ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠦᠬᠡ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠣᠶᠣᠯ ᠡᠷᠳᠡᠨᠢ
︽ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ︾ ᠭᠡᠮᠡᠬᠦ ᠨᠣᠮ ᠤᠨ ᠲᠤᠬᠠᠢ ᠥᠭᠦᠯᠡᠬᠦ ᠨᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2017/10/24
ᠴᠣ᠊ · ᠳᠤᠭᠠᠷᠵᠠᠪ         ︽ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ︾          ᠭᠡᠮᠡᠬᠦ   ᠨᠣᠮ   ᠤᠨ   ᠲᠤᠬᠠᠢ   ᠥᠭᠦᠯᠡᠬᠦ   ᠨᠢ         ᠨᠢᠭᠡ ᠮᠢᠩᠭ᠎ᠠ ᠲᠠᠪᠤᠨ ᠵᠠᠭᠤᠨ ᠬᠤᠷᠢᠭᠠᠳ ᠣᠨ ᠤ ᠦᠶ᠎ᠡ ᠠᠴᠠ ᠡᠬᠢᠯᠡᠨ ᠣᠷᠤᠰᠴᠤᠳ ᠦᠷᠡᠯ ᠤᠨ ᠨᠢᠷᠤᠭᠤ ᠶᠢ ᠳᠠᠪᠠᠨ ᠡᠮᠦᠨᠡᠰᠢᠯᠡᠵᠦ ᠪᠠᠷᠭᠤᠴᠤᠳ ᠤᠨ ᠨᠤᠲᠤᠭᠯᠠᠵᠤ ᠪᠠᠶᠢᠭᠰᠠᠨ ᠪᠠᠶᠢᠭᠠᠯ ᠳᠠᠯᠠᠢ᠂ ᠪᠠᠷᠭᠤᠵᠢᠨ ᠳᠥᠬᠦᠮ ᠳᠤ ᠣᠷᠤᠵᠤ ᠢᠷᠡᠭᠰᠡᠨ ᠪᠥᠭᠡᠳ ᠣᠨ ᠵᠢᠯ ᠤᠯᠠᠷᠢᠨ ᠥᠩᠭᠡᠷᠡᠬᠦ ᠶᠢ ᠳᠠᠭᠠᠯᠳᠤᠨ ᠣᠯᠠᠰᠢᠷᠠᠨ ᠨᠠᠮᠡᠭᠳᠡᠵᠦ ᠤᠤᠭᠠᠯ ᠨᠤᠲᠤᠭ ᠤᠨ ᠡᠵᠡᠳ ᠤᠨ ᠠᠵᠤ ᠠᠮᠢᠳᠤᠷᠠᠯ᠂ ᠠᠮᠤᠷ ᠲᠦᠪᠰᠢᠨ ᠳᠤ ᠠᠶᠤᠯ ᠬᠥᠨᠦᠭᠡᠯ ᠪᠣᠯᠤᠭᠰᠠᠨ ᠠᠵᠠᠢ᠃        ᠡᠶᠢᠮᠦᠷᠬᠦᠦ ᠪᠠᠶᠢᠳᠠᠯ ᠢ ᠤᠷᠢᠳ ᠠᠴᠠ ᠰᠡᠷᠡᠵᠦ ᠮᠡᠳᠡᠷᠡᠭᠰᠡᠨ ᠪᠠᠷᠭᠤᠴᠤᠳ 16 ᠳ᠋ᠤᠭᠠᠷ ᠵᠠᠭᠤᠨ ᠤ ᠰᠡᠭᠦᠯᠴᠢ ᠠᠴᠠ 17 ᠳ᠋ᠤᠭᠠᠷ ᠵᠠᠭᠤᠨ ᠤ ᠡᠬᠢ ᠪᠣᠯᠲᠠᠯᠠᠬᠢ ᠴᠠᠭ ᠡᠷᠢᠨ ᠳᠤ ᠤᠤᠭᠠᠯ ᠨᠤᠲᠤᠭ ᠪᠠᠶᠢᠭᠠᠯ ᠳᠠᠯᠠᠢ᠂ ᠪᠠᠷᠭᠤᠵᠢᠨ ᠳᠥᠬᠦᠮ ᠠᠴᠠ ᠪᠠᠨ ᠬᠠᠯᠬ᠎ᠠ ᠶᠢᠨ ᠨᠤᠲᠤᠭ ᠤᠷᠤᠭᠤ ᠨᠡᠭᠦᠵᠦ ᠣᠷᠤᠭᠰᠠᠨ ᠪᠠᠶᠢᠵᠠᠢ᠃ ᠲᠡᠦᠬᠡᠨ ᠲᠡᠮᠳᠡᠭᠯᠡᠯ ᠢ ᠠᠵᠢᠭᠯᠠᠬᠤ ᠳᠤ ᠪᠤᠷᠢᠶᠠᠳ ᠪᠠ ᠺᠠᠽᠠᠭ ᠴᠡᠷᠢᠭ ᠤᠨ ᠳᠠᠶᠢᠨ ᠭᠡᠵᠤ ᠪᠠᠶᠢᠬᠤ ᠠᠴᠠ ᠪᠢᠰᠢ ᠬᠠᠷᠢᠨ ᠪᠠᠷᠭᠤ ᠪᠣᠯᠤᠨ ᠺᠠᠽᠠᠭ ᠪᠤᠶᠤ ᠣᠷᠤᠰ ᠤᠨ ᠳᠠᠶᠢᠨ ᠭᠡᠬᠦ ᠲᠡᠮᠳᠡᠭᠯᠡᠯ ᠪᠠᠶᠢᠬᠤ ᠦᠭᠡᠢ ᠪᠠᠶᠢᠭ᠎ᠠ ᠶᠠᠪᠤᠳᠠᠯ ᠨᠢ ᠳᠠᠷᠤᠢ ᠲᠡᠦᠬᠡᠨ ᠪᠠᠷᠢᠮᠲᠠ ᠪᠣᠯᠤᠨ᠎ᠠ ᠭᠡᠵᠤ ᠪᠢ ᠦᠵᠡᠵᠦ ᠪᠠᠶᠢᠨ᠎ᠠ᠃ ᠪᠠᠷᠭᠤᠴᠤᠳ ᠪᠠᠷᠭᠤᠵᠢᠨ ᠳᠥᠬᠦᠮ ᠠᠴᠠ ᠨᠡᠭᠦᠭᠰᠡᠨ ᠤ ᠳᠠᠷᠠᠭ᠎ᠠ ᠬᠠᠮᠨᠢᠭᠠᠨᠴᠤᠳ ᠨᠡᠭᠦᠵᠦ ᠣᠴᠢᠭᠰᠠᠨ᠃ ᠣᠳᠤ  ᠶᠢᠨ ᠪᠠᠶᠢᠭ᠎ᠠ ᠢᠭᠢᠷᠢᠰ ᠤᠨ ᠪᠤᠷᠢᠶᠠᠳᠴᠤᠳ ᠪᠣᠯ 18 ᠳ᠋ᠤᠭᠠᠷ ᠵᠠᠭᠤᠨ ᠳᠤ ᠲᠡᠨᠳᠡ ᠨᠡᠭᠦᠵᠦ ᠣᠴᠢᠭᠰᠠᠨ ᠪᠢᠯᠡ᠃ ᠣᠳᠤ ᠪᠠᠷᠭᠤᠵᠢᠨ ᠳᠥᠬᠦᠮ ᠳᠤ ᠪᠠᠷᠭᠤᠵᠢᠨ ᠷᠠᠶᠤᠨ ᠪᠠ ᠬᠤᠷᠮᠤᠬᠠᠨ ᠷᠠᠶᠤᠨ ᠭᠡᠳᠡᠭ ᠬᠤᠶᠠᠷ ᠷᠠᠶᠤᠨ ᠪᠠᠶᠢᠳᠠᠭ᠃ ᠬᠤᠷᠮᠤᠬᠠᠨ ᠷᠠᠶᠤᠨ ᠳᠤᠨᠢ ᠣᠷᠤᠰ ᠴᠥᠬᠡᠨ ᠪᠤᠷᠢᠶᠠᠳ ᠣᠯᠠᠨ᠃ ᠪᠠᠷᠭᠤᠵᠢᠨ ᠷᠠᠶᠤᠨ ᠳᠤᠨᠢ ᠣᠷᠤᠰ ᠣᠯᠠᠨ ᠪᠤᠷᠢᠶᠠᠳ ᠴᠥᠭᠡᠨ ᠠᠮᠢᠳᠤᠷᠠᠵᠤ ᠪᠠᠶᠢᠨ᠎ᠠ᠃        ᠲᠡᠭᠦᠨ ᠠᠴᠠ ᠬᠤᠶᠢᠰᠢ ᠪᠠᠷᠭᠤᠴᠤᠳ ᠡᠷᠢᠨ ᠴᠠᠭ ᠤᠨ ᠤᠳᠠᠭ᠎ᠠ ᠳᠠᠷᠠᠭ᠎ᠠ ᠶᠢᠨ ᠳᠠᠶᠢᠨ ᠳᠠᠵᠢᠨ ᠠᠴᠠ ᠪᠣᠯᠵᠤ ᠬᠠᠯᠬ᠎ᠠ᠂ ᠥᠪᠥᠷ ᠮᠣᠩᠭᠤᠯ᠂ ᠣᠷᠤᠰ ᠤᠨ ᠨᠤᠲᠤᠭ ᠢᠶᠠᠷ ᠳᠥᠷᠪᠡᠵᠦ ᠳᠣᠷᠬᠢᠵᠤ ᠨᠡᠭᠦᠵᠦ ᠶᠠᠪᠤᠭᠰᠠᠨ ᠲᠦᠪᠡᠭ ᠪᠤᠳᠤᠯᠢᠶᠠᠨ ᠲᠠᠢ ᠥᠩᠭᠡᠷᠡᠯᠲᠡ ᠲᠠᠢ ᠪᠢᠯᠡ᠃ ᠢᠩᠭᠢᠭᠡᠳ ᠨᠠᠶᠢᠷᠠᠯᠲᠤ ᠲᠥᠪ ᠤᠨ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠣᠨ ︵1734︶ ᠳᠤ ᠬᠠᠯᠬ᠎ᠠ ᠶᠢᠨ ᠰᠡᠴᠡᠨ ᠬᠠᠨ ᠠᠶᠢᠮᠠᠭ ᠠᠴᠠ ᠨᠡᠭᠦᠵᠦ ᠢᠷᠡᠭᠰᠡᠨ ᠪᠠᠷᠭᠤᠴᠤᠳ ᠬᠥᠯᠥᠨ ᠪᠣᠶᠢᠷ ᠤᠨ ᠰᠢᠨ᠎ᠡ ᠪᠠᠷᠭᠤ ᠵᠡᠭᠦᠨ ᠪᠠᠷᠠᠭᠤᠨ ᠬᠤᠶᠠᠷ ᠭᠠᠷ᠂ ᠨᠠᠢᠮᠠᠨ ᠬᠤᠰᠢᠭᠤ ᠪᠣᠯᠤᠨ ᠵᠣᠬᠢᠶᠠᠨ ᠪᠠᠶᠢᠭᠤᠯᠤᠭᠳᠠᠵᠤ ᠣᠷᠱᠤᠨ ᠭᠤᠣᠯ ᠢᠶᠠᠷ ᠵᠠᠭᠠᠭᠯᠠᠨ ᠣᠷᠤᠰᠢᠨ ᠰᠠᠭᠤᠭᠰᠠᠨ ᠠᠵᠠᠢ᠃       ᠡᠳᠡᠭᠡᠷ ᠪᠠᠷᠭᠤᠴᠤᠳ ᠬᠠᠯᠬ᠎ᠠ ᠶᠢᠨ ᠨᠤᠲᠤᠭ ᠲᠤ ᠣᠷᠤᠰᠢᠨ ᠰᠠᠭᠤᠵᠤ ᠪᠠᠶᠢᠬᠤ ᠳᠠᠭᠠᠨ ᠲᠡᠳᠡᠨ ᠤ ᠰᠢᠲᠦᠵᠦ ᠪᠠᠶᠢᠭᠰᠠᠨ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ᠨᠥᠯᠥᠭᠡ ᠶᠢ ᠨᠡᠯᠢᠶᠡᠳ ᠬᠦᠯᠢᠶᠡᠨ ᠠᠪᠴᠤ ᠬᠥᠯᠥᠨ ᠪᠣᠶᠢᠷ ᠲᠤ ᠢᠷᠡᠬᠦ ᠳᠡᠭᠡᠨ 157 ᠯᠠᠮᠠ ᠲᠠᠢ ᠪᠠᠶᠢᠭᠰᠠᠨ ᠭᠡᠳᠡᠭ ᠲᠡᠦᠬᠡᠨ ᠲᠡᠮᠳᠡᠭᠯᠡᠯ ᠪᠣᠢ᠃ ᠤᠤᠯ ᠤᠨ ᠰᠢᠲᠦᠵᠦ ᠪᠠᠶᠢᠭᠰᠠᠨ ᠪᠥᠭᠡ ᠶᠢᠨ ᠱᠠᠰᠢᠨ ᠢᠶᠠᠨ ᠪᠣᠯ ᠨᠡᠯᠢᠶᠡᠳ ᠣᠷᠬᠢᠭᠰᠠᠨ ᠪᠠᠶᠢᠵᠠᠢ᠃ ᠡᠳᠡᠭᠡᠷ ᠰᠢᠨ᠎ᠡ ᠪᠠᠷᠭᠤᠴᠤᠳ ᠨᠤᠲᠤᠭᠰᠢᠨ ᠰᠠᠭᠤᠭᠰᠠᠨ ᠤ ᠪᠠᠨ ᠳᠠᠷᠠᠭ᠎ᠠ᠂ ᠠᠭᠠᠵᠢᠮ ᠢᠶᠠᠷ ᠰᠦᠮ᠎ᠡ ᠬᠡᠶᠢᠳ ᠪᠠᠷᠢᠨ ᠂ ᠯᠠᠮᠠ ᠬᠤᠸᠠᠷᠠᠭ ᠢ ᠣᠯᠠᠰᠢᠷᠠᠭᠤᠯᠵᠤ᠂ ᠠᠭᠤᠯᠠ ᠣᠪᠤᠭᠠᠨ ᠤ ᠤᠤᠯ ᠤᠨ ᠪᠥᠭᠡ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠥᠭᠡᠷᠡᠴᠢᠯᠡᠯᠲᠡ ᠬᠢᠵᠦ ᠯᠠᠮᠠ ᠵᠠᠯᠠᠨ ᠲᠦᠪᠡᠳ ᠨᠣᠮ ᠰᠤᠳᠤᠷ ᠤᠩᠰᠢᠭᠤᠯᠵᠤ ᠲᠠᠬᠢᠳᠠᠭ ᠪᠣᠯᠵᠠᠢ᠃       ᠰᠢᠨ᠎ᠡ ᠪᠠᠷᠭᠤᠴᠤᠳ ᠤᠨ ᠠᠩᠬᠠᠨ ᠤ ᠪᠠᠶᠢᠭᠤᠯᠤᠭᠰᠠᠨ ᠰᠦᠮ᠎ᠡ ᠪᠣᠯ ᠰᠢᠨ᠎ᠡ ᠪᠠᠷᠭᠤ ᠨᠠᠢᠮᠠᠨ ᠬᠤᠰᠢᠭᠤᠨ ᠤ ᠰᠦᠮ᠎ᠡ — ᠭᠠᠨᠵᠤᠤᠷ ᠰᠦᠮ᠎ᠡ ︵ᠥᠯᠵᠠᠢ ᠡᠩᠬᠡᠵᠢᠭᠦᠯᠦᠭᠴᠢ ᠰᠦᠮ᠎ᠡ︶ ᠪᠥᠭᠡᠳ ᠲᠤᠰ ᠰᠦᠮ᠎ᠡ ᠶᠢ ᠲᠡᠭᠷᠢ ᠲᠡᠳᠬᠦᠭᠴᠢ ᠶᠢᠨ ᠳᠦᠴᠢᠨ ᠶᠢᠰᠦᠨ ᠣᠨ ︵1784︶ ᠳᠤ ᠣᠳᠤ ᠶᠢᠨ ᠰᠢᠨ᠎ᠡ ᠪᠠᠷᠭᠤ ᠵᠡᠭᠦᠨ ᠬᠤᠰᠢᠭᠤᠨ ᠤ ᠠᠮᠤᠭᠤᠯᠠᠩ ᠪᠤᠯᠠᠭ ᠰᠤᠮᠤᠨ ᠤ ᠨᠤᠲᠤᠭ ᠪᠣᠯᠬᠤ ᠪᠤᠶᠠᠨᠲᠤ ᠪᠥᠷᠢᠳᠦ ᠬᠡᠮᠡᠬᠦ ᠭᠠᠵᠠᠷ ᠲᠤ ᠪᠠᠶᠢᠭᠤᠯᠵᠠᠢ᠃ ᠰᠢᠨ᠎ᠡ ᠪᠠᠷᠭᠤᠴᠤᠳ ᠤᠨ ᠬᠥᠯᠥᠨ ᠪᠣᠶᠢᠷ ᠲᠤ ᠣᠷᠤᠰᠢᠨ ᠲᠣᠭᠲᠠᠨᠢᠭᠰᠠᠨ 278 ᠵᠢᠯ ᠤᠨ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ᠲᠡᠦᠬᠡ  ᠶᠢ ᠰᠣᠨᠢᠭᠤᠴᠢᠯᠠᠨ ᠠᠵᠢᠭᠯᠠᠭᠠᠳ ᠰᠦᠮ᠎ᠡ ᠬᠡᠶᠢᠳ᠂ ᠠᠭᠤᠯᠠ ᠣᠪᠤᠭ᠎ᠠ᠂ ᠭᠡᠷ ᠡᠷᠦᠬᠡ ᠳᠤ ᠳᠡᠯᠭᠡᠷᠡᠭᠰᠡᠨ ᠱᠠᠰᠢᠨ  ᠤ ᠠᠵᠢᠯᠯᠠᠭ᠎ᠠ ᠶᠢᠨ ᠳᠣᠲᠤᠷ᠎ᠠ ᠰᠢᠨ᠎ᠡ ᠪᠠᠷᠭᠤᠴᠤᠳ ᠤᠨ ᠥᠪᠡᠷ ᠤᠨ ᠢᠮ ᠲᠠᠮᠠᠭ᠎ᠠ ᠲᠠᠢ ᠦᠢᠯᠡ ᠶᠠᠪᠤᠳᠠᠯ ᠶᠠᠭᠤ ᠪᠠᠶᠢᠳᠠᠭ ᠪᠢᠯᠡ︖ ᠭᠡᠰᠡᠨ ᠪᠣᠳᠤᠯ ᠨᠠᠳᠠ ᠳᠤ ᠠᠶᠠᠨᠳᠠᠭᠠᠨ ᠪᠣᠢ ᠪᠣᠯᠤᠭᠰᠠᠨ ᠶᠤᠮ᠃      ᠢᠩᠭᠢᠭᠡᠳ ᠪᠢ ᠰᠢᠨ᠎ᠡ ᠪᠠᠷᠭᠤᠴᠤᠳ ᠤᠨ ᠱᠠᠰᠢᠨ ᠤ ᠵᠠᠩ ᠦᠢᠯᠡ ᠶᠢᠨ ᠲᠤᠬᠠᠢ ᠣᠶᠢᠯᠠᠭᠠᠵᠤ ᠠᠪᠬᠤ ᠪᠠᠷ ᠲᠡᠦᠬᠡ ᠲᠡᠮᠳᠡᠭᠯᠡᠯ ᠢ ᠰᠡᠭᠦᠵᠦ ᠦᠵᠡᠬᠦ᠂ ᠨᠠᠰᠤᠲᠠᠨ ᠲᠣᠮᠤᠭᠠᠲᠠᠨ ᠠᠴᠠ ᠠᠰᠠᠭᠤᠨ ᠰᠤᠷᠠᠬᠤ᠂ ᠱᠠᠰᠢᠨ ᠤ ᠪᠣᠳᠠᠲᠤ ᠠᠵᠢᠯᠯᠠᠭ᠎ᠠ ᠳᠤ ᠣᠷᠤᠯᠴᠠᠬᠤ ᠵᠡᠷᠭᠡ ᠠᠷᠭ᠎ᠠ ᠪᠠᠷᠢᠯ ᠢ ᠬᠡᠷᠡᠭᠯᠡᠭᠡᠳ ᠣᠳᠤ ᠬᠦᠷᠲᠡᠯ᠎ᠡ ᠣᠶᠢᠯᠠᠭᠠᠭᠰᠠᠨ ᠵᠦᠢᠯ ᠪᠣᠯ ᠳᠠᠷᠤᠢ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ᠂ ᠮᠣᠭᠠᠶᠢᠲᠤ ᠶᠢᠨ ᠪᠣᠭᠳᠠ ᠠᠭᠤᠯᠠ᠂ ᠳᠠᠭ᠎ᠠ ᠶᠢᠨ ᠳᠡᠯ ᠠᠭᠤᠯᠠ ︵ᠶᠡᠭᠡ ᠠᠭᠤᠯᠠ︶ ᠵᠡᠷᠭᠡ ᠭᠤᠷᠪᠡᠨ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠪᠣᠯ ᠰᠢᠨ᠎ᠡ ᠪᠠᠷᠭᠤᠴᠤᠳ ᠤᠨ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ᠵᠠᠩ ᠦᠢᠯᠡ ᠳᠤ ᠨᠡᠮᠡᠷᠢᠯᠡᠭᠰᠡᠨ ᠥᠪᠡᠷ ᠤᠨ ᠬᠢᠨᠢ ᠪᠦᠲᠦᠭᠡᠯ ᠭᠡᠳᠡᠭ ᠢ ᠣᠯᠵᠤ ᠮᠡᠳᠡᠭᠰᠡᠨ ᠶᠤᠮ᠃     ᠡᠨᠡᠬᠦ ᠪᠣᠳᠠᠲᠤ ᠦᠨᠡᠨ ᠢ ᠮᠡᠳᠡᠭᠰᠡᠨ ᠤ ᠪᠠᠨ ᠳᠠᠷᠠᠭ᠎ᠠ᠂ 2008 ᠣᠨ ᠳᠤ ᠷᠠᠰᠢᠶᠠᠨ ᠰᠦᠮ᠎ᠡ ᠶᠢᠨ ᠪᠣ᠊ · ᠡᠷᠳᠡᠨᠢ ᠯᠠᠮᠠ ᠠᠴᠠ ᠡᠨᠡᠬᠦ ᠭᠤᠷᠪᠠᠨ ᠰᠤᠳᠤᠷ ᠤᠨ ᠲᠦᠪᠡᠳ ᠬᠡᠪᠯᠡᠯ ᠢ ᠣᠯᠵᠤ ᠠᠪᠤᠭᠠᠳ ᠲᠤᠰ ᠵᠢᠯ ᠳᠡᠭᠡᠨ ᠠᠷᠤ ᠬᠤᠷᠴᠢᠨ ᠤ ᠳᠣᠩᠷᠤᠪᠵᠠᠮᠰᠤ ᠳᠤ ᠥᠭᠴᠦ ᠮᠣᠩᠭᠤᠯ ᠢᠶᠠᠷ ᠣᠷᠴᠢᠭᠤᠯᠤᠭᠤᠯᠤᠨ᠂ 2009 ᠣᠨ ᠳᠤ ᠬᠥᠯᠥᠨ ᠪᠣᠶᠢᠷ ᠤᠨ ᠡᠳᠦᠷ ᠤᠨ ᠰᠣᠨᠢᠨ ᠤ ᠬᠤᠷᠢᠶᠠᠨ ᠤ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠳᠤ ᠥᠭᠴᠦ ᠬᠡᠪᠯᠡᠭᠦᠯᠦᠭᠡᠳ 2010 ᠣᠨ  ᠳᠤ ᠤᠩᠰᠢᠭᠴᠢᠳ ᠲᠠᠢ ᠵᠣᠯᠭᠠᠭᠤᠯᠤᠭᠰᠠᠨ ᠶᠤᠮ᠃     ᠢᠩᠭᠢᠵᠦ ᠬᠢᠭᠰᠡᠨ ᠮᠢᠨᠦ ᠪᠣᠳᠤᠯ ᠪᠣᠯ᠄     ⒈ ᠡᠨᠡᠬᠦ ᠭᠤᠷᠪᠠᠨ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠪᠣᠯ ᠰᠢᠨ᠎ᠡ ᠪᠠᠷᠭᠤᠴᠤᠳ ᠤᠨ ᠱᠠᠰᠢᠨ ᠤ ᠵᠠᠩ ᠦᠢᠯᠡ ᠳᠤ ᠣᠷᠤᠭᠤᠯᠤᠭᠰᠠᠨ ᠥᠪᠡᠷ ᠤᠨ ᠬᠢᠨᠢ ᠬᠤᠪᠢ ᠨᠡᠮᠡᠷᠢ ᠮᠥᠨ ᠭᠡᠳᠡᠭ ᠢ ᠦᠨᠡᠯᠡᠬᠦ︔     ⒉ ᠤᠷᠠᠳ᠂ ᠣᠷᠳᠤᠰ ᠲᠤ ᠰᠦᠮ᠎ᠡ ᠶᠢᠨ ᠬᠤᠷᠠᠯ ᠪᠠ ᠠᠭᠤᠯᠠ ᠣᠪᠤᠭᠠᠨ ᠤ ᠲᠠᠬᠢᠯᠭ᠎ᠠ ᠪᠠᠨ ᠮᠣᠩᠭᠤᠯ  ᠢᠶᠠᠷ ᠤᠩᠰᠢᠳᠠᠭ᠃ ᠰᠢᠨ᠎ᠡ ᠪᠠᠷᠭᠤᠴᠤᠳ ᠬᠤᠶᠢᠰᠢᠳᠠ ᠮᠣᠩᠭᠤᠯ ᠢᠶᠠᠷ ᠤᠩᠰᠢᠳᠠᠭ ᠪᠣᠯᠬᠤ ᠰᠡᠨ ᠪᠣᠯ ᠤᠤ ᠭᠡᠰᠡᠨ ᠰᠠᠨᠠᠭ᠎ᠠ︔     ⒊ ᠥᠷᠭᠡᠨ ᠣᠯᠠᠨ ᠰᠢᠲᠦᠭᠴᠢᠳ ᠲᠠᠬᠢᠯᠭ᠎ᠠ ᠶᠢᠨ ᠲᠦᠪᠡᠳ ᠤᠩᠰᠢᠯᠭ᠎ᠠ ᠶᠢ ᠮᠡᠯᠡᠷᠡᠨ ᠰᠣᠨᠣᠰᠴᠤ᠂ ᠮᠡᠨᠡᠷᠡᠨ ᠰᠠᠭᠤᠭᠰᠠᠨ ᠠᠴᠠ ᠤᠳᠬ᠎ᠠ ᠶᠢ ᠨᠢ ᠮᠡᠳᠡᠪᠡᠯ ᠶᠠᠮᠠᠷ ᠰᠢᠲᠦᠭᠡᠨ ᠢ ᠶᠠᠭᠠᠬᠢᠵᠤ ᠲᠠᠬᠢᠵᠤ ᠪᠠᠶᠢᠭ᠎ᠠ ᠪᠠᠨ ᠮᠡᠳᠡᠬᠦ ᠰᠡᠨ ᠪᠣᠯᠪᠠᠤ᠃ ᠡᠶᠢᠮᠦ ᠯᠡ ᠪᠣᠳᠤᠯ ᠠᠴᠠ ᠪᠣᠯᠤᠭᠰᠠᠨ ᠶᠤᠮ᠃    ᠶᠡᠷᠦ ᠨᠢ ᠣᠳᠤ ᠪᠣᠯᠲᠠᠯ᠎ᠠ ᠡᠨᠡ ᠭᠤᠷᠪᠠᠨ ᠠᠭᠤᠯᠠᠨ ᠠᠴᠠ ᠪᠤᠰᠤᠳ ᠠᠭᠤᠯᠠ᠂ ᠣᠪᠤᠭ᠎ᠠ ᠶᠢ ᠲᠠᠬᠢᠬᠤ ᠳᠠᠭᠠᠨ ᠨᠠᠮᠰᠠᠷᠠᠢ ᠪᠤᠶᠤ ᠯᠾᠠᠮᠤ ᠵᠡᠷᠭᠡ ᠪᠤᠷᠬᠠᠨ ᠤ ᠪᠡᠯᠡᠨ ᠪᠠᠶᠢᠭ᠎ᠠ ᠲᠦᠪᠡᠳ ᠰᠤᠳᠤᠷ ᠢ ᠤᠩᠰᠢᠵᠤ ᠲᠠᠬᠢᠭᠰᠠᠭᠠᠷ ᠢᠷᠡᠭᠰᠡᠨ ᠪᠢᠯᠡ᠃    ᠪᠢ ᠳᠣᠣᠷ᠎ᠠ ︽ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ︾ ᠬᠡᠮᠡᠬᠦ ᠨᠣᠮ ᠢᠶᠠᠷ ᠰᠦᠪᠡᠭᠴᠢ ᠪᠣᠯᠭᠠᠵᠤ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ᠂ ᠮᠣᠭᠠᠶᠢᠲᠤ ᠶᠢᠨ ᠪᠣᠭᠳᠠ ᠠᠭᠤᠯᠠ᠂ ᠳᠠᠭ᠎ᠠ ᠶᠢᠨ ᠳᠡᠯ ᠠᠭᠤᠯᠠ ︵ᠶᠡᠭᠡ ᠠᠭᠤᠯᠠ︶ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠤᠨ ᠲᠤᠬᠠᠢ ᠮᠡᠭᠦᠰ ᠮᠢᠨᠦ ᠠᠵᠢᠭᠯᠠᠯᠲᠠ ᠪᠠᠨ ᠦᠨᠳᠦᠰᠦᠯᠡᠵᠦ᠂ ᠱᠦᠭᠦᠷᠡᠭᠡᠢ ᠥᠭᠦᠯᠡᠯ ᠢᠶᠠᠨ ᠳᠡᠪᠰᠢᠭᠦᠯᠰᠦᠭᠡᠢ᠃    ᠨᠢᠭᠡ᠂ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠲᠤᠬᠠᠢ ᠥᠭᠦᠯᠡᠬᠦ ᠨᠢ᠄    ︵ᠨᠢᠭᠡ︶ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ ᠵᠣᠬᠢᠶᠠᠭᠰᠠᠨ ᠴᠠᠭ ᠦᠶ᠎ᠡ     ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠲᠤ ︽᠁ ᠬᠠᠷ᠎ᠠ ᠯᠤᠤ ᠵᠢᠯ ᠤᠨ ᠨᠠᠮᠤᠷ ᠤᠨ ᠳᠤᠮᠳᠠ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠲᠠᠪᠤᠨ ᠳᠤ ᠨᠠᠶᠢᠷᠠᠭᠤᠯᠪᠠᠢ︾ ᠭᠡᠵᠤ ᠪᠢᠴᠢᠵᠦ ᠪᠠᠶᠢᠨ᠎ᠠ᠃ ᠲᠡᠭᠡᠪᠡᠯ ᠲᠤᠬᠠᠢ ᠶᠢᠨ ᠴᠠᠭ ᠦᠶ᠎ᠡ ᠲᠠᠢ ᠬᠤᠯᠪᠤᠭᠳᠠᠬᠤ ᠬᠠᠷ᠎ᠠ ᠯᠤᠤ ᠵᠢᠯ ᠨᠢ ᠠᠯᠢ ᠵᠢᠯ ᠪᠣᠯᠬᠤ ᠪᠣᠢ︖ ᠭᠡᠳᠡᠭ ᠠᠰᠠᠭᠤᠳᠠᠯ ᠭᠠᠷᠤᠨ᠎ᠠ᠃  ᠷ᠊ · ᠰᠧᠪᠵᠢᠩᠭᠡ ᠶᠢᠨ ︽ᠰᠢᠨ᠎ᠡ ᠪᠠᠷᠭᠤ ᠪᠠᠷᠠᠭᠤᠨ ᠭᠠᠷᠤᠨ ᠡᠬᠢᠨ ᠤ ᠦᠶ᠎ᠡ ᠶᠢᠨ ᠨᠤᠲᠤᠭᠯᠠᠯ ᠤᠨ ᠪᠠᠶᠢᠳᠠᠯ ᠬᠢᠭᠡᠳ ᠲᠡᠭᠦᠨ ᠤ ᠪᠠᠭᠤᠷᠢ ᠶᠢᠨ ᠲᠤᠬᠠᠢ︾ ᠬᠡᠮᠡᠬᠦ ᠥᠭᠦᠯᠡᠯ ᠳᠤ ︽ᠨᠤᠲᠤᠭ ᠤᠨ ᠭᠤᠣᠯ ᠳᠤ ᠰᠦᠨᠳᠡᠷᠯᠡᠭᠰᠡᠨ ᠪᠣᠭᠳᠠ ᠠᠭᠤᠯᠠ ᠶᠢ ᠠᠩᠬ᠎ᠠ ᠳᠡᠭᠡᠷ᠎ᠡ ᠦᠶ᠎ᠡ ᠳᠤ ︿ᠬᠦᠢᠲᠡᠨ ᠬᠠᠷᠠᠭᠠᠲᠤ﹀ ᠭᠡᠵᠤ ᠪᠠᠶᠢᠭᠰᠠᠨ ᠢ ︿ᠳᠤᠯᠠᠭᠠᠨ ᠬᠠᠷᠠᠭᠠᠲᠤ﹀ ᠬᠡᠮᠡᠨ ᠥᠭᠡᠷᠡᠴᠢᠯᠡᠨ ᠨᠡᠷᠡᠶᠢᠳᠴᠦ᠂ ᠲᠡᠭᠷᠢ ᠲᠡᠳᠬᠦᠭᠴᠢ ᠶᠢᠨ ᠲᠠᠪᠤᠳᠤᠭᠠᠷ ︵1740︶ ᠣᠨ ᠳᠤ ᠰᠢᠨ᠎ᠡ ᠪᠠᠷᠭᠤ ᠪᠠᠷᠠᠭᠤᠨ ᠭᠠᠷᠤᠨ ᠳᠥᠷᠪᠡᠨ ᠬᠤᠰᠢᠭᠤ᠂ ᠠᠷᠪᠠᠨ ᠬᠤᠶᠠᠷ ᠰᠤᠮᠤ ᠪᠠᠷ ᠢᠶᠠᠨ ᠭᠤᠣᠯ ᠣᠪᠤᠭᠠᠨ ᠠᠴᠠ ᠭᠠᠳᠠᠨ᠎ᠠ ᠠᠷᠪᠠᠨ ᠬᠤᠶᠠᠷ ᠰᠤᠮᠤ ᠪᠦᠷᠢ ᠨᠢᠵᠡᠭᠡᠳ ᠣᠪᠤᠭ᠎ᠠ ᠪᠣᠰᠬᠠᠵᠤ ᠲᠠᠬᠢᠵᠠᠢ᠃ ᠬᠤᠵᠢᠮ ᠨᠢ ᠨᠡᠶᠢᠲᠡ ᠶᠢᠨ ᠣᠨ ᠲᠣᠭᠠᠯᠠᠯ ᠤᠨ 1850 ᠊ᠭᠠᠳ ᠣᠨ ᠠᠴᠠ ᠡᠬᠢᠯᠡᠨ ᠵᠢᠯ ᠪᠦᠷᠢ ᠶᠢᠨ ᠳᠣᠯᠤᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠭᠤᠷᠪᠠᠨ ᠤ ᠡᠳᠦᠷ ᠰᠢᠨ᠎ᠡ ᠪᠠᠷᠭᠤ ᠪᠠᠷᠠᠭᠤᠨ᠂ ᠵᠡᠭᠦᠨ ᠬᠤᠶᠠᠷ ᠭᠠᠷ ᠢᠶᠠᠷ ᠢᠶᠠᠨ ᠲᠠᠬᠢᠬᠤ ᠪᠣᠯᠵᠤ᠂ ᠲᠡᠭᠦᠨ ᠢᠶᠠᠨ ᠪᠠᠰᠠ ᠪᠣᠭᠳᠠ ᠠᠭᠤᠯᠠ ᠶᠢᠨ ︿ᠡᠪ  ᠤᠨ ᠨᠠᠶᠢᠷ﹀ ᠴᠦ ᠭᠡᠳᠡᠭ ᠪᠢᠯᠡ︾ ᠭᠡᠵᠤ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠳᠠᠭ᠃ ᠡᠨᠡ ᠬᠤᠶᠠᠷ ᠲᠠᠮᠳᠡᠭᠯᠡᠯ ᠢ ᠬᠠᠷᠢᠴᠠᠭᠤᠯᠤᠨ ᠦᠵᠡᠬᠦ ᠳᠤ ᠬᠤᠯᠪᠤᠭᠳᠠᠬᠤ ᠬᠠᠷ᠎ᠠ ᠯᠤᠤ ᠵᠢᠯ ᠪᠣᠯ — 1772 ᠣᠨ ᠤ ᠬᠠᠷ᠎ᠠ ᠯᠤᠤ ᠵᠢᠯ ᠪᠠ 1832 ᠣᠨ ᠤ ᠬᠠᠷ᠎ᠠ ᠯᠤᠤ ᠵᠢᠯ ᠤᠨ ᠨᠢᠭᠡ ᠨᠢ ᠪᠠᠶᠢᠬᠤ ᠶᠣᠰᠤᠲᠠᠢ᠃ ᠡᠷᠭᠢᠴᠡᠭᠦᠯᠵᠦ ᠪᠣᠳᠤᠪᠠᠯ᠂ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ  ᠨᠢ 1740 ᠣᠨ ᠳᠤ ᠨᠢᠭᠡ ᠭᠠᠷᠤᠨ ︽ᠪᠠᠭ᠎ᠠ︾ ᠲᠠᠬᠢᠯᠭ᠎ᠠ ᠪᠠᠶᠢᠭᠰᠠᠨ ᠠᠴᠠ ᠪᠠᠨ 1850 ᠣᠨ ᠳᠤ ᠬᠤᠶᠠᠷ ᠭᠠᠷ ᠤᠨ ᠳᠦᠷᠢᠮᠵᠢᠭᠰᠡᠨ ︽ᠶᠡᠭᠡ︾ ᠲᠠᠬᠢᠯᠭ᠎ᠠ ᠪᠣᠯᠤᠨ ᠥᠷᠭᠡᠵᠢᠭᠰᠡᠨ ᠪᠠᠶᠢᠨ᠎ᠠ᠃ ᠥᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ ᠪᠥᠭᠡ  ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠤᠳᠤᠮᠰᠢᠯᠲᠤ ᠲᠠᠬᠢᠯᠭ᠎ᠠ ᠠᠴᠠ ᠪᠠᠨ ᠰᠣᠶᠤᠯᠵᠢᠭᠰᠠᠨ᠂ ᠳᠦᠷᠢᠮᠵᠢᠭᠰᠡᠨ᠂ ᠪᠦᠬᠦᠶᠢᠯᠡ ᠰᠢᠨ᠎ᠡ ᠪᠠᠷᠭᠤᠴᠤᠳ ᠢ ᠬᠠᠮᠤᠷᠤᠭᠰᠠᠨ ᠲᠣᠮᠤ ᠰᠢᠲᠦᠭᠡᠨ ᠤ ᠲᠠᠬᠢᠯᠭ᠎ᠠ ᠪᠣᠯᠤᠭᠰᠠᠨ ᠪᠣᠯᠬᠤᠷ ᠲᠠᠬᠢᠯᠭ᠎ᠠ ᠶᠢᠨ ᠲᠤᠰᠬᠠᠢ ᠰᠤᠳᠤᠷ ᠲᠠᠢ ᠪᠣᠯᠬᠤ ᠱᠠᠭᠠᠷᠳᠠᠯᠭ᠎ᠠ ᠪᠣᠢ ᠪᠣᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠲᠡᠭᠡᠭᠦᠯᠡᠷ ᠡᠨᠡ ᠴᠠᠭ ᠦᠶ᠎ᠡ ᠪᠣᠯ 1772 ᠣᠨ  ᠤ ᠬᠠᠷ᠎ᠠ ᠯᠤᠤ ᠵᠢᠯ ᠪᠢᠰᠢ᠂ ᠬᠠᠷᠢᠨ 1832 ᠣᠨ ᠤ ᠬᠠᠷ᠎ᠠ ᠯᠤᠤ ᠵᠢᠯ ᠪᠠᠶᠢᠬᠤ ᠶᠣᠰᠤᠲᠠᠢ ᠭᠡᠵᠤ ᠪᠢ ᠦᠵᠡᠵᠦ ᠪᠠᠶᠢᠨ᠎ᠠ᠃ ᠥᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠦᠪᠡᠳ ᠤᠩᠰᠢᠯᠭ᠎ᠠ ᠶᠢᠨ ᠰᠤᠳᠤᠷ 1832 ᠣᠨ ᠳᠤ ᠵᠣᠬᠢᠶᠠᠭᠳᠠᠵᠤ᠂ ᠬᠤᠶᠠᠷ ᠭᠠᠷ ᠢᠶᠠᠷ ᠢᠶᠠᠨ ᠲᠠᠬᠢᠳᠠᠭ ᠪᠣᠯᠤᠭᠰᠠᠨ ᠠᠴᠠ ᠪᠠᠷᠠᠭᠤᠨ ᠭᠠᠷ ᠪᠢᠯᠢᠭ ᠤᠨ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠭᠤᠷᠪᠠᠨ ᠤ ᠡᠳᠦᠷ᠂ ᠪᠠᠷᠠᠭᠤᠨ᠂ ᠵᠡᠭᠦᠨ ᠭᠠᠷ ᠨᠡᠶᠢᠯᠡᠭᠡᠳ ᠳᠤᠯᠤᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠭᠤᠷᠪᠠᠨ ᠤ ᠡᠳᠦᠷ ᠲᠠᠬᠢᠳᠠᠭ ᠪᠣᠯᠤᠭᠰᠠᠨ ᠪᠠᠶᠢᠨ᠎ᠠ᠃ 1832 ᠣᠨ ᠳᠤ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠲᠦᠪᠡᠳ ᠰᠤᠳᠤᠷ ᠭᠠᠷᠬᠤ ᠠᠴᠠ ᠡᠮᠦᠨ᠎ᠡ ᠰᠢᠨ᠎ᠡ ᠪᠠᠷᠭᠤᠴᠤᠳ ᠪᠥᠭᠡ ᠶᠢᠨ ᠱᠠᠰᠢᠨ  ᠤ ᠤᠳᠤᠮᠰᠢᠯ ᠢᠶᠠᠷ ᠢᠶᠠᠨ ᠪᠣᠭᠳᠠ ᠠᠭᠤᠯᠠ ᠪᠠᠨ ᠲᠠᠬᠢᠳᠠᠭ ᠪᠠᠶᠢᠵᠤ᠂ 1832 ᠣᠨ ᠠᠴᠠ ᠬᠤᠶᠢᠰᠢ ᠰᠠᠶ᠋ᠢ ᠲᠠᠬᠢᠯᠭ᠎ᠠ ᠶᠢᠨ ᠲᠦᠪᠡᠳ ᠰᠤᠳᠤᠷ ᠢ ᠤᠩᠰᠢᠭᠤᠯᠵᠤ ᠲᠠᠬᠢᠭᠰᠠᠭᠠᠷ ᠢᠷᠡᠵᠡᠢ ᠭᠡᠳᠡᠭ ᠢ ᠡᠳᠡᠭᠡᠷ ᠲᠡᠦᠬᠡᠨ ᠲᠡᠮᠳᠡᠭᠯᠡᠯ  ᠠᠴᠠ ᠣᠶᠢᠯᠠᠭᠠᠵᠤ ᠪᠣᠯᠤᠨ᠎ᠠ᠃       ︵ᠬᠤᠶᠠᠷ︶ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ ᠵᠣᠬᠢᠶᠠᠭᠰᠠᠨ ᠬᠥᠮᠥᠨ       ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠲᠤ ︽᠁ ᠤᠮᠠᠷ᠎ᠠ ᠵᠦᠭ ᠤᠨ ᠶᠡᠭᠡ ᠮᠣᠩᠭᠤᠯ ᠣᠷᠤᠨ ᠤ ᠪᠤᠷᠬᠠᠨ ᠱᠠᠰᠢᠨ ᠳᠡᠭᠡᠳᠦ ᠨᠣᠮ ᠶᠡᠭᠡ ᠪᠠᠷ ᠳᠡᠯᠭᠡᠷᠡᠭᠰᠡᠨ ᠠᠭᠤᠤ ᠠᠭᠤᠳᠠᠮ ᠣᠷᠤᠨ ᠪᠣᠯᠬᠤ ᠬᠥᠯᠥᠨ ᠪᠣᠶᠢᠷ ᠤᠨ ᠣᠷᠤᠨ ᠤ ᠲᠡᠭᠷᠢ ᠭᠠᠵᠠᠷ ᠤᠨ ᠡᠵᠡᠳ ᠲᠤ ᠪᠠ ᠶᠡᠷᠦ ᠬᠢᠭᠡᠳ ᠢᠯᠠᠩᠭᠤᠶ᠎ᠠ ᠪᠠᠶᠠᠨᠮᠦ᠋ᠩᠭᠡ ᠠᠭᠤᠯᠠ ᠶᠢᠨ ᠰᠠᠪᠳᠠᠭ ᠲᠤ ᠲᠠᠬᠢᠯ ᠪᠠᠯᠢᠩ ᠡᠷᠭᠦᠬᠦ ᠶᠣᠰᠤ ᠶᠡᠭᠡ ᠠᠮᠤᠭᠤᠯᠠᠩ ᠤᠨ ᠬᠤᠷ᠎ᠠ ᠶᠢ ᠪᠠᠭᠤᠯᠭᠠᠭᠴᠢ ᠭᠡᠳᠡᠭ ᠡᠭᠦᠨ ᠢ ᠪᠤᠶᠠᠨ ᠤ ᠶᠠᠪᠤᠳᠠᠯ ᠳᠤ ᠬᠠᠭᠠᠰ ᠦᠭᠡᠢ ᠢᠳᠡ ᠬᠦᠴᠦᠨ ᠲᠡᠭᠦᠯᠳᠡᠷ᠂ ᠨᠢᠭᠤᠴᠠ ᠲᠠᠷᠨᠢ ᠶᠢᠨ ᠳᠡᠪᠢᠰᠬᠡᠷ ᠲᠤᠷ ᠰᠡᠳᠬᠢᠯ ᠤᠨ ᠳᠣᠷᠪᠢ ᠳᠣᠣᠷ᠎ᠠ ᠪᠤᠰᠤ ᠳᠡᠮᠴᠢ ᠭᠡᠯᠦᠩ ᠰᠢᠷᠠᠪ ᠢᠶᠠᠷ ᠶᠡᠭᠡ ᠰᠢᠮᠳᠠᠯ ᠢᠶᠠᠷ ᠳᠠᠬᠢᠨ ᠳᠠᠬᠢᠨ ᠳᠤᠷᠠᠳᠬᠠᠭᠰᠠᠨ ᠮᠡᠲᠦ᠃ ᠳᠡᠭᠡᠳᠦ ᠪᠠᠭᠰᠢ ᠶᠢᠨ ᠵᠠᠷᠯᠢᠭ ᠡᠰᠢ ᠪᠠᠷ ᠡᠷᠳᠡᠨᠢ ᠪᠠᠨᠳᠢᠳᠠ ᠶᠢᠨ ᠴᠣᠯᠠ ᠬᠠᠮᠠᠭᠠᠯᠠᠭᠰᠠᠨ ᠶᠡᠭᠡ ᠲᠥᠷᠥᠯᠬᠢᠲᠡᠨ ᠫᠤᠩᠴᠤᠭᠨᠠᠮᠵᠢᠯ ᠢᠶᠠᠷ ᠁ ᠨᠠᠶᠢᠷᠠᠭᠤᠯᠪᠠᠢ᠃ ᠡᠭᠦᠨ ᠢ ᠪᠢᠴᠢᠭᠯᠡᠭᠰᠡᠨ ᠨᠢ ᠤᠬᠠᠭᠠᠨ ᠤ ᠣᠷᠤᠨ᠎ᠠ ᠣᠶᠤᠨ ᠤ ᠨᠢᠳᠦ ᠨᠢ ᠠᠭᠤᠳᠠᠮ ᠭᠡᠯᠦᠩ ᠯᠤᠪᠰᠠᠩᠴᠣᠶᠢᠴᠤᠭ ᠪᠤᠯᠠᠢ︾ ᠭᠡᠵᠤ ᠪᠢᠴᠢᠵᠡᠢ᠃      ᠦᠴᠦᠬᠡᠨ ᠮᠢᠨᠦ ᠪᠢᠳᠠᠭᠤ ᠣᠶᠤᠨ ᠳᠠᠭᠠᠨ ᠲᠣᠩᠭᠠᠵᠤ ᠦᠵᠡᠬᠦ ᠪᠠᠷ᠄ ᠠᠳᠡ ᠳᠤᠷᠠᠳᠤᠭᠳᠠᠵᠤ ᠪᠠᠶᠢᠭ᠎ᠠ ᠭᠤᠷᠪᠠᠨ ᠬᠥᠮᠥᠨ — ᠡᠰᠢ᠂ ᠫᠤᠩᠴᠤᠭᠨᠠᠮᠵᠢᠯ᠂ ᠯᠤᠪᠰᠠᠩᠴᠣᠶᠢᠴᠤᠭ ᠴᠣᠬᠤᠮ ᠶᠠᠮᠠᠷ ᠡᠭᠦᠷᠭᠡ ᠭᠦᠢᠴᠡᠳᠬᠡᠭᠰᠡᠨ  ᠢ ᠠᠩᠬᠠᠷᠬᠤ ᠴᠢᠬᠤᠯᠠ ᠲᠠᠢ ᠪᠠᠶᠢᠨ᠎ᠠ᠃ ᠳᠡᠮᠴᠢ ᠭᠡᠯᠦᠩ ᠡᠰᠢ ᠪᠣᠯ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ ᠵᠣᠬᠢᠶᠠᠯᠭᠠᠬᠤ ᠪᠠᠷ ᠳᠤᠷᠠᠳᠤᠭᠰᠠᠨ ᠬᠥᠮᠥᠨ ᠪᠠᠶᠢᠵᠤ ᠮᠡᠳᠡᠨ᠎ᠡ᠃ ᠥᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ ᠵᠣᠬᠢᠶᠠᠯᠭᠠᠬᠤ ᠡᠭᠦᠷᠭᠡ ᠶᠢ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠰᠢᠨ᠎ᠡ ᠪᠠᠷᠭᠤᠴᠤᠳ ᠤᠨ ᠲᠥᠯᠥᠭᠡᠯᠡᠭᠴᠢ ᠴᠦ ᠪᠠᠶᠢᠵᠤ ᠮᠡᠳᠡᠨ᠎ᠡ᠃ ᠫᠤᠩᠴᠤᠭᠨᠠᠮᠵᠢᠯ ᠪᠣᠯ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ ᠵᠣᠬᠢᠶᠠᠭᠰᠠᠨ ᠬᠥᠮᠥᠨ ᠭᠡᠵᠤ ᠪᠢ ᠦᠵᠡᠵᠦ ᠪᠠᠶᠢᠨ᠎ᠠ᠃ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ ᠵᠠᠪᠠᠯ ᠱᠠᠰᠢᠨ ᠤ ᠳᠡᠭᠡᠲᠦ ᠬᠡᠷᠬᠡᠮᠲᠡᠨ ᠯᠡ ᠵᠣᠬᠢᠶᠠᠬᠤ ᠶᠣᠰᠤᠲᠠᠢ ᠪᠠᠶᠢᠭᠰᠠᠨ ᠨᠢ ᠲᠣᠳᠤᠷᠬᠠᠢ᠃ ᠣᠳᠤᠬᠠᠨ ᠳᠤ ᠶᠠᠩᠵᠤ ᠪᠦᠷᠢ ᠶᠢᠨ ᠬᠥᠮᠥᠰ ︵ᠪᠦᠰᠡᠭᠦᠶᠢᠴᠦᠳ ᠪᠠᠭᠲᠠᠨ᠎ᠠ︶ ᠪᠣᠭᠳᠠ ᠠᠭᠤᠯᠠ ᠶᠢ ᠮᠠᠭᠲᠠᠭᠰᠠᠨ ᠰᠢᠯᠦᠭ᠂ ᠳᠠᠭᠤᠤ ᠵᠣᠬᠢᠶᠠᠵᠤ ᠪᠠᠶᠢᠨ᠎ᠠ᠃ ᠭᠡᠪᠡᠴᠦ ᠲᠡᠳᠡᠭᠡᠷ ᠬᠥᠮᠥᠰ ᠪᠣᠳᠤᠵᠤ ᠦᠵᠡᠭᠰᠡᠨ ᠤᠤ︖ ᠪᠣᠭᠳᠠ ᠠᠭᠤᠯᠠ ᠪᠣᠯ ᠪᠦᠭᠦᠳᠡ ᠶᠢᠨ ᠮᠠᠨᠢ ᠰᠢᠲᠦᠭᠡᠨ ᠰᠢᠦ ᠳ᠋ᠠ︕ ᠥᠪᠡᠷ ᠤᠨ ᠰᠢᠲᠦᠭᠡᠨ  ᠠᠴᠠ ᠪᠠᠨ ᠠᠪᠤᠷᠠᠯ ᠥᠷᠦᠰᠢᠶᠡᠯ ᠭᠤᠶᠤᠬᠤ ᠠᠴᠠ ᠪᠢᠰᠢ᠂ ᠰᠢᠲᠦᠭᠡᠨ ᠠᠴᠠ ᠪᠠᠨ ᠬᠡᠳᠦᠶᠢᠳᠴᠢᠭᠡᠭᠡᠳ ᠰᠢᠲᠦᠭᠡᠨ  ᠢᠶᠠᠨ ᠮᠠᠭᠲᠠᠬᠤ ᠰᠠᠶᠢᠰᠢᠶᠠᠬᠤ ᠲᠠᠶᠢᠮᠦ ᠬᠢᠷᠢ ᠬᠡᠮᠵᠢᠶ᠎ᠡ ᠲᠠᠢ ᠪᠣᠯᠵᠤ ᠴᠢᠳᠠᠨ᠎ᠠ ᠭᠡᠵᠤ ᠤᠤ ᠳ᠋ᠠ︕ ᠯᠤᠪᠰᠠᠩᠴᠣᠶᠢᠴᠤᠭ ᠢ ᠪᠢ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ ᠳᠠᠷᠤᠮᠠᠯᠯᠠᠵᠤ ᠳᠡᠯᠭᠡᠷᠡᠭᠦᠯᠦᠭᠰᠡᠨ ᠬᠥᠮᠥᠨ ᠪᠣᠯᠪᠠᠤ ᠭᠡᠵᠤ ᠦᠵᠡᠵᠦ ᠪᠠᠶᠢᠨ᠎ᠠ᠃     ︵ᠭᠤᠷᠪᠠ︶ ᠰᠤᠳᠤᠷ ᠲᠤ ᠲᠠᠬᠢᠯᠭ᠎ᠠ ᠶᠢ ᠶᠠᠭᠠᠬᠢᠵᠤ ᠪᠢᠴᠢᠭᠰᠡᠨ ᠪᠣᠢ︖     ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠲᠤ ︽ᠪᠠᠶᠠᠨᠮᠦ᠋ᠩᠬᠡ ᠶᠡᠭᠡ ᠠᠭᠤᠯᠠ ᠶᠢᠨ ᠰᠠᠩ ᠣᠷᠤᠰᠢᠪᠠᠢ︾ ᠪᠠ ︽ᠪᠤᠶᠠᠨ ᠪᠡᠯᠭᠡ ᠮᠥᠩᠬᠡ ᠣᠷᠤᠰᠢᠬᠤ ᠢᠯᠡ ᠥᠯᠵᠡᠶᠢᠲᠦ ᠶᠡᠭᠡ ᠠᠭᠤᠯᠠ ᠪᠠᠶᠠᠨᠮᠦ᠋ᠩᠭᠡ ᠶᠢᠨ ᠰᠠᠪᠳᠠᠭ ᠲᠤ ᠲᠠᠬᠢᠯ ᠪᠠᠯᠢᠩ ᠡᠷᠭᠦᠬᠦ ᠶᠣᠰᠤᠨ ᠶᠡᠭᠡ ᠠᠮᠤᠭᠤᠯᠠᠩ ᠤᠨ ᠬᠤᠷ᠎ᠠ ᠶᠢ ᠪᠠᠭᠤᠯᠭᠠᠭᠴᠢ ᠬᠡᠮᠡᠬᠦ ᠣᠷᠤᠰᠢᠪᠠᠢ ︾ ᠭᠡᠳᠡᠭ ᠬᠤᠶᠠᠷ ᠰᠤᠳᠤᠷ ᠪᠣᠢ᠃     ︽ᠰᠠᠩ ᠣᠷᠤᠰᠢᠪᠠᠢ︾ ᠳᠤ ᠪᠠᠶᠠᠨᠮᠦ᠋ᠩᠭᠡ ᠪᠠᠷ ᠰᠦᠯᠳᠡ ᠪᠤᠯᠭᠠᠭᠰᠠᠨ ᠨᠠᠪᠳᠠᠭ ᠰᠠᠪᠳᠠᠭ ᠢ   ︽ᠮᠣᠷᠢᠯᠠᠭᠲᠤᠨ︾ ᠬᠡᠮᠡᠨ ᠵᠠᠯᠠᠵᠠᠢ᠃ ᠡᠭᠦᠨ ᠳᠤ᠄     ︽ᠥᠪᠡᠷ ᠢᠶᠠᠨ ᠭᠤᠷᠪᠠᠨ ᠴᠠᠭ ᠤᠨ ᠪᠤᠷᠬᠠᠨ ᠯᠢᠩᠬᠸ᠎ᠠ ᠠᠴᠠ ᠲᠥᠷᠥᠭᠴᠢ ᠪᠠᠭᠰᠢ      ᠤᠯᠠᠭᠠᠨ ᠪᠣᠷᠤ ᠥᠩᠭᠡᠲᠦ ᠸᠴᠢᠷ ᠲᠤᠳᠪᠠ ᠶᠢᠨ ᠪᠡᠯᠭᠡ ᠴᠣᠬᠤᠶᠢᠵᠤ      ᠺᠠᠷᠠᠮᠭ᠎ᠠ ᠶᠢ ᠭᠠᠷ ᠲᠤᠷ ᠪᠠᠷᠢᠵᠤ ᠤᠯᠠᠭᠠᠨ ᠫᠠᠩᠰᠠ ᠬᠤᠪᠴᠠᠰᠤ ᠵᠣᠭᠤᠭᠯᠠᠨ      ᠨᠠᠷᠠᠨ ᠰᠠᠷᠠᠨ ᠳᠡᠪᠢᠰᠬᠡᠷ ᠳᠡᠭᠡᠷ᠎ᠡ ᠸᠴᠢᠷ ᠵᠠᠪᠢᠯᠠᠯ ᠢᠶᠠᠷ ᠰᠠᠭᠠᠲᠠᠪᠠᠢ︾ ᠬᠡᠮᠡᠭᠡᠳ ︽ᠯᠠᠮᠠ ᠢᠳᠡᠮ ᠪᠠᠳᠮᠠᠵᠤᠩᠨᠠᠢ ᠮᠡᠲᠦ ᠶᠢᠨ ᠪᠠᠭᠰᠢ ᠨᠠᠷ︾᠂ ︽ᠪᠤᠷᠬᠠᠨ ᠪᠣᠳᠢᠰᠠᠸ᠎ᠠ ᠳᠠᠬᠢᠨᠢ ᠱᠠᠰᠢᠨ ᠤ ᠣᠯᠠᠨ ᠰᠠᠬᠢᠭᠤᠰᠤ︾᠂ ︽ᠰᠦᠯᠳᠡ ᠲᠡᠭᠷᠢ ᠣᠷᠤᠳ ᠤᠨ ᠡᠵᠡᠳ︾᠂ ︽ᠪᠠᠶᠠᠨᠮᠦ᠋ᠩᠬᠡ ᠨᠡᠷᠡᠲᠦ ᠶᠡᠭᠡ ᠠᠭᠤᠯᠠ︾᠂ ︽ᠣᠣᠷᠵᠢᠨ ᠠᠭᠤᠯᠠ︾ ᠂ ︽ᠮᠡᠨᠡᠩ ᠤᠨ ᠲᠠᠯ᠎ᠠ︾᠂ ︽ᠶᠡᠭᠡ ᠪᠠᠭ᠎ᠠ ᠭᠤᠪᠢ︾᠂        ︽ᠭᠤᠷᠪᠠᠨ ᠤ ᠷᠠᠰᠢᠶᠠᠨ︾᠂ ︽ᠬᠠᠷᠠᠭᠠᠲᠤ︾ ᠂ ︽ᠬᠡᠷᠦᠯᠦᠨ ᠶᠡᠭᠡ ᠭᠤᠣᠯ︾᠂ ︽ᠠᠪᠳᠠᠷ᠎ᠠ ᠬᠦᠷᠢᠶ᠎ᠡ︾᠂ ︽ᠦᠰᠦᠷᠢ ᠤᠰᠤ︾᠂ ︽ᠶᠡᠭᠡ ᠪᠠᠭ᠎ᠠ ᠬᠠᠷᠠᠭᠤᠯ︾ ᠭᠡᠬᠦ ᠮᠡᠲᠦ ᠪᠠᠷ ᠭᠠᠵᠠᠷ ᠤᠰᠤᠨ ᠤ ᠨᠡᠷ᠎ᠡ ᠶᠢ ᠳᠤᠷᠠᠳᠤᠨ ᠵᠠᠯᠠᠨ᠎ᠠ᠃       ᠳᠠᠷᠠᠭ᠎ᠠ ᠨᠢ ᠶᠠᠭᠤ ᠶᠠᠭᠤ ᠶᠢ ᠲᠠᠬᠢᠯ ᠲᠠᠯᠪᠢᠭᠰᠠᠨ ᠢᠶᠠᠨ ᠲᠣᠭᠠᠴᠢᠵᠤ      ︽ᠰᠠᠨᠰᠠᠷ ᠨᠢᠷᠸᠠᠨ ᠤ ᠵᠣᠴᠢᠳ ᠢ ᠪᠠᠶᠠᠰᠬᠠᠬᠤ ᠶᠢᠨ ᠲᠤᠯᠠ ᠡᠷᠭᠦᠮᠦ ᠵᠣᠭᠤᠭᠯᠠᠵᠤ ᠱᠠᠰᠢᠨ ᠠᠮᠢᠲᠠᠨ ᠤ ᠵᠢᠷᠭᠠᠯ ᠢ ᠠᠷᠪᠢᠳᠬᠠᠨ ᠵᠣᠬᠢᠶᠠ︾ ᠬᠡᠮᠡᠨ ᠵᠠᠯᠪᠠᠷᠢᠨ᠎ᠠ᠃ ᠢᠩᠭᠢᠭᠡᠳ ︽ᠯᠠᠮᠠ ᠨᠠᠷ︾᠂ ︽ᠢᠳᠡᠮ ᠪᠤᠷᠬᠠᠳ︾᠂ ︽ᠳᠠᠭᠢᠨᠢᠰ︾᠂ ︽ᠲᠡᠭᠷᠢ ᠯᠤᠤᠰ︾᠂ ︽ᠪᠠᠶᠠᠨᠮᠥ᠋ᠩᠬᠡ ︾᠂ ︽ᠣᠣᠷᠵᠢᠨ︾᠂ ︽ᠪᠣᠶᠢᠷ ᠨᠠᠭᠤᠷ︾᠂ ︽ᠶᠡᠭᠡ ᠪᠠᠭ᠎ᠠ ᠭᠤᠪᠢ︾᠂ ︽ᠭᠤᠷᠪᠠᠨ ᠤ ᠷᠠᠰᠢᠶᠠᠨ︾᠂ ︽ᠬᠠᠷᠠᠭᠠᠲᠤ︾᠂ ︽ᠬᠡᠷᠦᠯᠦᠨ︾᠂ ︽ᠠᠪᠳᠠᠷ᠎ᠠ ᠬᠦᠷᠢᠶ᠎ᠡ︾᠂ ︽ᠦᠰᠦᠷᠢ ᠤᠰᠤ︾᠂    ︽ᠶᠡᠭᠡ ᠪᠠᠭ᠎ᠠ ᠬᠠᠷᠠᠭᠤᠯ︾ ᠵᠡᠷᠭᠡ ᠭᠠᠵᠠᠷ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠢ ᠳᠠᠭᠤᠳᠠᠨ ︽ᠠᠷᠢᠭᠤᠯᠠᠮᠤ︾ ᠬᠡᠮᠡᠨ᠎ᠡ᠃      ᠲᠡᠭᠦᠨ ᠤ ᠳᠠᠷᠠᠭ᠎ᠠ ᠪᠠᠶᠠᠨᠮᠥ᠋ᠩᠬᠡ ᠪᠠᠷ ᠰᠦᠯᠳᠡ ᠪᠣᠯᠭᠠᠭᠰᠠᠨ ᠠᠭᠤᠯᠠ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠲᠤ ︽ᠬᠤᠣᠷᠯᠠᠯ ᠪᠦᠬᠦᠨ ᠠᠴᠠ ᠰᠠᠬᠢᠨ ᠰᠣᠶᠤᠷᠬ᠎ᠠ︾᠂ ︽ᠳᠠᠶᠢᠰᠤᠨ ᠲᠦᠢᠳᠬᠡᠷ ᠪᠦᠬᠦᠨ ᠢ ᠰᠦᠢᠳᠬᠡᠨ ᠵᠣᠬᠢᠶᠠ︾᠂ ︽ᠭᠠᠯ ᠳᠦᠢᠮᠡᠷ᠂ ᠤᠰᠤ ᠦᠶᠡᠷ ᠭᠡᠢ ᠰᠠᠯᠬᠢᠨ᠂ ᠮᠠᠯ ᠰᠦᠷᠦᠭ ᠤᠨ ᠡᠪᠡᠳᠴᠢᠨ ᠬᠤᠷᠤᠭᠳᠠᠯ᠂ ᠠᠷᠢᠶᠠᠲᠠᠨ ᠤ ᠬᠤᠣᠷᠯᠠᠯ ᠢ ᠠᠮᠤᠷᠯᠢᠨ ᠵᠣᠬᠢᠶᠠ︾᠂ ︽ᠬᠢᠷᠠᠭᠤ ᠮᠥᠨᠳᠦᠷ ᠭᠠᠩ ᠬᠠᠭᠰᠠᠷᠭᠠᠨ᠂ ᠬᠦᠰᠡᠰᠢ ᠦᠭᠡᠢ ᠬᠦᠨᠦᠭᠡᠯ ᠪᠠ ᠴᠠᠭ ᠲᠤᠷ ᠢᠶᠠᠨ ᠬᠤᠷ᠎ᠠ ᠪᠠᠭᠤᠵᠤ ᠳᠠᠷᠢᠶ᠎ᠠ ᠰᠠᠶᠢᠨ᠂ ᠳᠡᠭᠡᠳᠦ ᠨᠣᠮ ᠢ ᠠᠷᠪᠢᠵᠢᠭᠤᠯᠤᠨ ᠵᠣᠬᠢᠶᠠ︾ ᠬᠡᠮᠡᠨ ᠳᠠᠭᠠᠳᠬᠠᠨ᠎ᠠ᠃ ᠬᠠᠮᠤᠭ ᠤᠨ ᠰᠡᠭᠦᠯ ᠳᠤ᠄ ︽ᠲᠣᠪᠴᠢᠯᠠᠪᠠᠰᠤ ᠪᠤᠷᠬᠠᠨ ᠱᠠᠰᠢᠨ ᠳᠡᠯᠭᠡᠷᠡᠵᠦ ᠠᠮᠢᠲᠠᠨ ᠤ ᠠᠮᠤᠭᠤᠯᠠᠩ ᠠᠷᠪᠢᠵᠢᠬᠤ ᠬᠡᠰᠢᠭ ᠡᠨᠡ ᠡᠳᠦᠷ ᠠᠴᠠ ᠠᠳᠡ ᠨᠡᠶᠢᠳᠡᠮ ᠪᠢᠯᠬᠠᠷᠠᠨ ᠤᠷᠪᠠᠯᠲᠠ ᠦᠭᠡᠢ ᠬᠡᠰᠢᠭ ᠤᠨ ᠥᠯᠵᠡᠢ ᠣᠷᠤᠰᠢᠭᠲᠤᠨ︕︾ ᠬᠡᠮᠡᠨ ᠲᠡᠭᠦᠰᠬᠡᠳᠡᠭ᠃ ︽ᠶᠡᠭᠡ ᠠᠮᠤᠭᠤᠯᠠᠩ ᠤᠨ ᠬᠤᠷ᠎ᠠ ᠶᠢ ᠪᠠᠭᠤᠯᠭᠠᠭᠴᠢ ᠬᠡᠮᠡᠬᠦ ᠣᠷᠤᠰᠢᠪᠠᠢ︾ ᠳᠤ᠄ ︽ᠪᠦᠬᠦᠨ ᠢ ᠠᠶᠢᠯᠠᠳᠤᠭᠴᠢ ᠭᠠᠷᠬᠤ ᠶᠢᠨ ᠣᠷᠤᠨ ᠢᠵᠠᠭᠤᠷ ᠤᠨ ᠯᠠᠮᠠ ᠪᠦᠬᠦᠨ ᠢ ᠠᠵᠢᠭᠯᠠᠬᠤ ᠴᠢᠬᠤᠯᠠ ᠵᠠᠮ ᠢ ᠵᠢᠭᠠᠭᠴᠢ ᠢᠳᠡᠮ ᠪᠤᠷᠬᠠᠨ ᠪᠦᠬᠦᠨ᠎ᠡ ᠲᠦᠭᠡᠮᠡᠯ ᠬᠦᠴᠦᠲᠦ ᠳᠠᠭᠢᠨᠢ ᠰᠠᠬᠢᠭᠤᠰᠤ ᠶᠢᠨ ᠴᠢᠭᠤᠯᠭᠠᠨ ᠪᠦᠬᠦᠨ᠎ᠡ ᠲᠦᠭᠡᠮᠡᠯ ᠠᠮᠤᠭᠤᠯᠠᠩ ᠳᠡᠯᠭᠡᠷᠡᠬᠦ ᠥᠯᠵᠡᠢ ᠶᠢ ᠰᠣᠶᠤᠷᠬ᠎ᠠ︾ ᠬᠡᠮᠡᠨ ᠡᠬᠢᠯᠡᠭᠡᠳ᠂ ︽ᠥᠨᠳᠦᠷ ᠰᠦᠷᠯᠢᠭ ᠪᠦᠷᠢᠳᠦᠭᠰᠡᠨ ᠶᠡᠭᠡ ᠠᠭᠤᠯᠠ ᠶᠢᠨ ᠦᠵᠦᠭᠦᠷ ᠲᠤᠷ ᠣᠪᠤᠭ᠎ᠠ ᠪᠣᠰᠬᠠᠨ ᠲᠠᠬᠢᠵᠤ ᠲᠠᠩᠭᠠᠷᠢᠭ ᠤᠨ ᠡᠳ᠋ ᠪᠣᠯᠤᠨ ᠤᠨᠤᠭ᠎ᠠ ᠮᠠᠯ᠂ ᠤᠲᠤᠯᠭ᠎ᠠ ᠶᠢᠨ ᠰᠠᠩ ᠤᠨ ᠡᠭᠦᠯᠡᠨ ᠤᠲᠤᠭ᠎ᠠ ᠡᠯᠳᠡᠪ ᠵᠦᠢᠯ ᠤᠨ ᠲᠠᠬᠢᠯ ᠢ ᠴᠤᠬᠠᠭ ᠳᠡᠭᠡᠳᠦ ᠳᠤᠷ ᠡᠷᠭᠦᠵᠦ ᠲᠠᠶᠢᠨ ᠣᠯᠠᠨ ᠣᠷᠤᠳ ᠤᠨ ᠡᠵᠡᠳ ᠨᠠᠢᠮᠠᠨ ᠠᠶᠢᠮᠠᠭ ᠲᠡᠶᠢᠨ ᠣᠯᠠᠨ ᠰᠠᠨᠰᠠᠷ ᠨᠢᠷᠸᠠᠨ ᠤ ᠵᠣᠴᠢᠳ ᠪᠦᠬᠦᠨ᠎ᠡ ᠲᠡᠶᠢᠨ ᠠᠷᠢᠭᠤᠨ ᠰᠡᠳᠬᠢᠯ ᠢᠶᠠᠷ ᠲᠠᠬᠢᠬᠤ ᠪᠥᠭᠡᠳ ᠮᠠᠭᠲᠠᠬᠤ ᠨᠢ ᠲᠡᠶᠢᠨ ᠠᠷᠢᠭᠤᠨ ᠰᠠᠶᠢᠨ ᠶᠣᠰᠤᠨ ᠢ ᠳᠠᠭᠠᠭᠰᠠᠨ ᠶᠤᠮ᠃ ᠲᠡᠶᠢᠮᠦ ᠪᠣᠯᠬᠤᠷ ᠠᠭᠤᠤ ᠶᠡᠭᠡ ᠮᠣᠩᠭᠤᠯ ᠣᠷᠤᠨ ᠤ ᠭᠠᠵᠠᠷ ᠤᠨ ᠡᠳ᠋ ᠪᠦᠷᠢᠳᠦᠭᠰᠡᠨ ᠬᠥᠯᠥᠨ ᠪᠣᠶᠢᠷ ᠨᠤᠲᠤᠭ ᠲᠤ ᠪᠤᠷᠬᠠᠨ ᠱᠠᠰᠢᠨ ᠬᠢᠭᠡᠳ ᠬᠤᠸᠠᠷᠠᠭ ᠤᠨ ᠠᠶᠢᠮᠠᠭ ᠳᠡᠯᠭᠡᠷᠡᠵᠦ ᠱᠠᠰᠢᠨ ᠤ ᠥᠭᠯᠢᠭᠡ ᠶᠢᠨ ᠡᠵᠡᠨ ᠪᠦᠷᠢᠨ ᠲᠡᠭᠦᠯᠳᠡᠷ ᠪᠣᠯᠲᠤᠭᠠᠢ ᠲᠣᠭᠰᠢᠨ ᠠᠭᠤᠯᠠ ᠪᠦᠬᠦᠨ ᠠᠴᠠ ᠡᠵᠡᠯᠡᠬᠦᠨ ᠥᠨᠳᠦᠷ ᠣᠷᠬᠢᠯ ᠬᠠᠨ ᠠᠭᠤᠯᠠ ᠰᠦᠮᠪᠦᠷ ᠰᠢᠭ ᠦᠵᠡᠰᠬᠦᠯᠡᠩ ᠪᠠᠲᠤ ᠠᠭᠤᠯᠠ ᠶᠢᠨ ᠢᠷᠤᠭᠠᠷ ᠨᠠᠭᠤᠷ ᠳᠠᠯᠠᠢ ᠨᠡᠶᠢᠳᠡᠮ ᠬᠦᠷᠢᠶᠡᠯᠡᠭᠰᠡᠨ ᠠᠭᠤᠯᠠ ᠶᠢᠨ ᠣᠬᠢ ᠪᠣᠯᠤᠭᠰᠠᠨ ᠰᠦᠷᠯᠢᠭ ᠪᠠᠶᠠᠨᠮᠥ᠋ᠩᠬᠡ ᠳᠤ ᠲᠠᠬᠢᠯ ᠪᠠᠯᠢᠩ ᠤᠨ ᠡᠷᠭᠦᠯ ᠢ ᠮᠡᠷᠭᠡᠳ ᠤᠨ ᠰᠠᠶᠢᠨ ᠨᠣᠮᠯᠠᠯ ᠤᠨ ᠲᠤᠷᠰᠢᠯᠭ᠎ᠠ ᠰᠤᠷᠭᠠᠮᠵᠢ ᠶᠢ ᠲᠦᠪᠯᠡᠷᠡᠭᠦᠯᠦᠭᠰᠡᠨ ᠪᠠᠲᠤ ᠪᠠᠬᠢ ᠳᠡᠭᠡᠰᠦᠨ᠎ᠡ ᠡᠰᠢ ᠤᠬᠠᠭᠠᠨ ᠢ ᠬᠡᠯᠬᠢᠭᠰᠡᠨ ᠰᠤᠪᠤᠳ ᠤᠨ ᠰᠠᠶᠢᠬᠠᠨ ᠡᠷᠢᠬᠡ ᠶᠢ       ᠤᠬᠠᠭᠠᠨᠳᠠᠳ ᠤᠨ ᠬᠦᠵᠦᠭᠦᠨ ᠴᠢᠮᠡᠭ ᠢᠶᠠᠷ ᠡᠳᠦᠭᠡ ᠠᠳᠡ ᠪᠦᠲᠦᠭᠡᠪᠡᠢ︾ ᠭᠡᠵᠤ ︽ᠠᠷᠪᠠᠨ ᠪᠤᠶᠠᠨ ᠪᠦᠷᠢᠳᠦᠭᠰᠡᠨ ᠳᠡᠭᠡᠳᠦ ᠣᠷᠤᠨ ᠪᠤᠷᠬᠠᠨ ᠱᠠᠰᠢᠨ ᠤ ᠪᠤᠶᠠᠨ ᠤ ᠵᠦᠭ ᠢ ᠲᠡᠳᠬᠦᠬᠦ ᠣᠷᠤᠨ ᠭᠠᠵᠠᠷ ᠤᠨ ᠡᠵᠡᠳ ᠤᠨ ᠣᠷᠤᠰᠢᠵᠤ ᠪᠠᠶᠢᠭ᠎ᠠ ᠶᠡᠭᠡ ᠠᠭᠤᠯᠠ ᠪᠣᠯᠬᠤ᠂ ᠠᠩᠬᠠᠨ ᠤ ᠬᠠᠭᠤᠴᠢᠨ ᠨᠡᠷ᠎ᠡ ᠨᠢ ᠳᠤᠯᠠᠭᠠᠨ ᠬᠠᠷ᠎ᠠ ᠭᠡᠵᠤ ᠠᠯᠳᠠᠷᠰᠢᠭᠰᠠᠨ ᠲᠡᠭᠦᠨ᠎ᠡ ᠰᠢᠲᠦᠨ ᠪᠠᠷᠢᠯᠳᠤᠯᠭ᠎ᠠ ᠶᠢᠨ ᠣᠨᠢᠰᠤᠨ ᠢᠶᠠᠷ ᠪᠠᠶᠠᠨᠮᠥ᠋ᠩᠬᠡ ᠶᠡᠭᠡ ᠠᠭᠤᠯᠠ ᠭᠡᠵᠤ ᠨᠡᠷ᠎ᠡ ᠬᠠᠶᠢᠷᠠᠯᠠᠭᠰᠠᠨ ᠠᠨᠤ ᠡᠭᠦᠨ᠎ᠡ ᠣᠷᠤᠰᠢᠨ ᠰᠠᠭᠤᠭᠴᠢ ᠲᠡᠭᠷᠢ᠂ ᠯᠤᠤᠰ᠂ ᠭᠠᠵᠠᠷ ᠤᠨ ᠡᠵᠡᠳ ᠢ ᠪᠠᠶᠠᠷᠯᠠᠭᠤᠯᠬᠤ ᠰᠠᠩ ᠬᠢᠭᠡᠳ ᠲᠠᠬᠢᠯ ᠪᠠᠯᠢᠩ ᠡᠷᠭᠦᠬᠦ ᠶᠢᠨ ᠶᠣᠰᠤ ᠭᠤᠷᠢᠮ ᠢ ᠵᠣᠬᠢᠰᠲᠠᠢ ᠵᠣᠬᠢᠶᠠᠬᠤ ᠳᠤ ᠭᠤᠷᠪᠠ ᠪᠣᠢ᠃ ᠪᠡᠯᠡᠳᠬᠡᠯ᠂ ᠭᠤᠣᠯ ᠴᠣᠭᠴᠠ᠂ ᠡᠴᠦᠰ ᠤᠨ ᠳᠠᠷᠠᠭᠠᠯᠠᠯ ᠪᠤᠯᠠᠢ︾ ᠭᠡᠵᠡᠢ᠃       ᠪᠡᠯᠡᠳᠬᠡᠯ — ᠲᠠᠬᠢᠯᠭ᠎ᠠ ᠶᠢᠨ ᠡᠮᠦᠨ᠎ᠡ ᠡᠳᠦᠷ ᠣᠴᠢᠵᠤ ᠲᠠᠬᠢᠯᠭ᠎ᠠ ᠶᠢᠨ ᠪᠦᠬᠦᠶᠢᠯᠡ ᠵᠦᠢᠯ ᠢ ᠪᠡᠯᠡᠨ ᠪᠣᠯᠭᠠᠨ᠎ᠠ᠃       ᠭᠤᠣᠯ ᠴᠣᠭᠴᠠ — ᠲᠠᠬᠢᠬᠤ ᠡᠳᠦᠷ ᠤᠨ ᠨᠠᠷᠠᠨ ᠭᠠᠷᠬᠤ ᠠᠴᠠ ᠡᠬᠢᠯᠡᠨ ᠲᠠᠬᠢᠯᠭ᠎ᠠ ᠶᠢᠨ ᠵᠦᠢᠯ ᠢ ᠪᠦᠷᠢᠳᠦᠭᠦᠯᠵᠦ᠂ ᠤᠩᠰᠢᠯᠭ᠎ᠠ ᠶᠢᠨ ᠨᠣᠮ ᠳᠠᠭᠠᠨ ᠣᠷᠤᠨ᠎ᠠ᠃ ᠲᠡᠭᠡᠭᠡᠳ ᠣᠯᠠᠨ ᠪᠤᠷᠬᠠᠨ ᠰᠠᠬᠢᠭᠤᠰᠤᠨ᠂ ᠨᠠᠪᠳᠠᠭ ᠰᠠᠪᠳᠠᠭ ᠢ ᠵᠠᠯᠠᠬᠤ ᠶᠢᠨ ᠳᠣᠲᠤᠷ᠎ᠠ ︽ᠶᠡᠭᠡ ᠠᠭᠤᠯᠠ ᠪᠠᠶᠠᠨᠮᠥ᠋ᠩᠬᠡ ᠶᠢᠨ ᠰᠠᠪᠳᠠᠭ ᠪᠣᠯᠬᠤ ᠰᠦᠯᠳᠡ ᠬᠠᠭᠠᠨ ᠤ ᠪᠡᠶ᠎ᠡ ᠶᠢᠨ ᠥᠩᠭᠡ ᠮᠣᠳᠤᠷ ᠤᠨ ᠪᠡᠯᠭᠡ ᠵᠡᠷᠭᠡ ᠶᠢ ᠲᠣᠳᠤ ᠦᠭᠡᠢ ᠴᠦ ᠬᠡᠷᠬᠢᠪᠡᠴᠦ ᠦᠵᠡᠭᠳᠡᠨ ᠨᠠᠢᠮᠠᠨ ᠠᠶᠢᠮᠠᠭ ᠲᠡᠭᠷᠢ ᠯᠤᠤᠰ ᠢᠶᠠᠷ ᠬᠦᠷᠢᠶᠡᠯᠡᠵᠦ᠂ ᠠᠪᠤᠷᠠᠯ ᠡᠷᠢᠵᠦ ᠪᠠᠶᠢᠭ᠎ᠠ ᠥᠭᠯᠢᠭᠡ ᠶᠢᠨ ᠡᠵᠡᠳ ᠢ ᠰᠠᠬᠢᠨ ᠬᠠᠮᠠᠭᠠᠯᠠᠬᠤ ᠪᠥᠭᠡᠳ ᠰᠢᠳᠢ ᠶᠢ ᠰᠣᠶᠤᠷᠬᠠᠬᠤ ᠠᠭᠠᠷ ᠲᠤᠷ ᠣᠷᠤᠰᠢᠪᠠᠢ︾ ᠭᠡᠵᠤ ᠪᠠᠶᠠᠨᠮᠥ᠋ᠩᠬᠡ ᠶᠢ ᠳᠣᠪᠤᠶᠢᠯᠭᠠᠨ ᠳᠤᠷᠠᠳᠤᠨ᠎ᠠ᠃       ᠲᠡᠭᠡᠭᠡᠳ ᠡᠳᠡᠭᠡᠷ ᠣᠯᠠᠨ ᠨᠠᠪᠳᠠᠭ ᠰᠠᠪᠳᠠᠭ ᠢᠶᠠᠨ ᠳᠠᠭᠤᠳᠠᠵᠤ ᠨᠢᠭᠡ ᠨᠢᠭᠡ ᠪᠠᠷ          ︽ᠮᠥᠷᠭᠦᠮᠦ︾ ᠬᠡᠮᠡᠨ ᠳᠠᠭᠠᠳᠬᠠᠨ᠎ᠠ᠃ ᠳᠠᠷᠠᠭ᠎ᠠ ᠨᠢ ᠬᠦᠰᠡᠯ ᠰᠡᠳᠬᠢᠯ ᠢᠶᠠᠷ ᠵᠠᠯᠪᠠᠷᠢᠨ ︽ᠡᠷᠭᠦᠮᠦ︾ ᠬᠡᠮᠡᠨ ᠣᠯᠠᠨᠳᠠ ᠤᠩᠰᠢᠨ᠎ᠠ᠃ ᠪᠠᠰᠠ ᠠᠯᠢᠪᠠ ᠣᠰᠤᠯ ᠠᠳᠡᠭᠦᠦ᠂ ᠰᠦᠰᠦᠭ ᠦᠭᠡᠢ᠂ ᠬᠡᠮᠲᠦ ᠶᠠᠪᠤᠳᠠᠯ ᠢᠶᠠᠨ ︽ᠨᠠᠮᠠᠨᠴᠢᠯᠠᠮᠤ︾ ᠬᠡᠮᠡᠮᠣᠢ᠃       ᠲᠠᠬᠢᠯᠭ᠎ᠠ ᠶᠢᠨ ᠠᠵᠢᠯᠯᠠᠭ᠎ᠠ ᠶᠢᠨ ᠰᠡᠭᠦᠯᠴᠢ ᠪᠠᠷ᠄      ︽ᠯᠠᠮᠠ ᠢᠳᠡᠮ ᠲᠡᠳᠡᠭᠡᠷ ᠪᠦᠬᠦᠨ ᠤ ᠰᠡᠳᠬᠢᠯ ᠬᠠᠨᠤᠭᠲᠤᠨ       ᠣᠷᠤᠨ ᠤ ᠲᠡᠭᠷᠢ ᠭᠠᠵᠠᠷ ᠤᠨ ᠡᠵᠡᠳ ᠤᠨ ᠰᠡᠳᠬᠢᠯ ᠬᠠᠨᠤᠭᠲᠤᠨ       ᠵᠠᠷᠯᠢᠭ ᠨᠣᠮ ᠤᠨ ᠰᠠᠬᠢᠭᠤᠰᠤ ᠤᠳ ᠤᠨ ᠰᠡᠳᠬᠢᠯ ᠬᠠᠨᠤᠭᠲᠤᠨ       ᠪᠠᠶᠠᠨᠮᠥ᠋ᠩᠭᠡ ᠰᠦᠯᠳᠡ ᠲᠡᠭᠷᠢ ᠶᠢᠨ ᠰᠡᠳᠬᠢᠯ ᠬᠠᠨᠤᠭᠲᠤᠨ︾ ᠬᠡᠮᠡᠮᠣᠢ᠃ ᠪᠠᠰᠠ ᠬᠡᠰᠢᠭ ᠪᠤᠶᠠᠨ ᠤ ᠳᠠᠯᠠᠯᠭ᠎ᠠ ᠠᠪᠤᠨ᠎ᠠ᠃       ᠡᠴᠦᠰ ᠤᠨ ᠳᠠᠷᠠᠭᠠᠯᠠᠯ — ︽ᠣᠷᠤᠨ ᠤ ᠡᠵᠡᠳ ᠤᠨ ᠰᠡᠳᠬᠢᠯ ᠢ ᠬᠠᠩᠭᠠᠵᠤ᠂ ᠥᠭᠯᠢᠭᠡ ᠶᠢᠨ ᠡᠵᠡᠳ  ᠤᠨ ᠪᠠᠶᠠᠷ ᠨᠠᠶᠢᠷ ᠢ ᠠᠷᠪᠢᠵᠢᠭᠤᠯᠬᠤ ᠶᠢᠨ ᠲᠥᠯᠥᠭᠡ ᠬᠤᠷᠠᠯ ᠨᠣᠮ ᠤᠨ ᠲᠠᠬᠢᠯ ᠤᠨ ᠡᠳ᠋ ᠢ ᠲᠦᠭᠡᠭᠡᠵᠦ ᠢᠳᠡᠭᠦᠯᠵᠦ ᠬᠦᠷᠲᠡᠭᠦᠯᠬᠦ ᠭᠡᠷᠡᠭᠲᠡᠢ᠃ ᠬᠦᠨᠳᠦ ᠠᠴᠢ ᠶᠢ ᠬᠤᠷᠢᠶᠠᠬᠤ ᠶᠢᠨ ᠲᠥᠯᠥᠭᠡ ᠮᠣᠷᠳᠠᠭᠤᠯᠵᠤ ᠢᠯᠡᠭᠡᠬᠦ ᠶᠢᠨ ᠲᠠᠬᠢᠯ ᠮᠠᠭᠲᠠᠭᠠᠯ ᠶᠠᠪᠤᠭᠤᠯᠤᠨ᠎ᠠ᠃ ᠰᠠᠶᠢᠨ ᠪᠤᠶᠠᠨ ᠢ ᠠᠷᠪᠢᠵᠢᠭᠤᠯᠬᠤ ᠶᠢᠨ ᠲᠥᠯᠥᠭᠡ ᠥᠯᠵᠡᠢ ᠬᠤᠲᠤᠭ ᠢ ᠥᠭᠦᠯᠡᠨ᠎ᠡ︾ ᠬᠡᠮᠡᠵᠡᠢ᠃       ᠣᠳᠤ ᠶᠢᠨ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ ᠶᠢ ᠲᠠᠬᠢᠭᠴᠢᠳ ᠡᠨᠡ ᠬᠦ ᠲᠡᠦᠬᠡᠲᠦ ᠤᠳᠤᠮᠰᠢᠯ᠂ ᠨᠣᠮ ᠰᠤᠳᠤᠷ  ᠤᠨ ᠰᠤᠷᠭᠠᠯ ᠢ ᠮᠥᠷᠳᠡᠨ ᠪᠠᠷᠢᠮᠲᠠᠯᠠᠵᠤ ᠲᠠᠬᠢᠯᠭ᠎ᠠ ᠶᠢᠨ ᠠᠵᠢᠯᠯᠠᠭ᠎ᠠ ᠶᠢ ᠶᠠᠪᠤᠭᠳᠠᠭᠤᠯᠵᠤ ᠪᠠᠶᠢᠭ᠎ᠠ ᠪᠢᠯᠡ᠃ ᠭᠡᠬᠦ  ᠳᠡᠭᠡᠨ ᠨᠢᠭᠡᠨ ᠵᠦᠢᠯ ᠢ ᠠᠩᠬᠠᠷᠤᠯ ᠳᠠᠭᠠᠨ ᠠᠪᠤᠭᠤᠰᠢᠲᠠᠢ ᠪᠠᠶᠢᠨ᠎ᠠ᠃ ᠥᠩᠭᠡᠷᠡᠭᠰᠡᠨ ᠳᠤ ᠲᠠᠬᠢᠯ ᠤᠨ ᠡᠳ᠋ — ᠢᠳᠡᠭᠡᠨ ᠤᠮᠳᠠᠭᠠᠨ ᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷ᠎ᠡ ᠲᠠᠯᠪᠢᠭᠠᠳ ᠲᠠᠬᠢᠯ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭ᠎ᠠ ᠲᠠᠬᠢᠯᠭ᠎ᠠ ᠳᠤ ᠣᠷᠤᠯᠴᠠᠭᠰᠠᠨ ᠬᠥᠮᠥᠰ ᠲᠤ ᠳᠡᠭᠡᠳᠦ ᠳᠣᠣᠷᠠᠳᠤ ᠭᠡᠵᠤ ᠢᠯᠭᠠᠯ ᠦᠭᠡᠢ ᠲᠦᠭᠡᠭᠡᠵᠦ ᠬᠦᠷᠲᠡᠭᠦᠯᠳᠡᠭ ᠪᠠᠶᠢᠭᠰᠠᠨ ᠰᠠᠶᠢᠬᠠᠨ ᠵᠠᠩᠰᠢᠯ ᠲᠠᠢ ᠪᠠᠶᠢᠵᠠᠢ᠃ ᠭᠡᠲᠡᠯ᠎ᠡ ᠣᠳᠤ ᠠᠭᠤᠯᠠᠨ ᠤ ᠪᠠᠨ ᠣᠪᠤᠭᠠᠨ ᠥᠭᠡᠳᠡ ᠣᠮ ᠬᠤᠮ ᠦᠭᠡᠢ ᠰᠠᠴᠤᠯᠠᠵᠤ᠂ ᠠᠭᠤᠯᠠ ᠣᠪᠤᠭ᠎ᠠ ᠪᠣᠯᠤᠨ ᠣᠷᠴᠢᠨ ᠲᠣᠭᠤᠷᠢᠨ ᠢ ᠪᠤᠵᠠᠷᠳᠠᠭᠤᠯᠵᠤ᠂ ᠢᠳᠡᠭᠡᠨ ᠤᠮᠳᠠᠭᠠᠨ ᠢᠶᠠᠨ ᠪᠦᠷᠢᠯᠭᠡᠵᠦ᠂ ᠪᠣᠯᠬᠢ ᠪᠦᠲᠦᠭᠦᠯᠢᠭ᠂ ᠪᠣᠯᠪᠠᠰᠤᠨ ᠪᠤᠰᠤ᠂ ᠰᠢᠳᠦᠯᠭᠡ ᠶᠢᠨ ᠰᠣᠶᠤᠯ ᠢ ᠪᠤᠬᠢᠷᠳᠠᠭᠤᠯᠵᠤ ᠪᠠᠶᠢᠭ᠎ᠠ ᠪᠠᠨ ᠮᠡᠳᠡᠷᠡᠵᠦ᠂ ᠰᠡᠴᠡᠨ ᠰᠡᠬᠡᠭᠡᠷᠡᠭᠰᠡᠨ᠂ ᠰᠢᠲᠦᠨ ᠪᠢᠰᠢᠷᠡᠭᠰᠡᠨ ᠣᠢ ᠤᠬᠠᠭᠠᠨ ᠤ ᠰᠢᠲᠦᠯᠭᠡ ᠪᠢᠰᠢᠷᠡᠯ ᠤᠨ ᠵᠠᠩ ᠦᠢᠯᠡ ᠶᠢ ᠢᠮᠠᠭᠲᠠ ᠪᠠᠷᠢᠮᠲᠠᠯᠠᠳᠠᠭ ᠪᠣᠯᠤᠭᠠᠰᠠᠢ︕        ᠬᠤᠶᠠᠷ᠂ ᠮᠣᠭᠠᠶᠢᠲᠤ ᠶᠢᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠲᠤᠬᠠᠢ ᠥᠭᠦᠯᠡᠬᠦ ᠨᠢ᠄       ︵ᠨᠢᠭᠡ︶ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ ᠵᠣᠬᠢᠶᠠᠭᠰᠠᠨ ᠴᠠᠭ ᠦᠶ᠎ᠡ ᠪᠠ ᠵᠣᠬᠢᠶᠠᠭᠰᠠᠨ ᠬᠥᠮᠥᠨ       ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠲᠤ ᠵᠣᠬᠢᠶᠠᠭᠰᠠᠨ ᠴᠠᠭ ᠦᠶ᠎ᠡ ᠪᠠ ᠵᠣᠬᠢᠶᠠᠭᠰᠠᠨ ᠬᠥᠮᠥᠨ ᠤ ᠲᠤᠬᠠᠢ ᠶᠠᠭᠤ ᠴᠦ ᠳᠤᠷᠠᠳᠤᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠰᠢᠨ᠎ᠡ ᠪᠠᠷᠭᠤ ᠵᠡᠭᠦᠨ ᠭᠠᠷᠤᠨ ᠰᠢᠯᠤᠭᠤᠨ ᠬᠥᠬᠡ ᠬᠤᠰᠢᠭᠤᠨ ᠳᠤ ᠡᠶᠢᠮᠦ ᠨᠢᠭᠡ ᠶᠠᠷᠢᠶ᠎ᠠ ᠤᠯᠠᠮᠵᠢᠯᠠᠭᠳᠠᠭᠰᠠᠭᠠᠷ ᠢᠷᠡᠵᠡᠢ᠃ ᠬᠠᠮᠤᠭ ᠲᠡᠷᠢᠭᠦᠨ ᠳᠤ ᠮᠣᠭᠠᠶᠢᠲᠤ ᠶᠢᠨ ᠪᠣᠭᠳᠠ ᠠᠭᠤᠯᠠ ᠶᠢ ᠲᠠᠬᠢᠭᠰᠠᠨ ᠯᠠᠮᠠ ᠪᠣᠯ ᠰᠢᠯᠤᠭᠤᠨ ᠬᠥᠬᠡ ᠶᠢᠨ ᠭᠤᠨᠴᠤᠭᠳᠣᠮᠢ ᠭᠡᠳᠡᠭ ᠯᠠᠮᠠ ᠮᠥᠨ ᠭᠡᠯᠴᠡᠳᠡᠭ᠃ ᠲᠡᠷᠡ ᠠᠭᠤᠯᠠ ᠶᠢᠨ ᠢᠶᠠᠨ ᠣᠪᠤᠭ᠎ᠠ ᠶᠢ ᠲᠠᠬᠢᠵᠤ ᠪᠠᠷᠠᠭᠠᠳ ᠳᠣᠷᠤᠭᠰᠢ ᠪᠠᠭᠤᠵᠤ ᠶᠠᠪᠤᠲᠠᠯ᠎ᠠ ᠣᠳᠤ ᠶᠢᠨ ᠬᠡᠦᠬᠡᠳ ᠤᠨ ᠣᠪᠤᠭᠠᠨ ᠤ ᠳᠡᠷᠭᠡᠳᠡ ᠢᠷᠡᠭᠡᠳ ᠮᠣᠷᠢᠨ ᠤ ᠬᠢᠨᠢ ᠬᠥᠯ ᠬᠤᠭᠤᠷᠠᠵᠤ ᠭᠡᠨ᠎ᠡ᠃ ᠲᠡᠭᠡᠭᠰᠡᠨ ᠳᠤ ᠯᠠᠮᠠ ᠭᠤᠸᠠᠢ᠄      ︽ᠠᠶ᠎ᠠ︕ ᠡᠨᠡ ᠠᠭᠤᠯᠠ ᠶᠢ ᠲᠠᠬᠢᠵᠤ ᠪᠠᠶᠢᠭᠰᠠᠨ ᠪᠥᠭᠡ ᠴᠢᠨᠢ ᠠᠮᠠᠷ ᠦᠭᠡᠢ ᠴᠢᠳᠠᠯ ᠲᠠᠢ ᠪᠥᠭᠡ ᠶᠤᠮ ᠪᠠᠶᠢᠨ᠎ᠠ ᠳ᠋ᠠ᠃ ᠳᠠᠷᠠᠭ᠎ᠠ ᠵᠢᠯ ᠮᠢᠨᠦ ᠮᠣᠷᠢᠨ ᠤ ᠬᠥᠯ ᠬᠤᠭᠤᠷᠠᠭᠰᠠᠨ ᠡᠨᠡ ᠭᠠᠵᠠᠷ ᠨᠢᠭᠡ ᠣᠪᠤᠭ᠎ᠠ ᠪᠣᠰᠬᠠᠵᠤ ᠥᠭᠭᠦᠭᠡᠷᠡᠢ︾ ᠭᠡᠰᠡᠨ ᠶᠤᠮ ᠭᠡᠨ᠎ᠡ᠃ ᠢᠩᠭᠢᠭᠡᠳ ᠬᠡᠦᠬᠡᠳ  ᠤᠨ ᠣᠪᠤᠭ᠎ᠠ ᠶᠢ ᠳᠠᠷᠠᠭ᠎ᠠ ᠵᠢᠯ ᠨᠢ ᠲᠡᠷᠡ ᠭᠠᠵᠠᠷ ᠲᠤᠨᠢ ᠪᠣᠰᠬᠠᠭᠰᠠᠨ ᠶᠤᠮ ᠪᠠᠶᠢᠵᠠᠢ᠃        1732 ᠣᠨ ᠳᠤ ᠬᠥᠯᠥᠨ ᠪᠣᠶᠢᠷ ᠲᠤ ᠨᠡᠭᠦᠵᠦ ᠢᠷᠡᠭᠰᠡᠨ ᠬᠠᠭᠤᠴᠢᠨ ᠪᠠᠷᠭᠤᠴᠤᠳ ᠲᠤ ᠬᠠᠯᠬ᠎ᠠ ᠭᠤᠣᠯ ᠤᠨ ᠵᠡᠭᠦᠨ ᠬᠦᠪᠡᠭᠡ ᠳᠠᠭᠠᠤ ᠨᠤᠲᠤᠭ ᠢ ᠣᠯᠭᠤᠭᠰᠠᠨ ᠪᠣᠯᠬᠤᠷ ᠮᠣᠭᠠᠶᠢᠲᠤ ᠶᠢᠨ ᠪᠣᠭᠳᠠ ᠠᠭᠤᠯᠠ ᠨᠢ ᠬᠠᠭᠤᠴᠢᠨ ᠪᠠᠷᠭᠤᠴᠤᠳ ᠤᠨ ᠨᠤᠲᠤᠭ ᠪᠠᠶᠢᠵᠤ᠂ ᠬᠠᠭᠤᠴᠢᠨ ᠪᠠᠷᠭᠤ ᠪᠥᠭᠡ ᠮᠣᠭᠠᠶᠢᠲᠤ ᠶᠢᠨ ᠪᠣᠭᠳᠠ ᠠᠭᠤᠯᠠ ᠶᠢ ᠲᠠᠬᠢᠳᠠᠭ ᠪᠠᠶᠢᠵᠠᠢ᠃ ᠥᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ ᠰᠢᠨ᠎ᠡ ᠪᠠᠷᠭᠤ ᠵᠡᠭᠦᠨ ᠭᠠᠷᠤᠨ ᠰᠢᠯᠤᠭᠤᠨ ᠬᠥᠬᠡ ᠬᠤᠰᠢᠭᠤ ᠲᠠᠬᠢᠬᠤ  ᠠᠴᠠ ᠡᠮᠦᠨ᠎ᠡ ᠬᠠᠭᠤᠴᠢᠨ ᠪᠠᠷᠭᠤ ᠪᠥᠭᠡ ᠲᠠᠬᠢᠵᠤ ᠪᠠᠶᠢᠭᠰᠠᠨ ᠠᠵᠠᠢ᠃       ᠥᠭᠡᠷ᠎ᠡ ᠪᠠᠰᠠ ᠨᠢᠭᠡ ᠤᠯᠠᠮᠵᠢᠯᠠᠯ ᠶᠠᠷᠢᠶ᠎ᠠ ᠪᠠᠶᠢᠳᠠᠭ ᠨᠢ᠂ ᠮᠣᠭᠠᠶᠢᠲᠤ ᠶᠢᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢ ᠳᠠᠯᠠᠢ ᠯᠠᠮᠠ ᠪᠠᠷ ᠵᠣᠬᠢᠶᠠᠯᠭᠠᠭᠰᠠᠨ ᠭᠡᠯᠴᠡᠳᠡᠭ᠃ ᠬᠡᠷᠪᠡ ᠡᠨᠡ ᠲᠠᠬᠢᠯᠭ᠎ᠠ ᠶᠢ ᠳᠠᠯᠠᠢ ᠯᠠᠮᠠ ᠵᠣᠬᠢᠶᠠᠭᠰᠠᠨ ᠪᠣᠯ ᠲᠡᠷᠡ ᠴᠠᠭ ᠦᠶ᠎ᠡ ᠲᠠᠢ ᠬᠤᠯᠪᠤᠭᠳᠠᠬᠤ ᠳᠠᠯᠠᠢ ᠯᠠᠮᠠ ᠪᠣᠯ 11 ᠳ᠋ᠤᠭᠡᠷ ᠳᠠᠯᠠᠢ ᠯᠠᠮᠠ ᠬᠠᠶᠢᠷᠤᠪᠵᠠᠮᠰᠤ ︵1838 — 1855︶ 18 ᠨᠠᠰᠤᠯᠠᠭᠰᠠᠨ᠂ 12 ᠳ᠋ᠤᠭᠠᠷ ᠳᠠᠯᠠᠢ ᠯᠠᠮᠠ ᠫᠧᠷᠡᠩᠯᠠᠶᠢᠵᠠᠮᠰᠤ ︵1856 — 1875︶ 20 ᠨᠠᠰᠤᠯᠠᠭᠰᠠᠨ᠂ 13 ᠳ᠋ᠤᠭᠠᠷ ᠳᠠᠯᠠᠢ ᠯᠠᠮᠠ ᠲᠦᠪᠳᠡᠨᠵᠠᠮᠰᠤ ︵1876 — 1933︶ 58 ᠨᠠᠰᠤᠯᠠᠭᠰᠠᠨ᠃ ᠡᠨᠡ ᠭᠤᠷᠪᠡᠨ ᠳᠠᠯᠠᠢ ᠯᠠᠮᠠ ᠶᠢᠨ ᠨᠢᠭᠡ ᠨᠢ ᠪᠠᠶᠢᠬᠤ ᠶᠣᠰᠤᠲᠠᠢ᠃       ᠮᠢᠨᠦ ᠦᠵᠡᠬᠦ ᠪᠠᠷ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ 1832 ᠣᠨ ᠳᠤ ᠵᠣᠬᠢᠶᠠᠭᠳᠠᠭᠰᠠᠨ ᠪᠣᠯ ᠮᠣᠭᠠᠶᠢᠲᠤ ᠶᠢᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ 11 ᠳ᠋ᠤᠭᠡᠷ ᠳᠠᠯᠠᠢ ᠯᠠᠮᠠ ᠬᠠᠶᠢᠷᠤᠪᠵᠠᠮᠰᠤ ᠪᠤᠶᠤ 12 ᠳ᠋ᠤᠭᠠᠷ ᠳᠠᠯᠠᠢ ᠯᠠᠮᠠ ᠫᠧᠷᠡᠩᠯᠠᠶᠢᠵᠠᠮᠰᠤ ᠵᠣᠬᠢᠶᠠᠭᠰᠠᠨ ᠪᠠᠶᠢᠬᠤ ᠪᠣᠯᠤᠯᠴᠠᠭ᠎ᠠ ᠮᠠᠰᠢ ᠶᠡᠭᠡ ᠪᠠᠶᠢᠨ᠎ᠠ᠃ ᠴᠢᠩᠭᠢᠪᠡᠯ ᠡᠨᠡ ᠬᠤᠶᠠᠷ ᠰᠤᠳᠤᠷ ᠵᠣᠬᠢᠶᠠᠭᠳᠠᠭᠰᠠᠨ ᠬᠤᠭᠤᠴᠠᠭ᠎ᠠ ᠬᠤᠭᠤᠷᠤᠨᠳᠤ ᠪᠠᠨ ᠪᠠᠷᠤᠭ 20 — 40 ᠵᠢᠯ ᠤᠨ ᠵᠠᠢ ᠲᠠᠢ ᠪᠠᠶᠢᠨ᠎ᠠ᠃ ᠭᠤᠨᠴᠤᠭᠳᠣᠮᠢ ᠴᠦ ᠰᠤᠳᠤᠷ ᠵᠣᠬᠢᠶᠠᠭᠳᠠᠬᠤ ᠦᠶ᠎ᠡ ᠶᠢᠨ ᠬᠥᠮᠥᠨ ᠪᠠᠶᠢᠬᠤ ᠪᠣᠯᠤᠨ᠎ᠠ᠃ ᠥᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ ᠭᠤᠨᠴᠤᠭᠳᠤᠮᠢ ᠪᠣᠯ 19 ᠳ᠋ᠤᠭᠡᠷ ᠵᠠᠭᠤᠨ ᠤ ᠳᠤᠮᠳᠠᠴᠢ ᠦᠶ᠎ᠡ ᠶᠢᠨ ᠰᠢᠯᠤᠭᠤᠨ ᠬᠥᠬᠡ ᠬᠤᠰᠢᠭᠤᠨ ᠤ ᠬᠥᠮᠥᠨ ᠠᠵᠠᠢ᠃       ︵ᠬᠤᠶᠠᠷ︶ ᠰᠤᠳᠤᠷ ᠲᠤ ᠲᠠᠬᠢᠯᠭ᠎ᠠ ᠶᠢ ᠶᠠᠭᠠᠬᠢᠵᠤ ᠪᠢᠴᠢᠭᠰᠡᠨ ᠪᠣᠢ︖        ᠮᠣᠭᠠᠶᠢᠲᠤ ᠶᠢᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠲᠤ ︽ᠮᠣᠭᠠᠶᠢᠲᠤ ᠶᠢᠨ ᠬᠠᠨ ᠠᠭᠤᠯᠠ  ᠶᠢᠨ ᠰᠠᠩ ᠰᠡᠷᠵᠢᠮ ᠬᠡᠮᠡᠭᠳᠡᠬᠦ ᠣᠷᠤᠰᠢᠪᠠᠢ︾ ᠪᠠ ︽ᠶᠡᠭᠡ ᠯᠾᠡᠶ᠋ᠢᠭᠧᠨᠢᠨ ᠤ ᠵᠠᠯᠪᠠᠷᠢᠯ ᠲᠠᠬᠢᠯ ᠬᠡᠮᠡᠭᠴᠢ ᠣᠷᠤᠰᠢᠪᠠᠢ︾ ᠭᠡᠳᠡᠭ ᠬᠤᠶᠠᠷ ᠰᠤᠳᠤᠷ ᠪᠣᠢ᠃ ︽ᠰᠠᠩ ᠰᠡᠷᠵᠢᠮ ᠬᠡᠮᠡᠭᠳᠡᠬᠦ ᠣᠷᠤᠰᠢᠪᠠᠢ︾ ᠳᠤ ᠡᠬᠢᠯᠡᠭᠡᠳ᠂ ︽ᠡᠷᠳᠡ ᠴᠠᠭ ᠲᠤ ᠪᠠᠶᠠᠷ ᠤᠨ ᠴᠠᠭᠠᠨ ᠵᠦᠭ ᠢ ᠰᠠᠬᠢᠭᠴᠢ ᠳᠦᠷᠰᠦ ᠦᠭᠡᠢ ᠲᠦᠮᠡᠨ ᠪᠣᠳᠠᠰ ᠤᠨ ᠣᠮᠤᠭ ᠤᠨ ᠴᠢᠭᠤᠯᠭᠠᠨ ᠨᠠᠢᠮᠠᠨ ᠶᠡᠭᠡ ᠯᠤᠤᠰ ᠪᠠ ᠳᠥᠷᠪᠡᠨ ᠢᠵᠠᠭᠤᠷ ᠯᠤᠤᠰ ᠰᠣᠯᠣᠨ ᠪᠠᠷᠭᠤ ᠨᠤᠲᠤᠭ ᠤᠨ ᠣᠢ ᠰᠢᠭᠤᠢ ᠬᠢᠭᠡᠳ ᠶᠡᠭᠡ ᠬᠠᠨ ᠠᠭᠤᠯᠠ ᠵᠡᠷᠭᠡ ᠶᠢᠨ ᠠᠭᠤᠯᠠ ᠬᠠᠳᠠ ᠳᠠᠯᠠᠢ ᠪᠤᠯᠠᠭ ᠭᠤᠷᠤᠬ᠎ᠠ ᠮᠥᠷᠡᠨ ᠭᠤᠣᠯ ᠬᠡᠳᠦᠢ ᠴᠢᠨᠡᠭᠡᠨ ᠲᠡᠳᠡᠭᠡᠷ ᠪᠦᠬᠦᠨ᠎ᠡ ᠣᠷᠤᠰᠢᠭᠴᠢ ᠭᠠᠵᠠᠷ ᠤᠨ ᠡᠵᠡᠨ ᠯᠤᠤᠰ ᠢ ᠪᠢ ᠪᠠᠷ ᠲᠠᠬᠢᠵᠤ ᠤᠷᠢᠮᠤ ᠡᠨᠡ ᠣᠷᠤᠨ᠎ᠠ ᠮᠣᠷᠢᠯᠠᠭᠲᠤᠨ︾ ᠬᠡᠮᠡᠮᠣᠢ᠃ ᠳᠠᠷᠠᠭ᠎ᠠ ᠨᠢ ︽ᠴᠠᠭᠠᠨ ᠢᠮᠠᠭ᠎ᠠ᠂ ᠤᠯᠠᠭᠠᠨ ᠦᠨᠢᠶᠡᠨ ᠤ ᠰᠦ︾᠂ ︽ᠵᠠᠭᠤᠨ ᠠᠮᠲᠠᠲᠤ ᠰᠠᠶᠢᠨ ᠢᠳᠡᠭᠡᠨ︾᠂ ︽ᠢᠷᠠᠭᠤ ᠬᠥᠭᠵᠢᠮ︾᠂ ︽ᠰᠠᠶᠢᠨ ᠡᠮ︾᠂ ︽ᠮᠠᠩᠨᠤᠭ ᠲᠣᠷᠭ᠎ᠠ᠂ ᠬᠢᠲᠠᠳ ᠴᠠᠢ︾ ᠡᠷᠭᠦᠵᠦ᠂ ︽ᠲᠦᠯᠡᠭᠰᠡᠨ ᠤᠲᠤᠭᠠᠨ ᠤ ᠡᠭᠦᠯᠡ︾ ᠪᠠᠷ ᠠᠷᠢᠭᠤᠯᠠᠮᠤ᠂ ︽ᠳᠡᠭᠡᠲᠦ ᠲᠥᠷᠥᠯᠬᠢᠲᠡᠨ ᠪᠠᠶᠠᠰᠤᠨ ᠵᠣᠭᠤᠭᠯᠠ︾ ᠭᠡᠵᠡᠢ᠃ ᠵᠠᠯᠭᠠᠭᠠᠳ᠄ ︽ᠡᠨᠡ ᠣᠷᠤᠨ ᠵᠦᠭ ᠲᠤ ᠬᠥᠮᠥᠨ ᠮᠠᠯ ᠤᠨ ᠬᠢᠵᠢᠭ ᠤᠰᠤᠨ ᠤ ᠬᠠᠪᠤᠩ ᠬᠥᠯ ᠤᠨ ᠪᠠᠮ ᠬᠠᠪᠤᠳᠠᠷ ᠶᠠᠷ᠎ᠠ ᠯᠤᠤᠰ ᠨᠢᠶᠠᠨ ᠤ ᠡᠭᠦᠰᠬᠡᠭᠰᠡᠨ ᠡᠪᠡᠳᠴᠢᠨ ᠠᠳᠠ ᠲᠦᠢᠳᠬᠡᠷ ᠢ ᠣᠳᠤ ᠠᠴᠠ ᠡᠬᠢᠯᠡᠵᠦ ᠨᠡᠷ᠎ᠡ ᠶᠢᠨ ᠲᠡᠳᠦᠢ ᠴᠦ ᠦᠭᠡᠢ ᠪᠣᠯᠭ᠎ᠠ ᠴᠠᠭ ᠲᠠᠭᠠᠨ ᠬᠤᠷ᠎ᠠ ᠪᠠᠭᠤᠵᠤ ᠲᠠᠷᠢᠶ᠎ᠠ ᠲᠥᠮᠥᠰᠦ ᠰᠠᠶᠢᠨ ᠮᠣᠳᠤ ᠰᠢᠭᠤᠢ ᠦᠷ᠎ᠡ ᠵᠢᠮᠢᠰ ᠤᠭᠤᠭᠤᠳᠠ ᠪᠣᠯᠪᠠᠰᠤᠷᠠᠵᠤ ᠦᠵᠡᠰᠬᠦᠯᠡᠩ ᠡᠬᠡᠨᠡᠷ ᠤᠨ ᠰᠢᠮ᠎ᠡ ᠪᠦᠬᠦᠨ ᠲᠡᠶᠢᠨ ᠠᠷᠪᠢᠵᠢᠭᠰᠠᠨ ᠢᠶᠠᠷ ᠠᠮᠢᠲᠠᠨ ᠪᠦᠬᠦᠨ ᠬᠡᠵᠢᠶᠡᠳᠡ ᠠᠮᠤᠷ ᠢ ᠡᠳ᠋ᠯᠡᠬᠦ ᠪᠣᠯᠲᠤᠭᠠᠢ︾ ᠬᠡᠮᠡᠨ ᠳᠠᠭᠠᠳᠬᠠᠨ᠎ᠠ᠃      ᠲᠡᠭᠦᠰᠬᠡᠯ ᠤᠨ ᠦᠶ᠎ᠡ ᠳᠤ᠂ ᠠᠷᠢᠭᠤᠨ ᠤᠮᠳᠠᠭᠠᠨ ᠤ ᠳᠡᠭᠡᠵᠢ ᠰᠡᠷᠵᠢᠮ ᠢ ︽ᠯᠠᠮᠠ ᠢᠳᠡᠮ ᠪᠤᠷᠬᠠᠨ ᠪᠤᠳᠢᠰᠠᠳ᠋ᠸ᠎ᠠ︾᠂ ︽ᠪᠠᠭᠠᠲᠤᠷ ᠳᠠᠬᠢᠨᠢ ᠨᠣᠮ ᠢ ᠳᠡᠳᠬᠦᠨ ᠰᠠᠬᠢᠭᠴᠢᠳ︾᠂ ︽ᠯᠾᠡᠶ᠋ᠢᠭᠧᠨᠢᠨ ᠮᠠᠭᠪᠤᠨ ᠰᠡᠩᠭᠡ︾᠂ ︽ᠵᠠᠷᠯᠢᠭ ᠨᠣᠮ ᠤᠨ ᠰᠠᠬᠢᠭᠤᠰᠤ︾᠂ ︽ᠣᠮᠤᠭᠲᠤ ᠨᠠᠢᠮᠠᠨ ᠠᠶᠢᠮᠠᠭ︾ ᠲᠤ      ︽ᠵᠠᠯᠪᠠᠷᠢᠨ ᠲᠠᠬᠢᠬᠤ ᠠᠬᠤᠯ᠎ᠠ ᠳᠠᠭᠠᠳᠬᠠᠯ ᠢ ᠪᠦᠲᠦᠭᠡ︾ ᠭᠡᠳᠡᠭ᠃     ︽ᠵᠠᠯᠪᠠᠷᠢᠯ ᠲᠠᠬᠢᠯ ᠬᠡᠮᠡᠭᠴᠢ ᠣᠷᠤᠰᠢᠪᠠᠢ︾ ᠳᠤ ︽᠁ ᠶᠡᠭᠡ ᠯᠾᠡᠶ᠋ᠢᠭᠧᠨᠢᠨ ᠮᠠᠭᠪᠤᠨ ᠰᠡᠩᠭᠡ ᠶᠢᠨ ᠪᠡᠶ᠎ᠡ  ᠶᠢᠨ ᠥᠩᠭᠡ ᠴᠠᠭᠠᠨ ᠰᠢᠷᠭᠠᠯ᠂ ᠬᠢᠯᠢᠩ ᠪᠠᠶᠠᠷ ᠤᠨ ᠳᠦᠷᠢᠲᠤ᠂ ᠪᠡᠶ᠎ᠡ ᠳᠤᠷ ᠡᠷᠳᠡᠨᠢ ᠶᠢᠨ ᠬᠤᠶᠠᠭ ᠬᠢᠭᠡᠳ ᠲᠡᠷᠢᠭᠦᠨ᠎ᠡ ᠲᠣᠭᠤᠰ ᠤᠨ ᠥᠳᠥᠨ ᠪᠥᠭᠡᠷᠡᠩᠭᠡᠢ ᠳᠤᠭᠤᠯᠠᠭ᠎ᠠ ᠶᠢ ᠵᠣᠭᠤᠭᠯᠠᠵᠤ᠂ ᠪᠠᠷᠠᠭᠤᠨ᠎ᠠ ᠪᠠᠷᠰ ᠤᠨ ᠵᠣᠭᠳᠤᠷ᠂ ᠵᠡᠭᠦᠨ᠎ᠡ ᠢᠷᠪᠢᠰ ᠤᠨ ᠬᠤᠶᠠᠭ ᠢ ᠵᠡᠭᠦᠭᠦ ᠵᠡᠷᠭᠡ ᠪᠠᠭᠠᠲᠤᠷ ᠤᠨ ᠤᠭᠤᠭᠤᠳᠠ ᠪᠦᠷᠢᠨ᠂ ᠪᠠᠷᠠᠭᠤᠨ ᠮᠣᠲᠤᠷ ᠲᠠᠭᠠᠨ ᠢᠯᠳᠦ ᠳᠠᠯᠠᠶᠢᠵᠤ᠂ ᠵᠡᠭᠦᠨ ᠮᠤᠲᠤᠷ ᠲᠠᠭᠠᠨ ᠳᠠᠯᠪᠠᠭᠠᠲᠤ ᠵᠢᠳᠠ ᠶᠢ ᠪᠠᠷᠢᠭᠠᠳ᠂ ᠤᠯᠠᠭᠠᠨ ᠪᠤᠯᠭᠠᠷᠢ ᠶᠢᠨ ᠭᠤᠲᠤᠯ ᠡᠮᠦᠰᠴᠦ᠂ ᠬᠤᠶᠠᠷ ᠥᠯᠮᠡᠢ ᠵᠢᠪᠬᠤᠯᠠᠩ ᠤᠨ ᠪᠠᠶᠢᠳᠠᠯ ᠲᠠᠢ ᠥᠭᠡᠳᠡ ᠠᠴᠠ ᠨᠢ ᠬᠠᠷᠠᠵᠤ ᠪᠠᠶᠢᠭ᠎ᠠ ᠠᠷᠰᠯᠠᠨ ᠤ ᠨᠢᠷᠤᠭᠤᠨ ᠳᠡᠭᠡᠷ᠎ᠡ ᠣᠷᠤᠰᠢᠪᠠᠢ᠃ ᠲᠡᠭᠦᠨ ᠤ ᠳᠥᠷᠪᠡᠨ ᠵᠦᠭ ᠲᠤ ᠳᠣᠷᠤᠨ᠎ᠠ ᠠᠨᠤ ᠴᠠᠭᠠᠨ ᠥᠩᠭᠡᠲᠦ ᠯᠾᠡᠶ᠋ᠢᠭᠧᠨᠢᠨ᠂ ᠪᠠᠷᠠᠭᠤᠨ᠎ᠠ ᠬᠦᠷᠲᠤ ᠪᠠ ᠵᠡᠭᠦᠨ᠎ᠡ ᠸᠴᠢᠷ ᠴᠠᠯᠮ᠎ᠠ ᠭᠤᠬ᠎ᠠ ᠵᠡᠷᠭᠡ ᠶᠢ ᠪᠠᠷᠢᠵᠤ ᠴᠠᠭᠠᠨ ᠮᠣᠷᠢ ᠤᠨᠤᠭᠰᠠᠨ᠂ ᠡᠮᠦᠨ᠎ᠡ ᠢᠨᠦ ᠰᠢᠷ᠎ᠠ ᠥᠩᠭᠡᠲᠦ ᠯᠾᠡᠶ᠋ᠢᠭᠧᠨᠢᠨ᠂ ᠪᠠᠷᠠᠭᠤᠨ᠎ᠠ ᠡᠷᠳᠡᠨᠢ ᠬᠢᠭᠡᠳ ᠵᠡᠭᠦᠨ᠎ᠡ ᠸᠴᠢᠷ ᠴᠡᠯᠮ᠎ᠠ ᠭᠤᠬ᠎ᠠ ᠵᠡᠷᠭᠡ ᠶᠢ ᠪᠠᠷᠢᠵᠤ ᠵᠢᠷᠤᠭ᠎ᠠ ᠮᠣᠷᠢ ᠤᠨᠤᠵᠤ᠂ ᠥᠷᠦᠨ᠎ᠡ ᠤᠯᠠᠭᠠᠨ ᠥᠩᠭᠡᠲᠦ ᠯᠾᠡᠶ᠋ᠢᠭᠧᠨᠢᠨ ᠪᠠᠷᠠᠭᠤᠨ᠎ᠠ ᠪᠢᠯᠠᠭᠤ ᠬᠢᠭᠡᠳ ᠵᠡᠭᠦᠨ᠎ᠡ ᠸᠴᠢᠷ ᠴᠡᠯᠮ᠎ᠠ ᠭᠤᠬ᠎ᠠ ᠵᠡᠷᠭᠡ ᠶᠢ ᠪᠠᠷᠢᠵᠤ ᠤᠯᠠᠭᠠᠨ ᠮᠣᠷᠢ ᠤᠨᠤᠭᠰᠠᠨ᠂ ᠤᠮᠠᠷ᠎ᠠ ᠨᠣᠭᠤᠭᠠᠨ ᠥᠩᠭᠡᠲᠦ ᠯᠾᠡᠶ᠋ᠢᠭᠧᠨᠢᠨ ᠪᠠᠷᠠᠭᠤᠨ᠎ᠠ ᠢᠯᠳᠦ ᠬᠢᠭᠡᠳ ᠵᠡᠭᠦᠨ᠎ᠡ ᠸᠴᠢᠷ ᠴᠡᠯᠮ᠎ᠠ ᠭᠤᠬ᠎ᠠ ᠵᠡᠷᠭᠡ ᠶᠢ ᠪᠠᠷᠢᠵᠤ ᠨᠣᠭᠤᠭᠠᠨ ᠮᠣᠷᠢ ᠤᠨᠤᠭᠰᠠᠨ᠂ ᠳᠡᠭᠡᠷ᠎ᠡ ᠳᠣᠣᠷ᠎ᠠ ᠡᠷᠭᠢᠨ ᠲᠣᠭᠤᠷᠢᠨ ᠳᠤ ᠲᠤᠭ᠎ᠠ ᠦᠭᠡᠢ ᠣᠯᠠᠨ ᠣᠮᠤᠭᠲᠤ ᠨᠠᠢᠮᠠᠨ ᠠᠶᠢᠮᠠᠭ ᠤᠨ ᠣᠯᠠᠨ ᠴᠡᠷᠢᠭ ᠡᠷᠭᠢᠴᠡᠭᠰᠡᠨ ᠲᠡᠳᠡᠭᠡᠷ ᠤᠨ ᠣᠷᠣᠢ ᠳᠤᠷ ᠴᠠᠭᠠᠨ ᠣᠮ᠂ ᠬᠦᠵᠦᠭᠦᠨ ᠳᠤᠷ ᠤᠯᠠᠭᠠᠨ ᠠ᠂ ᠵᠢᠷᠦᠬᠡᠨ ᠳᠤᠷ ᠬᠥᠬᠡ ᠾᠦᠩ ᠦᠰᠦᠭ ᠢᠶᠠᠷ ᠪᠡᠯᠭᠡᠳᠡᠪᠡᠢ︾᠃ ᠡᠨᠡᠬᠦ ᠯᠾᠡᠶ᠋ᠢᠭᠧᠨᠢᠨ ᠮᠠᠭᠪᠤᠨ ᠰᠡᠩᠭᠡ ᠪᠣᠯ ᠳᠠᠷᠤᠢ ᠮᠣᠭᠠᠶᠢᠲᠤ ᠶᠢᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠰᠠᠬᠢᠭᠤᠰᠤ ᠮᠥᠨ ᠭᠡᠵᠤ ᠪᠢ ᠦᠵᠡᠵᠦ ᠪᠣᠢ᠃     ᠲᠠᠬᠢᠯᠭ᠎ᠠ ᠶᠢᠨ ᠵᠢᠷᠤᠮ ᠢᠶᠠᠷ ᠦᠷᠭᠦᠯᠵᠢᠯᠡᠨ ᠶᠠᠪᠤᠭᠳᠠᠬᠤ ᠵᠦᠢᠯ ᠪᠦᠬᠦᠨ ᠢ ᠭᠦᠢᠴᠡᠳᠬᠡᠵᠦ᠂ ︽ᠶᠡᠭᠡ ᠡᠷᠬᠡᠲᠦ ᠯᠾᠡᠶ᠋ᠢᠭᠧᠨᠢᠨ ᠰᠡᠳᠬᠢᠯ ᠮᠠᠰᠢ ᠬᠠᠨᠤᠭᠲᠤᠨ ᠵᠢᠸ᠎ᠠ ᠪᠤᠮᠠᠨ ᠠᠶᠢᠮᠠᠭ ᠤᠨ ᠨᠥᠬᠦᠷ ᠰᠡᠯᠳᠠ ᠨᠢ ᠬᠠᠨᠤᠭᠲᠤᠨ ᠰᠡᠳᠬᠢᠯ ᠮᠠᠰᠢ ᠬᠠᠨᠤᠭᠠᠳ ᠳᠣᠷᠣᠶᠢᠲᠠᠯ ᠪᠠᠭᠤᠷᠠᠯ ᠢ ᠰᠡᠷᠭᠦᠭᠡᠵᠦ ᠶᠡᠭᠦᠵᠡᠷ ᠪᠠᠭᠰᠢ ᠱᠠᠪᠢ ᠮᠠᠨ ᠤ ᠶᠠᠪᠤᠳᠠᠯ ᠢ ᠰᠠᠶᠢᠲᠤᠷ ᠪᠦᠲᠦᠭᠡᠨ ᠪᠤᠷᠬᠠᠨ ᠱᠠᠰᠢᠨ ᠢ ᠥᠨᠢ ᠡᠭᠦᠷᠢᠳᠡ ᠳᠡᠯᠭᠡᠷᠡᠭᠦᠯᠦᠨ ᠵᠣᠬᠢᠶᠠ︾ ᠬᠡᠮᠡᠨ ᠳᠠᠭᠠᠳᠬᠠᠨ᠎ᠠ᠃ ᠲᠡᠭᠦᠰᠬᠡᠯ ᠤᠨ ᠦᠶ᠎ᠡ ᠳᠤ ︽ᠲᠡᠷᠡ ᠮᠡᠲᠦ ᠲᠠ ᠨᠠᠷ ᠢ ᠲᠠᠬᠢᠬᠤ ᠪᠥᠭᠡᠳ ᠮᠠᠭᠲᠠᠪᠠᠰᠤ ᠰᠣᠯᠣᠨ ᠪᠠᠷᠭᠤ ᠬᠡᠮᠡᠬᠦ ᠦᠵᠡᠰᠬᠦᠯᠡᠩᠲᠦ ᠡᠨᠡ ᠣᠷᠤᠨ᠎ᠠ ᠮᠠᠭᠤ ᠵᠦᠢᠯᠡᠰ ᠠᠷᠢᠯᠵᠤ ᠰᠠᠶᠢᠨ ᠤ ᠶᠠᠪᠤᠳᠠᠯ ᠳᠡᠯᠭᠡᠷᠡᠨ ᠨᠣᠮ ᠲᠥᠷᠥ ᠪᠠᠯᠠᠷᠠᠰᠢ ᠦᠭᠡᠢ ᠵᠣᠨ ᠤ ᠳᠠᠯᠠᠢ ᠠᠷᠪᠢᠵᠢᠭᠲᠤᠨ ᠢᠯᠠᠩᠭᠤᠶ᠎ᠠ ᠬᠥᠯᠥ ᠬᠥᠬᠡ ᠨᠡᠷᠡᠲᠦ ᠡᠨᠡ ᠬᠤᠰᠢᠭᠤᠨ ᠤ ᠨᠣᠶᠠᠳ ᠨᠠᠷ ᠨᠢ ᠬᠤᠶᠠᠷ ᠶᠣᠰᠤᠨ ᠤ ᠠᠪᠬᠤ ᠣᠷᠬᠢᠬᠤ ᠳᠤ ᠮᠡᠷᠭᠡᠨ ᠡᠭᠡᠯ ᠠᠷᠠᠳ ᠨᠢ ᠪᠣᠯᠪᠠᠴᠤ ᠶᠡᠬᠡᠰ ᠳᠡᠭᠡᠳᠦ ᠪᠣᠯᠬᠤ ᠦᠶᠡᠰ ᠬᠤᠸᠠᠷᠠᠭ ᠤᠨ ᠰᠡᠳᠬᠢᠯ ᠵᠣᠬᠢᠯᠳᠤᠨ ᠨᠤᠮ ᠤᠨ ᠶᠠᠪᠤᠳᠠᠯ ᠠᠷᠪᠢᠵᠢᠭᠲᠤᠨ ᠤᠯᠤᠰ ᠣᠷᠤᠨ᠎ᠠ ᠡᠪᠡᠳᠴᠢᠨ ᠭᠠᠮᠰᠢᠭ ᠬᠡᠷᠡᠭᠦᠯ ᠮᠠᠷᠭᠤᠭᠠᠨ ᠬᠢᠷᠠᠭᠤ ᠮᠥᠨᠳᠦᠷ ᠭᠠᠩ ᠬᠠᠭᠰᠠᠷᠭᠠᠨ ᠭᠠᠷᠬᠤ ᠦᠭᠡᠢ ᠴᠠᠭᠠᠲᠤ ᠳᠠᠶᠢᠰᠤᠨ ᠤ ᠬᠡᠵᠢᠶᠡᠳᠡ ᠥᠯᠥ ᠬᠤᠣᠷᠯᠠᠬᠤ ᠶᠢᠰᠦᠨ ᠬᠦᠰᠡᠯ ᠤᠨ ᠰᠠᠶᠢᠨ ᠪᠤᠶᠠᠨ ᠢ ᠪᠦᠲᠦᠭᠡᠨ ᠳᠡᠯᠭᠡᠷᠡᠭᠦᠯ ᠲᠣᠪᠴᠢᠯᠠᠪᠠᠰᠤ ᠪᠢᠳᠠ ᠪᠠ ᠥᠭᠯᠢᠭᠡ ᠪᠤᠶᠠᠨ ᠤ ᠡᠵᠡᠳ ᠨᠠᠷ ᠤᠨ ᠲᠡᠩᠴᠡᠰᠢ ᠦᠭᠡᠢ ᠳᠥᠷᠪᠡᠨ ᠵᠦᠢᠯ ᠤᠨ ᠦᠢᠯᠡᠰ ᠶᠠᠪᠤᠳᠠᠯ ᠨᠢ ᠰᠠᠨᠠᠭᠰᠠᠨ ᠶᠣᠰᠤᠭᠠᠷ ᠠᠶᠠᠨᠳᠠᠭᠠᠨ ᠮᠠᠰᠢ ᠰᠠᠶᠢᠲᠤᠷ ᠪᠦᠲᠦᠬᠦ ᠥᠯᠵᠡᠢ ᠪᠠᠶᠠᠷ ᠢ ᠠᠷᠪᠠᠨ ᠵᠦᠭ ᠲᠤ ᠳᠡᠯᠭᠡᠷᠡᠭᠦᠯᠦᠨ ᠵᠣᠬᠢᠶᠠ︾᠃ ᠭᠡᠰᠢᠭ ᠳᠠᠯᠠᠯᠭ᠎ᠠ ᠬᠤᠷᠤᠶᠢᠯᠠᠨ᠎ᠠ᠃    ᠭᠤᠷᠪᠡ᠂ ᠳᠠᠭ᠎ᠠ ᠶᠢᠨ ᠳᠡᠯ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠤᠨ ᠲᠤᠬᠠᠢ ᠥᠭᠦᠯᠡᠬᠦ ᠨᠢ᠄    ︵ᠨᠢᠭᠡ︶ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠤᠨ ᠵᠣᠬᠢᠶᠠᠭᠰᠠᠨ ᠴᠠᠭ ᠦᠶ᠎ᠡ ᠪᠠ ᠵᠣᠬᠢᠶᠠᠭᠰᠠᠨ ᠬᠥᠮᠥᠨ     ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠤᠨ ᠰᠡᠭᠦᠯ ᠳᠤ ᠡᠶᠢᠮᠦ ᠨᠢᠭᠡᠨ ᠲᠡᠮᠳᠡᠭᠯᠡᠯ ᠪᠣᠢ᠃ ︽ᠪᠠᠷᠭᠤ ᠶᠢᠨ ᠬᠥᠪᠡᠭᠡᠲᠦ ᠴᠠᠭᠠᠨ ᠬᠤᠰᠢᠭᠤᠨ ᠤ ᠶᠡᠭᠡ ᠰᠠᠪᠳᠠᠭ ᠳᠠᠭ᠎ᠠ ᠶᠢᠨ ᠳᠡᠯ ᠭᠡᠵᠤ ᠠᠯᠳᠠᠷ ᠨᠡᠷ᠎ᠡ ᠭᠠᠷᠤᠭᠴᠢ ᠡᠭᠦᠨ ᠤ ᠢᠯᠡᠷᠬᠡᠢ ᠣᠨᠤᠯ ᠬᠠᠨᠤᠯ ᠨᠠᠮᠠᠨᠴᠢᠯᠠᠯ᠂ ᠦᠢᠯᠡᠰ ᠤᠨ ᠳᠠᠭᠠᠳᠬᠠᠯ ᠵᠡᠷᠭᠡ ᠦᠯᠥ ᠵᠣᠬᠢᠯᠳᠤᠬᠤ  ᠶᠢᠨ ᠬᠠᠷᠠᠩᠭᠤᠢ ᠶᠢ ᠠᠷᠢᠯᠭᠠᠭᠴᠢ ᠰᠢᠳᠢᠰ ᠤᠨ ᠨᠠᠷᠠ ᠬᠡᠮᠡᠭᠳᠡᠬᠦ ᠡᠭᠦᠨ ᠢ ᠮᠢᠨᠦ ᠥᠪᠡᠷ ᠤᠨ ᠠᠴᠢᠲᠤ ᠢᠵᠠᠭᠤᠷ ᠤᠨ ᠯᠠᠮᠠ ᠢᠨᠠᠭ ᠪᠠᠭᠰᠢ ᠬᠠᠮᠪᠤ ᠡᠷᠳᠡᠨᠢ ᠮᠡᠷᠭᠡᠨ ᠪᠠᠨᠳᠢᠳᠠ ᠶᠢᠨ ᠨᠣᠮ ᠢ ᠦᠨᠳᠦᠰᠦᠯᠡᠵᠦ᠂ ᠥᠪᠡᠷ ᠤᠨ ᠣᠶᠤᠨ ᠳᠤ ᠠᠯᠢ ᠲᠥᠷᠥᠭᠳᠡᠭᠰᠡᠨ ᠢᠶᠠᠨ ᠦᠰᠦᠭ ᠢᠶᠠᠷ ᠴᠢᠮᠡᠵᠦ᠂ ᠪᠢᠮᠪᠠᠼᠧᠩᠳᠡ ᠪᠠᠷ ᠣᠯᠠᠨ ᠠᠮᠢᠲᠠᠨ᠎ᠠ ᠲᠤᠰᠠᠯᠠᠬᠤ ᠶᠢ ᠪᠣᠳᠤᠵᠤ ᠨᠠᠶᠢᠷᠠᠭᠤᠯᠪᠠ᠃ ᠡᠭᠦᠨ ᠢ ᠪᠢᠴᠢᠭᠰᠡᠨ ᠨᠢ ᠱᠠᠪᠷᠤᠩ ᠵᠢᠭᠮᠡᠳᠳᠠᠩᠽᠠᠨ ᠪᠤᠯᠠᠢ᠃ ᠡᠭᠦᠨ ᠢᠶᠠᠷ ᠥᠪᠡᠷ ᠪᠤᠰᠤᠳ ᠤᠨ ᠬᠦᠰᠡᠭᠰᠡᠨ ᠬᠡᠷᠡᠭ ᠪᠦᠲᠦᠬᠦ ᠪᠣᠯᠲᠤᠭᠠᠢ︾ ᠭᠡᠰᠡᠨ ᠪᠠᠶᠢᠳᠠᠭ᠃ ᠪᠢᠳᠡ ᠡᠨᠡᠬᠦ ᠲᠡᠮᠳᠡᠭᠯᠡᠯ ᠢᠶᠠᠷ ᠰᠦᠪᠡᠭᠴᠢ ᠪᠣᠯᠭᠠᠵᠤ ᠳᠠᠭ᠎ᠠ ᠶᠢᠨ ᠳᠡᠯ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠤᠨ ᠵᠣᠬᠢᠶᠠᠭᠳᠠᠭᠰᠠᠨ ᠴᠠᠭ ᠦᠶ᠎ᠡ ᠪᠠ ᠵᠣᠬᠢᠶᠠᠭᠰᠠᠨ ᠬᠥᠮᠥᠨ ᠢ ᠣᠯᠵᠤ ᠮᠡᠳᠡᠵᠦ ᠪᠣᠯᠤᠨ᠎ᠠ᠃    ᠠᠳᠡ ᠳᠤᠷᠠᠳᠴᠤ ᠪᠠᠶᠢᠭ᠎ᠠ ︽ᠬᠠᠮᠪᠤ ᠡᠷᠳᠡᠨᠢ ᠮᠡᠷᠭᠡᠨ ᠪᠠᠨᠳᠢᠳᠠ︾ ᠪᠠ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠲᠤ ᠭᠠᠷᠴᠤ ᠪᠠᠶᠢᠭ᠎ᠠ ︽ᠡᠷᠳᠡᠨᠢ ᠪᠠᠨᠳᠢᠳᠠ ᠶᠢᠨ ᠴᠣᠯᠠ ᠶᠢ ᠬᠠᠮᠠᠭᠠᠯᠠᠭᠰᠠᠨ︾ ᠬᠥᠮᠥᠨ ᠪᠣᠯ ᠨᠢᠭᠡ ᠬᠥᠮᠥᠨ ᠮᠥᠨ᠃ ᠥᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ ᠫᠤᠩᠴᠤᠭᠨᠠᠮᠵᠢᠯ ᠪᠣᠯᠤᠨ᠎ᠠ᠃ ᠱᠠᠪᠷᠤᠩ ᠵᠢᠭᠮᠡᠳᠳᠠᠩᠽᠠᠨ ︽ᠢᠨᠠᠭ ᠪᠠᠭᠰᠢ ᠬᠠᠮᠪᠤ ᠡᠷᠳᠡᠨᠢ ᠮᠡᠷᠭᠡᠨ ᠪᠠᠨᠳᠢᠳᠠ ᠶᠢᠨ ᠨᠣᠮ ᠢ ᠦᠨᠳᠦᠰᠦᠯᠡᠵᠦ︾ ᠭᠡᠳᠡᠭ ᠨᠢ ᠬᠡᠷᠡᠭ ᠳᠡᠭᠡᠷ᠎ᠡ ᠪᠠᠨ ᠫᠤᠩᠴᠤᠭᠨᠠᠮᠵᠢᠯ ᠤᠨ ︽ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ︾ ᠢ ᠦᠨᠳᠦᠰᠦᠯᠡᠵᠦ ᠭᠡᠰᠡᠨ ᠦᠭᠡ ᠭᠡᠵᠤ ᠪᠢ ᠦᠵᠡᠵᠦ ᠪᠠᠶᠢᠨ᠎ᠠ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠳᠠᠯᠠᠩᠭᠤᠳ ᠭᠦᠪᠡᠷᠢ ᠶᠢᠨ ︽ᠪᠣᠭᠳᠠ ᠠᠭᠤᠯᠠ ᠶᠢᠨ ᠣᠩᠭᠤ ᠳᠠᠭᠤᠳᠠᠯᠭ᠎ᠠ︾ ᠭᠡᠬᠦ ᠥᠭᠦᠯᠡᠯ ᠳᠤ ︽ᠳᠠᠷᠬᠠᠨ ᠰᠦᠮᠪᠦᠷ ᠬᠠᠨ ᠤ ᠳᠡᠭᠦᠦ᠂ ᠳᠠᠭ᠎ᠠ ᠶᠢᠨ ᠳᠡᠯ ᠠᠭᠤᠯᠠ ᠮᠢᠨᠢ︾᠂ ︽ᠳᠡᠭᠡᠳᠦ ᠲᠡᠭᠷᠢ ᠶᠢᠨ ᠬᠤᠪᠢ ᠵᠣᠬᠢᠶᠠᠯ ᠢᠶᠠᠷ ᠳᠡᠯ ᠠᠭᠤᠯᠠ ᠳᠡᠭᠦᠦ ᠨᠠᠷ ᠲᠠᠢ︾ ᠭᠡᠵᠤ ᠳᠤᠷᠠᠳᠴᠤ ᠪᠠᠶᠢᠭ᠎ᠠ ᠪᠥᠭᠡᠳ ᠪᠠᠰᠠ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ ᠪᠣᠯᠤᠨ ᠳᠠᠭ᠎ᠠ ᠶᠢᠨ ᠳᠡᠯ ᠠᠭᠤᠯᠠ ᠶᠢ ᠠᠬ᠎ᠠ ᠳᠡᠭᠦᠦ ᠬᠤᠶᠠᠷ ᠠᠭᠤᠯᠠ ᠶᠤᠮ ᠭᠡᠳᠡᠭ ᠶᠠᠷᠢᠶ᠎ᠠ ᠠᠷᠠᠳ ᠤᠨ ᠳᠤᠮᠳᠠ ᠤᠯᠠᠮᠵᠢᠯᠠᠭᠳᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠢᠯᠡ᠃ ᠢᠩᠭᠢᠵᠦ ᠲᠦᠯᠬᠢᠨ ᠪᠣᠳᠤᠪᠠᠯ ᠱᠠᠪᠷᠤᠩ ᠵᠢᠭᠮᠡᠳᠳᠠᠩᠽᠠᠨ ᠪᠠᠭᠰᠢ ᠫᠤᠩᠴᠤᠭᠨᠠᠮᠵᠢᠯ ᠤᠨ ᠵᠣᠬᠢᠶᠠᠭᠰᠠᠨ ᠲᠠᠬᠢᠯᠭ᠎ᠠ  ᠶᠢᠨ ᠰᠤᠳᠤᠷ ᠢ ᠦᠨᠳᠦᠰᠦᠯᠡᠵᠦ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠳᠡᠭᠦᠦ ᠠᠭᠤᠯᠠ ᠳᠠᠭ᠎ᠠ ᠶᠢᠨ ᠳᠡᠯ ᠠᠭᠤᠯᠠᠨ  ᠳᠤ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠵᠣᠬᠢᠶᠠᠵᠤ ᠥᠭᠪᠡ ᠭᠡᠳᠡᠭ ᠢ ᠢᠲᠡᠭᠡᠬᠦ ᠦᠭᠡᠢ ᠪᠠᠶᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ᠃ ᠱᠠᠪᠷᠤᠩ ᠵᠢᠭᠮᠡᠳᠳᠠᠩᠽᠠᠨ ᠢ ᠬᠥᠪᠡᠭᠡᠲᠦ ᠴᠠᠭᠠᠨ ᠬᠤᠰᠢᠭᠤᠨ ᠤ ᠬᠥᠮᠥᠨ ᠭᠡᠳᠡᠭ ᠶᠠᠷᠢᠶ᠎ᠠ ᠴᠦ ᠪᠠᠶᠢᠳᠠᠭ᠃ ᠲᠤᠰ ᠬᠥᠮᠥᠨ 1832 ᠣᠨ ᠳᠤ ᠵᠣᠬᠢᠶᠠᠭᠳᠠᠭᠰᠠᠨ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠤᠨ ᠳᠠᠷᠠᠭ᠎ᠠ ᠳᠠᠭ᠎ᠠ ᠶᠢᠨ ᠳᠡᠯ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ ᠵᠣᠬᠢᠶᠠᠭᠰᠠᠨ ᠪᠣᠯᠬᠤᠷ 19 ᠳ᠋ᠤᠭᠡᠷ ᠵᠠᠭᠤᠨ ᠤ ᠳᠤᠮᠳᠠᠴᠢ ᠦᠶ᠎ᠡ ᠪᠠᠷ ᠠᠮᠢᠳᠤᠷᠠᠵᠤ ᠪᠠᠶᠢᠭᠰᠠᠨ ᠬᠥᠮᠥᠨ ᠪᠠᠶᠢᠵᠤ ᠲᠠᠭᠠᠷᠠᠨ᠎ᠠ᠃    ︵ᠬᠤᠶᠠᠷ︶ ᠰᠤᠳᠤᠷ ᠲᠤ ᠲᠠᠬᠢᠯᠭ᠎ᠠ ᠶᠢ ᠶᠠᠭᠠᠬᠢᠵᠤ ᠪᠢᠴᠢᠭᠰᠡᠨ ᠪᠣᠢ︖     ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠢ ︽ᠶᠡᠭᠡ ᠴᠢᠳᠠᠯᠲᠤ ᠰᠠᠪᠳᠠᠭ ᠪᠣᠯᠬᠤ ᠳᠠᠭ᠎ᠠ ᠶᠢᠨ ᠳᠡᠯ ᠤᠨ ᠬᠠᠨᠤᠯ ᠨᠠᠮᠠᠨᠴᠢᠯᠠᠯ ᠦᠯᠦ ᠵᠣᠬᠢᠬᠤ ᠬᠠᠷᠠᠩᠭᠤᠢ ᠶᠢ ᠠᠷᠢᠯᠭᠠᠭᠴᠢ ᠰᠢᠳᠢ ᠶᠢᠨ ᠨᠠᠷᠠ︾ ᠬᠡᠮᠡᠵᠡᠢ᠃ ᠡᠬᠢᠯᠡᠭᠡᠳ ︽ᠠᠳᠡ ᠤᠮᠠᠷ᠎ᠠ ᠵᠦᠭ ᠤᠨ ᠶᠡᠭᠡ ᠰᠠᠪᠳᠠᠭ ᠳᠠᠭ᠎ᠠ ᠶᠢᠨ ᠳᠡᠯ ᠭᠡᠵᠤ ᠶᠡᠭᠡ ᠠᠯᠳᠠᠷ ᠮᠠᠨᠳᠤᠭᠰᠠᠨ ᠡᠭᠦᠨ  ᠤ ᠢᠯᠡᠷᠬᠡᠢ ᠣᠨᠤᠯ ᠬᠠᠨᠤᠯ ᠨᠠᠮᠠᠨᠴᠢᠯᠠᠯ᠂ ᠦᠢᠯᠡᠰ ᠤᠨ ᠳᠠᠷᠠᠭᠠᠯᠠᠯ ᠢ ᠪᠢᠴᠢᠬᠦ ᠳᠤ ᠬᠠᠮᠤᠭ ᠲᠡᠷᠢᠭᠦᠨ ᠳᠤ ᠭᠤᠷᠪᠠᠨ ᠳᠠᠪᠬᠤᠷ ᠵᠤᠤᠬ᠎ᠠ ᠪᠠᠵᠠᠭᠠᠵᠤ᠂ ᠲᠡᠭᠦᠨ ᠤ ᠳᠡᠭᠡᠷ᠎ᠡ ᠲᠠᠬᠢᠯ ᠲᠠᠯᠪᠢᠨ᠎ᠠ᠃ ᠨᠢᠭᠡᠳᠦᠭᠡᠷ ᠳᠠᠪᠬᠤᠷ ᠲᠤ ᠳᠥᠷᠪᠡᠨ ᠢᠳᠡᠭᠡᠨ᠂ ᠬᠤᠶᠠᠳᠤᠭᠠᠷ ᠲᠤ ᠭᠤᠯᠢᠷ ᠢᠶᠠᠷ ᠬᠢᠭᠰᠡᠨ ᠵᠤᠯᠠ ᠶᠢ ᠲᠠᠪᠤ ᠪᠠ ᠲᠣᠭᠤᠷᠢᠭᠤᠯᠤᠭᠠᠳ ᠦᠴᠦᠬᠡᠨ ᠲᠣᠰᠤᠨ ᠷᠢᠯᠦ ᠶᠢ ᠲᠠᠯᠪᠢᠨ᠎ᠠ᠃ ᠭᠤᠷᠪᠠᠳᠤᠭᠠᠷ ᠲᠤ ᠠᠷᠪᠠᠨ ᠬᠤᠶᠠᠷ ᠷᠢᠯᠤ ᠶᠢᠨ ᠲᠠᠬᠢᠯ ᠢ ᠲᠠᠯᠪᠢᠵᠤ᠂ ᠲᠡᠭᠦᠨ ᠤ ᠭᠠᠳᠠᠭᠤᠷ ᠠᠯᠢ ᠡᠷᠭᠡᠶᠢᠪᠠᠴᠢ ᠶᠢᠨ ᠲᠠᠬᠢᠯ᠂ ᠡᠯᠳᠡᠪ ᠵᠦᠢᠯ ᠤᠨ ᠢᠳᠡᠭᠡᠨ ᠢ ᠥᠷᠦᠬᠦ᠂ ᠪᠠᠷᠠᠭᠤᠨ᠎ᠠ ᠡᠮ᠂ ᠵᠡᠭᠦᠨ᠎ᠡ ᠴᠢᠰᠤ᠂ ᠡᠮᠦᠨ᠎ᠡ ᠲᠠᠯ᠎ᠠ ᠳᠤᠨᠢ ᠰᠡᠷᠵᠢᠮ᠂ ᠲᠠᠩᠭᠠᠷᠢᠭ ᠤᠨ ᠡᠳ᠋ ᠲᠡᠷᠢᠭᠦᠲᠡᠨ ᠲᠠᠬᠢᠯ ᠪᠠᠯᠢᠩ ᠨᠤᠭᠤᠳ ᠢ ᠬᠤᠲᠠᠯᠠ ᠪᠦᠷᠢᠨ ᠪᠣᠯᠭᠠᠵᠤ ᠰᠠᠶᠢᠬᠠᠨ ᠪᠡᠯᠡᠳᠬᠡᠨ᠎ᠡ︾ ᠭᠡᠵᠡᠢ᠃     ︽ᠮᠣᠷᠢ᠂ ᠦᠬᠡᠷ᠂ ᠢᠮᠠᠭ᠎ᠠ᠂ ᠬᠤᠨᠢ ᠵᠡᠷᠭᠡ ᠪᠠᠶᠢᠪᠠᠯ ᠲᠦᠢᠳᠬᠡᠷ ᠢ ᠬᠥᠭᠡᠭᠡᠬᠦ ᠶᠢᠨ ᠲᠥᠯᠥᠭᠡ ᠲᠣᠷᠭ᠎ᠠ ᠳᠤᠷᠳᠤᠩ ᠤᠨ ᠵᠦᠢᠯ ᠢ ᠬᠦᠵᠦᠭᠦᠨ ᠳᠤᠨᠢ ᠤᠶᠠᠨ᠎ᠠ᠃ ᠬᠥᠭᠵᠢᠮ ᠤᠨ ᠵᠦᠢᠯ ᠢ ᠥᠷᠥᠵᠦ ᠲᠠᠯᠪᠢᠨ ᠁︾ ᠭᠡᠵᠡᠢ᠃    ᠳᠠᠷᠠᠭ᠎ᠠ ᠨᠢ ︽ᠠᠷᠢᠭᠤᠳᠬᠠᠬᠤ ᠲᠠᠷᠨᠢ︾᠂ ︽ᠠᠷᠪᠢᠵᠢᠬᠤ ᠲᠠᠷᠨᠢ︾᠂ ︽ᠷᠠᠰᠢᠶᠠᠨ ᠪᠣᠯᠭᠠᠬᠤ ᠲᠠᠷᠨᠢ︾᠂ ︽ᠬᠦᠰᠡᠯ ᠢ ᠪᠦᠲᠦᠭᠡᠬᠦ ᠲᠠᠷᠨᠢ︾᠂ ︽ᠪᠦᠭᠦᠳᠡ ᠶᠢ ᠣᠯᠬᠤ ᠲᠠᠷᠨᠢ︾᠂ ︽ᠰᠠᠴᠠᠭᠤ ᠣᠯᠬᠤ ᠲᠠᠷᠨᠢ︾ ᠬᠢᠨ᠎ᠡ᠃    ᠪᠠᠰᠠ ︽ᠴᠠᠭ ᠤᠨ ᠡᠴᠦᠰ ᠤᠨ ᠰᠠᠯᠬᠢᠨ ᠰᠢᠭ᠋ ᠠᠵᠢᠨᠠᠢ ᠬᠦᠯᠥᠭ ᠯᠠᠪᠠᠢ ᠶᠢᠨ ᠥᠩᠭᠡᠲᠦ᠂ ᠠᠯᠲᠠᠨ ᠡᠮᠡᠭᠡᠯ᠂ ᠮᠣᠭᠠᠢ ᠶᠢᠨ ᠬᠤᠳᠠᠷᠭ᠎ᠠ ᠬᠥᠮᠥᠯᠳᠦᠷᠭᠡ ᠪᠠ ᠬᠠᠵᠠᠭᠠᠷ ᠨᠣᠭᠲᠤ ᠬᠢᠭᠰᠡᠨ᠂ ᠳᠡᠯ ᠤᠨ ᠬᠠᠯᠬᠠᠪᠴᠢ ᠪᠣᠯᠤᠨ ᠭᠡᠳᠡᠰᠦᠨ  ᠤ ᠬᠠᠯᠬᠠᠪᠴᠢ ᠶᠢ ᠡᠷᠳᠡᠨᠢ ᠶᠢᠨ ᠴᠢᠮᠡᠭ ᠢᠶᠠᠷ ᠴᠢᠮᠡᠭᠯᠡᠭᠰᠡᠨ᠂ ᠲᠡᠭᠦᠨ ᠤ ᠳᠡᠭᠡᠷ᠎ᠡ ᠬᠦᠴᠦᠨ ᠴᠢᠳᠠᠯ ᠤᠨ ᠡᠷᠬᠡ ᠪᠠᠶᠠᠯᠢᠭ ᠰᠦᠯᠳᠡ ᠲᠡᠭᠷᠢ ᠶᠢᠨ ᠭᠤᠣᠯ ᠪᠣᠯᠬᠤ ᠳᠠᠭ᠎ᠠ ᠶᠢᠨ ᠡᠵᠡᠨ ᠤ ᠪᠡᠶ᠎ᠡ ᠲᠣᠳᠤᠷᠠᠭᠰᠠᠨ᠂ ᠬᠥᠮᠥᠰᠬᠡ ᠰᠠᠬᠠᠯ ᠨᠢ ᠤᠯᠠᠭᠠᠨ ᠰᠢᠷᠭᠠᠯ᠂ ᠭᠠᠯ ᠠᠳᠠᠯᠢ ᠪᠠᠳᠠᠷᠠᠭᠰᠠᠨ᠂ ᠵᠡᠭᠦᠨ ᠲᠠᠯ᠎ᠠ ᠳᠤᠨᠢ ᠶᠡᠭᠦᠵᠡᠷ ᠤᠳ ᠢ ᠡᠨᠡᠷᠢᠬᠦ ᠮᠡᠯᠮᠡᠢ ᠶᠢᠨ ᠥᠨᠴᠦᠭ ᠤᠨ ᠳᠦᠷᠢ ᠪᠠᠷ ᠠᠵᠢᠶᠠᠷᠠᠭᠰᠠᠨ᠂ ᠪᠠᠷᠠᠭᠤᠨ ᠮᠤᠲᠤᠷ ᠲᠠᠭᠠᠨ ᠬᠡᠷᠡᠭ ᠬᠦᠰᠡᠯ ᠪᠦᠬᠦᠨ ᠢ ᠰᠣᠶᠤᠷᠬᠠᠬᠤ ᠴᠢᠨᠳᠠᠮᠤᠨᠢ ᠡᠷᠳᠡᠨᠢ ᠪᠠᠷᠢᠭᠰᠠᠨ ᠪᠠ ᠵᠡᠭᠦᠨ ᠮᠤᠲᠤᠷ ᠲᠠᠭᠠᠨ ᠴᠡᠯᠮ᠎ᠠ ᠴᠢᠮᠡᠭᠲᠦ ᠰᠤᠮᠤᠨ ᠢ ᠰᠣᠯᠢᠪᠴᠢᠯᠠᠨ ᠠᠳᠬᠤᠭᠰᠠᠨ᠂ ᠪᠡᠶ᠎ᠡ ᠳᠤᠷ ᠬᠡᠷᠢᠰ ᠤᠨ ᠬᠤᠶᠠᠭ ᠳᠤᠭᠤᠯᠠᠭ᠎ᠠ ᠡᠮᠦᠰᠴᠦ᠂ ᠰᠤᠳᠤ ᠲᠣᠷᠭᠠᠨ ᠵᠠᠩᠴᠢ ᠶᠢ ᠵᠣᠭᠤᠭᠯᠠᠨ ᠂ ᠪᠠᠷᠰ ᠤᠨ ᠠᠷᠠᠰᠤ ᠪᠠᠷ ᠳᠣᠣᠷ᠎ᠠ ᠪᠡᠶ᠎ᠡ ᠪᠠᠨ ᠣᠷᠢᠶᠠᠵᠤ᠂ ᠥᠯᠮᠡᠢ ᠳᠤᠷ ᠪᠤᠯᠢᠭᠠᠷᠢ ᠶᠢᠨ ᠭᠤᠲᠤᠯ ᠢᠰᠬᠦᠯᠦᠨ᠂ ᠳᠠᠶᠢᠰᠤᠨ ᠲᠦᠢᠳᠬᠡᠷ ᠢ ᠳᠠᠷᠤᠭᠰᠠᠨ ᠭᠤᠷᠪᠠᠨ ᠬᠦᠷᠳᠦᠨ ᠢ ᠪᠡᠯᠬᠡᠭᠦᠰᠦᠨ ᠳᠡᠭᠡᠨ ᠵᠡᠭᠦᠭᠰᠡᠨ ᠪᠡᠶ᠎ᠡ ᠠᠴᠠ ᠬᠤᠪᠢᠯᠭᠠᠨ ᠡᠯᠴᠢ ᠰᠠᠯᠬᠤ ᠪᠤᠯᠠᠢ︾ ᠭᠡᠵᠤ ᠳᠠᠭ᠎ᠠ ᠶᠢᠨ ᠳᠡᠯ ᠠᠭᠤᠯᠠ ᠶᠢᠨ ᠰᠦᠷᠲᠦ ᠳᠦᠷᠬᠦ ᠶᠢ ᠢᠯᠡᠳᠬᠡᠨ᠎ᠡ᠃ ᠵᠠᠯᠭᠠᠭᠠᠳ ᠱᠠᠰᠢᠨ ᠤ ᠳᠦᠷᠢᠮ ᠭᠤᠷᠢᠮ ᠢᠶᠠᠷ ᠲᠠᠬᠢᠯᠭ᠎ᠠ ᠶᠢᠨ ᠠᠵᠢᠯ ᠤᠳ ᠶᠠᠪᠤᠭᠳᠠᠨ᠎ᠠ᠃    ᠲᠠᠬᠢᠯᠭ᠎ᠠ ᠶᠢᠨ ᠰᠤᠳᠤᠷ ᠤᠨ ᠲᠡᠭᠦᠰᠬᠡᠯ ᠤᠨ ᠬᠡᠰᠡᠭ ᠲᠤ᠄   ︽ᠳᠡᠭᠡᠳᠦᠰ ᠤᠨ ᠣᠪᠢᠳᠠᠰ ᠢ ᠰᠣᠨᠤᠰᠤᠭᠰᠠᠨ ᠦᠭᠡᠢ ᠪᠥᠭᠡᠳ   ᠮᠡᠷᠭᠡᠳ ᠤᠨ ᠰᠡᠳᠬᠢᠯ ᠤᠨ ᠨᠢᠭᠤᠴᠠ ᠶᠢ ᠦᠵᠡᠯ ᠦᠭᠡᠢ   ᠪᠦᠳᠦᠭᠦᠯᠢᠭ ᠰᠢᠯᠦᠭ ᠨᠠᠶᠢᠷᠠᠭ ᠤᠨ ᠵᠠᠶᠢᠳᠠᠭᠤ ᠦᠭᠡ ᠪᠠᠷ  ᠲᠤᠭᠤᠷᠪᠢᠭᠰᠠᠨ ᠠᠯᠵᠢᠶᠠᠯ ᠨᠢ ᠮᠢᠨᠦ ᠮᠤᠩᠬᠠᠭ ᠣᠶᠤᠨ︾ ᠭᠡᠰᠡᠨ ᠨᠢ ᠰᠤᠳᠤᠷ ᠢ ᠵᠣᠬᠢᠶᠠᠭᠴᠢ ᠰᠠᠨᠠᠭ᠎ᠠ ᠪᠠᠨ ᠢᠯᠡᠳᠬᠡᠭᠰᠡᠨ ᠤᠶᠠᠩᠭᠠᠯᠠᠯ ᠪᠣᠯᠪᠠᠤ︕      ᠮᠢᠨᠦ ᠳᠡᠭᠡᠷ᠎ᠡ ᠳᠤᠷᠠᠳᠤᠭᠰᠠᠨ ᠵᠦᠢᠯ ᠤᠳ ᠪᠣᠯ ᠵᠥᠪᠬᠡᠨ ᠰᠢᠨ᠎ᠡ ᠪᠠᠷᠭᠤᠴᠤᠳ ᠤᠨ 19 ᠳ᠋ᠤᠭᠡᠷ ᠵᠠᠭᠤᠨ ᠤ ᠳᠤᠮᠳᠠᠴᠢ ᠦᠶ᠎ᠡ ᠠᠴᠠ ᠬᠤᠶᠢᠰᠢᠬᠢ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ᠳᠦᠷᠢᠮ ᠭᠤᠷᠢᠮ ᠢᠶᠠᠷ ᠡᠨᠡᠬᠦ ᠭᠤᠷᠪᠠᠨ ᠠᠭᠤᠯᠠ ᠶᠢ ᠲᠠᠬᠢᠭᠰᠠᠨ ᠲᠤᠬᠠᠢ ᠮᠡᠭᠦᠰ ᠮᠥᠴᠢᠳ ᠣᠶᠢᠯᠠᠭᠠᠯᠲᠠ ᠪᠣᠯᠤᠨ᠎ᠠ᠃     ᠡᠨᠡ ᠭᠤᠷᠪᠠᠨ ᠠᠭᠤᠯᠠ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠵᠠᠩ ᠦᠢᠯᠡ ᠶᠢ ᠶᠡᠷᠦ ᠨᠢ ᠡᠶᠢᠮᠦᠷᠬᠦᠦ ᠳᠥᠭᠦᠮᠬᠡᠨ ᠣᠶᠢᠯᠠᠭᠠᠵᠤ ᠪᠣᠯᠬᠤ ᠦᠭᠡᠢ ᠶᠤᠮ᠃     ᠳᠠᠯᠠᠩᠭᠤᠳ ᠭᠦᠪᠡᠷᠢ ᠶᠢᠨ ︽ᠪᠣᠭᠳᠠ ᠠᠭᠤᠯᠠ ᠶᠢᠨ ᠠᠭᠤᠯᠠ ᠶᠢᠨ ᠣᠩᠭᠤ ᠳᠠᠭᠤᠳᠠᠯᠭ᠎ᠠ︾ ᠬᠡᠮᠡᠬᠦ ᠥᠭᠦᠯᠡᠯ ᠳᠤ ︽ᠰᠣᠨᠤᠰᠪᠠᠰᠤ᠂ ᠬᠥᠯᠥᠨ ᠪᠣᠶᠢᠷ ᠭᠠᠵᠠᠷ ᠣᠷᠤᠨ ᠪᠣᠯᠪᠠᠰᠤ ᠡᠷᠳᠡ ᠳᠡᠭᠡᠲᠦ ᠳᠡᠭᠡᠨ ᠬᠡᠷᠡᠮ ᠤᠨ ᠭᠠᠳᠠᠨᠠᠬᠢ ᠤᠮᠠᠷᠠᠲᠤ ᠣᠯᠠᠨ ᠤᠯᠤᠰ᠂ ᠠᠶᠢᠮᠠᠭ ᠤᠭᠰᠠᠭᠠᠲᠠᠨ ᠣᠷᠢᠳ ᠬᠤᠵᠢᠳ ᠵᠠᠯᠭᠠᠯᠳᠤᠭ᠎ᠠ ᠪᠠᠷ ᠥᠩᠭᠡᠷᠡᠭᠰᠡᠨ ᠪᠤᠶᠤ ᠪᠣᠭᠤᠨᠢ ᠬᠤᠭᠤᠴᠠᠭ᠎ᠠ ᠣᠷᠤᠰᠢᠨ ᠰᠠᠭᠤᠭᠰᠠᠨ ᠣᠷᠤᠨ ᠨᠤᠲᠤᠭ ᠪᠤᠯᠠᠢ᠃ ᠁ ᠣᠨᠴᠠᠭᠠᠶᠢᠯᠠᠨ ᠳᠥᠷᠪᠡᠨ ᠵᠦᠭ ᠨᠠᠢᠮᠠᠨ ᠵᠣᠪᠬᠢᠰ ᠲᠠᠭᠠᠨ ᠨᠡᠷ᠎ᠡ ᠠᠯᠳᠠᠷᠰᠢᠭᠰᠠᠨ ᠪᠠᠷᠭᠤ ᠶᠢᠨ ᠭᠤᠷᠪᠠᠨ ᠪᠣᠭᠳᠠ ᠠᠭᠤᠯᠠ ᠶᠢ ᠡᠯ᠎ᠡ ᠠᠶᠢᠮᠠᠭ ᠤᠭᠰᠠᠭ᠎ᠠ᠂ ᠣᠪᠤᠭ ᠲᠥᠷᠥᠯ ᠤᠨ ᠲᠡᠦᠬᠡ ᠱᠠᠰᠲᠢᠷ ᠪᠤᠶᠤ ᠪᠥᠭᠡ ᠶᠢᠨ ᠣᠩᠭᠤ ᠳᠠᠭᠤᠳᠠᠯᠭ᠎ᠠ ᠵᠡᠷᠭᠡ ᠠᠴᠠ ᠮᠥᠴᠢᠳ ᠬᠤᠷᠢᠶᠠᠩᠭᠤᠶᠢᠯᠠᠨ ᠳᠤᠷᠠᠳᠪᠠᠰᠤ᠄ ︿ᠨᠠᠷᠠᠨ ᠬᠠᠨ﹀᠂ ︿ᠳᠥᠯᠥᠨ ᠬᠠᠷ᠎ᠠ﹀᠂ ︿ᠭᠤᠷᠪᠠᠨ ᠰᠦᠮᠪᠦᠷ﹀᠂ ︿ᠡᠷᠭᠡ ᠪᠠᠭᠠᠲᠤᠷ﹀᠂ ︿ᠵᠠᠩᠵᠤᠨ ᠪᠦᠷᠭᠦᠳ﹀᠂ ︿ᠥᠨᠳᠦᠷ ᠭᠤᠷᠪᠠᠨ ᠪᠠᠭᠠᠲᠤᠷ﹀᠂ ︿ᠮᠥᠩᠭᠡ ᠲᠣᠭᠲᠠᠨᠢᠬᠤᠢ ᠣᠷᠤᠨ﹀᠂ ︿ᠬᠦᠢᠲᠡᠨ ᠬᠠᠷ᠎ᠠ﹀᠂ ︿ᠪᠠᠶᠠᠨᠮᠥ᠋ᠩᠬᠡ﹀᠂ ︿ᠬᠠᠶᠢᠷᠬᠠᠨ ᠠᠭᠤᠯᠠ﹀ ᠬᠡᠮᠡᠨ ᠬᠦᠨᠳᠦᠯᠡᠭᠳᠡᠨ ᠬᠠᠶᠢᠷᠠᠯᠠᠭᠳᠠᠵᠤ ᠢᠷᠡᠭᠰᠡᠨ ᠁︾ ᠭᠡᠵᠤ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠳᠠᠭ᠃ ᠡᠭᠦᠨ ᠠᠴᠠ ᠦᠵᠡᠪᠡᠯ ᠮᠡᠨᠡᠩ ᠤᠨ ᠪᠣᠭᠳᠠ ᠠᠭᠤᠯᠠ᠂ ᠳᠠᠭ᠎ᠠ ᠶᠢᠨ ᠳᠡᠯ ᠠᠭᠤᠯᠠ ᠨᠢ ᠡᠷᠳᠡ ᠳᠡᠭᠡᠳᠦ ᠠᠴᠠ ᠣᠩᠭᠤ ᠳᠠᠭᠤᠳᠠᠯᠭ᠎ᠠ ᠲᠠᠢ ᠲᠠᠬᠢᠯᠭᠠᠲᠤ ᠠᠭᠤᠯᠠ ᠤᠳ ᠪᠠᠶᠢᠭᠰᠠᠨ ᠢ ᠮᠡᠳᠡᠵᠦ ᠪᠣᠯᠤᠨ᠎ᠠ᠃ ᠮᠣᠭᠠᠶᠢᠲᠤ ᠶᠢᠨ ᠪᠣᠭᠳᠠ ᠠᠭᠤᠯᠠ ᠶᠢ ︽ᠮᠣᠩᠭᠤᠯ ᠤᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ︾ ᠳᠤ ︽ᠮᠠᠤ ᠥᠨᠳᠦᠷ︾ ᠬᠡᠮᠡᠨ ᠪᠢᠴᠢᠭᠰᠡᠨ ᠪᠠᠶᠢᠳᠠᠭ᠃ ᠤᠩᠰᠢᠭᠴᠢᠳ ᠮᠠᠨᠢ ᠠᠩᠬᠠᠷᠤᠯ ᠳᠠᠭᠠᠨ ᠠᠪᠬᠤ ᠪᠣᠯᠪᠠᠤ︕                                     ᠵᠣᠬᠢᠶᠠᠭᠴᠢ ᠶᠢᠨ ᠬᠠᠶ᠋ᠢᠭ᠄ ᠬᠥᠯᠥᠨ ᠪᠣᠶᠢᠷ ᠬᠤᠲᠠ ᠶᠢᠨ                                      ᠨᠢᠭᠡᠳᠦᠮᠡᠯ       ᠹᠷᠤᠨᠲ       ᠤᠨ       ᠬᠡᠯᠲᠡᠰ
  
ᠢᠷᠡᠯᠲᠡ᠄ ᠣᠤᠠᠬ᠎ᠠ ᠤᠷᠠᠯᠢᠭ ᠤᠨ ᠬᠤᠯᠪᠤᠭ᠎ᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠳᠠᠯ᠎ᠠ ᠨᠣᠳᠤᠭ ᠲᠤ ᠲᠡᠷᠢᠬᠦᠯᠡᠬᠦ ᠶᠢᠨ ᠲᠦᠯᠦᠬᠡ ᠬᠢ ᠲᠡᠮᠡᠴᠡᠯ ᠪᠣᠶᠣ ᠬᠦᠢᠳᠡᠨ ᠤ ᠳᠣᠯᠣᠯᠳᠣᠭᠠᠨ
ᠨᠤᠮᠤᠠ ᠬᠠᠠ ᠤ ᠲᠠᠶᠢᠠ
ᠴᠠᠬᠠᠷ ᠨᠠᠢᠮᠠᠨ ᠬᠤᠰᠢᠭᠤᠨ ᠤ ᠪᠠᠷᠭᠤ ︵ᠬᠤᠶᠠᠷ︶
ᠴᠠᠬᠠᠷ ᠨᠠᠢᠮᠠᠨ ᠬᠤᠰᠢᠭᠤᠨ ᠤ ᠪᠠᠷᠭᠤ ︵ᠨᠢᠭᠡ︶
ᠮᠣᠩᠭᠤᠯ ᠤᠯᠤᠰ ᠤᠨ ᠪᠠᠷᠭᠤᠴᠤᠳ ︵ᠭᠤᠷᠪᠠ︶
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号