ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/3/18
     ᠮᠤᠩᠭᠤᠯᠴᠤᠳ ᠦᠪᠡᠷ ᠤᠨ ᠨᠤᠲᠤᠭ ᠤᠰᠤᠨ ᠤ ᠪᠠᠨ ᠨᠤᠶᠠᠨ ᠤᠷᠭᠢᠯ ᠪᠤᠶᠤ ᠦᠯᠵᠡᠢ ᠲᠡᠮᠪᠡᠷᠠᠢ ᠲᠠᠢ ᠭᠠᠵᠠᠷ ᠯᠤᠤᠰ ᠢ ᠰᠤᠩᠭᠤᠵᠦ᠂ ᠤᠪᠤᠭ᠎ᠠ ᠪᠤᠰᠬᠠᠨ ᠲᠠᠬᠢᠳᠠᠭ ᠵᠠᠩᠰᠢᠯ ᠲᠠᠢ᠃ ᠰᠢᠨ᠎ᠡ ᠪᠠᠷᠭᠤ ᠪᠠᠷᠠᠭᠤᠨ ᠬᠤᠰᠢᠭᠤ ᠪᠠᠷ ᠠᠪᠴᠦ ᠬᠡᠯᠡᠭᠰᠡᠨ ᠴᠦ ᠬᠦᠯᠥᠨ ᠪᠤᠶᠢᠷ ᠤᠨ ᠭᠠᠵᠠᠷ ᠢᠳᠡᠭᠡᠰᠢᠵᠦ ᠨᠤᠲᠤᠭᠯᠠᠭᠰᠠᠨ 270 ᠵᠢᠯ ᠤᠨ ᠬᠤᠭᠤᠴᠠᠭᠠᠨ ᠳᠤ ᠤᠷᠢᠳ ᠬᠤᠵᠢᠳ 78 ᠠᠭᠤᠯᠠ ᠤᠪᠤᠭ᠎ᠠ ᠶᠢ ᠲᠠᠬᠢᠵᠦ ᠰᠢᠲᠦᠵᠦ ᠢᠷᠡᠭᠰᠡᠨ ᠶᠤᠮ ᠪᠠᠶᠢᠵᠠᠢ᠃      ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠶᠢ ᠬᠠᠷᠢᠨ ᠰᠢᠨ᠎ᠡ ᠪᠠᠷᠭᠤ ᠪᠠᠷᠠᠭᠤᠨ᠂ ᠵᠡᠭᠦᠨ ᠬᠤᠶᠠᠷ ᠭᠠᠷᠤᠨ ᠨᠠᠢᠮᠠᠨ ᠬᠤᠰᠢᠭᠤ ᠪᠠᠷ ᠢᠶᠠᠨ ᠳᠠᠬᠢᠵᠦ ᠰᠢᠲᠦᠳᠡᠭ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠦᠭᠡᠯᠡᠳ᠂ ᠪᠤᠷᠢᠶᠠᠳ᠂ ᠡᠸᠡᠩᠬᠢ᠂ ᠬᠠᠭᠤᠴᠢᠨ ᠪᠠᠷᠭᠤ ᠠᠴᠠ ᠴᠦ ᠲᠠᠬᠢᠵᠦ ᠰᠢᠲᠦᠳᠡᠭ ᠬᠦᠮᠦᠰ ᠪᠠᠰᠠ ᠪᠠᠶᠢᠳᠠᠭ᠃      ᠦᠡᠭᠭᠡᠷᠡᠭᠰᠡᠨ ᠳᠤ᠂ ᠬᠦᠯᠥᠨ ᠪᠤᠶᠢᠷ ᠤᠨ ᠨᠠᠶᠢᠷ ᠢ ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠶᠢᠨ ᠦᠪᠦᠷ ᠲᠤ ᠭᠤᠷᠪᠠ ᠤᠳᠠᠭ᠎ᠠ ᠬᠢᠵᠦ ᠦᠡᠭᠭᠡᠷᠡᠭᠰᠡᠨ ᠲᠡᠥᠬᠡ ᠴᠦ ᠪᠠᠶᠢᠳᠠᠭ᠃      ᠡᠷᠲᠡ ᠳᠡᠭᠡᠷ᠎ᠡ ᠦᠶ᠎ᠡ ᠠᠴᠠ ᠬᠦᠯᠥᠨ ᠪᠤᠶᠢᠷ ᠤᠨ ᠭᠠᠵᠠᠷ ᠤᠷᠤᠰᠢᠨ ᠨᠤᠲᠤᠭᠯᠠᠵᠦ ᠢᠷᠡᠭᠰᠡᠨ ᠡᠯ᠎ᠡ ᠦᠨᠳᠦᠰᠦᠲᠡᠨ᠂ ᠠᠶᠢᠮᠠᠭ ᠤᠭᠰᠠᠭᠠᠲᠠᠨ ᠤ ᠠᠷᠠᠳ ᠲᠦᠮᠡᠨ ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠶᠢ ︽ᠨᠠᠷᠠᠨ ᠬᠠᠭᠠᠨ︾᠂ ︽ᠲᠦᠯᠦᠨ ᠬᠠᠷ᠎ᠠ︾᠂ ︽ᠭᠤᠷᠪᠠᠨ ᠰᠦᠮᠪᠦᠷ︾᠂ ︽ᠡᠷᠭᠡ ᠪᠠᠭᠠᠲᠤᠷ︾᠂ ︽ᠵᠠᠩᠵᠤᠨ ᠪᠦᠷᠭᠦᠳ︾᠂ ︽ᠮᠦᠡᠭᠬᠡ ᠲᠤᠭᠲᠠᠨᠢᠬᠤᠢ ᠤᠷᠤᠨ︾᠂ ︽ᠬᠦᠢᠲᠡᠨ ᠬᠠᠷᠠᠭᠠᠲᠦ︾᠂ ︽ᠲᠤᠯᠠᠭᠠᠨ ᠬᠠᠷᠠᠭᠠᠲᠦ︾᠂ ︽ᠪᠠᠶᠠᠨᠮᠦ᠋ᠡᠭᠬᠡ︾ ᠭᠡᠬᠦ ᠮᠡᠲᠦ ᠨᠡᠷᠡᠯᠡᠵᠦ ᠢᠷᠡᠭᠰᠡᠨ ᠠᠵᠢ᠃      ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠪᠤᠯᠪᠠᠰᠤ ᠮᠠᠨ ᠤ ᠤᠯᠤᠰ ᠤᠨ ᠡᠷᠲᠡᠨ ᠤ ᠲᠡᠥᠬᠡ ᠱᠠᠰᠳᠢᠷ ᠲᠤ ᠲᠡᠮᠲᠡᠭᠯᠡᠭᠳᠡᠵᠦ ᠪᠠᠶᠢᠭ᠎ᠠ ᠪᠠ ᠲᠤᠮᠳᠠᠲᠦ ᠶᠢᠨ ᠡᠯ᠎ᠡ ᠦᠡᠳᠦᠰᠦᠲᠡᠨ ᠢ ᠨᠢᠭᠡᠳᠬᠡᠵᠦ᠂ ᠳᠡᠯᠡᠬᠡᠢ ᠶᠢᠨ ᠡᠬᠡ ᠬᠠᠭᠤᠷᠠᠢ ᠶᠢᠨ ᠬᠠᠭᠠᠰ ᠢᠯᠡᠭᠦᠦ ᠶᠢ ᠡᠵᠡᠯᠡᠵᠦ ᠶᠠᠪᠤᠭᠰᠠᠨ ᠨᠢᠭᠡᠨ ᠦᠶ᠎ᠡ ᠶᠢᠨ ᠲᠡᠭᠷᠢᠯᠢᠭ ᠬᠦᠪᠡᠭᠦᠨ ᠪᠤᠭᠳᠠ ᠴᠢᠩᠬᠢᠰ ᠬᠠᠭᠠᠨ ᠴᠦ ᠡᠨᠡ ᠤᠷᠤᠨ ᠵᠶᠠᠷ ᠨᠡᠷ᠎ᠡ ᠪᠠᠨ ᠮᠠᠨᠳᠤᠭᠤᠯᠵᠦ ᠮᠦᠷ ᠢᠶᠠᠨ ᠦᠯᠡᠳᠡᠭᠡᠵᠦ ᠶᠠᠪᠤᠭᠰᠠᠨ ᠪᠢᠯᠡ᠃      ᠡᠷᠲᠡᠨ ᠤ ᠨᠢᠭᠡᠨ ᠪᠢᠴᠢᠭ ᠲᠤᠷ᠄ ︽1203 ᠤᠨ᠂ ᠰᠦᠡᠭ ᠤᠯᠤᠰ ᠤᠨ ᠵᠢᠶᠠ ᠲᠠᠢ ᠶᠢᠨ 3 ᠤᠨ᠂ ᠬᠠᠷᠠᠭᠴᠢᠨ ᠭᠠᠭ᠋ᠠᠢ ᠵᠢᠯ᠂ ᠬᠠᠭᠠᠨ ︵ᠴᠢᠩᠬᠢᠰ ᠢ ᠬᠡᠯᠡᠵᠦ ᠪᠤᠢ︶ 42 ᠨᠠᠰᠤᠲᠠᠢ᠃ ᠬᠠᠪᠤᠷ ᠤᠡᠭ ᠬᠠᠨ ᠡᠴᠢᠭᠡ ᠬᠦᠪᠡᠭᠦᠨ ᠬᠤᠶᠠᠭᠤᠯᠠ ᠴᠡᠷᠢᠭ ᠬᠦᠳᠡᠯᠭᠡᠵᠦ ᠲᠤᠪᠲᠤᠯᠤᠨ ᠢᠷᠡᠭᠰᠡᠨ ᠳᠤᠷ ᠲᠡᠮᠦᠵᠢᠨ ᠠᠴᠢᠶ᠎ᠠ ᠬᠦᠰᠭᠡ ᠪᠠᠨ ᠴᠦᠮ ᠢ ᠦᠪᠡᠷ ᠤᠨ ᠪᠠᠶᠢᠬᠤ ᠭᠠᠵᠠᠷ ᠨᠡᠭᠦᠯᠭᠡᠵᠦ ᠬᠠᠷᠠᠭᠠᠯᠵᠠᠨ᠂ ᠡᠯᠢᠶᠡᠲᠦ ᠬᠡᠮᠡᠬᠦ ᠭᠠᠵᠠᠷ ᠴᠡᠷᠢᠭ ᠢᠶᠠᠨ ᠲᠦᠪᠰᠢᠳᠬᠡᠵᠦ ᠪᠠᠷᠢᠯᠳᠤᠭᠰᠠᠨ ᠠᠨᠤ ᠲᠡᠮᠦᠵᠢᠨ ᠤ ᠨᠢᠭᠡᠨ ᠨᠠᠰᠤᠨ ᠳᠠᠬᠢ ᠬᠠᠮᠤᠭ ᠤᠨ ᠠᠯᠲᠠᠷᠲᠦ ᠪᠠᠶᠢᠯᠲᠤᠭᠠᠨ ᠤ ᠨᠢᠭᠡ ᠨᠢ ᠠᠵᠢ᠃ ᠪᠠᠶᠢᠯᠳᠤᠭᠠᠨ ᠤ ᠡᠴᠤᠰ ᠲᠤᠷ ᠬᠡᠳᠦ᠋ᠢᠪᠡᠷ ᠤᠡᠭ ᠬᠠᠨ ᠤ ᠬᠦᠪᠡᠭᠦᠨ ᠰᠠᠩ ᠬᠦᠡᠭ ᠰᠢᠷᠬᠠᠲᠤᠵᠦ ᠮᠤᠷᠢᠨ ᠠᠴᠠ ᠪᠠᠨ ᠤᠨᠠᠭᠰᠠᠨ᠎ᠠ ᠤᠡᠭ ᠬᠠᠨ ᠴᠡᠷᠢᠭ ᠢᠶᠠᠨ ᠳᠠᠭᠠᠭᠤᠯᠵᠦ ᠶᠠᠪᠤᠭᠰᠠᠨ ᠪᠤᠯᠪᠠᠴᠦ ᠡᠴᠦᠰ ᠲᠡᠭᠡᠨ ᠲᠡᠮᠦᠵᠢᠨ ᠤ ᠬᠦᠮᠦᠨ ᠴᠦᠬᠡᠨ᠂ ᠲᠠᠶᠢᠰᠤᠨ ᠤᠯᠠᠨ ᠲᠤᠯᠠᠲᠠ ᠴᠡᠷᠢᠭ ᠢᠶᠠᠨ ᠬᠤᠷᠢᠶᠠᠵᠦ ᠤᠬᠤᠷᠢᠬᠤ ᠠᠴᠠ ᠦᠭᠡᠷ᠎ᠡ ᠠᠷᠭ᠎ᠠ ᠦᠭᠡᠢ ᠪᠤᠯᠤᠭᠠᠳ᠂ ᠵᠠᠮ ᠵᠠᠭᠤᠷ᠎ᠠ ᠴᠡᠷᠢᠭ ᠢᠶᠠᠨ ᠪᠦᠷᠢᠳᠬᠡᠵᠦ ᠦᠵᠡᠬᠦᠯ᠎ᠡ ᠲᠦᠡᠭᠭᠡᠵᠢ 2600 ᠬᠦᠮᠦᠨ ᠪᠠᠶᠢᠪᠠᠢ᠃ ᠪᠠᠯᠵᠢᠨ᠎ᠠ ᠭᠤᠤᠯ ︵ᠬᠤᠵᠢᠮ ᠨᠢ ᠬᠦᠯᠥᠨ ᠨᠠᠭᠤᠷ ᠤᠨ ᠤᠰᠤ ᠶᠡᠬᠡᠳᠦᠭᠰᠡᠨ ᠠᠴᠠ ᠬᠦᠯᠥᠨ ᠨᠠᠭᠤᠷ ᠯᠤᠭ᠎ᠠ ᠨᠡᠶᠢᠯᠡᠪᠡᠢ︶ ᠤᠨ ᠬᠦᠪᠡᠭᠦᠨ ᠳᠡᠭᠡᠷ᠎ᠡ ᠬᠦᠷᠦᠭᠡᠳ ᠰᠢᠪᠠᠷ ᠪᠠᠯᠴᠢᠭ ᠲᠠᠢ ᠤᠰᠤ ᠶᠢ ᠤᠤᠭᠤᠯᠴᠠᠬᠤ ᠲᠤᠮᠳᠠ ᠪᠠᠨ ︿ᠬᠤᠵᠢᠮ ᠬᠤᠶᠢᠰᠢᠲᠠ ᠶᠠᠮᠠᠷ ᠵᠤᠪᠠᠯᠠᠩ ᠲᠤᠬᠢᠶᠠᠯᠳᠤᠭᠰᠠᠨ ᠴᠦ ᠨᠢᠭᠡᠨ ᠨᠢᠭᠡᠨ ᠢᠶᠠᠨ ᠤᠷᠬᠢᠬᠤ ᠦᠭᠡᠢ﹀ ᠬᠡᠮᠡᠨ ᠠᠮᠠᠯᠳᠤᠪᠠᠢ᠃ ᠲᠡᠭᠦᠨ ᠢ ︿ᠪᠠᠯᠵᠢᠨ᠎ᠠ ᠶᠢᠨ ᠬᠤᠯᠪᠤᠭ᠎ᠠ﹀ ᠭᠡᠳᠡᠭ ᠪᠤᠶᠤ᠃ ᠲᠡᠭᠦᠨ ᠤ ᠳᠠᠷᠠᠭ᠎ᠠ ᠲᠡᠮᠦᠵᠢᠨ ᠭᠡᠨᠡᠳᠲᠡ ᠤᠡᠭ ᠬᠠᠨ ᠤ ᠴᠡᠷᠢᠭ ᠢ ᠲᠤᠪᠲᠤᠯᠤᠨ ᠲᠡᠶᠢᠯᠦᠭᠰᠡᠨ᠎ᠡ᠂ ᠤᠡᠭ ᠬᠠᠨ ᠪᠤᠷᠤᠭᠤᠯᠠᠨ ᠲᠤᠳᠠᠭᠠᠵᠦ ᠶᠠᠪᠤᠬᠤ ᠲᠤᠮᠲᠠ ᠪᠠᠨ ᠨᠠᠢᠮᠠᠨ ᠢᠷᠭᠡᠨ ᠤ ᠬᠦᠮᠦᠰ ᠲᠤᠷ ᠠᠯᠠᠭᠳᠠᠪᠠᠢ᠃ ᠤᠡᠭ ᠬᠠᠨ ᠤ ᠬᠦᠪᠡᠭᠦᠨ ᠴᠦ ᠴᠧᠷᠬᠢᠱᠮᠧ ᠬᠡᠮᠡᠬᠦ ᠭᠠᠵᠠᠷ ᠵᠢᠭᠤᠳᠠᠵᠦ ᠬᠦᠷᠦᠭᠡᠳ ᠪᠠᠰᠠ ᠬᠦᠮᠦᠨ ᠳᠤᠷ ᠠᠯᠠᠭᠳᠠᠵᠦ᠂ ᠬᠡᠷᠡᠶᠢᠳ ᠢᠷᠭᠡᠨ ᠢᠡᠭᠬᠢᠵᠦ ᠰᠦᠨᠦᠪᠡᠢ᠃ ᠲᠡᠮᠦᠵᠢᠨ ᠨᠤᠲᠤᠭ ᠢᠶᠠᠨ ᠦᠷᠦᠨᠡᠲᠦ ᠳᠤᠷ ᠨᠠᠢᠮᠠᠨ ᠤ ᠬᠢᠵᠠᠭᠠᠷ ᠲᠤᠷ ᠬᠦᠷᠲᠡᠯ᠎ᠡ ᠦᠷᠭᠡᠳᠬᠡᠪᠡᠢ︾ ᠭᠡᠵᠦ ᠪᠢᠴᠢᠵᠦ ᠪᠤᠢ᠃      ︽ᠪᠦᠬᠦᠳᠡ ᠨᠠᠶᠢᠷᠠᠮᠲᠠᠬᠤ ᠮᠤᠩᠭᠤᠯ ᠠᠷᠠᠳ ᠤᠯᠤᠰ ᠤᠨ ᠲᠡᠥᠬᠡ︾ ᠳᠤ᠄ ︽ᠲᠡᠮᠦᠵᠢᠨ ᠬᠦᠴᠦ ᠪᠠᠨ ᠶᠠᠭᠠᠷᠠᠨ ᠬᠤᠷᠠᠮᠳᠤᠭᠤᠯᠤᠨ ᠲᠠᠲ᠋ᠠᠷ ᠠᠶᠢᠮᠠᠭ ᠢ ᠨᠢᠭᠡᠳᠬᠡᠬᠦ ᠠᠴᠠ ᠡᠮᠦᠨ᠎ᠡ ᠠᠮᠵᠢᠵᠦ ᠲᠠᠶᠢᠴᠢᠭᠤᠳ᠂ ᠲᠦᠷᠪᠡᠳ ᠨᠠᠷ ᠢ ᠪᠤᠶᠢᠷ ᠨᠠᠭᠤᠷ ᠤᠨ ᠤᠷᠴᠢᠮ ᠬᠠᠳᠠᠬᠢᠨ ᠰᠠᠯᠵᠢᠭᠤᠳ ᠨᠠᠷ ᠢ ᠬᠦᠯᠦᠨ ᠨᠠᠭᠤᠷ ᠤᠨ ᠤᠷᠴᠢᠮ ᠳᠤ ᠲᠤᠰ ᠲᠤᠰ ᠴᠤᠬᠢᠵᠠᠢ ᠁︾᠂ ︽᠁ ᠸᠠᠩ ᠬᠠᠨ ᠲᠡᠮᠤᠵᠢᠨ ᠤ ᠬᠦᠰᠡᠭᠰᠡᠨ ᠶᠤᠰᠤᠭᠠᠷ ᠴᠡᠷᠢᠭ ᠢᠶᠠᠨ ᠠᠪᠴᠦ ᠬᠤᠶᠠᠷ ᠡᠲᠡᠭᠡᠳ ᠤᠨ ᠴᠡᠷᠢᠭ ᠢᠶᠠᠨ ᠲᠡᠶᠢᠵᠤ ᠬᠤᠶᠠᠷ ᠡᠲᠡᠭᠡᠳ ᠢᠶᠠᠷ ᠢᠶᠠᠨ ᠬᠡᠷᠦᠯᠦᠨ ᠳᠤ ᠨᠡᠶᠢᠯᠡᠵᠤ ᠲᠡᠨᠳᠡ ᠠᠴᠠ ᠬᠦᠳᠡᠯᠤᠨ ᠮᠤᠷᠲᠡᠵᠤ ᠪᠤᠶᠢᠷ᠂ ᠬᠦᠯᠦᠨ ᠤ ᠬᠤᠭᠤᠷᠤᠨᠲᠦ ︿ᠬᠦᠢᠲᠡᠨ﹀ ᠭᠡᠳᠡᠭ ᠭᠠᠵᠠᠷ ᠵᠠᠮᠤᠬ᠎ᠠ ᠶᠢᠨ ᠴᠡᠷᠢᠭ ᠲᠠᠢ ᠪᠠᠶᠢᠯᠲᠤᠨ ᠪᠤᠲᠡ ᠴᠤᠬᠢᠵᠠᠢ︾ ︵ᠨᠢᠭᠡᠳᠦᠭᠡᠷ ᠪᠤᠳᠢ ᠶᠢᠨ ᠳᠤᠤᠷᠠᠲᠦ ᠲᠡᠪᠲᠡᠷ ᠤᠨ 365 ᠳ᠋ᠤᠭᠠᠷ ᠨᠢᠭᠤᠷ ᠲᠤ ᠦᠵᠡ︶᠃ ᠠᠳᠡ ᠳᠤᠷᠠᠳᠴᠦ ᠪᠦᠬᠦᠢ ︽ᠬᠦᠢᠲᠡᠨ︾ ᠭᠡᠳᠡᠭ ᠨᠢ ᠳᠠᠷᠤᠢ ᠳᠡᠭᠡᠷ᠎ᠠ ᠳᠤᠷᠠᠳᠴᠦ ᠦᠡᠭᠭᠡᠷᠡᠭᠰᠡᠨ ︽ᠬᠦᠢᠲᠡᠨ ᠬᠠᠷᠠᠭᠠᠲᠦ︾ ᠮᠦᠨ ᠪᠦᠭᠡᠳ ᠤᠳᠤ ᠶᠢᠨ ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠪᠤᠯᠬᠤ ᠨᠢ ᠮᠠᠳᠠᠭ ᠦᠭᠡᠢ ᠪᠤᠯᠠᠢ᠃      ︽ᠪᠠᠶᠠᠨᠮᠦ᠋ᠡᠭᠭᠡ︾ ᠭᠡᠳᠡᠭ ᠨᠢ ᠪᠠᠷᠭᠤᠴᠤᠳ᠂ ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠶᠢ ᠡᠬᠢᠯᠡᠵᠤ ᠲᠡᠬᠢᠬᠤ ᠦᠶ ᠎ᠠ ᠳᠡᠭᠡᠨ ︽ᠦᠭᠡᠶᠢᠷᠡᠰᠢ ᠦᠭᠡᠢ ᠪᠠᠶᠠᠨ᠂ ᠦᠨᠦᠴᠢᠷᠡᠰᠢ ᠦᠭᠡᠢ ᠦᠨᠢᠷ︾ ᠶᠠᠪᠤᠬᠤ ᠶᠢᠨ ᠪᠡᠯᠭᠡ ᠲᠡᠮᠪᠡᠷᠡᠢ ᠶᠢ ᠵᠦᠡᠭᠨᠠᠵᠤ᠂ ᠨᠤᠲᠤᠭ ᠤᠰᠤᠨ ᠤ ᠪᠠᠨ ᠰᠦᠯᠲᠡ ᠪᠤᠯᠤᠭᠰᠠᠨ ᠬᠠᠶᠢᠷᠬᠠᠨ ᠠᠭᠤᠯᠠᠨ ᠳᠠᠭᠠᠨ ᠦᠯᠵᠡᠢ ᠮᠦᠷ ᠲᠠᠢ ᠰᠠᠶᠢᠬᠠᠨ ᠨᠡᠷ᠎ᠠ ᠡᠷᠬᠦᠭᠰᠡᠨ ᠪᠠᠶᠢᠯᠲᠠᠢ᠃      ᠪᠠᠷᠭᠤ ᠨᠠᠢᠮᠠᠨ ᠬᠤᠰᠢᠭᠤ ᠪᠠᠷ ᠢᠶᠠᠨ ᠵᠢᠯ ᠳᠤ ᠬᠤᠶᠠᠷ ᠤᠳᠠᠭ᠎ᠠ ᠲᠠᠬᠢᠳᠠᠭ ᠠᠴᠠ ᠴᠦ ᠪᠤᠯᠤᠭᠰᠠᠨ ᠶᠤᠮ ᠤᠤ᠂ ᠪᠠᠷᠭᠤ ᠶᠢᠨ ᠦᠭᠬᠢᠶᠠᠮᠤᠷ ᠪᠠᠶᠠᠨ ᠨᠤᠲᠤᠭ ᠤᠨ ᠰᠦᠯᠲᠡ ᠪᠤᠯᠤᠨ ᠮᠢᠩᠭᠠᠨ ᠤ ᠭᠠᠵᠠᠷ ᠠᠴᠠ ᠰᠦᠨᠳᠡᠷᠯᠡᠨ ᠪᠠᠶᠢᠳᠠᠭ ᠠᠴᠠ ᠴᠦ ᠪᠤᠯᠤᠭᠰᠠᠨ ᠶᠤᠮ ᠤᠤ᠂ ᠬᠤᠯᠠ ᠦᠢᠷ᠎ᠠ ᠳᠤ ᠤᠯᠤᠰ ᠤᠨ ᠳᠤᠳᠤᠭᠠᠲᠦ ᠭᠠᠳᠠᠭᠠᠲᠦ ᠳᠤ ︽ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ︾ ᠭᠡᠵᠤ ᠠᠯᠳᠠᠷᠰᠢᠭᠰᠠᠨ ᠨᠢ ᠪᠠᠷᠭᠤ ᠲᠦᠮᠡᠨ ᠤ ᠦᠨᠢ ᠡᠬᠦᠷᠢᠲᠡ ᠶᠢᠨ ᠪᠠᠭ᠋ᠠᠲᠤᠯ ᠪᠤᠯᠵᠤ ᠬᠡᠢ ᠮᠤᠷᠢ ᠰᠦᠯᠲᠡ᠂ ᠬᠡᠰᠢᠭ ᠪᠤᠶᠠᠨ ᠢ ᠨᠢ ᠬᠤᠷᠦ᠋ᠢᠯᠠᠨ ᠪᠠᠶᠢᠨᠠᠮ᠃      ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠪᠤᠯ ᠰᠢᠨ᠎ᠠ ᠪᠠᠷᠭᠤ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠨᠤᠲᠤᠭ ᠤᠨ ᠵᠡᠬᠦᠨ ᠡᠮᠦᠨ᠎ᠠ ᠪᠡᠶ᠎ᠠ ᠳᠤ ᠬᠤᠰᠢᠭᠤᠨ ᠤ ᠲᠦᠪ ᠠᠯᠳ᠋ᠬᠠᠮᠡᠭᠡᠯ ᠪᠠᠯᠭᠠᠰᠤ ᠠᠴᠠ ᠡᠮᠦᠨᠡᠰᠢ 45.8 ᠺᠢᠯᠤᠮᠧᠳ᠋ᠷ ᠵᠠᠶᠢᠲᠠᠢ᠂ ᠲᠠᠯᠠᠢ ᠶᠢᠨ ᠲᠦᠪᠰᠢᠨ ᠠᠴᠠ ᠲᠡᠭᠡᠭᠰᠢ 945 ᠮᠧᠳ᠋ᠷ ᠦᠨᠳᠦᠷ᠂ ᠵᠡᠬᠦᠨ ᠡᠮᠦᠨᠡᠰᠢ᠂ ᠪᠠᠷᠠᠭᠤᠨ ᠬᠤᠶᠢᠰᠢ ᠪᠠᠨ ᠵᠢᠰᠢᠬᠦᠭᠡᠨ ᠪᠠᠶᠢᠷᠢᠯᠠᠭᠰᠠᠨ ︽ᠬᠡᠪᠲᠡᠭᠡ ᠲᠡᠮᠡᠭᠡ ᠬᠡᠯᠪᠡᠷᠢᠲᠡᠢ︾ ᠲᠤᠮᠤ ᠠᠭᠤᠯᠠ ᠪᠤᠯᠤᠨ᠎ᠠ᠃      ᠠᠭᠤᠯᠠᠨ ᠤ ᠤᠷᠬᠢᠯ ᠲᠡᠭᠡᠷ᠎ᠠ ᠭᠠᠷᠤᠭᠠᠳ ᠪᠠᠷᠠᠯᠠᠬᠤᠶ᠎ᠠ ᠪᠦᠬᠦ ᠬᠤᠰᠢᠭᠤᠨ ᠤ ᠨᠤᠲᠤᠭ ᠪᠦᠷᠢᠨ ᠢᠶᠠᠷ ᠢᠶᠠᠨ ᠬᠠᠷᠠᠭᠳᠠᠳᠠᠭ ᠪᠦᠭᠡᠳ ᠲᠤᠩᠭᠠᠯᠠᠭ ᠰᠠᠶᠢᠬᠠᠨ ᠡᠳᠦᠷ ᠪᠤᠯᠪᠠᠰᠤ ᠰᠢᠨ᠎ᠠ ᠪᠠᠷᠭᠤ ᠵᠡᠬᠦᠨ ᠬᠤᠰᠢᠭᠤᠨ ᠤ ᠲᠦᠪ — ᠠᠮᠤᠭᠤᠯᠠᠩ ᠪᠠᠯᠭᠠᠰᠦ ᠠᠴᠠ ᠴᠦ ᠪᠤᠭᠳᠠ ᠠᠭᠤᠯᠠ ᠶᠢᠨ ᠪᠠᠷ᠎ᠠ ᠳᠤᠲᠤᠬᠠᠨ ᠴᠡᠩᠭᠡᠷᠯᠡᠵᠤ ᠬᠠᠷᠠᠭᠳᠠᠳᠠᠭ ᠶᠤᠮ᠃      ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠶᠢᠨ ᠲᠦᠷᠦᠬᠦᠦ ᠠᠭᠤᠯᠠᠨ ᠳᠡᠭᠡᠷ᠎ᠠ ᠨᠢ ᠳᠤᠮᠤ ᠭᠤᠤᠯ ᠤᠪᠤᠭ᠎ᠠ ᠲᠠᠢ᠂ ᠭᠤᠤᠯ ᠤᠪᠤᠭᠠᠨ ᠤ ᠲᠦᠷᠪᠡᠨ ᠲᠠᠯ᠎ᠠ ᠳᠤ ᠭᠤᠷᠪᠡ ᠭᠤᠷᠪᠡᠨ ᠵᠢᠵᠢᠭ ᠤᠪᠤᠭ᠎ᠠ ᠲᠠᠢ᠂ ᠭᠤᠤᠯ ᠤᠪᠤᠭᠠᠨ ᠠᠴᠠ ᠡᠮᠦᠨᠡᠰᠢ 60 ᠮᠧᠳ᠋ᠷ ᠵᠠᠶᠢᠲᠠᠢ ᠪᠠᠰᠠ ᠨᠢᠭᠡ ᠤᠪᠤᠭ᠎ᠠ ᠪᠠᠶᠢᠳᠠᠭ᠃ ᠤᠪᠤᠭ᠎ᠠ ᠪᠤᠯᠭᠠᠨ ᠳᠤ ᠠᠯᠲᠠ ᠪᠠᠷ ᠰᠢᠷᠠᠭᠰᠠᠨ ᠲᠤᠸᠠᠵᠠ ᠲᠠᠢ᠂ ᠵᠢᠯ ᠳᠤ ᠬᠤᠶᠠᠷ ᠤᠳᠠᠭ᠎ᠠ ᠲᠠᠬᠢᠬᠤ ᠠᠴᠠ ᠪᠠᠨ ᠡᠮᠦᠨ᠎ᠠ ᠨᠢ ᠤᠪᠤᠭᠠᠨ ᠳᠤ ᠲᠦᠷᠦᠬᠦᠴᠢ ᠶᠢᠨ ᠡᠷᠬᠦᠭᠰᠡᠨ ᠬᠠᠳᠠᠭ᠂ ᠱᠠᠩᠬᠠᠢ᠂ ᠲᠤᠷᠭ᠎ᠠ᠂ ᠳᠤᠷᠲᠤᠩ᠂ ᠤᠷᠭ᠎ᠠ᠂ ᠬᠡᠪᠯᠡᠭᠰᠡᠨ ᠬᠡᠢ ᠮᠤᠷᠢ᠂ ᠴᠠᠢ ᠢᠳᠡᠭᠡᠨ ᠤ ᠳᠡᠭᠡᠵᠢ ᠲᠡᠷᠢᠬᠦᠳᠡᠨ ᠢ ᠰᠠᠴᠤᠯᠢ ᠡᠷᠬᠦᠳᠡᠭ᠃      ᠳᠤᠮᠳᠠ ᠠᠭᠤᠯᠠ ᠬᠢᠭᠡᠳ ᠰᠡᠬᠦᠯ ᠠᠭᠤᠯᠠ ᠶᠢᠨ ᠤᠷᠤᠢ ᠲᠡᠭᠡᠷ᠎ᠠ ᠲᠤᠰ ᠪᠦᠷᠢ ᠴᠢᠯᠠᠭᠤᠨ ᠤᠪᠤᠭ᠎ᠠ ᠪᠠᠶᠢᠳᠠᠭ ᠪᠤᠯᠪᠠᠴᠦ ᠲᠤᠸᠠᠵᠠ ᠦᠭᠡᠢ᠂ ᠪᠤᠷᠭᠠᠰᠤᠯᠠᠳᠠᠭ ᠴᠦ ᠦᠭᠡᠢ᠃ ᠵᠠᠷᠢᠮ ᠰᠦᠰᠦᠭᠳᠡᠨ ᠪᠠᠰᠠ ᠬᠠᠳᠠᠭ᠂ ᠤᠷᠭ᠎ᠠ ᠡᠷᠬᠦᠵᠤ ᠮᠥᠷᠬᠦᠨ ᠰᠦᠰᠦᠭᠯᠡᠳᠡᠭ᠃      ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠨᠢ ᠮᠡᠨᠡᠩ ᠤᠨ ᠲᠠᠯ ᠎ᠠ ᠶᠢᠨ ᠬᠤᠶᠢᠲᠦ ᠪᠡᠶ᠎ᠠ ᠳᠤ ᠪᠠᠶᠢᠷᠢᠯᠠᠭᠰᠠᠨ ᠪᠤᠯᠬᠤᠷ ᠪᠠᠰᠠ ᠴᠦ ︽ᠮᠡᠨᠡᠩ ᠤᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ︾ ᠭᠡᠬᠦ ᠴᠦ ᠪᠤᠢ᠃      ᠰᠢᠨ᠎ᠠ ᠪᠠᠷᠭᠤ ᠪᠠᠷᠠᠭᠤᠨ ᠭᠠᠷᠤᠨ ᠪᠦᠬᠦᠳᠡ ᠶᠢᠨ ᠳᠠᠷᠤᠭ᠎ᠠ ᠴᠠᠷᠠᠨ᠂ ᠬᠦᠪᠡᠭᠡᠲᠦ ᠬᠦᠬᠡ ᠬᠤᠰᠢᠭᠤᠨ ᠤ ᠲᠡᠷᠢᠬᠦᠨ ᠰᠤᠮᠤᠨ ᠤ ᠵᠠᠩᠭᠢ ᠴᠦᠯᠲᠤᠮ᠂ ᠬᠤᠶᠠᠳᠤᠭᠠᠷ ᠰᠤᠮᠤᠨ ᠤ ᠵᠠᠩᠬᠢ ᠤᠷᠭᠤᠮᠠᠯ᠂ ᠭᠤᠳᠠᠭᠠᠷ ᠰᠤᠮᠤᠨ ᠤ ᠵᠠᠩᠬᠢ ᠪᠠᠭ᠎ᠠ ᠴᠦᠯᠳᠦᠮ᠂ ᠬᠦᠪᠡᠬᠡᠳᠦ ᠤᠯᠠᠭᠠᠨ ᠬᠤᠰᠢᠭᠤᠨ ᠤ ᠳᠡᠷᠢᠬᠦᠨ ᠰᠤᠮᠤᠨ ᠤ ᠵᠠᠩᠬᠢ ᠠᠶᠢᠵᠦ᠂ ᠬᠤᠶᠠᠳᠤᠭᠠᠷ ᠰᠤᠮᠤᠨ ᠤ ᠵᠠᠩᠭᠢ ᠱᠤᠩᠬᠤ᠂ ᠭᠤᠳᠠᠭᠠᠷ ᠰᠤᠮᠤᠨ ᠤ ᠵᠠᠩᠬᠢ ᡀᠠᠰᠦ᠋ᠷᠦᠩ᠂ ᠰᠢᠯᠤᠭᠤᠨ ᠤᠯᠠᠭᠠᠨ ᠬᠤᠰᠢᠭᠤᠨ ᠤ ᠲᠡᠷᠢᠬᠦᠨ ᠰᠤᠮᠤᠨ ᠤ ᠵᠠᠩᠬᠢ ᠪᠤᠨᠢ᠂ ᠬᠤᠶᠠᠳᠤᠭᠠᠷ ᠰᠤᠮᠤᠨ ᠤ ᠵᠠᠩᠬᠢ ᠲᠦᠯᠦᠪᠦᠷᠢ᠂ ᠭᠤᠳᠠᠭᠠᠷ ᠰᠤᠮᠤᠨ ᠤ ᠵᠠᠩᠬᠢ ᠮᠢᠡᠵᠤᠤᠷ᠂ ᠰᠢᠯᠤᠭᠤᠨ ᠰᠢᠷ᠎ᠠ ᠬᠤᠰᠢᠭᠤᠨ ᠤ ᠲᠡᠷᠢᠬᠦᠨ ᠰᠤᠮᠤᠨ ᠤ ᠵᠠᠩᠬᠢ ᠴᠡᠷᠡᠨ ︵ᠪᠦᠬᠦᠳᠡ ᠶᠢᠨ ᠳᠠᠷᠤᠭ᠎ᠠ︶᠂ ᠬᠤᠶᠠᠳᠤᠭᠠᠷ ᠰᠤᠮᠤᠨ ᠤ ᠵᠠᠩᠬᠢ ᠠᠰᠠᠷᠠᠯ᠂ ᠭᠤᠳᠠᠭᠠᠷ ᠰᠤᠮᠤᠨ ᠤ ᠵᠠᠩᠬᠢ ᠮᠢᠨᠵᠤᠤᠷ ᠬᠢᠬᠡᠳ ᠳ᠋ᠠᠩᠽᠠᠨ ᠬᠡᠯᠦᠩ ᠵᠡᠷᠬᠡ ᠬᠡᠷᠬᠡᠮᠳᠡᠨ ᠯᠠᠮᠠ ᠨᠠᠷ ᠵᠦᠪᠳᠡᠯᠴᠡᠵᠦ᠂ ᠨᠠᠶᠢᠷᠠᠯᠳᠤ ᠲᠦᠪ ᠤᠨ ᠠᠷᠪᠠᠨ ᠲᠦᠷᠪᠡᠳᠦᠬᠡᠷ ᠤᠨ ᠤ ᠤᠯᠠᠭᠠᠨ ᠯᠤᠤ ᠵᠢᠯ ᠪᠤᠶᠤ ᠨᠠᠶᠢᠳᠠ ᠶᠢᠨ ᠤᠨ ᠳᠤᠭᠠᠯᠠᠯ ᠤᠨ 1736 ᠤᠨ ᠠᠴᠠ ᠰᠢᠨ᠎ᠠ ᠪᠠᠷᠭᠤ ᠪᠠᠷᠠᠭᠤᠨ ᠭᠠᠷᠤᠨ ᠲᠦᠷᠪᠡᠨ ᠬᠤᠰᠢᠭᠤᠨ ᠠᠴᠠ 120 ᠦᠬᠡᠷ ᠳᠡᠷᠬᠡ ᠭᠠᠷᠭᠠᠵᠦ᠂ ᠪᠤᠭᠳᠠ ᠠᠭᠤᠯᠠᠨ ᠳᠤ ᠪᠠᠶᠢᠭᠰᠠᠨ ᠪᠦᠬᠡ ᠶᠢᠨ ᠤᠡᠭᠭᠤᠨ ᠢ ︽ ᠲᠠᠭᠠᠨ ᠳᠡᠯ︾ ᠬᠡᠮᠡᠬᠦ ᠠᠭᠤᠯᠠᠨ ᠳᠤ ᠨᠢᠬᠡ ᠰᠠᠷ᠎ᠠ ᠶᠢᠨ ᠬᠤᠭᠤᠴᠠᠭ᠎ᠠ ᠬᠡᠷᠡᠭᠯᠡᠨ ᠨᠡᠬᠦᠯᠬᠡᠵᠦ᠂ ᠳᠡᠭᠷᠢ ᠳᠡᠳᠬᠦᠭᠴᠢ ᠶᠢᠨ ᠳᠠᠪᠤᠳᠤᠭᠠᠷ ᠤᠨ ᠪᠤᠶᠤ ᠨᠠᠶᠢᠳᠠ ᠶᠢᠨ ᠤᠨ ᠳᠤᠭᠠᠯᠠᠯ ᠤᠨ1740 ᠤᠨ᠂ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠷᠠᠪᠵᠤᠩ ᠤᠨ ᠴᠠᠭᠠᠨ ᠪᠠᠴᠢᠨ ᠵᠢᠯ ᠤᠨ ᠳᠠᠪᠤᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠤ ᠡᠳᠦᠷ᠂ ᠰᠢᠨ᠎ᠠ ᠪᠠᠷᠭᠤ ᠪᠠᠷᠠᠭᠤᠨ ᠭᠠᠷᠤᠨ ᠲᠦᠷᠪᠡᠨ ᠬᠤᠰᠢᠭᠤ ᠪᠠᠷ ᠢᠶᠠᠨ ᠳᠠᠬᠢᠵᠦ ᠡᠬᠢᠯᠡᠵᠡᠢ᠃      ᠮᠦᠨ ᠳᠡᠭᠷᠢ ᠳᠡᠳᠬᠦᠭᠴᠢ ᠶᠢᠨ ᠳᠠᠪᠤᠳᠤᠭᠠᠷ ᠤᠨ ᠪᠤᠶᠤ ᠨᠡᠶᠢᠳᠡ ᠶᠢᠨ ᠤᠨ ᠳᠤᠭᠠᠯᠠᠯ ᠤᠨ 1740 ᠤᠨ᠂ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠷᠠᠪᠵᠤᠩ ᠤᠨ ᠴᠠᠭᠠᠨ ᠪᠠᠴᠢᠨ ᠵᠢᠯ ᠤᠨ ᠲᠡᠷᠢᠬᠦᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠳᠠᠪᠤᠨ ᠤ ᠡᠳᠦᠷ᠂ ᠰᠢᠨ᠎ᠠ ᠪᠠᠷᠭᠤ ᠪᠠᠷᠠᠭᠤᠨ ᠭᠠᠷᠤᠨ ᠬᠦᠪᠡᠬᠡᠳᠦ ᠬᠦᠬᠡ ᠬᠤᠰᠢᠭᠤᠨ ᠤ ᠬᠤᠶᠠᠳᠤᠭᠠᠷ ᠰᠤᠮᠤᠨ ᠤ ᠤᠯᠠᠭᠠᠨ ᠫᠢ ᠳᠠᠯᠠᠩᠭᠤᠳ ᠬᠠᠯᠠ ᠶᠢᠨ ᠤᠷᠭᠤᠮᠠᠯ ᠬᠡᠮᠡᠭᠴᠢ ᠪᠢᠴᠢᠭ ᠤᠨ ᠬᠦᠮᠦᠨ᠂ ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠶᠢᠨ ᠳᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ ᠮᠠᠨᠵᠤ ᠦᠰᠦᠭ ᠢᠶᠠᠷ ᠵᠤᠬᠢᠶᠠᠵᠠᠢ᠃      ᠳᠠᠷᠠᠭ᠎ᠠ ᠵᠢᠯ ᠠᠴᠠ ᠨᠢ᠂ ᠳᠠᠷᠤᠢ ᠳᠡᠭᠷᠢ ᠳᠡᠳᠬᠦᠭᠴᠢ ᠶᠢᠨ ᠵᠢᠷᠭᠤᠳᠤᠭᠠᠷ ᠤᠨ ᠪᠤᠶᠤ ᠨᠠᠶᠢᠳᠠ ᠶᠢᠨ ᠤᠨ ᠳᠤᠭᠠᠯᠠᠯ ᠤᠨ 1741 ᠤᠨ᠂ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠷᠠᠪᠵᠤᠩ ᠤᠨ ᠴᠠᠭᠠᠭᠴᠢᠨ ᠳᠠᠬᠢᠶ᠎ᠠ ᠵᠢᠯ ᠤᠨ ᠳᠠᠪᠤᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠭᠤᠷᠪᠠᠨ ᠤ ᠳᠤᠭᠳᠠᠮᠠᠯ ᠡᠳᠦᠷ᠂ ᠰᠢᠨ᠎ᠠ ᠪᠠᠷᠭᠤ ᠪᠠᠷᠠᠭᠤᠨ ᠭᠠᠷᠤᠨ ᠲᠦᠷᠪᠡᠨ ᠬᠤᠰᠢᠭᠤ ᠭᠤᠤᠯ ᠲᠠᠢ ᠳᠠᠬᠢᠬᠤ ᠪᠤᠯᠵᠤ᠂ ᠳᠠᠬᠦᠨ ᠢᠶᠠᠨ ︽ᠳᠠᠪᠤᠨ ᠰᠠᠷ᠎ᠠ ᠶᠢᠨ ᠠᠭᠤᠯᠠ ᠶᠢᠨ ᠨᠠᠶᠢᠷ︾ ᠬᠡᠳᠡᠭ ᠪᠤᠶᠤ᠃      ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠶᠢᠨ ᠳᠠᠬᠢᠯᠭ᠎ᠠ ᠶᠢᠨ ᠲᠦᠪᠡᠳ ᠰᠤᠳᠤᠷ ᠢ ᠨᠠᠶᠢᠳᠠ ᠶᠢᠨ ᠤᠨ ᠳᠤᠭᠠᠯᠠᠯ ᠤᠨ 1835 ᠤᠨ ᠪᠤᠶᠤ ᠬᠠᠷ᠎ᠠ ᠯᠤᠤ ᠵᠢᠯ ᠤᠨ 8 ᠰᠠᠷ᠎ᠠ ᠶᠢᠨ 30 ᠤ ᠡᠳᠦᠷ ᠨᠢᠬᠡᠨ ᠲᠦᠪᠡᠳ ᠯᠠᠮᠠ ᠵᠤᠬᠢᠶᠠᠵᠦ᠂ ᠳᠠᠷᠠᠭ᠎ᠠ ᠵᠢᠯ ᠤᠨ ᠬᠢᠨᠢ 5 ᠰᠠᠷ᠎ᠠ ᠶᠢᠨ 13 ᠤ ᠡᠳᠦᠷ ᠠᠴᠠ ᠡᠬᠢᠯᠡᠨ ᠯᠠᠮᠠ ᠨᠠᠷ ᠲᠦᠪᠡᠳ ᠰᠤᠳᠤᠷ ᠢᠶᠠᠷ ᠳᠠᠬᠢᠵᠦ ᠡᠬᠢᠯᠡᠭᠰᠡᠨ ᠠᠴᠠ ᠡᠳᠦᠬᠡ ᠬᠦᠷᠦᠵᠦᠬᠦᠢ᠃      ᠰᠢᠨ᠎ᠠ ᠪᠠᠷᠭᠤ ᠪᠠᠷᠠᠭᠤᠨ ᠭᠠᠷᠤᠨ ᠲᠦᠷᠪᠡᠨ ᠬᠤᠰᠢᠭᠤ ᠪᠠᠷ ᠢᠶᠠᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠶᠢ ᠠᠩᠬ᠎ᠠ ᠳᠠᠬᠢᠬᠤ ᠦᠶ᠎ᠠ ᠠᠴᠠ ᠰᠢᠨ᠎ᠠ ᠪᠠᠷᠭᠤ ᠵᠠᠬᠦᠨ ᠭᠠᠷᠤᠨ ᠬᠡᠰᠡᠭ ᠠᠶᠢᠯ ᠵᠤᠨ᠂ ᠮᠦᠨ ᠳᠠᠪᠤᠨ ᠰᠠᠷ᠎ᠠ ᠶᠢᠨ ᠠᠭᠤᠯᠠ ᠶᠢᠨ ᠨᠠᠶᠢᠷ ᠲᠤ ᠢᠷᠡᠵᠦ᠂ ᠪᠤᠭᠳᠠ ᠠᠭᠤᠯᠠ ᠶᠢ ᠳᠠᠬᠢᠯᠴᠠᠳᠠᠭ ᠪᠠᠶᠢᠭᠰᠠᠨ ᠢᠶᠠᠨ ᠨᠠᠶᠢᠳᠠ ᠶᠢᠨ ᠤᠨ ᠳᠤᠭᠠᠯᠠᠯ ᠤᠨ1850 ᠤᠨ ᠳᠤ᠂ ᠰᠢᠨ᠎ᠠ ᠪᠠᠷᠭᠤ ᠪᠠᠷᠠᠭᠤᠨ᠂ ᠵᠡᠬᠦᠨ ᠬᠤᠶᠠᠷ ᠭᠠᠷᠤᠨ ᠨᠠᠢᠮᠠᠨ ᠬᠤᠰᠢᠭᠤ ᠪᠠᠷ ᠢᠶᠠᠨ ᠡᠬᠢᠯᠡᠵᠦ ᠳᠠᠬᠢᠭᠠᠳ᠂ ᠳᠡᠬᠦᠨ ᠠᠴᠠ ᠬᠤᠶᠢᠰᠢ ᠵᠢᠯ ᠪᠦᠷᠢ ᠶᠢᠨ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠳᠤᠯᠤᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠠ ᠶᠢᠨ ᠭᠤᠷᠪᠠᠨ ᠤ ᠳᠤᠭᠳᠠᠮᠠᠯ ᠡᠳᠦᠷ ᠳᠠᠬᠢᠬᠤ ᠪᠤᠯᠵᠤ᠂ ᠳᠡᠬᠦᠨ ᠵᠶᠠᠨ ᠪᠠᠷᠭᠤ ᠨᠠᠢᠮᠠᠨ ᠬᠤᠰᠢᠭᠤᠨ ᠤ ︽ᠡᠪ ᠤᠨ ᠨᠠᠶᠢᠷ︾ ᠭᠡᠳᠡᠭ ᠪᠤᠯᠵᠤ᠂ ︽ᠳᠤᠯᠤᠭᠠᠨ ᠰᠠᠷ᠎ᠠ ᠶᠢᠨ ᠠᠭᠤᠯᠠ ᠶᠢᠨ ᠨᠠᠶᠢᠷ︾ ᠴᠤ ᠭᠡᠳᠡᠭ᠃      ᠬᠡᠳᠦ ︽ᠵᠠᠬᠦᠨ︾ ᠤ ᠱᠤᠭᠤᠮ ᠤᠨ ᠨᠦᠯᠦᠬᠡᠯᠡᠯ ᠠᠴᠠ ᠪᠤᠯᠵᠤ 1964 ᠤᠨ ︵ᠬᠦᠬᠡ ᠯᠤᠤ ᠵᠢᠯ︶ ᠠᠴᠠ ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠶᠢ ᠳᠠᠬᠢᠬᠤ ᠶᠢ ︽ᠹᠧᠤᠳᠠᠯ ᠤᠨ ᠬᠡᠢ ᠪᠢᠰᠢᠷᠠᠯ ᠤᠨ ᠠᠵᠢᠯᠯᠠᠭ᠎ᠠ︾ ᠬᠡᠵᠦ ᠪᠤᠷᠤᠭᠤᠰᠢᠶᠠᠨ ᠵᠤᠭᠰᠤᠭᠠᠵᠦ᠂ 1966 ᠤᠨ ︵ᠤᠯᠠᠭᠠᠨ ᠮᠤᠷᠢᠨ ᠵᠢᠯ︶ ᠳᠤ ︽ᠰᠤᠶᠤᠯ ᠤᠨ ᠬᠤᠪᠢᠰᠬᠠᠯ︾ ᠤᠨ ᠡᠬᠢᠨ ᠤ ︽ᠲᠦᠷᠪᠡᠨ ᠬᠠᠭᠤᠴᠢᠨ ᠢ ᠡᠪᠳᠡᠬᠦ︾ ᠦᠶ᠎ᠠ ᠳᠤ ᠪᠤᠭᠳᠠ ᠠᠭᠤᠯᠠ ᠶᠢᠨ ᠤᠪᠤᠭ᠎ᠠ ᠶᠢ ᠤᠡᠭᠬᠢᠯᠠᠨ ᠠᠭᠤᠳᠠᠯᠵᠦ᠂ ᠰᠦᠰᠦᠭᠯᠡᠭᠰᠡᠨ ᠤᠯᠠᠨ ᠤ ᠡᠷᠬᠦᠵᠦ ᠱᠦᠡᠭᠰᠢᠭᠯᠡᠭᠰᠡᠨ ᠡᠳ᠋ ᠡᠷᠳᠡᠨᠢᠰ ᠤᠨ ᠵᠦᠢᠯ ᠢ ᠴᠦᠯᠪᠡᠵᠦ᠂ ᠪᠤᠭᠳᠠ ᠠᠭᠤᠯᠠ ᠶᠢᠨ ᠵᠢᠰᠠ ᠶᠢᠨ ᠮᠠᠯ ᠬᠦᠷᠦᠩᠬᠡ ᠶᠢ ᠬᠤᠷᠢᠶᠠᠮᠵᠢᠯᠠᠨ ᠠᠪᠤᠭᠰᠠᠨ ᠪᠠᠶᠢᠵᠠᠢ᠃      1978 ᠤᠨ ︵ᠰᠢᠷ᠎ᠠ ᠮᠤᠷᠢᠨ ᠵᠢᠯ︶ ᠤ 12 ᠰᠠᠷ᠎ᠠ ᠶᠢᠨ 22 ᠤᠨ ᠡᠳᠦᠷ᠂ ᠳᠤᠮᠳᠠᠳᠤ ᠤᠯᠤᠰ ᠤᠨ ᠡᠪ ᠬᠠᠮᠳᠤ ᠨᠠᠮ ᠤᠨ ᠠᠷᠪᠠᠨ ᠨᠢᠬᠡᠳᠦᠬᠡᠷ ᠬᠤᠭᠤᠴᠠᠭᠠᠨ ᠤ ᠭᠤᠷᠪᠠᠳᠤᠭᠠᠷ ᠪᠦᠬᠦᠳᠡ ᠬᠤᠷᠠᠯᠳᠤᠭᠠᠨ ᠢᠯᠡᠯᠳᠡ ᠲᠠᠢ ᠬᠤᠷᠠᠯᠳᠤᠵᠦ ᠳᠡᠬᠦᠰᠦᠭᠰᠡᠨ ᠠᠴᠠ ᠬᠤᠶᠢᠰᠢ ᠨᠠᠮ ᠤᠨ ᠦᠨᠳᠦᠰᠦᠳᠡᠨ᠂ ᠱᠠᠰᠢᠨ ᠰᠤᠷᠳᠠᠬᠤᠨ ᠤ ᠳᠤᠬᠠᠢ ᠲᠦᠷᠦ ᠶᠢᠨ ᠪᠤᠳᠤᠯᠭ᠎ᠠ ᠨᠠᠶᠢᠳᠠᠪᠤᠷᠢᠵᠢᠭᠳᠠᠵᠦ᠂ 1981 ᠤᠨ ᠤ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠳᠠᠪᠤᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠭᠤᠷᠪᠠᠨ ᠤ ᠡᠳᠦᠷ᠂ ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠤᠭᠳᠠ ᠠᠭᠤᠯᠠ ᠪᠠᠨ ᠰᠡᠷᠬᠦᠬᠡᠨ ᠳᠠᠬᠢᠵᠦ ᠡᠬᠢᠯᠡᠭᠰᠡᠨ ᠪᠠᠶᠢᠨ᠎ᠠ᠃
  
ᠢᠷᠡᠯᠲᠡ᠄ ᠬᠦᠯᠤᠨ ᠪᠤᠶᠢᠷ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
︽ᠲᠠᠪᠤᠨ ᠦᠩᠭᠡ ᠶᠢᠨ ᠬᠠᠳᠠᠭ︾ ᠤᠨ ᠮᠦᠨ ᠴᠢᠨᠠᠷ
ᠨᠡᠰᠦᠠ ᠬᠤᠳᠤᠬ ᠤᠷᠳᠤᠤᠡᠬᠠᠬᠤ ᠶᠤᠰᠦᠠ
ᠮᠤᠩᠭᠤᠯ ᠵᠠᠩ ᠦᠢᠯᠡ ᠱᠠᠰᠢᠨ ᠤ ᠰᠤᠶᠤᠯ ᠤᠨ ᠡᠷᠲᠡᠮ ᠰᠢᠨᠵᠢᠯᠡᠭᠡᠨ ᠤ ᠬᠤᠷᠠᠯ ᠬᠦᠬᠡᠬᠤᠲᠠ ᠳᠤ ᠪᠤᠯᠪᠠ
ᠴᠠᠭᠠᠨ ᠰᠠᠷ᠎ᠠ — ᠮᠤᠩᠭᠤᠯᠴᠤᠳ ᠤᠨ ᠭᠡᠷ ᠤᠨ ᠬᠦᠮᠦᠵᠢᠯ ᠤᠨ ᠤᠨᠴᠠᠭᠠᠢ ᠬᠤᠭᠤᠴᠠᠭ᠎ᠠ
ᠮᠤᠩᠭᠤᠯᠴᠤᠳ ᠤᠨ ᠭᠠᠯ ᠤᠨ ᠴᠡᠭᠡᠷ ᠶᠤᠰᠤ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号