| ᠬᠠᠳᠠᠬᠦᠦ | | ᠤᠬᠠᠭᠠ ᠣᠷᠣᠭᠰᠠᠨ ᠴᠠᠭ ᠠᠴᠠ | ᠮᠠᠨ ᠤ ᠭᠡᠷ ᠲᠤ ᠠᠪᠤ ᠶᠢᠨ ᠱᠦᠭᠦᠢ ᠭᠡᠵᠦ | ᠣᠯᠠᠨ ᠰᠠᠶᠢᠬᠠᠨ ᠨᠣᠮ ᠲᠠᠢ | ᠥᠨᠳᠥᠷ ᠰᠢᠯᠦᠨ ᠬᠤᠷᠭᠤ ᠪᠠᠶᠢᠭᠰᠠᠨ ᠪᠢᠯᠡ | ᠣᠨᠢᠰᠤᠲᠠᠢ ᠲᠡᠷᠡ ᠱᠦᠭᠦᠢ ᠳᠣᠲᠣᠷᠠᠬᠢ | ᠦᠷᠦᠭᠡᠰᠦᠲᠡᠢ ᠠᠷᠪᠢᠨ ᠨᠣᠮ ᠤᠳ ᠢ ᠬᠠᠷᠠᠵᠤ | ︽ᠪᠠᠲᠤ ᠬᠠᠭᠠᠨ︾᠂ ︽ᠬᠤᠪᠢᠯᠠᠢ ᠬᠠᠭᠠᠨ︾᠂ | ︽ᠲᠡᠮᠦᠵᠢᠨ ᠴᠢᠩᠭᠢᠰ ᠬᠠᠭᠠᠨ ᠤ ᠴᠡᠷᠢᠭ ᠬᠡᠷᠡᠭᠯᠡᠬᠦ ᠶᠣᠰᠣᠨ︾ ᠭᠡᠳ | ᠪᠠᠷᠤᠭ ᠨᠡᠯᠢᠶᠡᠳ ᠢ ᠨᠢ ᠴᠡᠭᠡᠵᠢᠯᠡᠴᠢᠬᠡᠭᠰᠡᠨ ᠪᠠᠶᠢᠳᠠᠭ ᠰᠠᠨ | ᠠᠪᠤ ᠮᠢᠨᠢ ᠲᠡᠭᠡᠬᠦ ᠳᠤ | ᠠᠵᠢᠯ ᠠᠴᠠ ᠪᠠᠨ ᠪᠠᠭᠤᠵᠤ ᠢᠷᠡᠪᠡᠯ ᠨᠣᠮ ᠱᠠᠭᠠᠶᠢᠵᠤ ᠰᠠᠭᠤᠨᠠ | ᠠᠮᠠᠷᠠᠯᠲᠠ ᠶᠢᠨ ᠡᠳᠦᠷ ᠨᠡᠩ ᠴᠤ | ᠠᠪᠳᠠᠷᠠ ᠨᠣᠮ ᠲᠠᠢ ᠪᠠᠨ ᠯᠡ ᠨᠣᠴᠣᠯᠳᠣᠵᠤ ᠰᠠᠭᠤᠳᠠᠭ ᠪᠢᠯᠡ | ᠬᠠᠶᠠ ᠵᠠᠷᠢᠮ ᠳᠤ ᠪᠠᠨ | ᠬᠠᠯᠠᠰᠠᠭᠤᠬᠠᠨ ᠬᠠᠷᠢᠵᠤ ᠢᠷᠡᠬᠦ ᠳᠤ ᠪᠠᠨ | ᠬᠠᠨᠢᠲᠠᠨ ᠨᠦᠬᠦᠳ ᠤᠨ ᠬᠢᠨᠢ ᠭᠠᠷ ᠤᠨ ᠪᠡᠯᠡᠭ ᠭᠡᠵᠦ | ᠬᠠᠷᠮᠠᠨ ᠳᠦᠭᠦᠷᠡᠩ ᠨᠣᠮ ᠲᠠᠢ ᠴᠤ ᠣᠷᠤᠵᠤ ᠢᠷᠡᠳᠡᠭ ᠪᠠᠶᠢᠭᠰᠠᠨ | ᠬᠤᠷᠠᠯ ᠴᠤᠭᠯᠠᠭᠠᠨ ᠪᠣᠯᠵᠤ | ᠬᠤᠯᠠ ᠬᠤᠲᠠ ᠭᠠᠵᠠᠷ ᠶᠠᠪᠤᠪᠠᠯ | ᠵᠠᠪᠰᠠᠷ ᠵᠠᠢ ᠪᠠᠷ ᠨᠢ ᠨᠣᠮ ᠤᠨ ᠳᠡᠯᠭᠡᠭᠦᠷ ᠢᠶᠠᠷ ᠣᠴᠢᠵᠤ | ᠵᠠᠪᠠᠯ ᠥᠨᠥᠬᠢ ᠬᠡᠳᠦ ᠶᠢ ᠪᠠᠨ ᠴᠤᠭᠯᠠᠭᠤᠯᠵᠤ ᠠᠪᠳᠠᠭ ᠰᠠᠨ | ᠨᠠᠰᠤ ᠠᠬᠢᠵᠤ ᠢᠷᠡᠭᠡᠳ ᠨᠠᠰᠤᠨ ᠤ ᠠᠮᠠᠷᠠᠯᠲᠠ ᠪᠠᠨ ᠠᠪᠴᠤ | ᠨᠠᠷᠠᠨ ᠤ ᠪᠣᠷᠣ ᠬᠤᠨᠢᠴᠢᠨ ᠪᠣᠯᠵᠤ ᠶᠠᠪᠤᠬᠤ ᠳᠤ ᠪᠠᠨ | ᠨᠣᠮ ᠢᠶᠠᠨ ᠡᠪᠦᠷᠲᠦᠯᠡᠵᠦ ᠨᠣᠮᠣᠬᠠᠨ ᠬᠠᠷᠠ ᠪᠠᠨ ᠤᠨᠤᠭᠠᠳ | ᠥᠷᠯᠥᠭᠡ ᠰᠦᠷᠦᠭ ᠢᠶᠠᠨ ᠳᠠᠭᠠᠭᠠᠳ ᠮᠣᠷᠳᠠᠪᠠᠯ | ᠡᠳᠦᠷᠵᠢᠨ ᠰᠢᠬᠠᠭᠤ ᠬᠤᠨᠢᠨ ᠤ ᠴᠠᠭᠠᠨᠠ ᠨᠣᠮ ᠱᠠᠭᠠᠶᠢᠵᠤ ᠰᠠᠭᠤᠳᠠᠭ ᠪᠢᠯᠡ | ᠥᠨᠥ ᠡᠷᠭᠢᠵᠦ ᠪᠣᠳᠣᠬᠤ ᠳᠤ | ᠠᠪᠤ ᠨᠣᠮ ᠬᠤᠶᠠᠷ | ᠦᠷᠭᠦᠯᠵᠢ ᠴᠤᠭ ᠲᠤ ᠪᠠᠨ ᠪᠠᠶᠢᠭᠰᠠᠨ ᠶᠤᠮ ᠳ᠋ᠠ | ᠤᠬᠠᠭᠠᠨ ᠪᠠᠭᠠ ᠶᠢᠨ ᠦᠶᠡ ᠠᠴᠠ ᠡᠳᠦᠢ ᠳᠤ ᠲᠤᠯᠲᠠᠯᠠ | ᠠᠪᠤ ᠶᠢᠨ ᠲᠤᠬᠠᠢ ᠰᠠᠭᠤᠭᠳᠠᠯ ᠭᠡᠪᠡᠯ | ᠠᠷᠢᠬᠢ ᠪᠢᠰᠢ ᠬᠠᠷᠢᠨ ᠨᠣᠮ ᠯᠡ ᠪᠠᠶᠢᠨᠠ | ᠠᠢ᠂ ᠶᠠᠭᠠᠬᠢᠬᠤᠪ ᠠᠮᠢᠳᠤᠷᠠᠬᠤ ᠠᠵᠢᠯᠯᠠᠬᠤ ᠶᠢᠨ ᠡᠷᠬᠡᠨ ᠳᠤ | ᠠᠨᠳᠠ ᠨᠦᠬᠦᠳ ᠤᠨ ᠨᠢᠩᠵᠢᠨ ᠰᠡᠳᠬᠢᠯ ᠳᠤ | ᠠᠮᠰᠠᠵᠤ ᠪᠦᠷ ᠠᠬᠠᠳᠠᠭᠤᠯᠵᠤ ᠶᠠᠪᠤᠭᠰᠠᠨ ᠴᠤ | ᠠᠵᠢᠯ ᠨᠣᠮ ᠬᠤᠶᠠᠷ ᠢᠶᠠᠨ ᠣᠷᠬᠢᠵᠤ ᠬᠠᠶᠠᠵᠤ ᠶᠠᠪᠤᠭᠠ ᠦᠭᠡᠢ ᠶᠤᠮ | ᠠᠮᠢᠳᠤᠷᠠᠯ ᠦᠢᠯᠡᠰ ᠬᠤᠶᠠᠷ ᠲᠤ ᠪᠠᠨ ᠣᠰᠣᠯᠳᠠᠵᠤ ᠪᠤᠷᠤᠭᠤᠳᠴᠤ ᠪᠠᠶᠢᠭᠠ ᠦᠭᠡᠢ ᠶᠤᠮ | ᠠᠪᠳᠠᠷᠠ ᠠᠪᠳᠠᠷᠠ ᠠᠪᠤ ᠶᠢᠨ ᠮᠢᠨᠢ ᠨᠣᠮ | ᠦᠷᠡ ᠪᠢᠳᠡᠨ ᠳᠤ ᠪᠠᠨ ᠦᠯᠡᠳᠡᠭᠡᠭᠰᠡᠨ ᠦᠨᠡᠲᠦ ᠶᠡᠭᠡ ᠡᠷᠳᠡᠨᠢ ᠶᠤᠮ | ᠠᠯᠲᠠ ᠮᠦᠩᠭᠦ ᠪᠢᠰᠢ ᠭᠡᠰᠡᠨ ᠴᠤ | ᠠᠯᠲᠠ ᠮᠦᠩᠭᠦ ᠪᠠᠷ ᠦᠨᠡᠯᠡᠰᠢ ᠦᠭᠡᠢ | ᠠᠪᠤᠭᠠᠳ ᠠᠭᠤᠳᠠᠯᠤᠭᠠᠳ ᠪᠠᠷᠠᠰᠢ ᠦᠭᠡᠢ | ᠡᠷᠳᠡᠮ ᠤᠨ ᠭᠦᠨ ᠠᠭᠤᠷᠬᠠᠢ ᠶᠤᠮ | ᠤᠮᠪᠠᠭᠠᠳ ᠰᠡᠯᠢᠭᠡᠳ ᠭᠡᠲᠦᠯᠦᠰᠢ ᠦᠭᠡᠢ | ᠤᠬᠠᠭᠠᠨ ᠤ ᠶᠡᠭᠡ ᠲᠠᠩᠭᠢᠰ ᠶᠤᠮ᠃ | | |