ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/4/11
                                               ᠵᠣᠬᠢᠶᠠᠭᠴᠢ ᠬᠠᠰᠯᠤᠤ      ᠵᠢᠷᠠᠨ ᠨᠠᠰᠣ ᠶᠢ ᠲᠠᠪᠠᠵᠦ ᠵᠠᠵᠢᠨ ᠦᠰᠦ ᠨᠢ ᠪᠤᠭᠤᠷᠦᠯᠳᠣᠭᠰᠠᠨ ᠠᠪᠤ ᠡᠵᠢ ᠪᠠᠨ ᠡᠷᠳᠡ ᠨᠢᠭᠡ ᠡᠳᠣᠷ ᠬᠦᠨᠳᠣ ᠠᠵᠢᠯ ᠠᠴᠠ ᠨᠢ ᠴᠢᠯᠦᠭᠡᠯᠡᠵᠦ᠂ ᠪᠡᠶ᠎ᠡ ᠠᠮᠣᠷ ᠠᠮᠢᠳᠣᠷᠠᠭᠤᠯᠣᠶ᠎ᠠ ᠭᠡᠵᠦ ᠪᠤᠳᠣᠨ᠂ ᠡᠭᠡᠴᠢ ᠳᠡᠭᠦᠦ ᠪᠢᠳᠡ ᠬᠡᠲᠥᠬᠦᠯᠡ ᠪᠠᠨ ᠪᠠᠯᠭᠠᠰᠣᠨ ᠳᠤ ᠠᠰᠠᠷ ᠠᠪᠴᠣ ᠨᠡᠭᠦᠯᠭᠡᠬᠦ ᠪᠠᠷ ᠰᠢᠢᠳᠪᠡ᠃ ᠠᠪᠤ ᠡᠵᠢ ᠮᠢᠨᠢ ᠬᠡᠳᠦ᠋ᠪᠡᠷ ᠬᠦᠳᠡᠭᠡ ᠭᠡᠷ ᠤᠨ ᠠᠮᠢᠳᠣᠷᠠᠯ ᠠᠴᠠ ᠪᠠᠨ ᠰᠠᠯᠵᠣ ᠲᠦᠪᠳᠡᠬᠦ ᠦᠭᠡᠢ ᠪᠤᠯᠪᠠᠴᠣ ᠮᠠᠨᠤᠰ ᠡᠭᠡᠯᠵᠢᠯᠡᠨ ᠢᠳᠬᠠᠭᠠᠳ ᠪᠠᠶᠢᠬᠤᠯᠠᠷ ᠠᠷᠭ᠎ᠠ ᠪᠤᠰᠣ ᠲᠣᠯᠣᠭᠠᠢ ᠳᠣᠬᠢᠭᠰᠠᠨ ᠪᠢᠯᠡ᠃ ᠨᠠᠰᠣ ᠪᠠᠷ ᠢᠶᠠᠨ ᠬᠦᠳᠡᠭᠡ ᠳᠡᠭᠡᠨ ᠠᠮᠢᠳᠣᠷᠠᠵᠣ ᠳᠠᠰᠣᠭᠰᠠᠨ ᠬᠦᠮᠦᠨ ᠭᠡᠨᠡᠳᠳᠡ ᠬᠤᠳᠠ ᠭᠠᠵᠠᠷ ᠠᠮᠢᠳᠣᠷᠠᠨ᠎ᠠ ᠭᠡᠬᠦ ᠪᠠᠷ ᠰᠡᠳᠭᠢᠯ ᠲᠣᠭᠳᠠᠪᠤᠷᠢ ᠦᠭᠡᠢ ᠪᠠᠶᠢᠭᠰᠠᠨ ᠨᠢ ᠣᠶᠢᠯᠠᠭᠠᠮᠵᠢᠳᠠᠢ ᠶᠣᠮ᠃       ᠡᠵᠢ ᠮᠢᠨᠢ ᠨᠡᠬᠦᠵᠣ ᠪᠠᠭᠤᠬᠤ ᠳᠠᠭᠠᠨ ᠬᠦᠳᠡᠭᠡ ᠳᠡᠭᠡᠨ ᠬᠡᠷᠡᠭᠯᠡᠵᠦ ᠪᠠᠶᠢᠭᠰᠠᠨ ᠵᠦᠢᠯ ᠢᠶᠠᠨ ᠬᠠᠶᠠᠵᠣ ᠲᠦᠪᠳᠡᠬᠦ ᠦᠭᠡᠢ ᠪᠠᠶᠢᠭᠰᠠᠨ ᠴᠣ᠂ ᠪᠠᠭᠤᠵᠣ ᠰᠠᠭᠤᠬᠤ ᠵᠠᠮ ᠬᠤᠯᠠ᠂ ᠲᠡᠷᠭᠡ ᠣᠨᠤᠭ᠎ᠠ ᠪᠠᠭᠳᠠᠬᠤ ᠦᠭᠡᠢ ᠶᠢᠨ ᠳᠡᠭᠡᠷ᠎ᠡ ᠠᠰᠠᠷ ᠲᠤ ᠭᠠᠷᠪᠠᠯ ᠰᠢᠨ᠎ᠡ ᠬᠡᠷᠡᠭᠰᠡᠯ ᠠᠪᠬᠤ ᠪᠤᠯᠬᠤᠷ ᠲᠦᠷᠦᠯ ᠰᠠᠳᠣᠨ ᠣᠶᠢᠷ᠎ᠠ ᠵᠡᠷᠭᠡᠯᠡᠳᠡᠭᠡ ᠶᠢᠨ ᠬᠢᠨ ᠳᠤ ᠦᠭᠭᠦ ᠨᠢ ᠦᠭᠴᠦ ᠬᠠᠶᠠᠬᠤ ᠶᠢ ᠨᠢ ᠬᠠᠶᠠᠭᠠᠳ ᠬᠡᠳᠣᠨ ᠭᠠᠩ ᠰᠠᠪᠠ ᠪᠠᠨ ᠬᠡᠨ ᠳᠤ ᠴᠦ ᠦᠭᠭᠦᠭᠰᠡᠨ ᠦᠭᠡᠢ᠃ ᠠᠰᠠᠷ ᠲᠤ ᠭᠠᠷᠪᠠᠯ ᠭᠠᠩ ᠰᠠᠪᠠ ᠲᠠᠯᠪᠢᠬᠤ ᠭᠠᠵᠠᠷ ᠦᠭᠡᠢ ᠪᠦᠭᠡᠳ ᠭᠡᠷ ᠤᠨ ᠳᠣᠯᠠᠭᠠᠨ ᠤ ᠬᠡᠮᠵᠢᠶ᠎ᠡ ᠦᠨᠳᠣᠷ ᠪᠤᠯᠬᠤᠷ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠳᠠᠷᠣᠬᠤ ᠳᠤ ᠲᠣᠬᠢᠷᠠᠮᠵᠢ ᠦᠭᠡᠢ᠂ ᠪᠦᠷ ᠸᠠᠯᠠᠵᠤ ᠡᠪᠳᠡᠷᠡᠴᠢᠬᠡᠨ᠎ᠡ ᠭᠡᠬᠦ ᠶᠢ ᠰᠣᠨᠣᠰᠬᠤ ᠶᠣᠮ ᠪᠢᠰᠢ᠃ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠠᠴᠠ ᠪᠠᠨ ᠨᠢᠭᠡ ᠴᠦ ᠡᠳᠣᠷ ᠰᠠᠯᠵᠣ ᠴᠢᠳᠠᠬᠤ ᠦᠭᠡᠢ ᠡᠵᠢ ᠮᠢᠨᠢ ᠠᠪᠳᠠᠷ᠎ᠠ ᠳᠣᠣᠷ᠎ᠠ ᠪᠠᠨ ᠳᠠᠷᠣᠵᠣ ᠬᠠᠳᠠᠭᠠᠯᠠᠵᠤ ᠪᠠᠶᠢᠭ᠎ᠠ ᠣᠷᠬᠤᠳᠠᠢ ᠮᠡᠳᠣ ᠬᠡᠳᠣᠨ ᠭᠠᠩ ᠰᠠᠪᠠ ᠪᠠᠨ ᠠᠪᠤᠭᠠᠳ ᠢᠷᠡᠵᠡᠢ᠃       ᠡᠨᠡ ᠭᠠᠩ ᠰᠠᠪᠠ ᠳᠤ ᠡᠵᠢ ᠮᠢᠨᠢ ᠵᠢᠯ ᠪᠦᠷᠢ ᠨᠣᠭᠤᠭ᠎ᠠ ᠳᠠᠷᠣᠵᠣ᠂ ᠪᠢᠳᠡᠨ ᠳᠤ ᠠᠮᠳᠠᠳᠣ ᠵᠠᠭᠤᠰᠢ ᠪᠡᠯᠡᠳᠭᠡᠨ ᠦᠭᠴᠦ ᠪᠠᠶᠢᠭᠰᠠᠨ ᠢ ᠰᠠᠶᠢᠨ ᠮᠡᠳᠡᠨ᠎ᠡ᠃ ᠮᠡᠳᠡᠭᠡ ᠣᠷᠣᠭᠰᠠᠨ ᠠᠴᠠ ᠯᠡ ᠠᠪᠤᠭᠠᠳ ᠬᠡᠯᠡ ᠳᠤ ᠰᠢᠩᠭᠡᠭᠰᠡᠨ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠶᠢᠨ ᠦᠨᠦᠷ ᠠᠮᠳᠠ ᠬᠡᠵᠢᠶ᠎ᠡ ᠬᠠᠮᠢᠭ᠎ᠠ ᠶᠠᠪᠤᠭᠰᠠᠨ ᠴᠦ ᠮᠠᠷᠳᠠᠭᠳᠠᠬᠤ ᠦᠭᠡᠢ᠃ ᠪᠢᠴᠢᠭ ᠰᠣᠶᠣᠯ ᠤᠨ ᠮᠦᠷ ᠬᠦᠬᠡᠬᠡᠵᠣ ᠨᠣᠳᠤᠭ ᠠᠴᠠ ᠪᠠᠨ ᠬᠤᠯᠠ ᠶᠠᠪᠤᠭᠰᠠᠨ ᠪᠠ ᠰᠣᠷᠪᠤᠯᠵᠢᠯᠠᠭ᠎ᠠ ᠶᠢᠨ ᠠᠵᠢᠯ ᠢᠶᠠᠷ ᠣᠯᠠᠨ ᠭᠠᠵᠠᠷ ᠲᠤ ᠬᠦᠷᠴᠦ ᠡᠯᠳᠡᠪ ᠵᠦᠢᠯ ᠤᠨ ᠠᠮᠳᠠᠳᠠᠢ ᠨᠣᠭᠤᠭ᠎ᠠ ᠶᠢ ᠠᠮᠳᠠᠯᠠᠵᠣ ᠦᠵᠡᠭᠰᠡᠨ ᠪᠤᠯᠪᠠᠴᠣ ᠠᠯᠢ ᠨᠢ ᠴᠦ ᠭᠡᠰᠡᠨ ᠡᠵᠢ ᠶᠢᠨ ᠮᠢᠨᠢ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠶᠢᠨ ᠠᠮᠳᠠ ᠶᠢ ᠬᠦᠷᠬᠦ ᠦᠭᠡᠢ᠃ ᠬᠠᠮᠢᠭ᠎ᠠ ᠣᠴᠢᠭᠠᠳ ᠶᠠᠭᠤ ᠢᠳᠡᠭᠰᠡᠨ ᠴᠦ᠂ ᠬᠤᠶᠠᠷ ᠬᠤᠨᠣᠬᠤ ᠦᠭᠡᠢ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠪᠠᠨ ᠰᠠᠨᠠᠴᠢᠬᠠᠳᠠᠭ ᠪᠦᠭᠡᠳ ᠨᠢᠭᠡ ᠡᠷᠢᠨ ᠳᠤ ᠳᠠᠪᠣᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠳᠣᠳᠠᠭᠰᠠᠨ ᠪᠠᠶᠢᠪᠠᠯ᠂ ᠬᠤᠭᠤᠯᠠᠨ ᠤ ᠠᠮᠳᠠ ᠰᠢᠮᠳᠠ ᠨᠢ ᠠᠯᠳᠠᠷᠠᠭᠠᠳ ᠪᠠᠶᠢᠳᠠᠭ᠃       ᠬᠡᠳᠣᠨ ᠵᠢᠯ ᠤᠨ ᠡᠮᠦᠨ᠎ᠡ ᠪᠢ ᠣᠯᠣᠰ ᠤᠨ ᠰᠣᠷᠭᠠᠨ ᠬᠦᠮᠦᠵᠢᠯ ᠤᠨ ᠶᠠᠮᠣᠨ ᠤ ᠲᠣᠮᠢᠯᠠᠯᠳᠠ ᠪᠠᠷ ᠶᠠᠫᠣᠨ ᠣᠯᠣᠰ ᠲᠤ ᠬᠦᠷᠴᠣ ᠰᠣᠷᠣᠯᠴᠠᠭᠰᠠᠨ ᠪᠢᠯᠡ᠃ ᠠᠩᠬ᠎ᠠ ᠣᠴᠢᠬᠤ ᠳᠤ ᠶᠠᠫᠣᠨ ᠤ ᠠᠯᠢᠪᠠ ᠪᠦᠬᠦᠨ ᠰᠣᠨᠢᠨ ᠰᠠᠶᠢᠬᠠᠨ ᠰᠠᠨᠠᠭᠳᠠᠵᠣ ᠪᠠᠶᠢᠭᠰᠠᠨ ᠪᠤᠯᠪᠠᠴᠤ ᠶᠠᠫᠦᠨ ᠬᠤᠭᠤᠯᠠᠨ ᠳᠤ ᠠᠷᠠᠢ ᠳᠠᠰᠴᠣ ᠦᠭᠭᠦ ᠦᠭᠡᠢ ᠪᠠᠶᠢᠯ᠎ᠠ᠃ ᠲᠦᠭᠦᠬᠡᠢ ᠵᠢᠭᠠᠰᠣ ᠢᠳᠡᠬᠦ ᠳᠤ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠨᠡᠩ ᠢᠯᠡᠬᠦᠦ ᠡᠷᠢᠭᠳᠡᠨ᠎ᠡ᠃ ᠠᠲᠡ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠪᠠᠶᠢᠳᠠᠭ ᠴᠦ ᠦᠨᠦᠷ ᠠᠮᠳᠠ ᠳᠤᠨᠢ ᠪᠢ ᠳᠠᠰᠬᠤ ᠦᠭᠡᠢ᠂ ᠴᠠᠭ ᠦᠷᠬᠦᠯᠵᠢ ᠡᠵᠢ ᠶᠢᠨ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠳᠣᠷᠠᠰᠣᠭᠳᠠᠳᠠᠭ ᠪᠠᠶᠢᠯ᠎ᠠ᠃ ᠨᠢᠭᠡ ᠡᠳᠣᠷ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠪᠠᠨ ᠢᠳᠡᠶ᠎ᠡ ᠭᠡᠵᠣ ᠰᠠᠨᠠᠭᠠᠳ ᠲᠡᠰᠭᠦ ᠪᠠᠨ ᠪᠤᠯᠢᠬᠤ ᠳᠠᠭᠠᠨ ᠠᠷᠭ᠎ᠠ ᠦᠭᠡᠢ ᠰᠦᠯᠢᠶᠣᠣ ᠰᠠᠭᠤᠯᠠᠭ᠎ᠠ ᠬᠤᠳᠠᠯᠳᠣᠨ ᠠᠪᠴᠢᠷᠠᠭᠠᠳ᠂ ᠲᠣᠰᠬᠠᠶᠢᠯᠠᠨ ᠡᠵᠢ ᠳᠡᠭᠡᠨ ᠣᠳᠠᠰᠣᠳᠠᠵᠣ᠂ ᠲᠠᠪᠤᠰᠤᠯᠠᠭᠰᠠᠨ ᠨᠣᠭᠤᠭ᠎ᠠ ᠶᠠᠭᠠᠬᠢᠵᠤ ᠳᠠᠷᠣᠬᠤ ᠲᠣᠬᠠᠢ ᠠᠰᠠᠭᠤᠪᠠ᠃ ᠡᠵᠢ ᠶᠢᠨ ᠢᠶᠠᠨ ᠵᠢᠭᠠᠭᠰᠠᠨ ᠢᠶᠠᠷ ᠴᠠᠭᠠᠨ ᠨᠣᠭᠤᠭ᠎ᠠ᠂ ᠬᠤᠯᠣᠣᠪᠠᠩ ᠢ ᠯᠠᠵᠣᠣ ᠲᠠᠢ ᠬᠡᠷᠴᠢᠵᠣ ᠳᠠᠪᠤᠰᠣᠯᠠᠨ ᠪᠠᠶᠢᠷᠢ ᠶᠢᠨ ᠢᠶᠠᠨ ᠨᠠᠷᠠᠪᠴᠢᠨ ᠳᠤ ᠳᠠᠷᠣᠵᠣ ᠲᠠᠯᠪᠢᠭᠠᠳ᠂ ᠡᠳᠣᠷ ᠲᠣᠭᠠᠯᠠᠨ ᠬᠦᠯᠢᠶᠡᠵᠣ ᠰᠠᠭᠤᠯ᠎ᠠ᠂ ᠠᠷᠪᠠᠭᠠᠳ ᠡᠳᠣᠷ ᠤᠨ ᠳᠠᠷᠠᠭ᠎ᠠ ᠠᠮᠳᠠᠯᠠᠵᠤ ᠦᠵᠡᠭᠰᠡᠨ ᠴᠢᠨᠢ ᠡᠵᠢ ᠶᠢᠨ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠶᠢᠨ ᠦᠨᠦᠷ ᠠᠮᠳᠠ ᠮᠡᠷ ᠰᠡᠷ ᠠᠮᠳᠠᠯᠠᠭᠳᠠᠯ᠎ᠠ᠃ ᠪᠠᠶᠠᠷᠯᠠᠭᠰᠠᠨ ᠢ ᠬᠡᠯᠡᠬᠦ ᠦᠦ ᠳ᠋ᠠ᠃ ᠲᠡᠭᠦᠨ ᠠᠴᠠ ᠬᠤᠶᠢᠰᠢ ᠬᠡᠳᠣ ᠬᠤᠨᠣᠬᠤ ᠦᠭᠡᠢ ᠨᠢᠭᠡ ᠲᠣᠯᠣᠭᠠᠢ ᠴᠠᠭᠠᠨ ᠨᠣᠭᠤᠭ᠎ᠠ ᠬᠤᠳᠠᠯᠳᠣᠵᠣ ᠠᠪᠴᠢᠷᠠᠭᠠᠳ ᠳᠠᠷᠣᠳᠠᠭ ᠪᠤᠯᠤᠭᠰᠠᠨ ᠪᠦᠭᠡᠳ ᠲᠡᠬᠦᠨ ᠤ ᠠᠴᠢ ᠪᠠᠷ ᠬᠤᠶᠠᠷ ᠰᠠᠷ᠎ᠠ ᠶᠢ ᠠᠮᠳᠠ ᠰᠢᠮᠳᠠ ᠲᠠᠢ ᠦᠩᠭᠡᠷᠡᠭᠦᠯᠵᠦ ᠪᠢᠯᠡ᠃       ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠨᠠᠮᠣᠷ ᠤᠨ ᠰᠡᠬᠦᠯᠴᠢ ᠪᠠᠷ ᠨᠣᠭᠤᠭ᠎ᠠ ᠳᠠᠪᠤᠰᠣᠯᠠᠬᠤ ᠴᠠᠭ ᠪᠤᠯᠬᠤ ᠶᠢ ᠪᠢ ᠬᠠᠮᠤᠭ ᠠᠴᠠ ᠬᠦᠰᠡᠨ ᠬᠦᠯᠢᠶᠡᠳᠡᠭ᠃ ᠪᠠᠷᠤᠭ ᠯᠡ ᠢᠴᠡᠭᠡᠨ ᠤ ᠠᠮᠢᠳᠠᠨ ᠵᠢᠯ ᠤᠨ ᠬᠦᠨᠡᠰᠣ ᠪᠠᠨ ᠨᠦᠭᠡᠴᠡᠯᠡᠵᠤ ᠪᠠᠶᠢᠮᠠᠷ ᠡᠵᠢ ᠮᠢᠨᠢ ᠬᠠᠰᠢᠶᠠᠨ ᠳᠠᠭᠠᠨ ᠲᠠᠷᠢᠬᠰᠠᠨ᠂ ᠲᠠᠷᠢᠶᠠᠨ ᠡᠮ᠂ ᠬᠢᠮᠢ ᠶᠢᠨ ᠪᠤᠷᠳᠣᠭᠤᠷ ᠭᠡᠵᠣ ᠬᠢᠳᠡᠭ ᠦᠭᠡᠢ ᠴᠠᠭᠠᠨ ᠨᠣᠭᠤᠭ᠎ᠠ᠂ ᠰᠣᠩᠬᠢᠨ᠎ᠠ᠂ ᠬᠠᠰᠢ᠂ ᠬᠤᠯᠣᠣᠪᠠᠩ᠂ ᠮᠠᠨᠵᠢᠨ ᠭᠡᠬᠦ ᠮᠡᠳᠦᠴᠢᠯᠡᠨ ᠶᠠᠩᠵᠣ ᠶᠠᠩᠵᠣ ᠶᠢᠨ ᠨᠣᠭᠤᠭ᠎ᠠ ᠳᠠᠷᠣᠳᠠᠭ᠃ ᠡᠵᠢ ᠪᠠᠨ ᠬᠠᠮᠵᠢᠵᠦ ᠨᠣᠭᠤᠭ᠎ᠠ ᠲᠡᠭᠦᠭᠦ᠂ ᠣᠬᠢᠶᠠᠬᠤ ᠵᠡᠷᠭᠡ ᠠᠵᠢᠯ ᠢ ᠨᠢ ᠬᠢᠵᠦ ᠦᠭᠴᠦ ᠪᠠᠶᠢᠮᠠᠨ ᠠᠵᠢᠯ ᠳᠤ ᠣᠷᠣᠭᠰᠠᠨ ᠪᠢ ᠲᠡᠷᠡ ᠦᠶ᠎ᠡ ᠳᠤ ᠡᠵᠢ ᠠᠪᠤ ᠳᠠᠭᠠᠨ ᠬᠡᠴᠢᠨᠡᠬᠡᠨ ᠶᠡᠭᠡ ᠲᠣᠰᠠ ᠪᠤᠯᠤᠭᠰᠨᠨ ᠮᠡᠳᠣ ᠰᠠᠨᠠᠭᠳᠠᠵᠣ ᠪᠠᠶᠢᠭᠰᠠᠨ ᠳ᠋ᠠ ᠬᠦᠬᠡᠷᠦᠬᠦᠢ᠃ ᠨᠠᠮᠣᠷ ᠴᠠᠭ ᠰᠢᠨ᠎ᠡ ᠲᠠᠷᠣᠭᠰᠠᠨ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠣᠯᠵᠣ ᠢᠳᠡᠭᠦ ᠨᠢ ᠨᠢᠬᠡ ᠵᠢᠯ ᠤᠨ ᠬᠠᠮᠤᠭ ᠤᠨ ᠵᠢᠷᠭᠠᠯ ᠲᠠᠢ ᠮᠦᠴᠠ ᠪᠠᠶᠢᠯ᠎ᠠ᠃ ᠨᠠᠮᠣᠷ ᠤᠨ ᠬᠤᠷᠢᠶᠠᠯᠳᠠ ᠶᠢᠨ ᠶᠠᠭᠠᠷᠠᠯᠳᠠᠢ ᠣᠯᠠᠷᠢᠯ ᠳᠤ᠂ ᠠᠪᠤ ᠮᠢᠨᠢ ᠨᠢᠬᠡ ᠡᠳᠣᠷ ᠤᠨ ᠠᠵᠢᠯ ᠢᠶᠠᠨ ᠬᠢᠵᠦ ᠪᠠᠷᠠᠭᠠᠳ ᠦᠳᠡᠰᠢ ᠨᠢ ᠰᠢᠷᠡᠭᠡ ᠳᠦᠭᠦᠷᠳᠡᠯ᠎ᠡ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠦᠷᠦᠵᠦ ᠲᠠᠯᠪᠢᠭᠠᠳ᠂ ᠴᠡᠷ ᠴᠡᠷ ᠬᠢᠳᠠᠯ᠎ᠠ ᠵᠠᠵᠢᠯᠣᠨ᠂ ᠬᠤᠶᠠᠷ ᠬᠤᠨᠳᠠᠭ᠎ᠠ ᠠᠷᠢᠬᠢ ᠪᠠᠨ ᠪᠠᠯᠭᠤᠬᠤ ᠨᠢ ᠰᠢᠯᠦᠰᠣ ᠬᠤᠷᠠᠮᠠᠷ ᠠᠮᠳᠠᠳᠠᠢ ᠰᠠᠨᠠᠭᠳᠠᠭᠤᠯᠳᠠᠭ᠃ ᠠᠪᠤ ᠮᠢᠨᠢ ᠲᠡᠭᠡᠵᠣ ᠨᠢᠭᠡ ᠡᠳᠣᠷ ᠤᠨ ᠶᠠᠳᠠᠷᠠᠭ᠎ᠠ ᠴᠢᠯᠡᠭᠡ ᠪᠠᠨ ᠲᠠᠶᠢᠯᠵᠣ ᠪᠠᠶᠢᠭᠰᠠᠨ ᠪᠠᠶᠢᠯᠭᠦᠢ᠃       ᠣᠶᠢᠷ᠎ᠠ ᠶᠢᠨ ᠬᠡᠳᠣᠨ ᠵᠢᠯ᠂ ᠴᠢᠰᠣᠨ ᠳᠠᠷᠣᠯᠳᠠ ᠦᠨᠳᠣᠷ ᠡᠪᠡᠳᠴᠢᠳᠠᠨ ᠳᠤ ᠨᠡᠷᠪᠡᠭᠳᠡᠬᠦ ᠠᠴᠠ ᠪᠤᠯᠭᠤᠮᠵᠢᠯᠠᠨ ᠠᠪᠤ ᠡᠵᠢ ᠶᠢ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠳᠣᠳᠠᠭᠤ ᠢᠳᠡᠭᠡᠷᠡᠢ ᠭᠡᠵᠣ ᠤᠯᠠᠨᠳᠠ ᠢᠳᠬᠠᠵᠣ ᠬᠡᠯᠡᠭᠰᠡᠨ ᠴᠦ᠂ ᠲᠡᠳᠡ ᠢᠳᠡᠳᠡᠭ ᠢᠶᠠᠷ ᠢᠶᠠᠨ ᠢᠳᠡᠵᠦ ᠯᠡ ᠪᠠᠶᠢᠨ᠎ᠠ᠃ ᠨᠠᠰᠣ ᠪᠠᠷ ᠢᠶᠠᠨ ᠢᠳᠡᠭᠡᠳ ᠳᠠᠰᠴᠢᠬᠠᠭᠰᠠᠨ ᠬᠦᠮᠦᠨ ᠨᠢᠭᠡ ᠯᠡ ᠳᠣᠣᠷ᠎ᠠ ᠢᠳᠡᠬᠦ ᠪᠠᠨ ᠶᠠᠭᠠᠬᠢᠵᠣ ᠵᠣᠭᠰᠣᠵᠣ ᠳᠡᠶᠢᠯᠦᠨ᠎ᠡ ᠳ᠋ᠠ᠃ ᠲᠣᠭᠠᠯᠠᠭᠠᠳ ᠲᠠᠯᠪᠢᠭᠰᠠᠨ ᠨᠠᠰᠣ᠂ ᠮᠦᠩᠬᠡᠷᠡᠬᠦ ᠶᠣᠮ ᠪᠢᠰᠢ᠂ ᠮᠠᠨ ᠤ ᠨᠤᠲᠤᠭ ᠤᠨ ᠬᠢ ᠪᠦᠷ ᠳᠠᠪᠤᠰᠣ ᠶᠡᠭᠡ ᠢᠳᠡᠳᠡᠭ᠂ ᠲᠡᠭᠡᠯ᠎ᠡ ᠭᠡᠳ ᠪᠦᠷ ᠦᠨᠳᠣᠷ ᠨᠠᠰᠣᠯᠠᠵᠣ ᠪᠠᠶᠢᠬᠤ ᠦᠭᠡᠢ ᠦᠦ ᠭᠡᠬᠦ ᠶᠣᠮ᠃       ᠬᠡᠯᠡᠪᠡᠯ ᠪᠠᠰᠠ ᠰᠣᠨᠢᠨ᠂ ᠮᠠᠨ ᠤ ᠨᠣᠳᠤᠭ ᠤᠨ ᠬᠦᠮᠦᠨ ᠠᠷᠠᠳ ᠪᠦᠷ ᠣᠷᠳᠣ ᠨᠠᠰᠣᠯᠠᠳᠠᠭ᠃ ᠬᠠᠷ᠎ᠠ ᠪᠤᠷᠣ ᠠᠵᠢᠯ ᠬᠢᠵᠦ ᠶᠡᠭᠡ ᠵᠦᠳᠡᠷᠡᠳᠡᠭ ᠠᠪᠠᠴᠣ᠂ ᠬᠠᠷ᠎ᠠ ᠰᠢᠷᠣᠢ ᠳᠤ ᠣᠷᠭᠤᠭᠰᠠᠨ ᠪᠤᠳᠠᠭ᠎ᠠ ᠪᠠᠨ ᠢᠳᠡᠵᠣ᠂ ᠬᠤᠣᠯᠢᠨ ᠭᠤᠣᠯ ᠤᠨ ᠷᠠᠰᠢᠶᠠᠨ ᠮᠡᠳᠣ ᠤᠰᠣ ᠶᠢ ᠣᠣᠭᠤᠵᠣ ᠪᠠᠶᠢᠳᠠᠭ ᠠᠴᠠ ᠪᠤᠯᠪᠠ ᠦᠦ ᠪᠤᠤ ᠮᠡᠳᠡ᠂ ᠡᠶᠢᠮᠦ ᠲᠡᠶᠢᠮᠦ ᠡᠪᠡᠳᠴᠢᠨ ᠳᠤ ᠨᠡᠷᠪᠡᠭᠳᠡᠬᠦ ᠬᠦᠮᠦᠨ ᠲᠣᠩ ᠴᠦᠬᠡᠨ᠃ ᠪᠤᠰᠣᠳ ᠭᠠᠵᠠᠷ ᠤᠨ ᠬᠦᠮᠦᠨ ᠮᠠᠨ ᠤ ᠲᠡᠨᠳᠡ ᠣᠴᠢᠭᠰᠠᠭᠠᠷ ᠯᠡ ᠢᠳᠡᠬᠦ ᠳᠠᠪᠤᠰᠣᠨ ᠤ ᠬᠢᠨᠢ ᠶᠡᠭᠡ ᠳᠤ ᠳᠠᠳᠬᠤ ᠦᠭᠡᠢ᠂ ᠣᠨᠴᠠᠭᠠᠶᠢᠯᠠᠨ ᠠᠶᠠᠭ᠎ᠠ ᠫᠢᠯᠠ ᠪᠠᠷ ᠲᠦᠭᠦᠷᠳᠡᠯ᠎ᠡ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠲᠠᠯᠪᠢᠭᠠᠳ ᠢᠳᠡᠬᠦ ᠶᠢ ᠴᠣᠬᠤᠮ ᠭᠠᠶᠢᠬᠠᠳᠠᠭ ᠪᠦᠭᠡᠳ ᠴᠢᠰᠦᠨ ᠳᠠᠷᠣᠯᠳᠠ ᠦᠨᠳᠦᠷ ᠡᠪᠡᠳᠴᠢᠨ ᠣᠯᠬᠤ ᠦᠭᠡᠢ ᠦᠦ ᠭᠡᠵᠣ ᠰᠠᠨᠠᠭᠠᠰᠢᠷᠠᠲᠠᠬ᠃ ᠨᠣᠳᠤᠭ ᠨᠣᠳᠤᠭ ᠤᠨ ᠢᠳᠡᠭᠡᠨ᠂ ᠨᠣᠳᠤᠭ ᠨᠣᠳᠤᠭ ᠲᠠᠭᠠᠨ ᠲᠣᠬᠢᠷᠠᠭᠰᠠᠨ ᠦᠪᠡᠷᠮᠢᠴᠠ ᠦᠨᠦᠷ ᠠᠮᠳᠠ ᠲᠠᠢ ᠪᠠᠶᠢᠳᠠᠭ ᠪᠦᠭᠡᠳ ᠣᠷᠴᠢᠨ ᠠᠬᠤᠢ ᠲᠠᠢ ᠪᠠᠨ ᠠᠷᠭ᠎ᠠ ᠦᠭᠡᠢ ᠵᠣᠬᠢᠴᠠᠯᠳᠣᠭᠰᠠᠨ ᠷᠢᠳᠢ ᠰᠢᠳᠢ ᠲᠠᠢ᠃ ᠵᠢᠯᠵᠢᠨ ᠬᠦᠳᠡᠭᠡ ᠭᠠᠳᠠᠭ᠎ᠠ ᠶᠠᠪᠤᠵᠣ᠂ ᠬᠠᠯᠠᠭᠤᠨ ᠳᠤ ᠬᠠᠯᠠᠵᠣ᠂ ᠬᠦᠢᠳᠡᠨ ᠳᠤ ᠲᠠᠭᠠᠷᠠᠵᠦ᠂ ᠬᠠᠷ᠎ᠠ ᠬᠠᠳᠠᠭᠤ ᠲᠠᠷᠢᠶᠠᠨ ᠠᠵᠢᠯ ᠳᠤ ᠠᠷᠠᠯ ᠤᠨ ᠱᠠᠷ ᠰᠢᠭ ᠬᠦᠵᠦᠬᠦᠦ ᠰᠣᠩᠭᠠᠨ ᠵᠢᠳᠬᠦᠲᠡᠭ ᠬᠦᠮᠦᠨ ᠳᠤ ᠣᠰᠣ ᠳᠠᠪᠣᠰᠣ ᠭᠠᠷᠴᠠᠭ᠎ᠠ ᠦᠭᠡᠢ ᠶᠡᠭᠡ ᠱᠠᠭᠠᠷᠳᠠᠬᠲᠠᠳᠠᠭ ᠪᠦᠭᠡᠳ ᠣᠷᠣᠢ ᠠᠴᠠ ᠪᠠᠨ ᠣᠯᠠ ᠳᠤᠨᠢ ᠬᠦᠷᠳᠡᠯ᠎ᠡ ᠣᠷᠣᠰᠳᠠᠭ ᠬᠠᠷ᠎ᠠ ᠬᠦᠯᠣᠰᠣ ᠯᠡ ᠳᠠᠪᠤᠰᠣ ᠶᠢ ᠨᠢ ᠠᠭᠤᠷᠰᠢᠭᠤᠯᠴᠢᠬᠠᠳᠠᠭ ᠪᠠᠶᠢᠬ᠎ᠠ᠃       ᠳᠠᠪᠤᠰᠣ ᠶᠡᠭᠡ ᠢᠳᠡᠳᠡᠭ ᠠᠴᠠ ᠪᠤᠯᠤᠭᠰᠠᠨ ᠪᠠᠶᠢᠬ᠎ᠠ᠃ ᠮᠠᠨ ᠤ ᠨᠣᠳᠤᠭ ᠤᠨ ᠬᠦᠮᠦᠰ ᠬᠠᠲᠠᠭᠤ ᠪᠤᠳᠣᠯ ᠲᠠᠢ᠂ ᠵᠣᠷᠢᠭᠰᠠᠨ ᠳᠠᠭᠠᠨ ᠬᠦᠷᠬᠦ ᠠᠴᠠ ᠨᠠᠭᠠᠰᠢ ᠵᠣᠭᠰᠣᠳᠠᠭ ᠦᠭᠡᠢ᠂ ᠦᠵᠦᠬᠦᠷ ᠲᠤᠨᠢ ᠭᠠᠷᠬᠤ ᠠᠴᠠ ᠪᠤᠴᠠᠳᠠᠭ ᠦᠭᠡᠢ ᠵᠣᠷᠢᠮᠠᠭ ᠠᠷᠠᠨᠰᠢᠨ ᠲᠠᠢ᠃ ᠲᠠᠷᠢᠶ᠎ᠠ ᠲᠠᠷᠢᠭᠰᠠᠨ ᠴᠣ᠂ ᠲᠠᠯᠬ᠎ᠠ ᠨᠠᠶᠢᠷᠠᠭᠰᠠᠨ ᠴᠣ ᠨᠠᠷᠢᠯᠢᠭ ᠭᠡᠳᠡᠭ ᠨᠢ ᠬᠡᠴᠡᠬᠦᠦ᠂ ᠲᠠᠷᠢᠶᠠᠨ ᠳᠠᠭᠠᠨ ᠰᠢᠷᠬᠡᠭ ᠡᠪᠡᠰᠣ ᠴᠣ ᠦᠯᠡᠳᠡᠭᠡᠯ ᠦᠭᠡᠢ ᠠᠷᠴᠢᠵᠣ ᠭᠠᠷᠳᠠᠭ᠃ ᠬᠡᠷᠪᠡ ᠲᠠᠷᠢᠶ᠎ᠠ ᠨᠢ ᠦᠯᠦᠩ ᠡᠪᠡᠰᠣ ᠲᠠᠢ ᠪᠠᠶᠢᠪᠠᠯ ᠪᠤᠰᠣᠳ ᠲᠤ ᠮᠠᠭᠤ ᠬᠡᠯᠡᠭᠳᠡᠨ᠎ᠡ ᠭᠡᠵᠣ ᠠᠪᠤ ᠮᠢᠨᠢ ᠦᠷᠭᠦᠯᠵᠢ ᠪᠢᠳᠡᠨ ᠢ ᠰᠣᠷᠭᠠᠳᠠᠭ᠃ ᠶᠠᠭ ᠲᠡᠶᠢᠮᠦ ᠠᠴᠠ ᠮᠠᠨ ᠤ ᠨᠣᠳᠤᠭ ᠠᠴᠠ ᠡᠮᠴᠢ ᠲᠣᠮᠴᠢ ᠡᠷᠳᠡᠮᠳᠡᠨ ᠮᠡᠷᠭᠡᠳ ᠴᠣᠯᠭᠤᠷᠠᠳᠠᠭ ᠨᠢ ᠣᠯᠠᠨ᠂ ᠠᠵᠢᠯ ᠢ ᠬᠢᠪᠠᠯ ᠳᠠᠭᠤᠰᠳᠠᠯ᠎ᠠ᠂ ᠳᠠᠪᠤᠰᠣ ᠶᠢ ᠬᠢᠪᠠᠯ ᠠᠭᠤᠰᠳᠠᠯ᠎ᠠ ᠭᠡᠳᠡᠭ ᠦᠭᠡ ᠶᠣᠰᠣᠳᠠᠢ ᠮᠠᠨ ᠤ ᠨᠣᠳᠤᠭ ᠤᠨ ᠬᠦᠮᠦᠰ ᠢ ᠣᠨᠣᠭᠠᠵᠣ ᠬᠡᠯᠡᠭᠰᠡᠨ ᠶᠣᠮ᠃ ᠶᠠᠭᠤ ᠬᠢᠭᠰᠡᠨ ᠴᠣ ᠳᠣᠲᠠᠭᠤ ᠳᠣᠷᠭᠤᠨ ᠲᠠᠯᠪᠢᠳᠠᠭ ᠦᠭᠡᠢ᠂ ᠵᠠᠪᠠᠯ ᠲᠤᠭᠤᠷᠠᠳᠠᠯ᠎ᠠ ᠰᠠᠶᠢᠬᠠᠨ ᠬᠢᠳᠡᠭ᠃       ᠨᠢᠲᠣᠨᠣᠨ ᠤ ᠵᠢᠷᠭᠤᠭᠠᠨ ᠰᠠᠷ᠎ᠠ ᠶᠢᠨ ᠦᠶ᠎ᠡ ᠪᠠᠷ ᠪᠢ ᠰᠣᠷᠪᠤᠯᠵᠢᠯᠠᠭ᠎ᠠ ᠬᠢᠵᠦ ᠶᠠᠪᠤᠬᠤ ᠳᠠᠭᠠᠨ ᠷᠠᠰᠢᠶᠠᠨ ᠬᠤᠳᠠ ᠠᠴᠠ ᠰᠢᠯᠢ ᠶᠢᠨ ᠭᠤᠣᠯ ᠬᠦᠷᠬᠦ ᠭᠠᠯᠳᠣ ᠲᠡᠷᠭᠡᠨ ᠳᠤ ᠰᠠᠭᠤᠵᠦ ᠨᠣᠳᠤᠭ ᠢᠶᠠᠷ ᠢᠶᠠᠨ ᠦᠩᠭᠡᠷᠡᠭᠰᠡᠨ ᠪᠢᠯᠡ᠃ ᠠᠪᠤ ᠡᠵᠢ ᠮᠢᠨᠢ ᠨᠡᠬᠦᠵᠦ ᠶᠠᠪᠤᠭᠰᠠᠨ ᠠᠴᠠ ᠬᠤᠶᠢᠰᠢ ᠨᠣᠳᠤᠭ ᠲᠠᠭᠠᠨ ᠬᠦᠯ ᠲᠠᠯᠪᠢᠭ᠎ᠠ ᠦᠭᠡᠢ ᠬᠡᠳᠣᠨ ᠵᠢᠯ ᠪᠤᠯᠵᠠᠢ᠃ ᠮᠠᠨ ᠤ ᠠᠶᠢᠯ ᠭᠠᠴᠠᠭ᠎ᠠ ᠭᠠᠳᠠᠨ᠎ᠠ ᠠᠴᠠ ᠨᠢ ᠬᠠᠷᠠᠬᠤ ᠳᠤ ᠲᠠᠨᠢᠭᠳᠠᠮᠠᠷ ᠦᠭᠡᠢ ᠪᠤᠯᠳᠠᠯ᠎ᠠ ᠬᠤᠪᠢᠷᠠᠵᠦ᠂ ᠱᠦᠢᠨᠢ ᠵᠠᠮ ᠰᠤᠨᠤᠯᠵᠠᠨ᠂ ᠬᠠᠰᠢᠶ᠎ᠠ ᠬᠡᠷᠡᠮ ᠨᠢ ᠪᠦᠷ ᠴᠢᠯᠠᠭᠤ ᠲᠣᠭᠤᠰᠭ᠎ᠠ ᠪᠤᠯᠤᠭᠰᠠᠨ ᠪᠠᠶᠢᠯ᠎ᠠ᠃ ︽ᠡᠵᠡᠨ ᠲᠠᠢ ᠭᠠᠵᠠᠷ ᠢ ᠨᠣᠳᠤᠭ ᠭᠡᠳᠡᠭ᠂ ᠨᠣᠳᠤᠭ ᠲᠠᠢ ᠬᠦᠮᠦᠨ ᠢ ᠡᠵᠡᠨ ᠭᠡᠳᠡᠭ︾᠃ ᠡᠨᠡ ᠨᠣᠳᠤᠭ ᠠᠴᠠ ᠨᠡᠬᠦᠵᠦ ᠶᠠᠪᠤᠭᠰᠠᠨ ᠴᠦ ᠡᠨᠡ ᠨᠣᠳᠤᠭ ᠤᠨ ᠢᠶᠠᠨ ᠡᠵᠡᠨ ᠨᠢ ᠪᠤᠯᠬᠤᠷ ᠣᠢ ᠳᠣᠷᠠᠰᠣᠮᠵᠢ ᠳᠠᠭᠠᠨ ᠨᠤᠲᠤᠭ ᠤᠰᠤ᠂ ᠠᠶᠢᠯ ᠰᠠᠭᠠᠬᠠᠯᠳᠠ ᠪᠠᠨ ᠲᠤᠷᠠᠰᠤᠨ ᠰᠠᠨᠠᠭᠠᠯᠵᠠᠭᠰᠠᠭᠠᠷ ᠶᠠᠪᠤᠳᠠᠭ᠃       ᠪᠠᠭ᠎ᠠ ᠳᠤ ᠮᠠᠨ ᠤ ᠠᠶᠢᠯ ᠠᠴᠠ ᠲᠦᠷᠪᠡ ᠲᠠᠪᠤᠬᠠᠨ ᠭᠠᠵᠠᠷ ᠤᠨ ᠵᠠᠶᠢᠲᠠᠢ ᠵᠢᠵᠢᠭ ᠭᠠᠯᠳᠣ ᠲᠡᠷᠭᠡᠨ ᠦᠷᠳᠡᠭᠡ ᠪᠠᠶᠢᠵᠠᠢ᠃ ᠡᠮᠦᠨ᠎ᠡ ᠬᠡᠳᠣᠨ ᠵᠢᠯ ᠬᠡᠷᠡᠭᠯᠡᠭᠡᠨ ᠠᠴᠠ ᠭᠠᠷᠴᠣ ᠬᠦᠨᠳᠡᠢ ᠬᠤᠭᠤᠰᠣᠨ ᠵᠣᠭᠰᠣᠭᠠᠯ ᠪᠤᠯᠵᠦ ᠦᠯᠡᠳᠡᠭᠰᠡᠨ ᠴᠢᠮᠡᠭᠡ ᠶᠢ ᠲᠣᠭᠤᠯᠣᠭᠠᠳ ᠪᠢ ᠬᠡᠳᠣᠨ ᠡᠳᠣᠷ ᠵᠣᠪᠠᠭᠰᠠᠨ ᠶᠣᠮ᠃       ᠬᠠᠪᠤᠷ ᠤᠨ ᠠᠭᠤᠷ ᠣᠷᠣᠵᠦ᠂ ᠬᠠᠮᠤᠭ ᠠᠮᠢᠳᠠᠨ ᠠᠮᠢᠯᠠᠨ ᠰᠡᠷᠭᠦᠵᠦ ᠡᠬᠢᠯᠡᠬᠦ ᠦᠶ᠎ᠡ ᠵᠦᠭ ᠤᠨ ᠬᠤᠯᠠ ᠠᠴᠠ ᠵᠦᠯᠭᠡᠨ ᠤ ᠮᠡᠯᠡᠭᠡᠢ ᠳᠣᠣᠭᠠᠷᠬᠤ ᠨᠢ ᠨᠠᠳᠠ ᠣᠨᠴᠠ ᠶᠢᠨ ᠰᠠᠶᠢᠬᠠᠨ ᠰᠠᠨᠠᠭᠳᠠᠳᠠᠭ ᠪᠠᠶᠢᠯ᠎ᠠ᠃ ᠪᠢ ᠪᠠᠭ᠎ᠠ ᠶᠢᠨ ᠬᠡᠳᠦᠨ ᠨᠠᠶᠢᠵᠠ ᠲᠠᠢ ᠪᠠᠨ ᠠᠶᠢᠯ ᠤᠨ ᠠᠷᠣ ᠪᠠᠷ ᠰᠣᠨᠣᠯᠵᠠᠬᠤ ᠲᠡᠮᠣᠷ ᠵᠠᠮ ᠢᠶᠠᠷ ᠦᠰᠦᠷᠬᠢᠯᠡᠨ ᠳᠡᠪᠬᠡᠷᠦᠭᠰᠡᠭᠡᠷ ᠵᠢᠵᠢᠭᠬᠡᠨ ᠭᠠᠯᠳᠣ ᠲᠡᠷᠭᠡᠨ ᠦᠷᠳᠡᠭᠡᠨ ᠳᠤ ᠬᠦᠷᠳᠡᠭ ᠪᠠᠶᠢᠪᠠ᠃       ᠰᠢᠨ᠎ᠡ ᠵᠢᠯ ᠴᠠᠭᠠᠨ ᠰᠠᠷ᠎ᠠ ᠠᠴᠠ ᠪᠤᠰᠤᠳ ᠡᠩ ᠤᠨ ᠦᠶ᠎ᠡ ᠳᠤ ᠪᠤᠯ ᠡᠪᠡᠷ ᠲᠡᠪᠡᠷ ᠬᠡᠳᠣᠬᠡᠨ ᠬᠦᠮᠦᠨ ᠡᠨᠡ ᠦᠷᠳᠡᠭᠡ ᠳᠠᠮᠵᠢᠨ ᠬᠠᠮᠢᠭ᠎ᠠ ᠶᠠᠪᠤᠵᠦ ᠬᠠᠮᠢᠭ᠎ᠠ ᠨᠢᠭᠡᠨ ᠭᠠᠵᠠᠷ ᠠᠴᠠ ᠢᠷᠡᠳᠡᠭ᠃ ᠪᠢᠳᠠ ᠲᠡᠷᠭᠡᠨ ᠦᠷᠳᠡᠭᠡᠨ ᠳᠤ ᠵᠣᠭᠰᠣᠭᠠᠳ᠂ ᠲᠡᠷᠡ ᠬᠤᠯᠠ ᠠᠴᠠ ᠲᠣᠯᠪᠦ‍ ᠰᠢᠭ ᠦᠵᠡᠭᠳᠡᠵᠦ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠠᠯᠭᠤᠷ ᠠᠭᠠᠵᠢᠮ ᠢᠶᠠᠷ ᠣᠶᠢᠷᠠᠳᠣᠨ ᠢᠷᠡᠳᠡᠭ ᠨᠣᠭᠤᠭᠠᠨ ᠦᠩᠭᠡ ᠶᠢᠨ ᠬᠠᠭᠤᠴᠢᠪᠳᠣᠷ ᠭᠠᠯᠳᠣ ᠲᠡᠷᠭᠡ ᠶᠢ ᠣᠭᠳᠣᠨ ᠦᠳᠡᠵᠦ᠂ ᠦᠨᠢ ᠬᠤᠯᠠ ᠶᠢᠨ ᠪᠤᠶᠤ ᠠᠯᠣᠰ ᠢᠷᠡᠭᠡᠳᠤᠢ ᠶᠢᠨ ᠲᠣᠬᠠᠢ ᠬᠡᠦᠬᠡᠳ ᠨᠠᠰᠣᠨ ᠤ ᠮᠦᠷᠦᠭᠡᠳᠣᠯ ᠢ ᠠᠴᠢᠭᠠᠳ᠂ ᠭᠠᠯᠳᠤ ᠲᠡᠷᠭᠡ ᠵᠢᠵᠢᠭᠬᠡᠨ ᠦᠷᠲᠡᠭᠡ ᠲᠠᠮᠵᠢᠨ᠂ ᠣᠰᠣ ᠶᠢ ᠲᠠᠪᠠᠵᠦ᠂ ᠠᠭᠤᠯᠠ ᠶᠢ ᠣᠷᠢᠶᠠᠭᠰᠠᠭᠠᠷ᠂ ᠨᠢᠭᠡ ᠵᠦᠢᠯ ᠤᠨ ᠬᠦᠷᠴᠣ ᠴᠢᠳᠠᠰᠢ ᠦᠭᠡᠢ ᠮᠦᠷᠣᠭᠡᠳᠣᠯ ᠢ ᠲᠡᠭᠡᠭᠡᠭᠰᠡᠭᠡᠷ ᠬᠤᠯᠠᠳᠠᠳᠠᠭ᠃       ᠪᠢᠳᠡ ᠵᠠᠷᠢᠮ ᠳᠠᠭᠠᠨ ᠦᠷᠯᠦᠭᠡ ᠭᠠᠷᠪᠠᠯ᠂ ᠣᠷᠣᠢ ᠪᠤᠯᠤᠭᠠᠳ ᠰᠠᠶ᠋ᠢ ᠬᠠᠷᠢᠵᠦ ᠢᠷᠡᠳᠡᠭ᠃ ᠦᠷᠯᠣᠭᠡ ᠭᠠᠷᠬᠤ ᠳᠠᠭᠠᠨ ᠬᠡᠦᠬᠡᠳ ᠤᠨ ᠲᠣᠯᠣᠭᠠᠢ ᠶᠢᠨ ᠬᠢᠷᠢ ᠡᠷᠳᠡᠨᠢ ᠰᠢᠰᠢ ᠶᠢᠨ ᠰᠢᠷ᠎ᠠ ᠪᠤᠤᠪᠤ ᠪᠠᠨ ᠬᠠᠳᠠᠭᠠᠭᠰᠠᠨ ᠮᠠᠨᠵᠢᠨ ᠲᠠᠢ ᠪᠠᠨ ᠣᠭᠤᠳᠠᠨ ᠳᠤ ᠰᠠᠪᠠᠯᠠᠨ ᠠᠪᠴᠣ ᠦᠳᠡ ᠶᠢᠨ ᠬᠤᠭᠤᠯᠠ ᠪᠤᠯᠭᠠᠨ᠎ᠠ᠃       ᠪᠠᠭ᠎ᠠ ᠰᠣᠷᠭᠠᠭᠤᠯᠢ ᠶᠢᠨ ᠲᠠᠪᠤᠳᠣᠭᠠᠷ ᠣᠨ ᠪᠤᠯᠵᠦ ᠪᠢ ᠭᠠᠴᠠᠭᠠᠨ ᠠᠴᠠ ᠬᠡᠳᠣᠨ ᠭᠠᠵᠠᠷ ᠤᠨ ᠵᠠᠶᠢᠳᠠᠢ ᠰᠣᠮᠣᠨ ᠤ ᠰᠣᠷᠭᠠᠭᠤᠯᠢ ᠳᠤ ᠣᠷᠣᠵᠦ ᠪᠠᠶᠢᠷᠢ ᠳᠤ ᠰᠠᠭᠤᠪᠠ᠃ ᠲᠡᠷᠡ ᠦᠶ᠎ᠡ ᠶᠢᠨ ᠠᠮᠢᠳᠣᠷᠠᠯ ᠤᠨ ᠨᠦᠬᠦᠴᠡᠯ ᠣᠳᠣ ᠶᠢᠨ ᠬᠢ ᠶᠢ ᠪᠤᠳᠣᠪᠠᠯ ᠬᠤᠯᠠ ᠬᠦᠴᠢᠷᠳᠡᠢ᠃ ᠪᠢᠳᠡᠨ ᠳᠤ ᠢᠳᠡᠬᠦ ᠠᠰᠠᠭᠤᠳᠠᠯ ᠬᠠᠮᠤᠭ ᠠᠴᠠ ᠬᠡᠴᠡᠭᠦᠦ ᠰᠠᠨᠠᠭᠳᠠᠳᠠᠭ ᠪᠠᠶᠢᠪᠠ᠃ ᠭᠠᠷᠠᠭ ᠲᠠᠭᠠᠨ ᠨᠢᠭᠡ ᠠᠮᠠᠷᠠᠯᠳᠠ ᠲᠠᠯᠪᠢᠳᠠᠭ ᠪᠤᠯᠬᠤᠷ ᠪᠢᠳᠡ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠶᠢ ᠡᠳᠣᠷ ᠲᠣᠭᠠᠯᠠᠨ ᠬᠦᠯᠢᠶᠡᠳᠡᠭ᠃ ᠭᠡᠷ ᠲᠡᠭᠡᠨ ᠬᠠᠷᠢᠪᠠᠯ᠂ ᠬᠤᠵᠢᠷᠰᠢᠭᠰᠠᠨ ᠲᠡᠮᠡᠭᠡ ᠰᠢᠭ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠵᠠᠵᠢᠯᠬᠤ ᠶᠢ ᠬᠠᠷᠠᠭᠠᠳ ᠡᠵᠢ ᠮᠢᠨᠢ ᠨᠠᠮᠠᠢᠢ ᠶᠡᠭᠡ ᠯᠡ ᠬᠦᠭᠡᠷᠦᠬᠦ᠋ᠯᠡᠳᠡᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠰᠣᠷᠭᠠᠭᠤᠯᠢ ᠳᠤ ᠶᠠᠪᠤᠬᠤ ᠪᠤᠯᠪᠠᠯ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ᠂ ᠦᠨᠳᠡᠭᠡ ᠲᠠᠢ ᠬᠠᠭᠤᠷᠣᠭᠰᠠᠨ ᠵᠢᠶᠠᠩ ᠭᠡᠵᠦ ᠬᠡᠳᠣᠨ ᠭᠤᠸᠠᠨᠳ᠋ᠸᠣ ᠶᠢᠨ ᠯᠣᠩᠬᠤᠨ ᠳᠤ ᠰᠠᠪᠠᠯᠠᠵᠣ ᠶᠠᠪᠤᠭᠤᠯᠳᠠᠭ ᠪᠠᠶᠢᠯ᠎ᠠ᠃       ᠭᠠᠳᠠᠨ᠎ᠠ ᠣᠷᠣᠨ ᠳᠤ ᠬᠦᠯᠦᠰᠦᠨ ᠠᠵᠢᠯ ᠬᠢᠳᠡᠭ ᠡᠭᠡᠴᠢ ᠮᠢᠨᠢ ᠨᠢᠭᠡ ᠣᠳᠠᠭ᠎ᠠ ᠭᠡᠷ ᠲᠤ ᠬᠠᠷᠢᠵᠤ ᠢᠷᠡᠭᠡᠳ᠂ ᠨᠠᠮᠠᠢᠢ ᠦᠵᠡᠬᠦ ᠪᠠᠷ ᠰᠣᠷᠭᠠᠭᠤᠯᠢ ᠳᠤ ᠢᠷᠡᠪᠡ᠃ ᠨᠠᠳᠠ ᠳᠤ ᠨᠢᠭᠡ ᠯᠣᠩᠬᠤ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠳᠡᠭᠦᠵᠢᠯᠡᠵᠦ ᠠᠪᠴᠢᠷᠠᠭᠰᠠᠨ ᠪᠦᠭᠡᠳ ᠲᠠᠪᠤᠨ ᠲᠦᠭᠦᠷᠢᠭ ᠭᠠᠷᠲᠠᠭᠤᠯᠪᠠ᠃ ᠬᠤᠭᠤᠯᠠᠨ ᠭᠡᠷ ᠲᠤ ᠦᠢᠯᠡᠴᠢᠯᠡᠭᠴᠢ ᠪᠠᠷ ᠠᠵᠢᠯᠯᠠᠳᠠᠭ ᠡᠭᠡᠴᠢ ᠮᠢᠨᠢ ᠰᠠᠷ᠎ᠠ ᠳᠠᠭᠠᠨ ᠬᠡᠳᠣᠨ ᠠᠷᠪᠠᠨ ᠲᠦᠭᠦᠷᠢᠭ ᠣᠯᠳᠠᠭ ᠦᠭᠡᠢ ᠭᠡᠳᠡᠭ ᠢ ᠪᠢ ᠰᠠᠶᠢᠨ ᠮᠡᠳᠡᠨ᠎ᠡ᠃ ᠲᠠᠪᠤᠨ ᠲᠦᠬᠦᠷᠢᠭ ᠲᠡᠭᠦᠨ ᠳᠤ ᠠᠪᠴᠣ ᠬᠡᠯᠡᠪᠡᠯ ᠪᠠᠭ᠎ᠠ ᠦᠭᠡᠢ ᠵᠣᠭᠤᠰ ᠪᠦᠭᠡᠳ ᠨᠠᠳᠠ ᠳᠤ ᠠᠪᠴᠣ ᠬᠡᠯᠡᠪᠡᠯ ᠨᠡᠩ ᠶᠡᠭᠡ ᠮᠦᠩᠬᠦ ᠪᠠᠶᠢᠯ᠎ᠠ᠃       ᠬᠤᠪᠴᠠᠰᠣᠨ ᠳᠤ ᠲᠣᠬᠢᠳᠠᠢ ᠬᠠᠷᠮᠠᠨ ᠪᠠᠶᠢᠭᠰᠠᠨ ᠦᠭᠡᠢ ᠪᠤᠯᠬᠤᠷ᠂ ᠭᠡᠭᠡᠬᠦ ᠠᠴᠠ ᠪᠤᠯᠭᠤᠮᠵᠢᠯᠠᠵᠤ᠂ ᠤᠶᠢᠮᠣᠰᠣᠨ ᠳᠠᠭᠠᠨ ᠴᠢᠬᠢᠵᠦ ᠣᠷᠣᠭᠤᠯᠣᠨ ᠬᠢᠴᠢᠶᠡᠯ ᠤᠨ ᠭᠡᠷ ᠣᠷᠣᠭᠤ ᠪᠠᠨ ᠶᠠᠪᠤᠭᠰᠠᠨ ᠶᠤᠮ᠃ ᠤᠷᠤᠢ ᠨᠢ ᠪᠠᠶᠢᠷᠢ ᠳᠠᠭᠠᠨ ᠬᠠᠷᠢᠭᠠᠳ ᠭᠡᠨᠡᠳᠳᠡ ᠦᠨᠦᠬᠢ ᠵᠣᠭᠤᠰ ᠢᠶᠠᠨ ᠪᠤᠳᠣᠵᠣ ᠣᠯᠣᠭᠠᠳ ᠣᠶᠢᠮᠣᠰᠣ ᠣᠷᠣᠭᠤ ᠪᠠᠨ ᠭᠠᠷ ᠣᠷᠣᠭᠤᠯᠣᠬᠰᠠᠨ ᠴᠢᠨᠢ ᠠᠯᠠᠭ᠎ᠠ᠃ ᠳᠣᠳᠣᠷ᠎ᠠ ᠫᠠᠯ ᠬᠢᠪᠡ᠃ ᠦᠰᠦᠷᠴᠣ ᠲᠣᠭᠯᠠᠵᠤ ᠪᠠᠶᠢᠭᠰᠠᠭᠠᠷ ᠬᠠᠮᠢᠭ᠎ᠠ ᠨᠢ ᠭᠡᠭᠡᠴᠢᠬᠡᠭᠰᠡᠨ ᠪᠤᠯ︖ ᠪᠢ ᠪᠤᠷᠣ ᠮᠦᠷ ᠢᠶᠠᠷ ᠢᠶᠠᠨ ᠡᠷᠢᠵᠦ ᠶᠠᠪᠤᠪᠠ᠃ ᠪᠤᠷᠣ ᠮᠦᠷ ᠢᠶᠠᠷ ᠭᠡᠵᠤ ᠳ᠋ᠠ᠃ ᠦᠳᠡ ᠳᠤ ᠦᠭᠭᠦᠭᠰᠡᠨ ᠶᠠᠭᠤᠮ᠎ᠠ ᠶᠢ ᠣᠷᠣᠢ ᠨᠢ ᠡᠷᠢᠬᠦ ᠭᠡᠳᠡᠭ ᠪᠠᠰᠠ ᠬᠡᠴᠡᠭᠦᠦ ᠶᠠᠭᠤᠮ᠎ᠠ ᠪᠤᠯᠵᠠᠢ᠃ ᠣᠶᠢᠮᠦᠰᠦᠨ ᠠᠴᠠ ᠰᠣᠭᠤᠷᠠᠨ ᠭᠠᠷᠣᠭᠠᠳ ᠬᠠᠮᠢᠭ᠎ᠠ ᠨᠢᠭᠡ ᠭᠠᠵᠠᠷ ᠣᠨᠠᠭᠰᠠᠨ ᠪᠤᠯ ᠬᠡᠵᠢᠶᠡᠨ ᠤ ᠬᠡᠨ ᠨᠢᠭᠡ ᠨᠢ ᠣᠯᠣᠭᠠᠳ ᠠᠪᠴᠢᠬᠠᠭᠰᠠᠨ ᠪᠠᠶᠢᠯᠭᠦᠢ᠃ ᠦᠭᠡᠷ᠎ᠡ ᠬᠦᠮᠦᠨ ᠣᠯᠵᠣ ᠠᠪᠬᠤ ᠦᠭᠡᠢ ᠴᠣ ᠭᠡᠰᠡᠨ᠂ ᠰᠠᠯᠬᠢᠨ ᠳᠤ ᠬᠡᠶᠢᠰᠦᠭᠡᠳ ᠠᠯᠠᠭ᠎ᠠ ᠪᠤᠯᠴᠢᠬᠠᠭᠰᠠᠨ ᠪᠠᠶᠢᠯᠭᠦᠢ᠃ ᠪᠠᠶᠢᠷᠢ ᠠᠴᠠ ᠠᠩᠭᠢ ᠶᠢᠨ ᠭᠡᠷ᠂ ᠠᠩᠬᠢ ᠶᠢᠨ ᠭᠡᠷ ᠠᠴᠠ ᠵᠣᠷᠯᠣᠩ᠂ ᠵᠣᠷᠯᠣᠩ ᠠᠴᠠ ᠲᠠᠮᠢᠷ ᠤᠨ ᠲᠠᠯᠠᠪᠤᠷ᠂ ᠪᠠᠷᠤᠭ ᠣᠴᠢᠭᠰᠠᠨ ᠭᠠᠵᠠᠷ ᠪᠤᠯᠭᠠᠨ ᠳᠤ ᠬᠦᠷᠦᠭᠰᠡᠨ ᠪᠤᠯᠪᠠᠴᠣ ᠣᠯᠳᠠᠭᠰᠠᠨ ᠦᠭᠡᠢ᠃       ᠡᠭᠡᠴᠢ ᠶᠢᠨ ᠮᠢᠨᠢ ᠬᠡᠳᠣᠨ ᠡᠳᠣᠷ ᠤᠨ ᠬᠦᠴᠦ ᠬᠦᠳᠡᠯᠮᠣᠷᠢ ᠭᠡᠵᠤ ᠪᠤᠳᠤᠬᠤ ᠲᠠᠢ ᠵᠡᠷᠭᠡ ᠬᠠᠷᠠᠮᠰᠠᠬᠤ ᠪᠠ ᠦᠪᠡᠷ ᠢ ᠪᠠᠨ ᠵᠢᠮᠡᠯᠡᠬᠦ ᠮᠢᠨᠢ ᠣᠯᠠᠮ ᠬᠡᠴᠡᠭᠦᠳᠡᠪᠡ ᠃ ᠰᠦᠨᠡᠰᠦ ᠪᠠᠨ ᠭᠡᠭᠡᠴᠢᠬᠡᠭᠰᠡᠨ ᠰᠢᠭ ᠲᠣᠯᠣᠭᠠᠢ ᠯᠠᠪᠲᠠᠶᠢᠯᠭᠠᠭᠠᠳ ᠭᠡᠳᠡᠭ ᠦᠭᠡ ᠪᠠᠶᠢᠳᠠᠭ ᠪᠢᠰᠢᠦ᠃ ᠪᠢ ᠣᠷᠮ᠎ᠠ ᠮᠠᠭᠤᠳᠠᠢ ᠪᠠᠶᠢᠷᠢ ᠳᠠᠭᠠᠨ ᠬᠠᠷᠢᠵᠤ᠂ ᠣᠷᠣᠨ ᠳᠠᠭᠠᠨ ᠰᠠᠭᠤᠭᠠᠳ ᠱᠠᠬᠠᠢ ᠣᠶᠢᠮᠣᠰᠣ ᠪᠠᠨ ᠲᠠᠶᠢᠯᠪᠠ᠃ ᠲᠡᠭᠡᠬᠦ ᠳᠤ ᠣᠶᠢᠮᠣᠰᠣᠨ ᠠᠴᠠ ᠦᠨᠦᠬᠢ ᠲᠠᠪᠤᠨ ᠲᠦᠭᠦᠷᠢᠭ ᠭᠠᠷᠣᠭᠠᠳ ᠢᠷᠡᠪᠡ᠃ ᠮᠢᠨᠦ ᠪᠠᠶᠠᠷᠯᠠᠭᠰᠠᠨ ᠭᠡᠵᠢ ᠡ᠃ ᠭᠡᠭᠡᠭᠰᠡᠨ ᠵᠣᠭᠤᠰ ᠢᠶᠠᠨ ᠡᠷᠭᠢᠭᠡᠳ ᠣᠯᠣᠭᠠᠳ᠂ ᠶᠠᠭ ᠯᠡ ᠰᠠᠨᠠᠭᠠᠨ ᠠᠴᠠ ᠭᠠᠳᠠᠭᠤᠷ ᠣᠯᠵᠠ ᠣᠯᠣᠭᠰᠠᠨ ᠰᠢᠭ ᠪᠠᠶᠠᠷᠯᠠᠪᠠ᠃ ᠲᠡᠭᠡᠭᠡᠳ ᠰᠣᠷᠭᠠᠭᠤᠯᠢ ᠶᠢᠨ ᠬᠠᠵᠠᠭᠤᠳᠠᠬᠢ ᠳᠡᠯᠭᠡᠭᠦᠷ ᠲᠤ ᠬᠦᠷᠴᠦ᠂ ᠶᠡᠷᠣ ᠳᠡᠭᠡᠨ ᠠᠪᠴᠤ ᠢᠳᠡᠳᠡᠭ ᠦᠭᠡᠢ ᠮᠢᠬ᠎ᠠ ᠲᠠᠢ ᠪᠤᠤᠵᠠ ᠠᠴᠠ ᠬᠤᠶᠠᠷ ᠢ ᠬᠤᠳᠠᠯᠳᠣᠨ ᠠᠪᠤᠭᠠᠳ ᠡᠭᠡᠴᠢ ᠶᠢᠨ ᠠᠪᠴᠣ ᠢᠷᠡᠭᠰᠡᠨ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠲᠠᠢ ᠢᠳᠡᠭᠰᠡᠨ ᠢᠶᠠᠨ ᠣᠳᠣ ᠴᠦ ᠴᠡᠭᠡᠵᠢᠯᠡᠭᠰᠡᠭᠡᠷ ᠪᠠᠶᠢᠨ᠎ᠠ᠂ ᠲᠡᠷᠡ ᠠᠮᠳᠠ ᠶᠢ ᠬᠡᠯᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ᠃       ᠶᠡᠭᠡ ᠰᠣᠷᠭᠠᠭᠤᠯᠢ ᠲᠡᠭᠦᠰᠦᠨ ᠲᠡᠭᠦᠰᠳᠡᠯ᠎ᠡ ᠣᠳᠠᠭ᠎ᠠ ᠪᠤᠯᠭᠠᠨ ᠠᠮᠠᠷᠠᠯᠳᠠ ᠲᠠᠭᠤᠰᠴᠣ ᠰᠣᠷᠭᠠᠭᠤᠯᠢ ᠳᠠᠭᠠᠨ ᠶᠠᠪᠤᠬᠤ ᠦᠶ᠎ᠡ ᠳᠤ ᠡᠵᠢ ᠮᠢᠨᠢ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠶᠢ ᠪᠤᠭᠴᠣ ᠳᠦᠭᠦᠷᠳᠡᠯ᠎ᠡ ᠰᠠᠪᠠᠯᠠᠵᠤ ᠦᠭᠳᠡᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠣᠳᠣ ᠴᠦ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠪᠤᠯᠭᠠᠨ ᠪᠠᠰᠠ ᠯᠠ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠶᠢ ᠰᠠᠪᠠᠯᠠᠵᠣ ᠦᠭᠭᠦ ᠵᠣᠷᠰᠢᠯ ᠢᠶᠠᠨ ᠬᠠᠶᠠᠭ᠎ᠠ ᠦᠭᠡᠢ᠃       ᠨᠢᠳᠣᠨᠣᠨ ᠪᠢ ᠠᠪᠤ ᠡᠵᠢ ᠲᠠᠢ ᠪᠠᠨ ᠴᠤᠬ ᠰᠢᠨᠡᠯᠡᠭᠰᠡᠨ ᠪᠢᠯᠡ᠃ ᠰᠢᠨ᠎ᠡ ᠵᠢᠯ ᠴᠠᠭᠠᠨ ᠰᠠᠷ᠎ᠠ ᠰᠢᠷᠡᠭᠡ ᠲᠦᠭᠦᠷᠳᠡᠯ᠎ᠡ ᠬᠤᠭᠤᠯᠠ ᠵᠠᠭᠤᠰᠢ ᠪᠡᠯᠡᠳᠭᠡᠳᠡᠭ ᠴᠦ᠂ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠳᠣᠳᠠᠵᠣ ᠪᠤᠯᠬᠤ ᠦᠭᠡᠢ᠃ ᠡᠵᠢ ᠮᠢᠨᠢ ᠠᠰᠠᠷ ᠲᠤ ᠨᠡᠭᠦᠵᠦ ᠣᠷᠣᠭᠰᠠᠨ ᠠᠴᠠ ᠬᠤᠶᠢᠰᠢ᠂ ᠰᠠᠨᠠᠭᠠᠨ ᠳᠠᠭᠠᠨ ᠲᠣᠯᠳᠠᠯ᠎ᠠ ᠨᠣᠭᠤᠭ᠎ᠠ ᠳᠠᠷᠣᠵᠣ ᠲᠡᠶᠢᠯᠬᠦ ᠪᠠᠨ ᠪᠤᠯᠢᠵᠠᠢ ᠭᠡᠵᠦ ᠭᠤᠮᠣᠳᠠᠯ ᠲᠣᠭᠠᠴᠢᠨ᠎ᠠ᠃ ᠠᠪᠤ ᠡᠵᠢ ᠪᠠᠨ ᠬᠤᠳᠠ ᠳᠤ ᠨᠡᠭᠦᠯᠭᠡᠭᠰᠡᠨ ᠤ ᠳᠠᠷᠠᠭ᠎ᠠ ᠪᠢ ᠬᠤᠳᠠ ᠶᠢᠨ ᠠᠮᠢᠳᠣᠷᠠᠯ ᠳᠤ ᠲᠠᠰᠬᠤ ᠡᠰᠡᠬᠦ ᠶᠢᠨ ᠲᠣᠬᠠᠢ ᠰᠠᠨᠠᠭᠠᠰᠢᠷᠠᠵᠦ᠂ ᠵᠠᠷᠢᠮ ᠳᠠᠭᠠᠨ ᠣᠳᠠᠰᠣ ᠪᠠᠷ ᠡᠵᠢ ᠠᠴᠠ ᠪᠠᠨ ᠬᠦᠳᠡᠭᠡ ᠪᠠᠨ ᠰᠠᠨᠠᠵᠣ ᠪᠠᠶᠢᠨ᠎ᠠ ᠦᠦ︖ ᠭᠡᠵᠦ ᠠᠰᠠᠭᠤᠪᠠᠯ᠂ ᠦᠭᠡᠢ᠂ ᠶᠠᠭᠤᠨ ᠳᠤ ᠰᠠᠨᠠᠬᠤ ᠶᠣᠮ ᠳ᠋ᠠ᠂ ᠠᠳᠡ ᠡᠪᠤᠯ ᠳᠡᠭᠡᠨ ᠳᠠᠭᠠᠷᠠᠬᠤ ᠦᠭᠡᠢ᠂ ᠵᠣᠨ ᠳᠠᠭᠠᠨ ᠬᠠᠯᠠᠬᠤ ᠦᠭᠡᠢ᠂ ᠦᠢᠯᠡ ᠲᠠᠮᠣ ᠪᠠᠨ ᠦᠵᠡᠬᠦ ᠦᠭᠡᠢ᠂ ᠰᠠᠨᠠᠭ᠎ᠠ ᠠᠮᠣᠷ ᠬᠡᠳᠣᠢ ᠰᠠᠶᠢᠬᠠᠨ ᠪᠤᠢ ᠭᠡᠬᠦ ᠪᠠᠷ ᠨᠢ ᠲᠠᠯᠪᠢᠭᠤᠷᠠᠳᠠᠭ᠃ ᠦᠨᠡᠨᠳᠡᠭᠡᠨ ᠪᠢ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠪᠠᠨ ᠴᠠᠭ ᠦᠷᠭᠦᠯᠵᠢ ᠳᠣᠷᠠᠰᠳᠠᠭ ᠲᠠᠢ ᠠᠳᠠᠯᠢ ᠠᠪᠤ ᠡᠵᠢ ᠮᠢᠨᠢ ᠴᠦ ᠬᠦᠳᠡᠭᠡ ᠶᠢᠨ ᠠᠮᠢᠳᠣᠷᠠᠯ ᠢᠶᠠᠨ ᠳᠣᠷᠠᠰᠣᠯ ᠦᠭᠡᠢ ᠶᠠᠭᠠᠬᠢᠬᠤᠪ᠃       ᠨᠢᠳᠣᠨᠣᠨ ᠡᠭᠡᠴᠢ ᠮᠢᠨᠢ ᠪᠡᠭᠡᠵᠢᠩ ᠳᠤ ᠢᠷᠡᠬᠦ ᠳᠡᠭᠡᠨ ᠬᠡᠳᠣᠨ ᠯᠣᠩᠬᠤ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ᠂ ᠨᠣᠳᠤᠭ ᠤᠨ ᠲᠠᠬᠢᠶᠠᠨ ᠦᠨᠳᠡᠭᠡ ᠨᠢᠭᠡ ᠬᠠᠶᠢᠷᠴᠠᠭ ᠡᠭᠦᠷᠦᠭᠡᠳ ᠢᠷᠡᠪᠡ᠃ ᠡᠶᠢᠮᠦ ᠬᠤᠯᠠ ᠲᠡᠶᠢᠮᠦ ᠬᠦᠨᠳᠣ ᠶᠠᠭᠤᠮ᠎ᠠ ᠶᠢ ᠡᠭᠦᠷᠦᠭᠡᠳ ᠶᠠᠭᠠᠬᠢᠬᠤ ᠭᠡᠰᠡᠨ᠋ ᠶᠣᠮ ᠪᠤᠢ ᠭᠡᠵᠤ ᠪᠢ ᠡᠭᠡᠴᠢ ᠪᠠᠨ ᠵᠢᠮᠡᠯᠡᠪᠡ᠃ ᠡᠭᠡᠴᠢ ᠬᠡᠳᠣᠨ ᠡᠳᠣᠷ ᠪᠤᠯᠤᠭᠠᠳ ᠬᠠᠷᠢᠪᠠ᠃ ᠬᠠᠷᠢᠨ ᠣᠳᠠᠭ᠎ᠠ ᠪᠤᠯᠭᠠᠨ ᠬᠦᠯᠳᠡᠭᠡᠭᠦᠷ ᠤᠨ ᠡᠭᠦᠳᠡ ᠶᠢ ᠨᠡᠭᠡᠭᠡᠬᠦ ᠲᠠᠢ ᠵᠡᠷᠭᠡ ᠳᠠᠪᠤᠰᠣᠯᠠᠭᠰᠠᠨ ᠨᠣᠭᠤᠭ᠎ᠠ ᠶᠢᠨ ᠦᠨᠦᠷ ᠬᠠᠩᠬᠤᠯᠵᠣ᠂ ᠡᠭᠡᠴᠢ ᠮᠢᠨᠢ᠂ ᠡᠵᠢ ᠮᠢᠨᠢ ᠬᠠᠵᠠᠭᠤ ᠳᠤ ᠪᠠᠶᠢᠭ᠎ᠠ ᠶᠤᠮ ᠰᠢᠭ ᠰᠠᠨᠠᠭᠳᠠᠭᠤᠯᠤᠨ᠎ᠠ᠃
ᠢᠷᠡᠯᠲᠡ᠄ ᠳᠤᠮᠳᠠᠳᠤ ᠤᠯᠤᠰ ᠤᠨ ᠮᠣᠩᠭᠤᠯ ᠬᠡᠯᠡᠨ ᠤ ᠰᠣᠨᠢᠨ ᠮᠡᠳᠡᠭᠡ ᠶᠢᠨ ᠰᠦᠯᠵᠢᠶ᠎ᠡ