠪᠠᠷᠢᠵᠦ ᠭᠠᠷᠬᠠᠨ ᠬᠤᠶᠠᠭ ᠬᠡᠳᠦᠷᠴᠣ᠂ ᠭᠤᠷᠪᠠᠨ ᠵᠠᠭᠤᠨ ᠠᠮᠢ ᠬᠠᠮᠠᠭᠠᠯᠠᠬᠤ ᠰᠢᠯᠢᠳᠡᠭ ᠴᠡᠷᠢᠭ ᠢ ᠲᠠᠭᠠᠭᠤᠯᠤᠨ ᠵᠡᠬᠢᠷᠴᠤ ᠂ ᠲᠠᠶᠢᠰᠤᠨ ᠤ ᠬᠠᠭᠠᠯᠳᠠ ᠶᠢ ᠰᠡᠳᠡᠯᠤᠨ ᠵᠠᠮ ᠭᠠᠷᠭᠠᠬᠤ ᠪᠠᠷ ᠮᠡᠨᠵᠤ ᠴᠡᠷᠢᠭ ᠤᠷᠤᠭᠤ ᠴᠢᠰᠤᠨ ᠵᠠᠮ ᠲᠠᠳᠠᠭᠤᠯᠤᠨ ᠲᠠᠭᠠᠷᠢᠨ ᠤᠷᠤᠪᠠ᠃ ᠠᠨᠤ ᠬᠠᠳᠤᠨ ᠤ ᠲᠠᠭᠠᠭᠤᠯᠤᠭᠰᠠᠨ ᠴᠡᠷᠢᠭ᠂ ᠠᠷᠤ ᠪᠠᠷ ᠤᠷᠤᠵᠤ ᠢᠷᠡᠭᠡᠳ ᠬᠠᠭᠠᠵᠤ ᠪᠠᠶᠢᠭᠰᠠᠨ ᠴᠢᠩ ᠤᠨ ᠴᠡᠷᠢᠭ ᠢ ᠬᠤᠶᠠᠷ ᠲᠠᠶᠢᠰᠢ ᠨᠢ ᠢᠷᠡᠨ᠂ ᠠᠯᠠᠯᠳᠤᠨ ᠲᠤᠯᠤᠯᠳᠤᠨ ᠵᠠᠮ ᠭᠠᠷᠭᠠᠭᠰᠠᠨ ᠳᠤ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠦᠯᠡᠳᠡᠭᠰᠡᠨ ᠬᠡᠳᠦᠬᠡᠨ ᠵᠠᠭᠤᠨ ᠴᠡᠷᠢᠭ ᠲᠠᠢ ᠪᠠᠨ ᠲᠠᠶᠢᠨ ᠤ ᠲᠠᠯᠠᠪᠤᠷ ᠠᠴᠠ ᠰᠤᠭᠤᠷᠠᠨ ᠭᠠᠷᠴᠤ᠂ ᠰᠢᠨᠳᠠᠰᠤᠳᠤ ᠬᠦᠯᠦᠭ ᠤᠨ ᠬᠤᠷᠳᠤ ᠪᠠᠷ ᠲᠠᠷᠠᠯᠵᠢ ᠶᠢᠨ ᠠᠮᠠ ᠪᠠᠷ ᠪᠤᠷᠤᠭᠤᠯᠠᠵᠠᠢ᠃ ᠳ᠋ᠠᠢ ᠪᠠᠭᠠᠳᠤᠷ ᠵᠠᠶᠢᠰᠠᠩ᠂ ᠪᠤᠯᠤᠳ ᠬᠤᠵᠤ ᠲᠡᠷᠢᠬᠦᠳᠡᠢ ᠨᠡᠯᠢᠶᠡᠳ ᠤᠯᠠᠨ ᠨᠤᠶᠠᠳ ᠴᠡᠷᠢᠭ ᠪᠠᠶ᠎ᠠ ᠦᠷᠡᠭᠳᠡᠵᠦ᠂ ᠲᠤᠭᠠᠷ ᠠᠷᠠᠪᠳᠠᠨ᠂ ᠲᠠᠨᠵᠢᠨ ᠤᠮᠪᠤ ᠨᠡᠷ ᠰᠢᠷᠬ᠎ᠠ ᠤᠯᠵᠤ᠂ ᠬᠤᠶᠠᠷ ᠮᠢᠩᠭ᠎ᠠ ᠰᠢᠬᠠᠮ ᠴᠡᠷᠢᠭ ᠠᠯᠭ᠍ᠳᠠᠵᠤ᠂ ᠭᠤᠷᠪᠠᠨ ᠮᠢᠩᠭ᠎ᠠ ᠭᠠᠷᠤᠢ ᠬᠦᠮᠦᠨ ᠤᠯᠵᠠᠯᠠᠭᠳᠠᠵᠠᠢ᠃ ᠪᠠᠰᠠ ᠠᠴᠢᠶ᠎ᠡ ᠬᠦᠰᠭᠡ᠂ ᠦᠭᠡᠷ ᠬᠤᠨᠢ ᠬᠡᠳᠦᠨ ᠲᠦᠮᠡ ᠪᠠᠷ ᠮᠠᠨᠵᠤ ᠶᠢᠨ ᠴᠡᠷᠢᠭ ᠲᠤ ᠤᠯᠠᠢ ᠪᠤᠯᠪᠠ᠃ ᠠᠨᠤ ᠭ᠋ᠠᠳᠤᠨ ᠪᠤᠴᠠᠰᠢ ᠦᠭᠡᠢ ᠨᠤᠭᠤᠷᠠᠰᠠᠢ ᠦᠭᠡᠢ ᠪᠠᠶᠢᠯᠳᠤᠨ ᠪᠠᠶᠢᠬᠤ ᠳᠠᠭᠠᠨ ᠲᠠᠶᠢᠰᠤᠨ ᠤ ᠭᠠᠯᠳᠤ ᠫᠤᠤ ᠶᠢᠨ ᠭᠠᠯᠠᠯᠭ᠎ᠠ ᠳᠤ ᠬᠦᠨᠳᠦ  ᠰᠢᠷᠬᠠᠳᠤᠨ ᠦᠬᠡᠳᠡ ᠪᠤᠯᠵᠠᠢ᠃ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠤ ᠬᠠᠶᠢᠷᠠᠳᠠᠢ ᠬᠠᠨᠢ ᠢᠳᠡᠭᠡᠯᠳᠡᠢ ᠬᠠᠪᠰᠤᠷᠤᠭᠴᠢ ᠠᠨᠤ ᠬᠠᠳᠤᠨ ᠭᠡᠭᠴᠢ ᠦᠯᠠᠮᠵᠢ ᠭᠠᠪᠢᠶ᠎ᠠ ᠦᠷᠭᠡᠨ ᠵᠢᠳᠭᠦᠯ ᠢᠶᠠᠨ ᠦᠨᠢ ᠶᠢᠨ ᠲᠡᠤᠭᠡᠨ ᠳᠤ ᠲᠡᠮᠳᠡᠭᠯᠡᠭᠦᠯᠵᠦ᠂ ᠠᠮᠢ ᠨᠠᠰᠤᠨ ᠤ ᠢᠷᠠᠭᠤ ᠲᠠᠭᠤᠯᠠᠯ ᠳᠠᠭᠠᠨ ᠵᠠᠭᠤᠨ ᠮᠤᠳᠤ ᠶᠢᠨ ᠴᠤᠤᠳᠤ ᠪᠠᠶᠢᠯᠳᠤᠭᠠᠨ ᠢᠶᠠᠷ ᠲᠡᠭᠦᠰᠭᠡᠯ ᠴᠢᠭ ᠵᠢᠷᠤᠭᠰᠠᠨ ᠪᠢᠯᠠ᠃      ᠠᠨᠤ ᠬᠠᠳᠤᠨ ᠨᠢᠭᠡ ᠨᠠᠰᠤ ᠪᠠᠷ ᠢᠶᠠᠨ ᠤᠯᠤᠰ ᠲᠦᠷᠦ ᠶᠢᠨ ᠤᠴᠢᠷ ᠶᠠᠪᠤᠳᠠᠯ ᠢ ᠠᠷᠭᠠᠴᠠᠵᠤ ᠰᠢᠢᠳᠪᠤᠷᠢᠯᠠᠬᠦ ᠠᠷᠭ᠎ᠠ ᠪᠤᠳᠤᠯᠭ᠎ᠠ ᠶᠢ ᠰᠤᠷᠢᠨ᠂ ᠲᠠᠶᠢᠨ ᠪᠠᠶᠢᠯᠳᠤᠭᠠᠨ ᠳᠤ ᠭᠠᠪᠰᠢᠭᠠᠶᠢᠯᠠᠨ ᠤᠷᠤᠯᠴᠠᠨ ᠴᠡᠷᠢᠭ ᠮᠤᠷᠢᠳ ᠢ ᠴᠢᠳᠠᠮᠠᠭᠠᠢ ᠵᠢᠯᠤᠭᠤᠳᠴᠤ ᠶᠠᠪᠤᠵᠠᠢ᠃ ᠬᠤᠷᠴᠠ ᠰᠡᠷᠭᠦᠯᠡᠩ ᠤᠬᠠᠭᠠᠨ ᠡᠷᠳᠡᠮ ᠬᠤᠤᠰᠯᠠᠭᠰᠠᠨ ᠭᠤᠸ᠎ᠠ ᠦᠵᠡᠰᠭᠦᠯᠡᠩᠳᠦ ᠠᠨᠤ ᠬᠠᠳᠤᠨ ᠦᠢᠷᠡᠳ ᠤᠨ ᠲᠡᠤᠭᠡᠨ ᠳᠤ ᠤᠳᠤ ᠪᠤᠯᠵᠤ ᠮᠦᠩᠭᠡ ᠭᠡᠷᠡᠯᠳᠤᠵᠤ᠂ ᠮᠤᠩᠭᠤᠯ ᠪᠦᠰᠡᠭᠦ᠋ᠢᠴᠤᠳ ᠤᠨ ᠲᠤᠮᠳᠠ ᠰᠤᠳᠤ ᠪᠤᠯᠤᠭᠰᠠᠨ ᠡᠬᠦᠷᠢᠳᠡ ᠶᠢᠨ ᠲᠠᠭᠤᠷᠢᠶᠠᠯ ᠪᠢᠯᠠ᠃ ᠮᠤᠩᠭᠤᠯ ᠤᠨ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠪᠠᠮᠪᠠᠵᠠᠪ ᠤᠨ ᠡᠩᠬᠡᠳᠤᠶᠠᠭ᠎ᠠ ︽ᠠᠨᠤ ᠬᠠᠳᠤᠨ︾ ᠭᠡᠬᠦ ᠰᠢᠯᠦᠭ ᠲᠡᠭᠡᠨ᠄      ᠁ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠡᠪᠡᠷᠰᠢᠳᠡᠯ᠎ᠡ      ᠡᠪᠡᠷ ᠨᠤᠮᠤ ᠡᠪᠰᠢᠶᠡᠯᠭᠡᠵᠦ ᠶᠠᠪᠤᠭᠰᠠᠨ      ᠡᠩᠭᠡᠰᠭᠡᠳᠦ ᠬᠠᠴᠠᠷ ᠢᠶᠠᠨ ᠲᠤᠯᠢᠳᠠᠬᠤ ᠵᠡᠪ ᠦᠭᠡᠢ      ᠡᠮᠡᠭᠡᠯ ᠤᠨ ᠪᠦᠭᠦᠷᠭᠡ ᠳᠤ ᠲᠤᠭᠬᠢᠵᠦ ᠶᠠᠪᠤᠭᠰᠠᠨ      ᠣᠷᠭᠤᠬᠤ ᠨᠠᠷᠠ ᠰᠢᠭ᠋ ᠠᠨᠤ ᠬᠠᠳᠤᠨ      ᠤᠨᠳᠠᠷᠠᠬᠤ ᠭᠠᠯ ᠤᠨ ᠰᠢᠨᠡᠬᠡᠨ ᠭᠡᠩᠰᠢᠭᠦᠦ      ᠡᠷᠡᠮᠡᠭ ᠵᠤᠷᠢᠮᠠᠭ ᠠᠨᠤ ᠬᠠᠳᠤᠨ       ᠡᠮᠳᠡᠷᠡᠬᠦ ᠬᠠᠳᠠᠨ ᠤ ᠪᠤᠯᠤᠷ ᠲᠡᠯᠡᠰᠳᠤ      ᠦᠬᠦᠯ ᠤᠨ ᠲᠠᠮᠠᠭ᠎ᠠ ᠲᠠᠢ ᠭᠠᠯᠳᠠᠨ ᠪᠤᠱᠤᠭᠳᠤ ᠳᠤ      ᠦᠢᠯᠡ ᠪᠠᠷ ᠬᠠᠨᠢᠯᠠᠭᠰᠠᠨ ᠦᠵᠡᠰᠭᠦᠯᠡᠩ ᠭᠤᠸ᠎ᠠ      ᠦᠳᠡᠯᠦᠭᠡᠳ ᠮᠤᠷᠳᠠᠬᠤ ᠬᠤᠷᠸ᠎ᠠ ᠶᠢᠨ ᠪᠠᠭᠤᠳᠠᠯ ᠳᠤ      ᠦᠯᠢᠭᠡᠷ ᠰᠢᠭ ᠦᠩᠭᠡᠷᠡᠭᠰᠡᠨ ᠮᠤᠩᠭᠤᠯᠵᠢᠨ ᠭᠤᠸ᠎ᠠ      ᠬᠠᠯᠬ᠎ᠠ ᠦᠢᠷᠡᠳ ᠤᠨ ᠡᠪ ᠬᠠᠭᠠᠷᠠᠬᠤ ᠳᠤ      ᠬᠠᠪᠴᠢᠯ ᠳᠤᠨᠢ ᠤᠨᠠᠭᠰᠠᠨ ᠬᠠᠳᠤᠨ ᠭᠤᠸ᠎ᠠ      ᠢᠰᠡᠭᠡᠢ ᠬᠦᠷᠦᠨ ᠤ ᠲᠡᠤᠬᠡ ᠶᠢᠨ ᠨᠡᠭᠦᠳᠡᠯ ᠳᠤ      ᠡᠮᠡᠬᠡᠯ ᠲᠡᠭᠡᠷ᠎ᠡ ᠬᠠᠯᠢᠭᠰᠠᠨ ᠮᠤᠩᠭᠤᠯᠵᠢᠨ ᠭᠤᠸ᠎ᠠ ᠁ ᠭᠡᠵᠦ ᠤᠶᠠᠩᠭᠠᠯᠠᠭᠰᠠᠨ ᠪᠠᠶᠢᠯ᠎ᠠ᠃
ᠢᠷᠡᠯᠲᠡ᠄ ︽ᠮᠣᠩᠭᠤᠯᠵᠢᠨ ᠭᠤᠸ᠎ᠠ ᠬᠠᠲᠤᠳ︾ ᠨᠣᠮ ᠠᠴᠠ