ᠯᠠᠯᠦ ᠶᠢᠨ ᠶᠢᠷᠳᠢᠨᠴᠦ ᠶᠢ ᠢᠯᠠᠨ ᠳᠣᠷᠣᠶᠢᠳᠠᠭᠤᠯᠣᠭᠴᠢ ᠢᠯ ᠬᠠᠭᠠᠨ ᠬᠦᠯᠡᠬᠦ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/20
      ᠶᠡᠭᠡ ᠬᠠᠭᠠᠳ ᠤᠨ ᠣᠯᠣᠰ ᠤᠨ ᠠᠩᠬᠠᠨ ᠤ ᠬᠠᠭᠠᠨ ᠬᠦᠯᠡᠬᠦ ᠪᠣᠯ ᠴᠢᠩᠭᠢᠰ ᠬᠠᠭᠠᠨ ᠤ ᠬᠦᠦ ᠳᠣᠯᠣᠢ ᠶᠢᠨ ᠭᠤᠳᠠᠭᠠᠷ ᠬᠦᠦ᠂ ᠶᠡᠭᠡ ᠬᠠᠭᠠᠨ ᠮᠦᠩᠬᠡ᠂ ᠬᠤᠪᠢᠯᠠᠢ ᠨᠠᠷ ᠤᠨ ᠳᠡᠭᠦᠦ ᠪᠠᠶᠢᠭᠰᠠᠨ ᠪᠦᠭᠡᠳ 1217 ᠣᠨ ᠳᠤ ᠲᠦᠷᠦᠵᠡᠢ᠃ ᠬᠦᠯᠡᠬᠦ ᠮᠣᠩᠭᠤᠯ ᠤᠨ ᠡᠵᠡᠨᠳᠦ ᠬᠦᠷᠦᠨ ᠤ ᠪᠠᠷᠠᠭᠤᠨ ᠡᠮᠦᠨᠡᠳᠦ ᠬᠡᠰᠡᠭ ᠢ ᠠᠰᠣᠷᠣ ᠠᠭᠤᠳᠠᠮ ᠨᠣᠳᠤᠭ ᠢᠶᠠᠷ ᠦᠷᠬᠡᠵᠢᠬᠦᠯᠵᠦ᠂ ᠢᠯ ᠬᠠᠭᠠᠳ ᠤᠨ ᠣᠯᠣᠰ ᠢ ᠪᠠᠶᠢᠭᠤᠯᠣᠭᠰᠠᠨ ᠶᠣᠮ᠃ ᠮᠣᠩᠭᠤᠯ ᠤᠨ ᠡᠵᠡᠨᠳᠦ ᠬᠦᠷᠦᠨ ᠤ ᠶᠡᠭᠡ ᠬᠠᠭᠠᠨ ᠮᠦᠩᠬᠡ ᠣᠶᠢᠷᠠᠬᠢ ᠳᠣᠷᠣᠨᠠᠳᠣ ᠣᠷᠣᠭᠤ ᠳᠡᠬᠦᠦ ᠬᠦᠯᠡᠬᠦ ᠶᠢ ᠠᠷᠪᠠᠨ ᠠᠶᠢᠯ ᠪᠦᠷᠢ ᠠᠴᠠ ᠬᠤᠶᠠᠷ ᠴᠡᠷᠢᠭ ᠭᠠᠷᠭᠠᠵᠦ᠂ ᠠᠷᠮᠢ ᠪᠦᠷᠢᠳᠦᠬᠦᠯᠦᠨ ᠶᠠᠪᠣᠭᠤᠯᠬᠤ ᠳᠤ᠂ ᠠᠰᠰᠠᠰᠢᠨ ᠨᠤᠭᠤᠳ ᠤᠨ ᠴᠠᠶᠢᠵᠠ ᠪᠠᠬᠢᠯᠡᠯᠳᠡ ᠶᠢ ᠳᠣᠪᠳᠣᠯᠣᠨ ᠡᠵᠡᠯᠡᠵᠦ᠂ ᠶᠡᠭᠡ ᠬᠠᠭᠠᠨ ᠤ ᠵᠠᠬᠢᠷᠭᠠᠨ ᠳᠤ ᠳᠠᠭᠠᠭᠤᠯᠬᠤ᠂ ᠮᠦᠨ ᠦᠨᠡᠨᠴᠢ ᠠᠯᠪᠠᠳᠣ ᠶᠢᠨ ᠶᠣᠰᠣᠭᠠᠷ ᠬᠦᠴᠦᠨ ᠵᠢᠳᠬᠦᠬᠦ ᠶᠢ ᠪᠠᠭᠳᠠᠳ᠋ ᠤᠨ ᠬᠠᠯᠢᠹᠠ ᠪᠠᠷ ᠬᠦᠯᠢᠶᠡᠨ ᠵᠦᠪᠰᠢᠶᠡᠷᠡᠭᠦᠯᠬᠦ ᠬᠡᠰᠡᠨ ᠬᠤᠶᠠᠷ ᠭᠤᠣᠯ ᠡᠭᠦᠷᠭᠡ ᠶᠢ ᠬᠠᠷᠢᠭᠤᠴᠠᠭᠤᠯᠵᠠᠢ᠃      1090 ᠣᠨ ᠳᠤ ᠬᠠᠰᠠᠨ ᠢᠪᠠᠨ ᠰᠠᠪᠠᠾ ᠠᠰᠰᠠᠰᠢᠨ ᠨᠤᠭᠤᠳ ᠤᠨ ᠱᠠᠰᠢᠨ ᠤ ᠬᠡᠳᠦ ᠳᠡᠪᠡᠷᠡᠵᠦ ᠣᠯᠠᠶᠢᠷᠠᠭᠰᠠᠨ ᠰᠢᠳᠦᠯᠬᠡᠳᠦ ᠪᠦᠯᠦᠭᠯᠡᠯ ᠢ ᠦᠨᠳᠦᠰᠦᠯᠡᠨ ᠪᠠᠶᠢᠭᠤᠯᠵᠦ᠂ ᠦᠪᠡᠷ ᠤᠨ ᠨᠢᠭᠤᠴᠠ ᠬᠤᠯᠪᠣᠭ᠎ᠠ ᠬᠡᠯᠬᠢᠶ᠎ᠡ ᠶᠢ ᠭᠠᠵᠠᠷ ᠰᠠᠢ ᠦᠬᠡᠢ ᠰᠠᠯᠭᠠᠭᠤᠯᠣᠨ ᠠᠭᠠᠯᠵᠢᠨ ᠤ ᠳᠣᠣᠷ ᠮᠡᠳᠦ ᠬᠡᠯᠬᠢᠴᠢᠬᠡᠬᠡᠳ᠂ ᠦᠪᠡᠷ ᠤᠨ ᠳᠠᠯ᠎ᠠ ᠳᠤ ᠯᠠᠯᠣ ᠶᠢᠨ ᠡᠳᠦᠢ ᠳᠡᠳᠦᠢ ᠦᠨᠡᠨᠴᠢ ᠱᠠᠪᠢ ᠨᠠᠷ ᠢ ᠡᠯᠰᠡᠬᠦᠯᠦᠨ ᠨᠣᠮᠯᠠᠬᠤ ᠪᠣᠯᠣᠭᠰᠠᠨ ᠲᠡᠦᠬᠡ ᠲᠠᠢ ᠪᠢᠯᠡ᠃ ᠡᠨᠡ ᠮᠠᠭᠤ ᠢᠷᠸ᠎ᠠ ᠶᠢᠨ ᠪᠦᠯᠦᠭᠯᠡᠯ ᠢ ᠳᠠᠷᠣᠬᠤ ᠬᠡᠵᠦ ᠦᠵᠡᠭᠡᠳ ᠣᠯᠠᠩᠭᠠᠰᠣᠭᠰᠠᠨ ᠬᠦᠯᠦᠰᠦᠨ ᠤ ᠠᠯᠠᠭᠤᠷᠴᠢᠨ ᠤ ᠴᠢᠴᠢᠯᠡᠬᠦᠷ ᠬᠢᠳᠣᠭᠠᠨ ᠳᠤ ᠦᠷᠳᠦᠵᠦ ᠠᠮᠢ ᠬᠡᠯᠳᠦᠷᠢᠭᠰᠡᠨ ᠬᠡᠨ ᠪᠣᠯᠪᠠᠴᠣ ᠢᠯᠭᠠᠭ᠎ᠠ ᠦᠬᠡᠢ ᠣᠳᠠᠯ ᠦᠬᠡᠢ ᠠᠷᠣ ᠬᠤᠳᠠᠷᠭᠠᠨ ᠳᠤᠨᠢ ᠪᠣᠰᠣᠯᠭ᠎ᠠ ᠰᠠᠮᠠᠭᠤᠨ ᠳᠡᠭᠳᠡᠵᠦ᠂ ᠠᠯᠠᠯᠭ᠎ᠠ ᠬᠢᠳᠣᠯᠭ᠎ᠠ ᠦᠷᠬᠦᠯᠵᠢᠯᠡᠭᠰᠡᠨ ᠢᠷᠡᠬᠦ ᠳᠤ ᠠᠶᠣᠮᠰᠢᠭᠳᠣ ᠠᠭᠤᠯᠠ ᠶᠢᠨ ᠡᠪᠦᠭᠡᠳ ᠤᠨ ᠬᠠᠷ᠎ᠠ ᠬᠡᠷᠡᠭ ᠳᠡᠶᠢᠯᠳᠡᠰᠢ ᠦᠬᠡᠢ ᠬᠡᠳᠡᠭ ᠢ ᠡᠴᠦᠰ ᠣᠬᠠᠭᠠᠷᠠᠳᠠᠭ ᠠᠵᠣᠭᠤ᠃      ᠬᠦᠯᠡᠬᠦ ᠶᠡᠭᠡ ᠴᠡᠷᠢᠭ ᠢᠶᠠᠨ ᠳᠠᠭᠠᠭᠤᠯᠣᠨ ᠬᠦᠷᠴᠦ ᠣᠴᠢᠬᠤ ᠳᠤ ᠮᠣᠩᠭᠤᠯᠴᠣᠳ ᠤᠨ ᠪᠠᠶᠢᠯᠳᠣᠨ ᠳᠠᠭᠠᠭᠤᠯᠣᠯ᠂ ᠬᠤᠷᠣᠰᠣᠯ ᠵᠠᠨᠣᠯ ᠠᠴᠠ ᠦᠬᠦᠳᠡᠯ᠎ᠡ  ᠪᠠᠨ ᠠᠶᠣᠨ ᠰᠦᠷᠳᠡᠭᠰᠡᠨ ᠢᠷᠠᠨ ᠤ ᠵᠠᠬᠢᠷᠣᠭᠴᠢ ᠨᠠᠷ ᠠᠶᠣᠮᠰᠢᠭᠳᠣ ᠡᠨᠡ ᠪᠦᠯᠦᠭ ᠠᠴᠠ ᠬᠡᠳᠦᠢ ᠠᠶᠣᠵᠦ ᠬᠤᠯᠴᠠᠶᠢᠵᠦ ᠪᠠᠶᠢᠭᠰᠠᠨ ᠴᠦ ᠠᠰᠰᠠᠰᠢᠨ ᠨᠤᠭᠤᠳ ᠢ ᠦᠯᠦᠬᠡᠢ ᠲᠠᠢ ᠬᠡᠦᠬᠡᠳ ᠴᠦ ᠦᠯᠡᠳᠡᠬᠡᠯ ᠦᠬᠡᠢ ᠬᠦᠢᠰᠦ ᠳᠡᠮᠳᠡᠷᠢᠨ ᠣᠰᠠᠳᠬᠠᠬᠤ ᠬᠡᠵᠦ ᠣᠷᠢᠶᠠᠯᠠᠭᠰᠠᠨ ᠬᠦᠯᠡᠬᠦ ᠬᠠᠭᠠᠨ ᠤ ᠳᠣᠷ᠎ᠠ ᠲᠠᠢ ᠳᠣᠷ᠎ᠠ ᠦᠬᠡᠢ ᠡᠪᠰᠡᠬᠦ  ᠠᠴᠠ ᠦᠬᠡᠷ᠎ᠡ ᠠᠷᠭ᠎ᠠ ᠪᠠᠶᠢᠭᠰᠠᠨ ᠦᠬᠡᠢ᠃ ᠮᠣᠩᠭᠤᠯᠴᠣᠳ ᠬᠡᠳᠦᠶᠢᠪᠡᠷ ᠬᠦᠴᠦ ᠴᠢᠳᠠᠯ ᠤᠨ ᠢᠶᠠᠨ ᠢᠳᠡ ᠦᠶ᠎ᠡ ᠳᠤ ᠪᠠᠶᠢᠭᠰᠠᠨ ᠴᠦ ᠲᠠᠩ ᠢᠶᠠᠷ ᠢᠶᠠᠨ ᠠᠯᠠᠮᠦ᠋ᠲ  ᠤᠨ ᠬᠦᠴᠦ ᠴᠢᠳᠠᠯ ᠢ ᠨᠣᠭᠤᠯᠬᠤ ᠨᠢ ᠬᠡᠴᠡᠬᠦᠦ ᠵᠣᠷᠢᠯᠳᠠ ᠪᠠᠶᠢᠵᠠᠢ᠃ ᠮᠣᠩᠭᠤᠯ ᠤᠨ ᠴᠡᠷᠢᠭ ᠬᠤᠳᠠ ᠰᠠᠭᠤᠷᠢᠨ ᠪᠠᠬᠢᠯᠡᠯᠳᠡ ᠤᠳ ᠢ ᠳᠠᠷᠠᠭᠠᠯᠠᠨ ᠡᠵᠡᠯᠡᠭᠰᠡᠨ ᠤ ᠡᠴᠦᠰ ᠲᠤ᠂ ᠪᠦᠳᠦᠨ ᠭᠤᠷᠪᠠᠨ ᠵᠢᠯ ᠠᠭᠤᠯᠠᠰ ᠤᠨ ᠳᠠᠭᠳᠣ ᠳᠤ ᠣᠷᠣᠰᠢᠬᠤ ᠬᠠᠯᠳᠠᠰᠢ ᠦᠬᠡᠢ ᠲᠡᠷᠡ ᠴᠠᠶᠢᠵᠠ ᠶᠢ ᠪᠦᠰᠡᠯᠡᠨ ᠰᠠᠭᠤᠵᠦ᠂ ᠮᠢᠩᠭᠠᠨ ᠠᠯᠬᠤᠮ ᠳᠣᠳᠣᠮ ᠳᠤ ᠬᠦᠴᠦ ᠳᠡᠩᠬᠡᠬᠡ ᠲᠠᠢ ᠴᠡᠷᠢᠭ ᠠᠴᠠ ᠪᠦᠷᠢᠳᠦᠭᠰᠡᠨ ᠠᠩᠬᠢ ᠴᠡᠷᠢᠭ ᠪᠠᠶᠢᠷᠢᠯᠠᠭᠤᠯᠣᠨ᠂ ᠬᠢᠳᠠᠳ ᠤᠨ ᠣᠷᠠᠴᠣᠳ ᠤᠨ ᠦᠢᠯᠡᠳᠦᠭᠰᠡᠨ 250 ᠠᠯᠬᠤᠮ ᠤᠨ ᠳᠣᠰᠬᠠᠯ ᠲᠠᠢ ᠫᠣᠣ ᠨᠤᠭᠤᠳ ᠢ ᠭᠠᠷ ᠳᠠᠮᠵᠢᠭᠤᠯᠣᠨ ᠵᠦᠬᠡᠬᠡᠵᠦ᠂ ᠠᠭᠤᠯᠠ ᠶᠢᠨ ᠣᠷᠣᠢ ᠳᠤ ᠭᠠᠷᠭᠠᠵᠠᠢ᠃ ᠬᠤᠳᠠ ᠶᠢ ᠬᠠᠷᠪᠣᠵᠦ ᠡᠬᠢᠯᠡᠬᠦ ᠳᠤ ᠰᠣᠯᠢᠷ ᠯᠤᠭ᠎ᠠ ᠨᠢᠰᠬᠦ ᠵᠠᠪᠢ ᠶᠢᠨ ᠭᠠᠯ ᠳᠤ ᠣᠯᠠᠨ ᠬᠦᠮᠦᠨ ᠬᠤᠶᠢᠬᠠᠯᠠᠭᠳᠠᠨ᠂ ᠡᠰᠡᠷᠭᠦᠴᠡᠭᠴᠢᠳ ᠠᠭᠤᠯᠠ ᠶᠢᠨ ᠣᠷᠣᠭᠤ ᠴᠢᠯᠠᠭᠤ ᠦᠩᠬᠦᠷᠡᠬᠦᠯᠪᠡᠴᠦ ᠮᠣᠩᠭᠤᠯ ᠴᠡᠷᠢᠭ ᠤᠳ ᠢ ᠰᠢᠷᠬᠠᠳᠣᠭᠤᠯᠵᠦ ᠴᠢᠳᠠᠬᠤ ᠦᠬᠡᠢ ᠪᠠᠶᠢᠯ᠎ᠠ᠃ ᠣᠯᠠᠮ ᠢᠶᠠᠷ ᠮᠣᠩᠭᠤᠯᠴᠣᠳ ᠤᠨ ᠵᠡᠪᠰᠡᠭ ᠤᠨ ᠰᠦᠷ ᠲᠤ ᠳᠠᠷᠣᠭᠳᠠᠭᠰᠠᠨ ᠴᠠᠶᠢᠵᠠ ᠶᠢᠨ ᠬᠢᠨ ᠪᠠᠶᠢᠯᠳᠣᠭᠠᠨ ᠢᠶᠠᠨ ᠵᠣᠭᠰᠣᠭᠠᠵᠦ ᠰᠧᠷᠢᠾ ᠠᠯ ᠵᠪᠧᠯ ᠤᠨ ᠵᠠᠯᠭᠠᠮᠵᠢᠯᠠᠭᠴᠢ ᠨᠢ ᠰᠣᠯᠠ ᠳᠣᠷᠣᠢ ᠨᠢᠬᠡᠨ ᠪᠠᠶᠢᠭᠰᠠᠨ ᠣᠴᠢᠷ ᠣᠳᠠᠯ ᠦᠬᠡᠢ ᠪᠠᠭᠤᠵᠦ ᠦᠭᠴᠡᠢ᠃ ᠭᠡᠰᠡᠨ ᠴᠦ ᠡᠯᠪᠷᠦ᠋ᠰ ᠤᠨ ᠠᠭᠤᠯᠠᠰ ᠲᠤ ᠠᠰᠰᠠᠰᠢᠨ ᠤ ᠵᠠᠭᠤ ᠭᠠᠷᠣᠢ ᠴᠠᠶᠢᠵᠠ ᠪᠠᠬᠢᠯᠡᠯᠳᠡ ᠡᠵᠡᠯᠡᠭᠳᠡᠭᠡ ᠦᠬᠡᠢ ᠦᠯᠡᠳᠡᠭᠰᠡᠨ ᠪᠠᠶᠢᠪᠠ᠃      ᠬᠦᠯᠡᠬᠦ ᠬᠠᠭᠠᠨ ᠣᠯᠵᠠᠯᠠᠭᠳᠠᠭᠰᠠᠨ ᠰᠧᠷᠢᠾ ᠢᠶᠠᠷ ᠳᠡᠳᠡᠭᠡᠷ ᠴᠠᠶᠢᠵᠠ ᠤᠳ ᠤᠨ ᠵᠠᠬᠢᠷᠣᠭᠴᠢᠳ ᠲᠤ ᠳᠣᠰᠢᠶᠠᠯ ᠦᠭᠭᠦᠬᠦᠯᠵᠦ ᠬᠠᠭᠠᠯᠭ᠎ᠠ ᠶᠢ ᠨᠢ ᠨᠡᠬᠡᠬᠡᠯᠬᠡᠨ ᠪᠠᠭᠤᠯᠭᠠᠨ ᠠᠪᠣᠭᠠᠳ᠂ ᠪᠠᠬᠢᠯᠡᠯᠳᠡ ᠤᠳ ᠢ ᠨᠢ ᠨᠣᠷᠠᠭᠠᠵᠦ ᠭᠠᠵᠠᠷ ᠲᠠᠢ ᠳᠡᠭᠰᠢᠯᠡᠬᠡᠳ᠂ ᠴᠡᠷᠢᠭ ᠳᠠᠶᠢᠴᠢᠳ ᠢ ᠨᠢ ᠬᠦᠢᠰᠦ ᠳᠡᠮᠳᠡᠷᠢᠪᠡ᠃ ᠬᠠᠷᠢᠨ ᠠᠯᠠᠮᠦ᠋ᠲ ᠴᠠᠶᠢᠵᠠ ᠶᠢᠨ ᠬᠠᠨ᠎ᠠ ᠶᠢ ᠨᠣᠷᠠᠭᠠᠬᠤ ᠪᠣᠯᠣᠭᠰᠠᠨ ᠳᠤ ᠶᠠᠮᠠᠷ ᠴᠦ ᠬᠦᠷᠵᠡ ᠵᠡᠭᠡᠳᠦᠦ ᠳᠤ ᠠᠪᠳᠠᠰᠢ ᠦᠬᠡᠢ ᠳᠠᠩᠴᠣ ᠪᠦᠬᠡ ᠪᠠᠷᠢᠭᠰᠠᠨ ᠪᠠᠶᠢᠵᠠᠢ᠃ ᠣᠯᠵᠠᠯᠠᠭᠳᠠᠭᠰᠠᠨ ᠵᠠᠬᠢᠷᠣᠭᠴᠢ ᠶᠢ ᠬᠦᠯᠡᠬᠦ ᠶᠡᠭᠡ ᠬᠠᠭᠠᠨ ᠳᠤ ᠬᠦᠷᠬᠡᠯᠬᠡᠬᠦ ᠪᠠᠷ ᠢᠯᠡᠬᠡᠭᠰᠡᠨ ᠳᠤ ᠵᠠᠮ ᠳᠠᠭᠠᠨ ᠠᠮᠢ ᠦᠷᠡᠭᠳᠡᠭᠰᠡᠨ ᠬᠡᠳᠡᠭ᠃      ᠠᠯᠠᠮᠦ᠋ᠲ ᠢ ᠡᠵᠡᠯᠡᠵᠦ ᠠᠪᠣᠭᠠᠳ ᠵᠢᠷᠭᠤᠭᠠᠨ ᠳᠣᠯᠤᠭ᠎ᠠ ᠬᠤᠨᠤᠭ ᠤᠨ ᠬᠤᠶᠢᠨ᠎ᠠ ᠮᠣᠩᠭᠤᠯ ᠤᠨ ᠴᠡᠷᠢᠭ ᠲᠢᠭᠷ ᠮᠦᠷᠡᠨ ᠢ ᠭᠠᠳᠣᠯᠵᠦ᠂ ᠪᠠᠭᠳᠠᠳ᠋ ᠤᠨ ᠬᠠᠯᠢᠹᠠ ᠮᠦᠰᠲ᠋ᠠᠰᠢᠮ ᠳᠤ ᠬᠦᠯᠡᠬᠦ ᠬᠠᠭᠠᠨ ᠡᠯᠴᠢ ᠢᠯᠡᠬᠡᠵᠡᠢ᠃ ᠡᠭᠦᠨ ᠳᠤ ᠠᠰᠰᠠᠰᠢᠨ ᠨᠤᠭᠤᠳ ᠢ ᠳᠠᠷᠣᠬᠤ ᠳᠤ ᠬᠦᠴᠦ ᠬᠠᠪᠰᠣᠷᠤᠭ᠎ᠠ ᠦᠬᠡᠢ ᠳᠤ ᠵᠢᠮᠡᠯᠡᠬᠡᠳ᠂ ᠴᠠᠶᠢᠵᠠ ᠤᠳ ᠢᠶᠠᠨ ᠪᠠᠭᠤᠯᠭᠠᠨ ᠳᠠᠭᠠᠷ᠎ᠠ ᠣᠷᠣᠬᠤ ᠶᠢ ᠳᠣᠯᠭᠠᠨ ᠱᠠᠭᠠᠷᠳᠠᠪᠠ᠃ ᠭᠡᠳᠡᠯ᠎ᠡ ᠬᠠᠷᠢᠭᠤ ᠳᠤᠨᠢ ︽ᠠᠷᠪᠠ ᠬᠤᠨᠤᠭ ᠤᠨ ᠪᠠᠶᠢᠯᠳᠣᠭᠠᠨ ᠳᠤ ᠠᠵᠠ ᠳᠣᠬᠢᠷᠠᠵᠦ ᠢᠯᠠᠭᠰᠠᠨ ᠢᠶᠠᠷ ᠣᠷᠴᠢᠯᠠᠩ ᠤᠨ ᠡᠵᠡᠨ ᠪᠣᠯᠣᠯ᠎ᠠ ᠬᠡᠵᠦ ᠦᠪᠡᠷ ᠢ ᠪᠠᠨ ᠰᠡᠳᠬᠢᠨ᠎ᠡ ᠦᠦ ᠵᠠᠯᠠᠭᠤ ᠮᠢᠨᠢ᠂ ᠴᠢᠨᠣ ᠳᠣᠰᠢᠶᠠᠯ ᠪᠣᠰᠣᠳ ᠤᠨ ᠬᠤᠪᠢ ᠳᠠᠪᠢᠯᠠᠩ ᠢ ᠰᠢᠢᠳᠳᠡᠭ ᠬᠡᠵᠦ ᠪᠣᠳᠤᠭ᠎ᠠ ᠦᠦ᠂ ᠦᠷᠦᠨ᠎ᠡ ᠠᠴᠠ ᠳᠣᠷᠣᠨ᠎ᠠ ᠶᠢ ᠬᠦᠷᠳᠡᠯ᠎ᠡ ᠯᠠᠯᠣ ᠶᠢᠨ ᠴᠢᠩ ᠦᠨᠡᠨᠴᠢ ᠰᠦᠰᠦᠭᠳᠡᠨ ᠨᠦᠭᠦᠳ ᠪᠦᠬᠦᠳᠡ ᠮᠢᠨᠣ ᠠᠯᠪᠠᠳᠣ ᠤᠳ ᠭᠡᠳᠡᠭ ᠢ ᠦᠯᠦ ᠮᠡᠳᠡᠨ᠎ᠡ ᠦᠦ᠂ ᠬᠡᠷᠪᠡ ᠮᠢᠨᠣ ᠪᠡᠶ᠎ᠡ ᠬᠦᠰᠡᠬᠦ ᠯᠡ ᠶᠣᠮ ᠪᠣᠯ ᠢᠷᠠᠨ ᠢ ᠲᠡᠷᠡ ᠴᠢᠭ ᠢᠶᠠᠷ ᠨᠢ ᠵᠠᠬᠢᠷᠭᠠᠨ ᠳᠠᠭᠠᠨ ᠣᠷᠣᠭᠤᠯᠵᠦ ᠴᠢᠳᠠᠬᠤ ᠰᠠᠨ᠂ ᠬᠡᠪᠡᠴᠦ ᠳᠠᠶᠢᠳᠣᠵᠦ ᠪᠠᠶᠢᠯᠳᠣᠬᠤ ᠶᠠᠮᠠᠷ ᠴᠦ ᠬᠦᠰᠡᠯ ᠨᠠᠳᠠ ᠳᠤ ᠠᠯᠠᠭ᠎ᠠ᠂ ᠠᠮᠣᠭᠤᠯᠠᠩ ᠡᠩᠬᠡ ᠶᠢ ᠰᠠᠬᠢᠵᠦ ᠢᠷᠡᠭᠰᠡᠨ ᠵᠠᠮ ᠢᠶᠠᠷ ᠢᠶᠠᠨ ᠬᠤᠷᠠᠰᠰᠠᠨ ᠣᠷᠣᠭᠤ ᠪᠠᠨ ᠪᠣᠴᠠ ᠳ᠋ᠠ︾ ᠭᠡᠮᠡᠨ ᠪᠠᠷᠳᠠᠮᠨᠠᠨ ᠬᠠᠷᠢᠭᠤ ᠢᠷᠡᠭᠦᠯᠵᠡᠢ᠃ ᠮᠦᠰᠲ᠋ᠠᠰᠢᠮ ᠬᠠᠯᠢᠹᠠ ᠶᠢᠨ ᠡᠯᠴᠢ ᠪᠠᠰᠠ ᠬᠠᠯᠢᠹᠠ ᠶᠢᠨ ᠬᠤᠪᠢᠯᠭᠠᠨ ᠲᠦᠷᠢ  ᠳᠤ ᠭᠠᠷ ᠳᠠᠯᠠᠶᠢᠭᠰᠠᠨ ᠬᠡᠨ ᠪᠣᠯᠪᠠᠴᠣ ᠢᠯᠭᠠᠭ᠎ᠠ ᠦᠬᠡᠢ ᠮᠠᠨᠣ ᠪᠠᠨ ᠦᠵᠡᠨ᠎ᠡ ᠬᠡᠵᠦ ᠰᠠᠨᠠᠭᠤᠯᠵᠠᠢ᠃ ᠠᠪᠪᠠᠰᠢᠳ᠋ ᠤᠨ ᠣᠳᠣᠮ ᠤᠨ ᠬᠢᠨ ᠳᠠᠪᠣᠨ ᠵᠠᠭᠤᠨ ᠵᠢᠯ ᠤᠨ ᠳᠣᠷᠰᠢ ᠪᠠᠭᠳᠠᠳ᠋ ᠤᠨ ᠬᠠᠯᠢᠹᠠ ᠪᠠᠷ ᠰᠠᠭᠤᠵᠦ ᠪᠠᠶᠢᠭᠰᠠᠨ ᠪᠦᠭᠡᠳ ᠯᠠᠯᠣ ᠶᠢᠨ ᠱᠠᠰᠢᠨ ᠤ ᠲᠡᠭᠡᠳᠦ ᠡᠷᠬᠡ ᠶᠢ ᠪᠠᠷᠢᠭᠰᠠᠨ ᠤ ᠬᠤᠪᠢ ᠳᠤ ᠪᠦᠬᠦ ᠰᠦᠯᠲ᠋ᠠᠨ᠂ ᠱᠠᠾ  ᠤᠳ ᠲᠡᠭᠦᠨ ᠳᠤ ᠵᠠᠬᠢᠷᠣᠭᠳᠠᠬᠤ ᠣᠴᠢᠷ ᠲᠠ ᠪᠠᠶᠢᠪᠠ᠃ ᠦᠨᠡᠭᠡᠷ ᠴᠦ ᠦᠪᠡᠷ ᠲᠡᠭᠡᠨ ᠪᠡᠷᠳᠡᠵᠦ ᠢᠳᠡᠭᠡᠭᠰᠡᠨ ᠬᠤᠷᠧᠽᠠᠮ ᠤᠨ ᠮᠦᠬᠠᠮᠧᠳ᠋ ᠱᠠᠾ ᠯᠠ ᠲᠡᠭᠦᠨ ᠲᠠᠢ ᠨᠢᠬᠡ ᠪᠠᠶᠢᠯᠳᠣᠵᠦ ᠦᠵᠡᠭᠰᠡᠨ ᠪᠢᠯᠡ᠃ ᠬᠡᠪᠡᠴᠦ ᠬᠦᠯᠡᠬᠦ ᠬᠠᠭᠠᠨ ᠠᠶᠣᠨ ᠪᠣᠯᠭᠤᠮᠵᠢᠯᠠᠵᠦ ᠣᠬᠤᠷᠢᠵᠦ ᠨᠢᠴᠣᠭᠰᠠᠨ ᠦᠬᠡᠢ᠃ ᠬᠦᠯᠡᠬᠦ ᠶᠢᠨ ᠳᠡᠷᠭᠡᠳᠡ ᠶᠢᠨ ᠵᠢᠷᠣᠬᠠᠶᠢᠴᠢ ᠦᠨᠡᠨ ᠰᠦᠰᠦᠭᠳᠦ ᠯᠠᠯᠣ ᠬᠦᠮᠦᠨ ︽ᠬᠡᠷᠪᠡ ᠮᠣᠩᠭᠤᠯᠴᠣᠳ ᠯᠠᠯᠣ ᠱᠠᠰᠢᠨ ᠤ ᠨᠡᠶᠢᠰᠯᠡᠯ ᠬᠤᠳᠠ ᠶᠢ ᠳᠠᠭᠠᠷᠢᠬᠤ ᠬᠡᠪᠡᠯ ᠵᠢᠷᠭᠤᠭᠠᠨ ᠵᠦᠢᠯ ᠮᠠᠭᠤ ᠶᠠᠪᠣᠳᠠᠯ ᠳᠣᠬᠢᠶᠠᠯᠳᠣᠨ᠎ᠠ︾ ᠭᠡᠵᠦ ᠠᠶᠢᠯᠠᠳᠬᠠᠵᠠᠢ᠃ ᠡᠶᠢᠮᠦ ᠮᠡᠷᠭᠡᠨ ᠲᠦᠯᠬᠡ ᠦᠢᠯᠡᠳᠦᠭᠰᠡᠨ ᠵᠢᠷᠣᠬᠠᠶᠢᠴᠢ ᠠᠮᠢ ᠪᠠᠨ ᠠᠯᠳᠠᠬᠤ ᠳᠤ ᠳᠠᠷᠠᠭ᠎ᠠ ᠶᠢᠨ ᠲᠦᠯᠬᠡᠴᠢ ᠨᠢ ︽ᠬᠦᠯᠡᠬᠦ ᠬᠠᠭᠠᠨ ᠢ ᠪᠠᠳᠣᠳᠠᠢ ᠢᠯᠠᠵᠦ ᠳᠡᠶᠢᠯᠦᠨ᠎ᠡ︾ ᠬᠡᠮᠡᠨ ᠲᠦᠯᠭᠡᠳᠡᠵᠡᠢ᠃      ᠨᠢᠬᠡ ᠳᠣᠯᠤᠭ᠎ᠠ ᠬᠤᠨᠤᠭ ᠤᠨ ᠳᠣᠳᠣᠷ᠎ᠠ ᠬᠠᠯᠢᠹᠠ ᠶᠢᠨ ᠴᠡᠷᠢᠭ ᠢ ᠪᠣᠳᠠ ᠴᠣᠬᠢᠵᠦ᠂ ᠨᠢᠬᠡ ᠡᠳᠦᠷ ᠤᠨ ᠳᠠᠷᠠᠭ᠎ᠠ ᠮᠣᠩᠭᠤᠯ ᠴᠡᠷᠢᠭ ᠪᠠᠭᠳᠠᠳ᠋ ᠤᠨ ᠲᠡᠷᠢᠬᠦᠨ ᠬᠠᠮᠠᠭᠠᠯᠠᠯᠳᠠ ᠶᠢᠨ ᠱᠣᠭᠤᠮ ᠳᠤ ᠳᠣᠯᠵᠦ ᠢᠷᠡᠵᠡᠢ᠃ ᠭᠤᠷᠪᠠᠨ ᠳᠣᠯᠤᠭ᠎ᠠ ᠬᠤᠨᠤᠭ ᠤᠨ ᠳᠣᠷᠰᠢ ᠪᠦᠰᠡᠯᠡᠨ ᠪᠠᠶᠢᠯᠳᠣᠭᠠᠳ ᠬᠤᠳᠠ ᠶᠢᠨ ᠳᠡᠭᠦᠷᠭᠡ ᠤᠳ ᠢ ᠳᠠᠷᠠᠭᠠᠯᠠᠨ ᠠᠪᠴᠣ ᠡᠬᠢᠯᠡᠬᠦ ᠳᠤ᠂ ᠬᠠᠯᠢᠹᠠ ᠶᠠᠭᠤ ᠯᠡ ᠪᠣᠯᠤᠭ ᠬᠡᠮᠡᠨ ᠬᠤᠪᠢ ᠵᠠᠶᠠᠭ᠎ᠠ ᠪᠠᠨ ᠪᠣᠷᠬᠠᠨ ᠳᠤ ᠳᠠᠭᠠᠳᠬᠠᠨ ᠪᠠᠭᠤᠵᠦ ᠦᠭᠬᠦᠨ᠂ ᠨᠢᠭᠤᠨ ᠳᠠᠯᠳᠠᠯᠠᠭᠰᠠᠨ ᠡᠳ᠋ ᠪᠠᠶᠠᠯᠢᠭ ᠢᠶᠠᠨ ᠵᠢᠭᠠᠨ ᠦᠭᠴᠦ᠂ ᠠᠪᠪᠠᠰᠢᠳ᠋ ᠤᠨ ᠣᠭᠰᠠᠭᠠᠨ ᠤ ᠬᠢᠨ ᠤ ᠬᠠᠭᠠᠰ ᠵᠠᠭᠤᠨ ᠵᠢᠯ ᠤᠨ ᠳᠣᠷᠰᠢ ᠴᠣᠭᠯᠠᠭᠤᠯᠣᠭᠰᠠᠨ ᠶᠡᠭᠡ ᠡᠷᠳᠡᠨᠢᠰ ᠢ ᠴᠢᠩᠬᠢᠰ ᠬᠠᠭᠠᠨ ᠤ ᠠᠴᠢ ᠬᠦᠦ ᠶᠢᠨ ᠶᠡᠭᠡ ᠠᠰᠠᠷ ᠤᠨ ᠡᠮᠦᠨ᠎ᠡ ᠠᠪᠴᠢᠷᠠᠵᠦ ᠠᠰᠬᠠᠵᠠᠢ᠃ ᠪᠠᠭᠳᠠᠳ᠋ ᠢ ᠵᠢᠷᠭᠤᠭᠠᠨ ᠡᠳᠦᠷ ᠰᠦᠨᠢ ᠶᠢᠨ ᠳᠣᠷᠰᠢ ᠴᠦᠯᠮᠦᠨ ᠳᠡᠭᠡᠷᠡᠮᠳᠡᠵᠦ᠂ ᠰᠦᠮ᠎ᠡ ᠳᠣᠭᠠᠩ ᠢ ᠰᠢᠳᠠᠭᠠᠨ᠂ ᠬᠦᠮᠦᠨ ᠠᠮᠠ ᠶᠢ ᠬᠢᠳᠣᠭᠰᠠᠨ ᠤ ᠡᠴᠦᠰ ᠲᠤ ᠬᠤᠳᠠ ᠶᠢ ᠮᠡᠳᠡᠯ ᠳᠡᠭᠡᠨ ᠠᠪᠴᠣ ᠠᠮᠢᠳᠣ ᠦᠯᠡᠳᠡᠭᠰᠡᠳ ᠢ ᠠᠯᠪᠠᠳᠣ ᠪᠠᠨ ᠪᠣᠯᠭᠠᠯᠠᠯ ᠬᠡᠳᠡᠭ ᠢᠶᠠᠨ ᠵᠠᠷᠯᠠᠭᠠᠳ᠂ ᠴᠠᠭᠠᠰᠢᠳᠠ ᠠᠯᠢᠪᠠ ᠬᠦᠴᠦᠷᠭᠡᠭᠯᠡᠯ ᠢ ᠴᠠᠭᠳᠠᠨ ᠬᠤᠷᠢᠭᠯᠠᠪᠠ᠃ ᠰᠦᠮ᠎ᠡ ᠳᠣᠭᠠᠩ ᠳᠠᠭᠠᠨ ᠴᠣᠭᠯᠠᠭᠠᠳ ᠴᠠᠭᠠᠰᠢᠳᠠ ᠶᠠᠭᠤ ᠪᠣᠯᠬᠤ ᠶᠢ ᠬᠠᠷᠠᠵᠦ ᠪᠠᠶᠢᠭᠰᠠᠨ ᠡᠾᠷᠢᠰᠲ᠋ᠣᠰ ᠱᠠᠰᠢᠨᠳᠠᠨ ᠨᠤᠭᠤᠳ ᠢ ᠶᠠᠭᠠᠬᠢᠭᠰᠠᠨ ᠴᠦ ᠦᠬᠡᠢ᠃ ᠨᠣᠶᠠᠷᠬᠠᠭᠴᠢ ᠦᠨᠳᠦᠰᠦᠳᠡᠨ ᠨᠦᠭᠦᠳ ᠲᠡᠭᠡᠨ ᠳᠠᠶᠢᠰᠣᠩᠨᠠᠨ ᠬᠠᠨᠳᠣᠳᠠᠭ ᠪᠠᠶᠢᠭᠰᠠᠨ ᠨᠣᠳᠤᠭ ᠤᠨ ᠪᠣᠰᠣᠳ ᠬᠦᠮᠦᠨ ᠠᠷᠠᠳ ᠢ ᠨᠢ ᠳᠠᠯ᠎ᠠ ᠳᠠᠭᠠᠨ ᠳᠠᠳᠠᠬᠤ ᠶᠠᠪᠣᠳᠠᠯ ᠠᠩᠬᠠᠨ ᠠᠴᠠ ᠪᠠᠨ ᠮᠣᠩᠭᠤᠯᠴᠣᠳ ᠤᠨ ᠪᠣᠳᠣᠯᠭ᠎ᠠ ᠪᠠᠶᠢᠭᠰᠠᠨ ᠠᠵᠢ᠃      ᠴᠢᠩᠬᠢᠰ ᠬᠠᠭᠠᠨ ᠣᠶᠢᠷᠠᠬᠢ ᠳᠣᠷᠣᠨ᠎ᠠ ᠶᠢ ᠡᠵᠡᠯᠡᠬᠦ ᠠᠶᠠᠨ ᠳᠠᠶᠢᠨ ᠢᠶᠠᠨ ᠬᠤᠷᠧᠽᠠᠮ ᠬᠦᠷᠦᠨ ᠢ ᠪᠣᠳᠠ ᠨᠢᠷᠭᠡᠭᠰᠡᠨ ᠢᠶᠠᠷ ᠡᠬᠢᠯᠡᠭᠰᠡᠨ᠂ ᠦᠬᠡᠳᠡᠢ ᠶᠢᠨ ᠦᠶ᠎ᠡ ᠳᠤ ᠮᠣᠩᠭᠤᠯ ᠤᠨ ᠨᠣᠶᠠᠷᠬᠠᠯ ᠠᠷᠮᠧᠨᠢ ᠬᠦᠷᠳᠡᠯ᠎ᠡ ᠳᠡᠯᠡᠭᠰᠡᠨ ᠪᠣᠯ ᠬᠦᠯᠡᠬᠦ ᠬᠠᠭᠠᠨ ᠬᠠᠯᠢᠹᠠ ᠶᠢ ᠳᠠᠷᠣᠵᠦ ᠣᠶᠢᠷᠠᠬᠢ ᠳᠣᠷᠣᠨ᠎ᠠ ᠶᠢ ᠪᠦᠬᠦᠯᠢ ᠳᠤᠨᠢ ᠪᠠᠶᠢᠯᠳᠣᠨ ᠳᠠᠭᠠᠭᠤᠯᠬᠤ ᠳᠤ ᠳᠣᠩ ᠣᠶᠢᠷᠠᠳᠣᠵᠠᠢ᠃ ᠢᠩᠬᠢᠬᠡᠳ ᠮᠣᠩᠭᠤᠯᠴᠣᠳ ᠴᠠᠭᠠᠰᠢ ᠮᠧᠰᠣᠫᠣᠲ᠋ᠠᠮ᠂ ᠰᠢᠷᠢ ᠶᠢᠨ ᠵᠦᠭ ᠬᠦᠳᠡᠯᠪᠡ᠃ ᠵᠠᠮ ᠳᠠᠭᠠᠨ ᠦᠬᠡ ᠳᠠᠭᠤ ᠦᠬᠡᠢ ᠪᠠᠭᠤᠵᠦ ᠦᠭᠬᠦᠭᠰᠡᠨ ᠬᠤᠳᠠ ᠤᠳ ᠢ ᠦᠷᠦᠰᠢᠶᠡᠵᠦ᠂ ᠳᠠᠭᠠᠵᠦ ᠣᠷᠣᠬᠤ ᠪᠠᠨ ᠢᠯᠡᠷᠬᠡᠶᠢᠯᠡᠭᠰᠡᠨ ᠬᠠᠭᠠᠳ ᠨᠣᠶᠠᠳ ᠲᠤ ᠴᠣᠯᠠ ᠬᠡᠷᠬᠡᠮ ᠱᠠᠩᠨᠠᠵᠦ᠂ ᠣᠯᠣᠰ ᠣᠷᠣᠨ ᠢ ᠨᠢ ᠭᠠᠷ ᠬᠦᠷᠦᠯ ᠦᠬᠡᠢ ᠦᠯᠡᠳᠡᠭᠡᠨ ᠶᠠᠪᠣᠵᠠᠢ᠃ ᠪᠣᠰᠴᠣ ᠡᠰᠡᠷᠬᠦᠴᠡᠭᠰᠡᠨ ᠠᠯᠧᠫᠫᠤ ᠬᠤᠳᠠ ᠶᠢ ᠳᠠᠭᠠᠷᠢᠨ ᠡᠵᠡᠯᠡᠭᠡᠳ᠂ ᠳᠠᠪᠣᠨ ᠡᠳᠦ ᠴᠦᠯᠮᠦᠨ ᠦᠬᠡᠶᠢᠷᠡᠭᠦᠯᠵᠦ᠂ ᠯᠠᠯᠣ ᠬᠤᠩ ᠳᠠᠶᠢᠵᠢ ᠶᠢ ᠢᠳᠡᠭᠡᠯ ᠬᠦᠯᠢᠶᠡᠯᠬᠡᠨ ᠵᠠᠬᠢᠷᠣᠭᠴᠢ ᠪᠠᠷ ᠨᠢ ᠳᠠᠯᠪᠢᠪᠠ᠃ ᠡᠶᠢᠨᠬᠦ ᠬᠦᠯᠡᠬᠦ ᠬᠠᠭᠠᠨ ᠢᠶᠠᠷ ᠣᠳᠣᠷᠢᠳᠣᠭᠤᠯᠣᠨ ᠮᠣᠩᠭᠤᠯ ᠤᠨ ᠴᠡᠷᠢᠭ ᠭᠠᠵᠠᠷ ᠤᠨ ᠳᠣᠮᠳᠠᠳᠣ ᠳᠠᠩᠬᠢᠰ ᠤᠨ ᠡᠷᠬᠢ ᠳᠤ ᠳᠣᠯᠵᠦ ᠣᠴᠢᠪᠠ᠃ ᠬᠦᠯ ᠲᠠᠢ ᠨᠢ ᠬᠦᠯᠬᠦᠵᠦ᠂ ᠬᠦᠯ ᠦᠬᠡᠢ ᠨᠢ ᠮᠦᠯᠬᠦᠵᠦ᠂ ᠴᠠᠭᠠᠰᠢ  ᠪᠠᠨ ᠠᠹᠷᠢᠺᠠ ᠶᠢᠨ ᠬᠦᠨ ᠣᠷᠣᠭᠤ ᠲᠦᠨᠢᠰ ᠣᠷᠣᠭᠤ ᠵᠢᠭᠤᠳᠠᠵᠦ ᠪᠠᠶᠢᠯ᠎ᠠ᠃ ᠳᠠᠬᠢᠭᠠᠳ ᠯᠡ ᠠᠶᠣᠮᠰᠢᠭᠳᠣ ᠰᠠᠨᠳᠣᠷᠣᠯ ᠳᠡᠭᠳᠡᠵᠦ᠂ ᠠᠷᠠᠪ ᠤᠳ ᠤᠨ ᠳᠡᠮᠡᠬᠡᠨ ᠤ ᠦᠨ᠎ᠡ ᠳᠡᠭᠷᠢ ᠳᠤ ᠬᠠᠳᠠᠵᠠᠢ᠃ ᠡᠨᠡ ᠪᠦᠬᠦᠨ ᠯᠠᠯᠣ ᠶᠢᠨ ᠱᠠᠰᠢᠨᠳᠣ ᠣᠯᠣᠰ ᠲᠦᠮᠡᠨ ᠢ ᠬᠦᠨ ᠬᠦᠨᠵᠡᠬᠡᠢ ᠪᠢᠴᠢᠬᠦ ᠳᠡᠭᠡᠨ᠄ ︽ᠶᠡᠭᠡ ᠵᠦᠩᠴᠢ ᠶᠢᠨ ᠮᠡᠨᠳᠦᠯᠡᠭᠰᠡᠨ  ᠠᠴᠠ ᠬᠤᠶᠢᠰᠢ ᠯᠠᠯᠣ ᠣᠯᠠᠨ ᠲᠦᠮᠡᠨ ᠣᠳᠣ ᠶᠢᠨ ᠰᠢᠭ ᠡᠶᠢᠮᠦ ᠵᠣᠪᠠᠯᠠᠩ ᠵᠦᠳᠡᠭᠦᠷᠢ ᠠᠮᠰᠠᠭᠰᠠᠨ ᠦᠬᠡᠢ ᠪᠢᠯᠡ᠂ ᠨᠢᠬᠡ ᠳᠠᠯ᠎ᠠ ᠠᠴᠠ ᠲᠠᠲ᠋ᠠᠷ ᠤᠳ ᠠᠽᠧᠷᠪᠠᠶᠢᠵᠠᠨ᠂ ᠢᠷᠠᠺ᠂ ᠰᠢᠷᠢ ᠶᠢ ᠲᠦᠢᠪᠡᠭᠡᠵᠦ᠂ ᠰᠦᠢᠳᠬᠡᠯ᠎ᠡ᠃ ᠨᠦᠬᠦᠬᠡ ᠳᠠᠯ᠎ᠠ ᠠᠴᠠ ᠹᠷᠠᠩᠺ ᠤᠳ ᠢ ᠯᠠᠯᠣ ᠶᠢᠨ ᠬᠢᠨ ᠦᠯᠳᠡᠨ ᠬᠦᠬᠡᠬᠡᠵᠦ ᠴᠢᠳᠠᠬᠤ ᠦᠬᠡᠢ ᠪᠠᠶᠢᠭ᠎ᠠ ᠶᠢᠨ ᠣᠯᠠᠮ ᠠᠴᠠ ᠣᠳᠣ ᠳᠡᠳᠡ ᠳᠡᠨᠳᠡ ᠮᠢᠰᠢᠷ ᠲᠤ ᠬᠠᠯᠳᠠᠨ ᠣᠷᠣᠬᠤ ᠳᠤ ᠪᠡᠯᠡᠨ ᠵᠣᠭᠰᠣᠵᠦ ᠪᠠᠶᠢᠨ᠎ᠠ᠃ ᠡᠵᠡᠨᠳᠦ ᠬᠦᠷᠦᠨ ᠤ ᠦᠯᠡᠳᠡᠭᠰᠡᠨ ᠬᠡᠰᠡᠭ ᠪᠣᠳᠠ ᠴᠣᠬᠢᠭᠤᠯᠬᠤ ᠠᠶᠣᠯ ᠳᠤ ᠣᠴᠠᠷᠠᠭᠠᠳ ᠪᠠᠶᠢᠨ᠎ᠠ︾ ᠬᠡᠵᠡᠢ᠃ ᠯᠠᠯᠣ ᠶᠢᠨ ᠱᠠᠰᠢᠨ ᠤ ᠡᠴᠦᠰ ᠤᠨ ᠮᠦᠬᠦᠯ ᠤᠨ ᠴᠠᠭ ᠢᠷᠡᠭᠰᠡᠨ ᠮᠡᠳᠦ ᠪᠠᠶᠢᠯ᠎ᠠ᠃ ᠣᠳᠣ ᠯᠠᠯᠣ ᠤᠳ ᠲᠤ ᠵᠢᠭᠤᠳᠠᠨ ᠬᠤᠷᠭᠤᠳᠠᠵᠦ ᠪᠣᠯᠬᠤ ᠭᠠᠭᠴᠠᠬᠠᠨ ᠭᠠᠵᠠᠷ ᠦᠯᠡᠳᠡᠭᠰᠡᠨ ᠨᠢ ᠳᠡᠳᠡᠨ ᠤ ᠡᠴᠦᠰ ᠤᠨ ᠦᠮᠦᠭ ᠲᠦᠰᠢᠭ ᠮᠢᠰᠢᠷ ᠣᠷᠣᠨ ᠪᠠᠶᠢᠪᠠ᠃ ᠬᠦᠯᠡᠬᠦ ᠳᠠᠭᠠᠵᠦ ᠣᠷᠣᠬᠤ ᠶᠢ ᠱᠠᠭᠠᠷᠳᠠᠨ ᠮᠢᠰᠢᠷ ᠤᠨ ᠰᠦᠯᠲ᠋ᠠᠨ ᠳᠤ ᠡᠯᠴᠢ ᠪᠠᠨ ᠢᠯᠡᠬᠡᠪᠡ᠃ ᠬᠡᠯ᠎ᠡ ᠴᠦ ᠡᠨᠡ ᠦᠶ᠎ᠡ ᠳᠤ ᠶᠡᠭᠡ ᠬᠠᠭᠠᠨ ᠮᠦᠩᠬᠡ ᠬᠡᠨᠡᠳᠳᠡ ᠨᠠᠰᠣ ᠪᠠᠷᠠᠭᠰᠠᠨ ᠢᠶᠠᠷ ᠳᠡᠯᠡᠬᠡᠢ ᠪᠠᠷ ᠨᠢᠬᠡ ᠳᠠᠷᠬᠠᠭᠰᠠᠨ ᠮᠣᠩᠭᠤᠯᠴᠣᠳ ᠢ ᠨᠢᠭᠡᠳᠬᠡᠨ ᠨᠢᠭᠳᠠᠷᠠᠭᠤᠯᠵᠦ ᠪᠠᠶᠢᠭᠰᠠᠨ ᠬᠦᠴᠦ ᠦᠬᠡᠢ ᠪᠣᠯᠵᠦ᠂ ᠪᠠᠷᠤᠭ ᠪᠡᠶ᠎ᠡ ᠪᠠᠨ ᠳᠠᠭᠠᠭᠠᠭᠰᠠᠨ ᠠᠯᠳᠠᠨ ᠣᠷᠳᠣᠨ ᠣᠯᠣᠰ᠂ ᠪᠣᠰᠣᠳ ᠠᠴᠠ ᠪᠠᠨ ᠢᠯᠡᠬᠦᠦ ᠬᠦᠴᠦ ᠲᠠᠢ ᠶᠣᠸᠠᠨ ᠣᠯᠣᠰ᠂ ᠪᠠᠭ᠎ᠠ ᠠᠽᠢᠶ᠎ᠠ ᠳᠤ ᠲᠦᠩᠬᠡᠵᠦ ᠳᠣᠭᠳᠠᠨᠢᠵᠦ ᠡᠬᠢᠯᠡᠭᠡᠳ ᠪᠠᠶᠢᠭᠰᠠᠨ ᠢᠯ ᠬᠠᠭᠠᠳ ᠤᠨ ᠣᠯᠣᠰ ᠤᠳ ᠦᠨᠳᠦᠰᠦᠨ ᠳᠡᠭᠡᠨ ᠠᠳᠠᠯᠢ ᠳᠡᠭᠰᠢ ᠡᠷᠬᠡ ᠲᠠᠢ ᠪᠠᠷ ᠣᠷᠣᠰᠢᠨ ᠳᠣᠭᠳᠠᠨᠢᠬᠤ ᠪᠣᠯᠵᠠᠢ᠃      ᠬᠦᠯᠡᠬᠦ ᠬᠠᠭᠠᠨ ᠡᠶᠢᠨᠬᠦ ᠮᠦᠩᠬᠡ ᠬᠠᠭᠠᠨ ᠢ ᠨᠠᠰᠣ ᠪᠠᠷᠠᠭᠰᠠᠨ ᠤ ᠬᠤᠶᠢᠨ᠎ᠠ ᠰᠢᠨ᠎ᠡ ᠬᠠᠭᠠᠨ ᠢ ᠵᠠᠯᠠᠬᠤ ᠶᠡᠭᠡ ᠬᠤᠷᠠᠯᠳᠠᠢ ᠳᠤ ᠣᠷᠣᠯᠴᠠᠬᠤ ᠪᠠᠷ ᠮᠣᠩᠭᠤᠯ ᠨᠣᠳᠤᠭ ᠣᠷᠣᠭᠤ ᠪᠠᠨ ᠪᠣᠴᠠᠬᠤ ᠳᠠᠭᠠᠨ ᠲᠦᠩᠭᠡᠵᠦ ᠡᠵᠡᠯᠡᠵᠦ ᠠᠪᠣᠭᠠᠳ ᠪᠠᠶᠢᠭᠰᠠᠨ ᠰᠢᠷᠢ ᠳᠤ ᠬᠡᠳᠡᠪᠣᠬ᠎ᠠ ᠵᠠᠩᠵᠣᠨ ᠢᠶᠠᠷ ᠣᠳᠣᠷᠢᠳᠣᠭᠤᠯᠣᠭᠰᠠᠨ ᠴᠦᠬᠡᠪᠳᠦᠷ ᠴᠡᠷᠢᠭ ᠢ ᠦᠯᠡᠳᠡᠬᠡᠵᠦ᠂ ᠭᠤᠣᠯ ᠬᠦᠴᠦ ᠪᠠᠨ ᠪᠠᠭ᠎ᠠ ᠠᠽᠢᠶ᠎ᠠ ᠶᠢᠨ ᠣᠷᠣᠨ ᠨᠤᠭᠤᠳ ᠲᠤ ᠬᠤᠪᠢᠶᠠᠷᠢᠯᠠᠵᠦ ᠠᠮᠵᠢᠭ᠎ᠠ ᠦᠬᠡᠢ ᠪᠠᠶᠢᠬᠤ ᠳᠤ ᠮᠢᠰᠢᠷ ᠤᠨ ᠰᠦᠯᠲ᠋ᠠᠨ ᠺᠦᠲ᠋ᠦ᠋ᠽ ᠰᠢᠷᠢ ᠳᠤ ᠪᠣᠢ ᠴᠡᠷᠢᠭ ᠢ ᠨᠢ ᠴᠣᠬᠢᠭᠠᠳ᠂ ᠶᠡᠭᠡ ᠬᠦᠴᠦ ᠪᠠᠷ ᠴᠢᠳᠬᠤᠨ ᠣᠷᠣᠭᠰᠠᠨ ᠳᠣᠬᠠᠢ ᠮᠡᠳᠡᠭᠡ ᠢᠷᠡᠪᠡ᠃      ᠶᠡᠭᠡ ᠴᠡᠷᠢᠭ ᠬᠡᠳᠡᠷᠬᠦ ᠪᠣᠴᠠᠬᠤ ᠦᠶ᠎ᠡ ᠳᠤ ᠬᠢᠯᠢ ᠬᠢᠵᠠᠭᠠᠷ ᠤᠨ ᠭᠠᠵᠠᠷ ᠠᠶᠣᠯ ᠣᠰᠣᠯ ᠣᠴᠠᠷᠠᠬᠤ ᠮᠠᠭᠠᠳᠬᠠᠯ ᠦᠨᠳᠦᠷ ᠳᠣᠯᠠ ᠪᠠᠳᠣ ᠬᠠᠭᠠᠨ ᠦᠬᠡᠳᠡᠢ  ᠶᠢ ᠨᠠᠰᠣ ᠪᠠᠷᠠᠭᠰᠠᠨ ᠤ ᠳᠠᠷᠠᠭ᠎ᠠ ᠡᠬᠡ ᠨᠣᠳᠤᠭ ᠤᠨ ᠵᠦᠭ ᠬᠦᠳᠡᠯᠬᠦ ᠳᠤ ᠭᠠᠷᠮᠠᠭᠠᠢ ᠵᠠᠩᠵᠣᠨ ᠰᠦᠪᠡᠭᠡᠳᠡᠢ ᠣᠩᠭᠠᠷ ᠢ ᠴᠦᠯᠮᠦᠨ ᠬᠤᠭᠤᠰᠣᠯᠠᠵᠦ᠂ ᠭᠠᠯᠢᠼ᠂ ᠡᠮᠦᠨᠡᠳᠦ ᠫᠣᠯᠱᠠ ᠶᠢᠨ ᠭᠠᠷᠭᠠᠭᠠᠳ ᠳᠤᠨᠢ ᠬᠠᠶᠠᠭᠠᠳ᠂ ᠡᠪᠳᠡᠵᠦ ᠰᠦᠢᠷᠡᠭᠰᠡᠨ ᠦᠷᠬᠡᠨ ᠵᠣᠷᠪᠣᠰ ᠨᠣᠳᠤᠭ ᠢ ᠪᠣᠴᠠᠵᠦ ᠪᠣᠢ ᠮᠣᠩᠭᠤᠯᠴᠣᠳ᠂ ᠡᠵᠡᠯᠡᠭᠳᠡᠭᠡ ᠦᠬᠡᠢ ᠳᠠᠶᠢᠰᠣᠨ ᠬᠤᠶᠠᠷ ᠤᠨ ᠬᠤᠭᠤᠷᠣᠨᠳᠣ ᠦᠯᠡᠳᠡᠳᠡᠭ ᠨᠢ ᠣᠴᠢᠷ ᠲᠠᠢ ᠪᠠᠶᠢᠯ᠎ᠠ᠃ ᠬᠠᠷᠢᠨ ᠬᠦᠯᠡᠬᠦ ᠮᠦᠩᠬᠡ ᠬᠠᠭᠠᠨ ᠢ ᠨᠠᠰᠣ ᠪᠠᠷᠠᠭᠰᠠᠨ ᠤ ᠳᠠᠷᠠᠭ᠎ᠠ ᠡᠷᠬᠢᠬᠦ ᠳᠡᠭᠡᠨ ᠡᠶᠢᠮᠦ ᠠᠷᠭ᠎ᠠ ᠬᠡᠮᠵᠢᠶ᠎ᠡ ᠠᠪᠣᠭᠰᠠᠨ ᠦᠬᠡᠢ ᠨᠢ ᠲᠦᠩᠬᠡᠵᠦ ᠪᠣᠯᠢᠶᠠᠨ ᠠᠪᠣᠭᠰᠠᠨ ᠬᠢᠵᠠᠭᠠᠷ ᠨᠣᠳᠤᠭ ᠢᠶᠠᠨ ᠡᠶᠢᠨᠬᠦ ᠪᠣᠴᠠᠭᠠᠨ ᠠᠯᠳᠠᠬᠤ ᠳᠤ ᠬᠦᠷᠬᠡᠵᠡᠢ᠃ ᠡᠶᠢᠨᠬᠦ ᠲᠡᠷᠡ ᠪᠠᠷ ᠰᠢᠷᠢ ᠶᠢ ᠳᠠᠬᠢᠨ ᠡᠵᠡᠯᠡᠬᠦ ᠳᠣᠯᠣᠭᠠᠨ ᠳᠤ ᠪᠡᠯᠡᠳᠬᠡᠬᠦ ᠠᠴᠠ ᠦᠬᠡᠷ᠎ᠡ ᠠᠷᠭ᠎ᠠ ᠦᠬᠡᠢ ᠪᠣᠯᠪᠠ᠃ ᠬᠦᠯᠡᠬᠦ ᠬᠠᠭᠠᠨ ᠠᠶ᠋ᠢᠯ ᠵᠠᠯᠦ᠋ᠲ ᠤᠨ ᠢᠯᠠᠭᠳᠠᠯ ᠠᠴᠠ ᠵᠢᠯ ᠬᠠᠭᠠᠰ ᠤᠨ ᠳᠠᠷᠠᠭ᠎ᠠ ᠴᠡᠷᠢᠭ ᠢᠶᠠᠨ ᠴᠣᠭᠯᠠᠭᠤᠯᠵᠦ ᠵᠠᠰᠠᠭᠠᠳ ᠮᠠᠮᠯᠢᠦᠺ ᠤᠨ ᠰᠦᠯᠲ᠋ᠠᠨ ᠢ ᠰᠢᠷᠢ᠂ ᠮᠢᠰᠢᠷ ᠠᠴᠠ ᠦᠯᠳᠡᠨ ᠬᠦᠬᠡᠬᠡᠵᠦ ᠰᠦᠨᠢ ᠬᠤᠷᠣᠰᠣᠯ  ᠢᠶᠠᠨ ᠳᠠᠶᠢᠯᠬᠤ ᠠᠶᠠᠨ ᠳᠠᠶᠢᠨ ᠳᠤ ᠮᠣᠷᠳᠠᠬᠤ ᠬᠡᠳᠡᠯ᠎ᠡ ᠠᠯᠳᠠᠨ ᠣᠷᠳᠣᠨ ᠤ ᠬᠠᠭᠠᠨ ᠪᠡᠷᠬᠡ ᠶᠢᠨ ᠴᠡᠷᠢᠭ ᠬᠦᠯᠡᠬᠦ ᠶᠢᠨ ᠣᠯᠣᠰ ᠲᠤ ᠬᠠᠯᠳᠠᠨ ᠣᠷᠣᠬᠤ ᠳᠤ ᠪᠡᠯᠡᠬᠡᠨ ᠺᠡᠦᠺᠡᠽ ᠳᠤ ᠬᠦᠷᠦᠯᠴᠡᠨ ᠢᠷᠡᠭᠡᠳ ᠪᠠᠶᠢᠪᠠ᠃ ᠰᠦᠰᠦᠭ ᠪᠢᠰᠢᠷᠡᠯ ᠤᠨ ᠨᠢᠬᠡᠳᠦᠮᠡᠯ ᠪᠠᠶᠢᠳᠠᠯ ᠦᠨᠳᠦᠰᠦ ᠣᠭᠰᠠᠭᠠᠨ ᠤ ᠬᠡᠯᠬᠢᠶ᠎ᠡ ᠬᠤᠯᠪᠣᠭ᠎ᠠ ᠶᠢ ᠠᠩᠬ᠎ᠠ ᠣᠳᠠᠭ᠎ᠠ ᠢᠯᠠᠨ ᠳᠡᠶᠢᠯᠦᠭᠰᠡᠨ ᠨᠢ ᠡᠨᠡ ᠠᠵᠢ᠃ ᠮᠠᠮᠯᠢᠦᠺ ᠤᠨ ᠰᠦᠯᠲ᠋ᠠᠨ ᠪᠣᠯᠣᠭᠰᠠᠨ ᠪᠸᠢᠢᠪᠡᠷᠰ ᠤᠨ ᠨᠠᠷᠢᠨ ᠳ᠋ᠢᠫᠯᠣᠮᠠᠲ ᠪᠣᠳᠣᠯᠭ᠎ᠠ ᠯᠠᠯᠣ ᠶᠢᠨ ᠱᠠᠰᠢᠨ ᠳᠤ ᠣᠷᠣᠭᠰᠠᠨ ᠪᠡᠷᠬᠡ ᠶᠢ ᠯᠠᠯᠣ ᠶᠢᠨ ᠱᠠᠰᠢᠨ ᠤ ᠲᠡᠷᠢᠬᠦᠨ ᠬᠡᠮᠡᠭᠳᠡᠬᠦ ᠬᠠᠯᠢᠹᠠ ᠶᠢ ᠪᠠᠷᠢᠵᠦ ᠴᠠᠭᠠᠵᠠᠯᠠᠭᠰᠠᠨ ᠬᠦᠯᠡᠬᠦ ᠶᠢᠨ ᠡᠰᠡᠷᠬᠦ ᠬᠠᠨᠳᠣᠬᠤ ᠳᠤ ᠬᠦᠷᠬᠡᠪᠡ᠃      ᠴᠢᠩᠬᠢᠰ ᠬᠠᠭᠠᠨ ᠤ ᠲᠡᠮᠦᠷ ᠮᠡᠳᠦ ᠬᠦᠰᠡᠯ ᠵᠣᠷᠢᠭ ᠨᠢᠬᠡᠨ ᠠᠷᠠᠳ ᠲᠦᠮᠡᠨ ᠢ ᠶᠠᠭᠤ ᠴᠦ ᠦᠬᠡᠢ ᠬᠤᠭᠤᠰᠣᠨ ᠠᠴᠠ ᠭᠠᠷᠭᠠᠨ ᠢᠷᠡᠵᠦ᠂ ᠳᠠᠷᠬᠠᠢ ᠪᠣᠳᠠᠷᠬᠠᠢ ᠨᠡᠬᠦᠳᠡᠯᠴᠢᠳ ᠠᠴᠠ ᠬᠠᠳᠠᠭᠤ ᠰᠠᠬᠢᠯᠭ᠎ᠠ ᠪᠦᠬᠦᠢ ᠠᠷᠮᠢ ᠪᠣᠯᠭᠠᠵᠦ᠂ ᠵᠡᠷᠯᠢᠭ ᠪᠦᠳᠦᠭᠦᠯᠢᠭ ᠳᠠᠶᠢᠴᠢᠳ ᠤᠨ ᠳᠡᠯᠡᠬᠡᠢ ᠶᠢᠨ ᠬᠡᠮᠵᠢᠶᠡᠨ ᠤ ᠭᠠᠷᠮᠠᠭᠠᠢ ᠵᠠᠩᠵᠣᠨ ᠰᠲᠷᠠᠲ᠋ᠧᠬᠢᠴᠣᠳ ᠢ ᠲᠦᠷᠦᠬᠦᠯᠦᠭᠰᠡᠨ ᠪᠣᠯᠪᠠᠴᠣ ᠭᠠᠭᠴᠠᠬᠠᠨ ᠵᠦᠢᠯ ᠳᠤ ᠯᠡ ᠬᠦᠴᠦᠨ ᠮᠡᠬᠦᠰᠳᠡᠭᠰᠡᠨ ᠨᠢ ᠮᠣᠩᠭᠤᠯᠴᠣᠳ ᠤᠨ ᠵᠠᠩ ᠠᠪᠣᠷᠢ ᠶᠢ ᠦᠬᠡᠷᠡᠴᠢᠯᠡᠵᠦ ᠴᠢᠳᠠᠭᠰᠠᠨ ᠦᠬᠡᠢ᠃ ᠡᠷᠳᠡ ᠪᠠᠯᠠᠷ ᠤᠨ ᠦᠶ᠎ᠡ ᠠᠴᠠ ᠠᠪᠣᠭᠠᠳ ᠯᠡ ᠮᠣᠩᠭᠤᠯ ᠨᠣᠳᠤᠭ ᠲᠤ ᠲᠦᠷᠡᠯᠵᠡᠨ ᠬᠦᠴᠦ ᠴᠢᠳᠠᠯ ᠢ ᠨᠢ ᠰᠠᠷᠨᠢᠭᠤᠯᠵᠦ ᠪᠠᠶᠢᠭᠰᠠᠨ ᠠᠬ᠎ᠠ ᠳᠡᠭᠦᠦᠰ ᠢᠶᠠᠨ ᠠᠯᠠᠵᠦ ᠬᠢᠳᠣᠬᠤ ᠳᠠᠶᠢᠨ ᠪᠠᠶᠢᠯᠳᠣᠭᠠᠨ ᠮᠦᠨᠦᠬᠡᠨ ᠠᠽᠢᠶ᠎ᠠ ᠲᠢᠪ ᠤᠨ ᠦᠷᠬᠡᠨ ᠠᠭᠤᠳᠠᠮ ᠨᠣᠳᠤᠭ ᠢ ᠨᠡᠯᠦᠩᠬᠢ ᠳᠤᠨᠢ ᠪᠦᠷᠬᠦᠬᠦ ᠪᠣᠯᠵᠠᠢ᠃ ᠬᠤᠪᠢᠯᠠᠢ ᠶᠢᠨ ᠮᠣᠩᠭᠤᠯᠴᠣᠳ ᠠᠷᠢᠭᠪᠦ᠋ᠬᠡ ᠶᠢᠨ ᠮᠣᠩᠭᠤᠯᠴᠣᠳ ᠤᠨ ᠡᠰᠡᠷᠬᠦ ᠶᠡᠭᠡ ᠭᠤᠪᠢ ᠶᠢᠨ ᠵᠠᠬ᠎ᠠ ᠬᠢᠵᠠᠭᠠᠷ ᠲᠤ ᠪᠠᠶᠢᠯᠳᠣᠭᠰᠠᠨ ᠲᠡᠷᠡ ᠯᠡ ᠴᠠᠭ ᠦᠶ᠎ᠡ ᠳᠤ ᠬᠦᠯᠡᠬᠦ ᠶᠢᠨ ᠮᠣᠩᠭᠤᠯᠴᠣᠳ ᠪᠡᠷᠬᠡ ᠶᠢᠨ ᠬᠠᠷᠢᠶᠠᠨ ᠤ ᠮᠣᠩᠭᠤᠯᠴᠣᠳ ᠲᠠᠢ ᠳᠣᠯᠭᠠᠷᠠᠨ ᠪᠠᠶᠢᠯᠳᠣᠵᠠᠢ᠃ ᠬᠦᠯᠡᠬᠦ᠂ ᠪᠡᠷᠬᠡ ᠬᠤᠶᠠᠷ ᠤᠨ ᠬᠤᠭᠤᠷᠣᠨᠳᠣ ᠭᠠᠷᠣᠭᠰᠠᠨ ᠮᠠᠷᠭᠤᠭᠠᠨ ᠤ ᠣᠭ ᠰᠣᠷᠪᠣᠯᠵᠢ ᠨᠢ ᠱᠠᠰᠢᠨ ᠤ ᠬᠦᠴᠦᠨ ᠵᠦᠢᠯ ᠠᠴᠠ ᠭᠠᠳᠠᠨ᠎ᠠ ᠠᠽᠧᠷᠪᠠᠶᠢᠵᠠᠨ ᠢ ᠬᠡᠨ ᠨᠢ ᠡᠷᠬᠡᠰᠢᠶᠡᠯ ᠳᠡᠭᠡᠨ ᠠᠪᠬᠤ ᠪᠣᠢ ᠬᠡᠳᠡᠭ ᠠᠰᠠᠭᠤᠳᠠᠯ  ᠠᠴᠠ ᠡᠭᠦᠰᠦᠭᠰᠡᠨ ᠪᠠᠶᠢᠨ᠎ᠠ᠃ ᠴᠢᠩᠬᠢᠰ ᠬᠠᠭᠠᠨ ᠤ ᠬᠤᠪᠢᠶᠠᠷᠢ ᠶᠣᠰᠣᠭᠠᠷ ᠵᠦᠴᠢ ᠶᠢᠨ ᠣᠯᠣᠰ ᠲᠤ ᠬᠠᠮᠢᠶᠠᠷᠬᠤ ᠶᠣᠰᠣᠳᠠᠢ ᠠᠳᠠᠯ᠎ᠠ ᠬᠦᠯᠡᠬᠦ ᠶᠢᠨ ᠮᠡᠳᠡᠯ ᠳᠤ ᠣᠴᠢᠭᠰᠠᠨ ᠳᠣᠯᠠ ᠬᠤᠵᠢᠮ ᠬᠡᠳᠦ ᠬᠡᠳᠦᠨ ᠣᠳᠠᠭ᠎ᠠ ᠨᠢᠬᠡ ᠠᠴᠠ ᠨᠦᠬᠦᠬᠡ ᠶᠢᠨ ᠮᠡᠳᠡᠯ ᠳᠤ ᠰᠢᠯᠵᠢᠬᠦ ᠪᠣᠯᠵᠠᠢ᠃ ᠨᠦᠬᠦᠬᠡ ᠳᠠᠯ᠎ᠠ ᠪᠠᠷ ᠬᠦᠯᠡᠬᠦ ᠶᠢᠨ ᠠᠶᠠᠨ ᠳᠠᠶᠢᠨ ᠳᠤ ᠣᠷᠣᠯᠴᠠᠭᠰᠨ ᠵᠦᠴᠢ ᠶᠢᠨ ᠣᠳᠣᠮ ᠤᠨ ᠨᠣᠶᠠᠳ ᠲᠤ ᠳᠠᠶᠢᠨ ᠤ ᠣᠯᠵᠠ ᠠᠴᠠ ᠪᠠᠨ ᠦᠭᠬᠦᠬᠡ ᠦᠬᠡᠢ ᠬᠡᠳᠡᠭ᠃      ᠡᠶᠢᠨᠬᠦ 1256 ᠣᠨ ᠳᠤ ᠪᠡᠷᠬᠡ ᠬᠦᠯᠡᠬᠦ ᠬᠤᠶᠠᠷ ᠤᠨ ᠬᠤᠭᠤᠷᠣᠨᠳᠣ ᠠᠩᠬᠠᠨ ᠤ ᠳᠠᠶᠢᠨ ᠪᠣᠯᠪᠠ᠃ ᠬᠡᠳᠦᠶᠢᠪᠡᠷ ᠳᠡᠳᠡ ᠬᠡᠳᠦ ᠬᠡᠳᠦᠨ ᠣᠳᠠᠭ᠎ᠠ ᠦᠭᠬᠦᠬᠡ ᠠᠪᠣᠭ᠎ᠠ ᠲᠠᠢ ᠳᠣᠮᠣ ᠵᠢᠵᠢᠭ ᠳᠣᠯᠭᠠᠷᠠᠨ ᠪᠠᠶᠢᠯᠳᠣᠭᠰᠠᠨ ᠴᠦ ᠬᠤᠵᠢᠮ ᠬᠤᠪᠢᠯᠠᠢ ᠶᠢ ᠦᠡᠭᠡ ᠬᠠᠭᠠᠨ ᠬᠡᠮᠡᠨ ᠬᠦᠯᠢᠶᠡᠨ ᠵᠦᠪᠰᠢᠶᠡᠷᠡᠭᠦᠯᠬᠦ ᠪᠣᠯᠣᠭᠰᠠᠨ ᠤ ᠳᠡᠭᠡᠷ᠎ᠡ ᠶᠡᠭᠡ ᠬᠠᠭᠠᠨ ᠤ ᠵᠠᠷᠯᠢᠭ ᠳᠣᠰᠢᠶᠠᠯ ᠤᠨ ᠠᠴᠢ ᠪᠠᠷ ᠪᠣᠰᠣ ᠬᠠᠷᠢᠨ ᠲᠡᠭᠦᠨ ᠠᠴᠠ ᠠᠷᠢᠭᠪᠦ᠋ᠬᠡ ᠶᠢ ᠳᠠᠷᠣᠭᠰᠠᠨ ᠤ ᠳᠠᠷᠠᠭ᠎ᠠ ᠳᠣᠰᠠᠯᠠᠮᠵᠢ ᠪᠣᠯᠭᠠᠨ ᠬᠦᠯᠡᠬᠦ ᠳᠤ ᠢᠯᠡᠭᠡᠭᠰᠡᠨ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠤᠨ ᠬᠦᠴᠦ ᠪᠠᠷ ᠪᠠᠶᠢᠯᠳᠣᠬᠤ ᠪᠠᠨ ᠵᠣᠭᠰᠣᠭᠠᠵᠦ ᠪᠡᠷᠬᠡ ᠬᠠᠭᠠᠨ ᠳ᠋ᠧᠷᠪᠧᠨᠲ ᠠᠴᠠ ᠣᠷᠣᠭᠰᠢ ᠨᠡᠪᠳᠡᠷᠡᠬᠦ ᠬᠡᠵᠦ ᠣᠷᠣᠯᠳᠣᠬᠤ ᠪᠠᠨ ᠪᠣᠯᠢᠵᠠᠢ᠃ ᠪᠡᠷᠬᠡ ᠶᠢ ᠬᠦᠯᠡᠬᠦ ᠶᠢᠨ ᠡᠰᠡᠷᠬᠦ ᠵᠦᠪᠬᠡᠨ ᠮᠠᠮᠯᠢᠦᠺ ᠤᠳ ᠪᠣᠰᠣ ᠣᠷᠣᠰ ᠤᠳ ᠦᠳᠦᠬᠡᠨ ᠳᠣᠷᠬᠢᠷᠠᠵᠦ ᠪᠠᠶᠢᠵᠠᠢ᠃ ᠡᠬᠦᠨ ᠳᠤ ᠠᠯᠧᠺᠰᠠᠨᠳ᠋ᠷ ᠨᠸᠧᠰᠺᠢ ᠮᠠᠰᠢ ᠢᠳᠡᠪᠬᠢ ᠲᠠᠢ ᠠᠵᠢᠯᠯᠠᠵᠦ ᠪᠡᠷᠬᠡ ᠬᠠᠭᠠᠨ ᠢ ᠢᠷᠠᠨ ᠤ ᠮᠣᠩᠭᠤᠯᠴᠣᠳ ᠲᠠᠢ ᠡᠪ ᠲᠦᠨᠵᠢᠨ ᠳᠠᠰᠣᠷᠠᠬᠤ ᠳᠡᠳᠦᠢ ᠦᠬᠡᠢ ᠪᠡᠬᠡᠵᠢᠩ  ᠳᠤ ᠳᠠᠳᠠᠪᠣᠷᠢ ᠦᠭᠬᠦ ᠶᠢ ᠨᠢ ᠪᠣᠯᠢᠭᠤᠯᠬᠤ ᠳᠤ ᠨᠦᠯᠦᠬᠡᠯᠡᠭᠰᠡᠨ ᠢᠶᠠᠷ ᠠᠯᠳᠠᠨ ᠣᠷᠳᠣᠨ ᠤ ᠣᠯᠣᠰ ᠨᠢ ᠶᠡᠭᠡ ᠮᠣᠩᠭᠤᠯ ᠠᠴᠠ ᠪᠠᠨ ᠰᠠᠯᠵᠦ ᠠᠵᠢᠯ ᠮᠦᠷᠡᠨ ᠤ ᠪᠣᠶᠣ ᠳᠣᠷᠣᠨᠠᠳᠣ ᠡᠸᠦ᠋ᠷᠦᠫᠠ ᠶᠢᠨ ᠨᠢᠬᠡ ᠣᠯᠣᠰ ᠬᠤᠪᠢᠷᠠᠭᠰᠠᠨ ᠪᠣᠯᠠᠢ᠃ ᠡᠶᠢᠨᠬᠦ ᠪᠡᠷᠬᠡ ᠬᠠᠭᠠᠨ ᠮᠢᠰᠢᠷ᠂ ᠣᠷᠣᠰ ᠬᠤᠶᠠᠷ ᠤᠨ ᠢᠳᠬᠠᠯᠭᠠᠨ ᠳᠤ ᠠᠪᠳᠠᠨ ᠢᠯ ᠬᠠᠭᠠᠳ ᠲᠠᠢ ᠪᠠᠶᠢᠯᠳᠣᠨ ᠶᠡᠭᠡ ᠮᠣᠩᠭᠤᠯ ᠠᠴᠠ ᠪᠠᠨ ᠳᠠᠰᠣᠷᠠᠨ᠂ ᠪᠡᠶ᠎ᠡ ᠳᠠᠭᠠᠭᠠᠵᠦ ᠲᠡᠯᠡᠬᠡᠢ ᠶᠢ ᠪᠦᠷᠬᠦᠭᠡᠭᠰᠡᠨ ᠶᠡᠭᠡ ᠮᠣᠩᠭᠤᠯ ᠣᠯᠣᠰ ᠪᠠᠶᠢᠭᠤᠯᠬᠤ ᠬᠡᠰᠡᠨ ᠡᠵᠡᠨ ᠴᠢᠩᠬᠢᠰ ᠬᠠᠭᠠᠨ ᠤ ᠪᠣᠳᠣᠯ ᠬᠡᠷᠢᠶᠡᠰᠦᠯᠡᠯ ᠬᠦᠢᠴᠡᠯᠳᠦᠬᠦ ᠦᠨᠳᠦᠰᠦ ᠦᠬᠡᠢ ᠪᠣᠯᠵᠠᠢ᠃      ᠬᠦᠯᠡᠬᠦ ᠬᠠᠭᠠᠨ ᠠᠵᠢᠯ ᠶᠠᠪᠣᠳᠠᠯ ᠢᠶᠠᠨ ᠴᠡᠭᠴᠡᠯᠡᠵᠦ ᠪᠡᠯᠡᠳᠦᠭᠰᠡᠨ ᠤ ᠡᠴᠦᠰ ᠲᠤ ᠪᠸᠢᠢᠪᠡᠷᠰ ᠲᠠᠢ ᠳᠣᠭᠠᠴᠠᠭ᠎ᠠ ᠪᠣᠳᠣᠬᠤ ᠪᠠᠷ ᠶᠠᠭ ᠬᠦᠳᠡᠯᠬᠦ ᠬᠡᠳᠡᠯ᠎ᠡ ᠨᠢᠬᠡᠨᠳᠡ ᠣᠷᠣᠶᠢᠳᠠᠭᠰᠠᠨ ᠪᠠᠶᠢᠯ᠎ᠠ᠃ ᠣᠴᠢᠷ ᠨᠢ ᠪᠸᠢᠢᠪᠡᠷᠰ ᠬᠦᠴᠦ ᠴᠢᠳᠠᠯ ᠢᠶᠠᠷ ᠦᠪᠡᠷ ᠲᠤᠨᠢ ᠵᠡᠷᠭᠡᠴᠡᠬᠦᠶᠢᠴᠡ ᠬᠡᠮᠵᠢᠶᠡᠨ ᠳᠤ ᠬᠦᠷᠦᠭᠰᠡᠨ ᠪᠠᠶᠢᠯ᠎ᠠ᠃ ᠲᠡᠭᠦᠨ  ᠤ ᠴᠡᠷᠢᠭ ᠲᠤ ᠠᠯᠳᠠᠨ ᠣᠷᠳᠣᠨ ᠤ ᠣᠯᠣᠰ ᠠᠴᠠ ᠢᠷᠡᠭᠰᠡᠨ ᠰᠣᠷᠭᠠᠭᠴᠢᠳ ᠠᠵᠢᠯᠯᠠᠵᠦ ᠪᠠᠶᠢᠪᠠ᠃ ᠮᠢᠰᠢᠷ ᠣᠷᠣᠨ ᠢ ᠪᠠᠶᠢᠯᠳᠣᠨ ᠳᠠᠭᠠᠭᠤᠯᠵᠦ ᠡᠵᠡᠩᠨᠡᠬᠦ ᠮᠦᠷᠦᠬᠡᠳᠦᠯ ᠵᠠᠮᠬᠠᠷᠠᠵᠦ᠂ ᠵᠦᠪᠬᠡᠨ ᠰᠢᠷᠢ ᠶᠢᠨ ᠬᠡᠰᠡᠭ ᠪᠣᠰᠠᠭ ᠢ ᠪᠣᠶᠣ ᠡᠨᠡ ᠲᠡᠷᠡ ᠬᠤᠳᠠ ᠶᠢ ᠡᠵᠡᠯᠡᠬᠦ ᠶᠢᠨ ᠲᠦᠯᠦᠬᠡ ᠲᠡᠮᠡᠴᠡᠯ ᠳᠣᠯᠣᠯᠳᠣᠭᠠᠨ ᠦᠷᠨᠢᠬᠦ ᠪᠣᠯᠪᠠ᠃ ᠡᠶᠢᠨᠬᠦ ᠬᠦᠯᠡᠬᠦ ᠬᠠᠭᠠᠨ ᠤ ᠦᠶ᠎ᠡ ᠳᠤ ᠢᠯ ᠬᠠᠭᠠᠳ ᠤᠨ ᠣᠯᠣᠰ ᠪᠦᠷᠢᠨ ᠳᠣᠰᠠᠭᠠᠷᠯᠠᠨ ᠳᠣᠭᠳᠠᠭᠰᠠᠨ ᠪᠣᠯᠪᠠᠴᠣ ᠵᠦᠪᠬᠡᠨ ᠢᠯ ᠬᠢᠯᠢ ᠬᠢᠵᠠᠭᠠᠷ ᠤᠨ ᠳᠣᠳᠣᠷ᠎ᠠ ᠪᠠᠨ ᠪᠠᠷᠢᠭᠳᠠᠨ ᠳᠣᠭᠳᠠᠬᠤ ᠪᠣᠯᠵᠠᠢ᠃      ᠬᠦᠯᠡᠬᠦ ᠯᠠᠯᠣ ᠶᠢᠨ ᠱᠠᠰᠢᠨᠳᠠᠨ ᠨᠤᠭᠤᠳ ᠤᠨ ᠡᠰᠡᠷᠬᠦ ᠬᠤᠯᠪᠣᠭ᠎ᠠ ᠪᠠᠶᠢᠭᠤᠯᠬᠤ ᠶᠢ ᠣᠷᠣᠯᠳᠣᠨ ᠡᠸᠦ᠋ᠷᠦᠫᠡ ᠣᠷᠣᠭᠤ ᠣᠯᠠᠨ ᠣᠳᠠᠭ᠎ᠠ ᠡᠯᠴᠢ ᠢᠯᠡᠬᠡᠵᠦ ᠪᠠᠶᠢᠯ᠎ᠠ᠃ ᠬᠡᠪᠡᠴᠦ ᠪᠦᠳᠦᠯ ᠲᠠᠢ ᠵᠦᠢᠯ ᠪᠣᠯᠣᠯ ᠦᠬᠡᠢ ᠪᠠᠶᠢᠭᠰᠠᠭᠠᠷ ᠨᠠᠰᠣᠨ ᠡᠴᠦᠰᠯᠡᠵᠦ᠂ ᠲᠡᠭᠦᠨ ᠤ ᠬᠦᠦ ᠠᠪᠠᠭ᠎ᠠ ᠨᠢ ᠵᠠᠯᠭᠠᠮᠵᠢᠯᠠᠪᠠ᠃ 
ᠢᠷᠡᠯᠲᠡ᠄ ︽ᠮᠣᠩᠭᠤᠯᠴᠤᠳ ᠤᠨ ᠲᠡᠦᠬᠡᠨ ᠳᠤ ᠠᠯᠳᠠᠷᠰᠢᠭᠰᠠᠨ 33 ᠴᠤᠤᠲᠤ︾ ᠨᠤᠮ ᠠᠴᠠ